讀 約翰一書chit本書信

甚麼人是作者、寫hō͘甚麼人
Tī認bat聖經ê每一卷經冊chìn前，若是先知影作者ê身分，就會知影伊寫作ê社會曉背景，然後tùi chia koh再去瞭解當時可能影響作者寫作ê各種因素，án-ne會koh-khah容易明白作者寫作ê目的。可惜ê是：kui本聖經六十六卷中，thang知影真實作者ê經冊非常少，往往都無明確具名。縱然用使徒保羅ê名所寫ê書信，mā常被聖經學者質疑地並m̄是使徒保羅所寫。Mā因為án-ne，往往困擾tio̍h讀者tī chit方面ê求知。
約翰一書ê作者不明就是一個典型ê例。有bē少學者認為chit本書信ê作者是耶穌基督ê門徒約翰，因為in認為tio̍h án-ne書信中有真chē觀點、講法，á是用詞等，lóng kah約翰福音ê內容相符。親像：

約翰一書/約翰福音 對照
第一章1節「起初就存在tio̍h性命之道」/第一章1節「宇宙被造以前，道已經存在」(全民版)

第二章7節「親愛ê眾朋友，我寫hō͘ lín ê，m̄是新ê命令，卻是舊ê命令，是lín一開始就領受ê。這舊ê命令是lín經聽過了ê信息。/第十三章34到35節 「我hō͘ lín一條新命令；tio̍h彼此相疼。我怎樣疼lín，lín mā ài怎樣彼此相疼。如果lín彼此相疼，世人就之道lín是我ê門徒。」(全民版)

第四章9節「上帝差祂獨生 ê Kiáⁿ 來到世間，hō͘ 咱 tùi 祂來得tio̍h 活命。上帝用án-ne 對咱顯明祂ê 疼tī 咱中間。(全民版)」/第三章16節「基督為咱犧牲性命，咱就tùi án-ne 知影甚麼是疼心。咱mā 應該為tio̍h 兄弟á 是姊妹犧牲性命。」(全民版)

第五章12節「有kah 上帝ê Kiáⁿ 結聯ê 人就有chit-ê 活命；無kah 上帝ê Kiáⁿ 結聯ê 人就無chit-ê 活命。(全民版)」/第三章36節「信kiáⁿ兒ê，有永恆ê性命；m̄信kiáⁿ兒ê，bē有真性命，而且上帝ê懲罰永遠bē離開伊。」

類似chit種句話真chē。另外，約翰一書ê作者mā歡喜用「烏暗kah光明」、「生kah死」、「疼kah恨」等等chit種相對ê比較，而tī約翰福音內底mā有chit種特色。問題是約翰福音是m̄是就是門徒約翰所寫？mā iáu未明確ê定論，只是一般同意chit種講法罷了。

Chit本書信是寫hō͘當時ê教會ê一封公開信，因為án-ne，並無指明收phoe ê對象，而且作者是以「長輩」ê身分寫此書信。Tùi án-ne書信中充滿tio̍h鼓勵、教導ê語調。

寫chit本書信ê主要目的kah內容
Tùi第一章4節所寫ê：「阮寫 chiah-ê tāi-chì hō͘ lín，是 beh hō͘ 咱大家充滿喜樂。(全民版)」tī第五章13節án-ne講：「我寫 chiah-ê tāi-chì，是 beh hō͘ lín知影，信上帝ê Kiáⁿ ê 人有永遠ê 活命。(全民版)」chit兩節經文thang講是此封書信ê主要目的。Tùi chia mā thang看tio̍h早期教會ê問題是：教會內部有紛爭，特別是當假教師tī教會內部出現ê時，就會引發糾紛，進一步koh造成信徒互相猜忌、不滿、怨恨。Mā因為án-ne，hō͘真chē信徒感覺非常艱苦心，心靈不安。Chiah-ê假教師ê主要特色，就是用真chē堂皇ê言詞講教，卻無實踐家己所傳講ê，約翰一書ê作者真清楚指出，chiah-ê就是「對敵基督者」（參考二：18、22），in誘惑人進入虛榮、慾望，棄sak上帝教示ê生活環境中，kah魔鬼無兩樣。In siōng大ê特徵是kan-taⁿ會講，bē做。因為in teh講「疼」ê時chūn，卻對身邊兄弟姊妹ê需要無動tī衷。

