讀 哥林多前書chit本書信
《哥林多前書》應該是使徒保羅寫hō͘該教會書信中ê一封，到底使徒保羅寫幾封書信hō͘哥林多教會，已經無法度正確知影，不過至少有四封，除了新約聖經中ê哥林多前後書之外，tī前書第五章9節提起伊bat寫phe hō͘哥林多教會ê信徒，提起「bē-tàng kah淫亂ê人來往」，chit封信顯然已經遺失了。哥林多教會內部ê問題真嚴重，因為使徒保羅bat用痛苦ê語氣寫phe hō͘ in，講：「我tī憂傷痛苦中流真chē 目屎，來寫hit 張phoe hō͘ lín，m̄是 beh hō͘ lín艱苦心，是beh hō͘ lín 知影我 gōa-ni̍ h-á 疼 lín。(全民版)」（哥林多後書二：4）koh講：「我以前 hit 張 phoe 雖然有 hō͘ lín 艱苦心，我並無後悔；taⁿ我有小khóa 後悔，因為我知影 hit 張 phoe 有 hō͘ lín 一時ê 艱苦心。(全民版)」（哥林多後書七：8）chit封bat hō͘哥林多教會信徒感覺「憂愁」ê信，kah使徒保羅bat用「流tio̍h真chē目屎」寫ê信，lóng遺失了，目前保留tī新約聖經中ê，就是只有《前書》、《後書》這兩封書信而已。

另外，mā有一種情形，就是信有kúi-nā封，m̄-koh集合起來成做《前書》、《後書》，因此，有人kā它看做各自一封。比如：哥林多前書第七章1節講：「現在來討論lín信中所提ê事。」然後開始講tio̍h有關婚姻ê問題。M̄-koh thang看tio̍h tùi第七章開始，是討論有關哥林多教會寫phe hō͘使徒保羅，問伊有關信仰ê問題ê時，使徒保羅所做ê回答。Án-ne，頭前ê六章mā可能是另外一封書信，使徒保羅先講述伊對哥林多教會內部發生問題，而當chiah-ê問題傳聞到伊hia ê時，伊聽了確實真傷心，就án-ne寫phe講伊聽tio̍h有關該教會發生各種問題了後ê感想。

除了羅馬書之外，ná親像頂面所講講ê，tùi第七章開始，記載使徒保羅寫這書信ê主要原因，就是為tio̍h beh回答該教會提出ê問題。伊寫hō͘其他教會ê書信mā是仝款，lóng是為tio̍h beh回答á是處理教會所發生ê事。

哥林多城kah哥林多ê教會
哥林多教會是使徒保羅、亞居拉kah百基拉chit對夫婦開拓起來ê。Teh寫hō͘羅馬教會信徒ê書信中，使徒保羅án-ne寫tio̍h：「請替我kā 基督耶穌ê 同工— 百基拉kah 亞居拉請安。In bat 為tio̍h 我冒性命ê 危險。M̄ -nā 我，連外邦ê 教會mā lóng tio̍h kā in 感謝。 Mā 請kā tī in tau teh 聚會ê 教會請安，請替我kā 所疼ê Ê-pai-né-toh 請安，伊是亞西亞省頭一個信基督ê 人。(全民版)」（羅馬書十六：3—5ａ）簡單ê幾句請安話語，卻提供了非常寶貴ê資料，除了hō͘讀者知影亞居拉、百基拉chit對夫婦tī福音事工上是好模範外，in mā是使徒保羅非常忠心ê福音伙伴。雖然並無清楚in到底tī甚麼時chūn bat為使徒保羅「冒性命ê危險」，m̄-koh卻ē-tàng明白in kah使徒保羅tī福音ê事工上有「生死kah共」ê密切關係。Koh講，mā tùi羅馬書chit句請安語中，對照使徒行傳第十八章19到21節，就會發現到另外一個寶貴資料：以弗所教會信徒ê聚會地點，就是tī亞居拉、百基拉ê厝裡。

亞居拉kah百基拉chit對夫婦，是tī羅馬皇帝克勞第命令所有ê猶太人離開羅馬ê時chūn，tùi意大利輾tńg來到哥林多城。Tú好，使徒保羅ê第二pái旅行傳道tī he時chūn mā來到哥林多城。Siōng有意思ê是：in夫婦kah使徒保羅lóng是以從事「製造帳棚為業」。Tī安息日，in同齊到猶太人會堂去見證福音。後來西拉kah提摩太tùi馬其頓來到哥林多，使徒保羅就用全部時間投入福音ê事工。M̄-koh因為猶太人中間有人強烈反彈，hō͘ in無法度繼續使用猶太人會堂，改到一位名叫提多‧猶士都 ê厝裡聚會，使徒保羅就是tòa tī伊ê厝裡，因伊ê厝離會堂真近。Án-ne，thang看tio̍h當時聚會ê地點真可能就是tī提多‧猶士都 ê厝裡（參考使徒行傳十八：1—17）。使徒保羅旅行傳道ê時，除了停留tī以弗所城siōng長，約有三年時間，koh來，就beh算是哥林多城了，將近有兩年ê時間（參考使徒行傳十八：11、18）。

