認bat 列王記chit本經冊

列王記chit本經冊原本並未分做現在ê「上」、「下」，是因為有一本稱做「七十人譯本」ê希臘文聖經，kā它kah撒母耳記同齊編列成王國史第一卷、第二卷、第三卷、第四卷。列王記就是屬tī第三kah第四卷，mā就是目前chit種「上」kah「下」兩本，後來ê拉丁文譯本mā跟tòe分做「上」kah「下」，就án-ne延續到taⁿ。Mā有ê聖經學者比較歡喜kā列王記分做三個段落看：a.列王記上第一章到第十一章，這是以色列王國iáu未分裂ê時代。B.列王記上第十二章到列王記下第十七章，這是分裂後ê南國以色列kah北國以色列時代。C.列王記下第十八章到第廿五章，北國以色列滅亡後，南國猶大ê景況。因為án-ne，有人認為若是分做上、中、下三卷koh-khah貼切。不過chit種觀點並無被接受，只有ē-tàng當做分段閱讀ê一種方式。

作者kah寫作ê日期
Ná親像聖經其它經卷仝款，大多數作者ê身分lóng無清楚，列王記mā是án-ne，時到今á日聖經學者iáu是無清楚作者是甚麼人。雖然有ê學者認為作者是先知耶利米，因為伊當時是出入宮廷頻率真高ê先知，因為án-ne， ē-tàng tī列王記內面看tio̍h kah耶利米書仝款ê內容，親像列王記下第廿四章18節到廿五章30節，差不多就kah耶利米書第五十二章1到34節仝款。M̄-koh，chit種觀點mā被懷疑，原因是列王記下第廿四章講約雅斤王是hō͘掠到巴比倫去，m̄-koh先知耶利米則被帶去埃及（參考耶利米書四十三：6）。因為án-ne，作者比較有可能是kah先知耶利米同時代ê先知，伊看tio̍h當時社會ê景況，心中有真chē憂慮，而寫落來chit本史記。

Chit位先知引用了bē少撒馬利亞kah耶路撒冷官方（á是王室）檔案ê資料，親像列王記上第十一章41節提起ê「所羅門史」、列王記上第十四章19節ê「以色列列王史」kah第29節ê「猶大列王史」等。不過mā有聖經學者持無仝ê看法，in認為頂面所講ê「所羅門史」、「以色列列王史」、「猶大列王史」等是m̄是就是官方史料，iáu需要考證，原因是在列王記上第十六章20節講：「心利其他ê tāi-chì kah 伊所行背叛ê tāi chì，kám無記tī以色列chiah-ê王ê記錄？(全民版)」mā可能咱會講心利只有當短短「七工」ê王而已，伊ê惡行當然thang記錄tī官方史料上，chit種講法mā同時thang用在列王記下第十五章15節有關「沙龍」ê事蹟，因為伊在位mā只有短短一個月而已。

不過咱mā thang án-ne想：就是每一個時代lóng有人會記錄當代王朝ê各項事蹟，chiah-ê事蹟有真chē lóng是類似公開ê年鑑，特別是眾先知siōng歡喜寫chit種年鑑，並趁機會提出信仰上ê觀點，列王記就是tī chit種情況下寫出來ê作品。

甚麼時chūn寫chit本冊ê？這mā是一個iáu未確定ê問題。原因是chit本經冊最後提起約雅斤受掠後ê「第三十七年十二月二十七日」，依照chit-ê年代，應該是tī主前562 á是561年之間。M̄-koh，，只提起約雅斤被tháu放，而且kah巴比倫王同桌進餐（列王記下廿五：29），都無提起約雅斤tùi巴比倫被釋khǹg tńg去國ê記事，因為án-ne，寫作日期應bē tī主前536年了後。