Chiah-ê假教師tī信徒中間散播真chē無正確ê觀念，其中影響當時ê信徒siōng大ê，就是in講：耶穌基督只是一般人，只不過伊比較正直、聰明、有智慧、有疼心而已。Iáu講耶穌是tī受洗了後，chiah有聖神降臨在伊身上，伊開始傳上帝國度ê信息。Tī伊受掠受審ê時chūn，上帝ê靈就離開伊。In chit種講法已經否認耶穌基督是上帝「受難ê僕人」，mā有人講耶穌並無真正死tī十字架上。

Chiah-ê言論、思想影響當時信徒非常大，因為chit種看法會hō͘人認為：耶穌基督並無真正降生tī人間，人所看見ê耶穌基督，只不過是一個「幻影」而已！

盛行tī第一到二世紀ê所謂「諾斯底主義」就是主張耶穌是幻影，並未真正存在世上。In講究一切lóng tio̍h攤tī「知識」落來檢驗，有點á類似tī第二十世紀初期，真chē知識份子強調kā一切lóng khǹg入去「實驗室」裡驗證，beh ē-tàng證明chiah是真實。因為án-ne，作者tī chit本書信中極力駁斥chit種言論思想，一再強調：耶穌就是基督，伊以十字架ê死kah koh活來顯明上帝拯救ê疼。凡是m̄是認耶穌是基督ê人，就是對敵基督ê人（參考四：1—3）。Á「凡信耶穌是基督ê lóng是上帝ê kiáⁿ兒」（參考五：1）。只要相信耶穌是基督，是上帝ê kiáⁿ兒，是真正神，chit種人就會得tio̍h「永恆ê性命」（參考五：13、20）。

Koh講，作者寫此書信ê主要目的，beh hō͘大家知影：疼，是信仰kah行動ê根基。上帝就是疼（參考四：7、16），mā為tio̍h beh表明祂對人類ê疼，上帝chiah會差遣祂ê獨生kiáⁿ耶穌基督來到世上，hō͘人thang透過耶穌基督體會上帝ê疼，並且學習去疼別人（參考四：8—10）。作者強調：「疼」， tio̍h先tùi家己ê兄弟姊妹開始（參考四：19—21），意思就是先tùi家己身邊做起。若是無實踐疼，講koh-khah chē mā無用。

除了提起「疼」之外，作者另外強調上帝ê幾個特性：
一是上帝是光（參考一：5）。有光，就bē有烏暗。只要人藉tio̍h耶穌基督，就ē-tàng kah上帝結合，性命就bē koh再陷tī烏暗中（參考一：7）。

二是上帝乃是性命ê源頭，tī祂ê疼內面，人會得tio̍h永恆ê性命（參考一：1）。上帝就是以耶穌基督向人表明：賞賜永恆ê性命hō͘人（參考四：9）。

三、上帝是信實公義ê上帝（參考一：9），凡是承認家己ê罪，慈愛ê上帝必定會赦免咱。因為上帝是信實、公義ê上帝，祂希望所有屬tī祂ê人lóng ē-tàng過顯明公義ê生活（參考三：7）。

四、上帝是一個無所不知ê上帝（參考三：20），祂深深知影咱ê心思意念。

會出現chiah-ê上帝屬性ê論點，lóng是為tio̍h回應當時社會所瀰漫ê「放縱」生活ê型態，以及過度講究「苦修」ê避世態度，作者希望大家明白：如果無kā信仰落實在生活中，確實活出信仰ê內涵，就m̄是屬tī上帝ê kiáⁿ兒。

Thang分做下列幾個段落
一、序言；第一章1到4節。
二、光明kah烏暗之間；第一章5到第二章29節。
三、上帝就是疼；第三到四章。
四、tī耶穌基督內面有永恆ê性命；第五章。