Tī羅馬時代，哥林多是一個出名ê海灣城市，設tī希臘ê南端。Tī主前27年前已經是羅馬帝國tī亞該亞省ê行政中心。因為是非常活躍ê港灣城市，因此，外來ê商賈客旅真chē，人種複雜，當時ê人口已經相當chē，至少有五十萬人以上，包括了「自由人二十萬、奴隸四十萬」，chit種數目tī到chit-má兩千年前ê城市，ē-sái講是非常大ê城市，而且非常繁榮ê大lóng會。雖是繁榮，m̄-koh tī道德生活上卻非常墮落，當時就有「he是真哥林多化」chit種俗語，用來形容一種物品真「色情樣」，á是用chit句話來形容一個真好色、淫亂ê行為。原因是hit-ê城有真chē ê妓女，包括hit-ê城神廟中就有bē少間廟宇擁有娼妓，親像in供奉ê「阿弗洛狄特女神」（Aphrodete Kallipygos）就有「廟妓」ê編制，tú-tio̍h神明祭典ê節期，á是重大ê事故，lóng會先請廟妓跳舞酬神，m̄-koh chiah-ê廟妓mā提供性ê服務，因此，參加廟會ê活動並m̄是專心為tio̍h beh參與祭拜活動，有kóa人就是為tio̍h kah廟妓性交易。

真正問題就tī chia發生了；因為哥林多城ê淫蕩行為，mā hō͘哥林多教會受tio̍h嚴重ê影響，原因是有人將chit種行踏帶入了教會，這就是為甚麼使徒保羅tī chit-ê封信中提起講：「我確實聽tio̍h lín 中間有淫亂 ê tāchì，就是有人收留後母做 bó͘ ，hit 款ê 淫亂連教會外mā 無。(全民版)」（哥林多前書五：1）然後伊繼續講：「Lín kám m̄知不義ê 人bē-tàng 做上帝國度ê 子民？M̄ -thang 欺騙家己。無論是淫亂ê，拜偶像ê，犯姦淫ê，做男娼ê，好男色ê，做賊ê，貪心ê，好酒ê，譭謗ê，詐欺ê，lóng bē-tàng 做上帝國度ê 子民。(全民版)」（哥林多前書六：9—10）tùi chit兩段經文thang看出教會出現淫亂ê事，而且chit種非常嚴重ê道德瑕疵，連非基督徒lóng比in koh-khah好。這就是後來為甚麼使徒保羅會用koh khah嚴苛ê口氣寫phe，kā伊譴責們ê原因。可惜ê是ná封信已經無法度chhōe獲而留存落來。請注意，教會內部如果發生淫亂ê事，就真oh說明基督徒ê道德生活規範遠超過一般人，這mā就是為甚麼使徒保羅tī伊ê書信一再強調「聖潔生活」ê重要性（參考羅馬書十二：1—2，哥林多前書六：19，哥林多後書五：17，加拉太書五：13、六：15，以弗所書四：22—24，歌羅西書三：5—10，帖撒羅尼迦前書四：3—7）。

另外一點，哥林多教會內部發生分裂ê事件，mā是使徒保羅寫chit本書信主要ê內容之一。Chit本書信tùi第一章到第四章，lóng是teh處理該教會因分裂帶來糾紛ê問題。使徒保羅強調：耶穌ê十字架chiah是基督教信仰ê中心，其他lóng m̄重要。因此，不應該kā某一個人當做信仰ê權威，he是無意義ê。伊kā哥林多教會信徒講，所有thang幫助人信仰成長ê，無論人á是事，lóng是為tio̍h beh見證上帝tī耶穌基督內面救贖ê恩典。伊用「kah上帝同工」來形容一個福音工作者ê角色。

幾個問題到taⁿ iáu-koh存在
Tùi第十二到十四章，thang看出早期教會已經發生大家teh爭論什麼人比較有「屬靈ê恩賜」chit種問題，而且是將「屬靈ê恩賜」放teh講方言chit種現象。使徒保羅聽tio̍h了後非常難過，伊Tī chit段經文中tńg來覆hō͘該教會特別強調，大家lóng是建構tī基督ê肢體上，無講什麼人比較有「屬靈ê恩賜」，什麼人就比較重要。Mā m̄是什麼人比較會講方言，什麼人就比較有聖神ê力量，chit種認bat並無正確。伊án-ne講：「我若準會曉講各種人ê 話語，甚至天使ê 音語，若無疼心，我講話to̍h bē 輸teh 摃大鑼，á 是teh phah 鐃鈸。(全民版)」（十三：1）然後，伊tī第十三章ê結尾講：「Taⁿ 信心、ǹg 望、疼心三項會永遠存在，其中siōng 重要ê 是疼心。(全民版)」（十三：13）chit節經文已經真清楚說明一件事：thang hō͘一個信仰團契凝聚做伙ê，只有疼。並m̄是某一個人ê特異chiah ē-tàng，á是有什麼能力。

Tùi chia koh再延伸出來ê，iáu有愛筵ê問題。信仰團契基本上是用疼凝聚做伙，因此，每一個人就不應該以家己ê事為重，卻是會知影關懷別人ê欠缺kah需要。其實，mā thang án-ne講，愛筵就是kā耶穌kah門徒守最後Pôaⁿ過節暗頓改變過來ê，因為Pôaⁿ過節暗頓，是teh記念以色列人民因為上帝ê帶領離開埃及為奴之地。使徒保羅用耶穌kah門徒守這Pôaⁿ過節暗頓，改變成做聖餐，就是teh表明大家tī耶穌裡，感謝上帝透過耶穌拯救ê恩典。而這恩典是beh kah所有ê人同齊分享ê，m̄是用來只顧家己食飽ê。
伊tī chit-ê本書信中mā討論到婚姻ê問題。婚姻ê問題並m̄是今天才有，早tī摩西時代就有訂出離婚ê條例，而耶穌真清楚表明，摩西寫落來離婚ê條例，是因為以色列人民ê「心腸siuⁿ硬」（參考馬可福音十：5）。使徒保羅用一章ê篇幅討論關於婚姻ê問題。

Tùi頂面所講chiah-ê問題來看今á日ê基督教會，並無因為基督教會已建立接近兩千年而解決，顛倒ê，tī今á日ê基督教會中chiah-ê問題iáu-koh存在，包括講方言ê事，mā包括了聖餐所代表ê意義kah規矩，以及信徒是m̄是thang離婚ê問題等等。

寫chit本書信ê日期
Tùi哥林多前書第十六章8節ē-tàng看出，使徒保羅寫chit封書信ê時間，大約是tī主後55年。Chit節經文記載使徒保羅對哥林多教會信徒講：「我iáu-beh留tī以弗所，一直到五旬節。」哥林多前書ê chit本書信大概就是tī chit-ê時chūn寫ê。Tī這chìn前，伊應該寫過比chit封koh-khah早ê書信hō͘該教會，親像第五章9節有chit種話講：「以前我寄 hit 張 phoe hō͘ lín，有 kā lín 警戒m̄ -thang kah 淫亂ê 人來往。(全民版)」可見chit封「以前hō͘ lín ê信」已經遺失了。因此，chit封書信就成做「前書」。Mā是伊完成第二pái旅行傳道，當第三pái旅行傳道ê時，tī以弗所停留三年ê時chūn寫ê。這幫助咱明白伊寫哥林多前書ê時間，比siōng早出現ê馬可福音koh khah早大約十年ê時間。如果kā chit本書信第十一章23到26節提起關於耶穌ê聖餐，kah馬可福音第十四章22到25節記載關於最後暗頓ê記事，有可能咱thang án-ne講：早期教會對tī聖餐ê瞭解，已經受tio̍h使徒保羅ê影響。

Chit本書信ê大綱
1．第一章1到9節，請安ê話。
2．第一章10到第四章21節，有關哥林多教會內部分裂ê問題，包括結黨分派、信仰認知上ê têng-tâⁿ。
3．第五到六章，基督徒ê道德生活規範，特別是關於淫亂ê事件。
4．第七章，有關婚姻ê事。
5．第八章1節到十一章1節，基督徒社會生活應該有ê基本原則、態度。
6．第十一章2到34節，婦女tī公眾場合參與敬拜ê事宜，以及守耶穌基督聖餐ê問題。
7．第十二到十四章，關於聖神恩賜ê問題。
8．第十五章，有關koh活ê信仰問題。

（本冊經文採用opensource/copyleft ê《全民台語聖經》，tī chia特別致謝。）