Chit本經冊ê主要信息
如果kā此本經冊單純當做「史冊」看，he是真冤枉ê，因為聖經ê作者m̄-nā是單純teh記載王國史料á是社會檔案而已。聖經ê作者寫冊，有一個共同ê目的，是beh hō͘後代kiáⁿ孫，學習認bat上帝tī in祖先行過ê路上，所hō͘ in ê一切恩典，以及上帝kah祖先之間互動ê關係。因為án-ne，編撰此本經冊ê時，年代ê順序m̄是chit本經冊siōng主要ê考量，卻是kā重點khǹg tī kah上帝之間約ê關係基礎上。因為án-ne，以色列人民是m̄是遵行祖先kah上帝立約ê教示，就成做此本經冊tī編輯上ê重點。作者想beh表達一個基本觀念：無論是hit位國王，伊tī經濟、政治、社會ê繁榮上有jōa-chē貢獻，作者考量ê重點lóng是chit位國王怎樣帶領人民敬拜上帝，伊根據chit點來衡量一個國王ê好á無，mā tùi chit點teh評定一個國家、民族ê興衰。

以北國以色列為例，如果beh tùi政治、軍事考量一個國王ê成就，則暗利國王對北國以色列，ē-sái講是貢獻匪淺，伊定lóng撒馬利亞（列王記上十六：23－24），伊mā是帶領北國以色列征服摩押人ê優秀君王，甚至tī伊ê後代beh描述王朝ê輝煌時代，lóng會以「暗利王朝」來做指標。M̄-koh，，伊卻是帶領人民拜偶像ê君王，因為án-ne，在列王記ê作者筆下之評語是：「暗利行上主看做pháiⁿ ê tāi-chì，比伊以前所有ê 王koh khah pháiⁿ(全民版)。」（列王記上十六：25）。

Koh再以耶羅波安二世為例，伊mā是對北國以色列非常有貢獻ê君王，tī伊統治長到四十一年之久ê期間內，「收復了所有屬tī以色列ê領土，tùi北方ê哈馬隘口直到南方ê死海。」mā收復了「大馬士革kah哈馬，重歸以色列版圖」（參考列王記下十四：25、28），tī伊ê時代，ē-sái講是北國以色列達到顛峰ê時代，m̄-koh，，作者hō͘伊ê評語是：「伊行上主看做pháiⁿ ê tāi-chì，無離開尼八 ê kiáⁿ 耶羅波安 hō͘ 以色列犯罪 ê(全民版)」（列王記下十四：24）

Tùi列王記thang看tio̍h作者就是用chit種句話──伊做上主看做邪惡ê事──形容一個君王是m̄是有依照上帝ê教示帶領人民。Chit-ê教示是對上帝忠心，禁止以色列人民敬拜偶像。因為án-ne，如果有一個國王帶領以色列人民剷除境內ê偶像神明、祭壇，帶領人民敬拜上帝，chit-ê王就會hō͘評定tio̍h是上帝所歡喜ê王，因為伊行上帝看做對ê事。親像猶大希西家就是一個例，tī伊統治猶大王國廿九年ê時間，列王記ê作者寫落來chit種評語：

「伊行上主所看做好 ê tāi-chì，照伊ê 祖先大衛所行ê 一切。伊廢除山頭壇，毀壞柱像，剉亞舍拉，phah 碎摩西所造ê 銅蛇，因為到hit 時以色列人對它燒香，kā 它叫做Ne-hu-si-tàn1。伊óa 靠上主— 以色列ê 上帝，tī 伊以後ê 猶大列王中無一個會比得伊，伊以前mā 無。因為伊結聯tī 上主，tòe 祂無離開，執守上主所命令摩西ê 誡命。上主kah 伊同在，伊無論去tó 位，全部lóng 興通。伊背叛亞述王，無kā 伊服事。(全民版)」（列王記下十八：3─7）尤其是teh紹介猶大王約西亞ê時chūn，用ê句話koh khah特別，講：「伊行上主所看做好 ê tāi chì，照án-ne 行伊ê 祖先大衛一切ê 路，無偏左mā 無偏右。(全民版)」（列王記下廿二：2）伊並且帶領全國人民「一心一意遵守律法誡命」，koh khah重要ê，是伊重新舉辦已經真久無慶祝ê Pôaⁿ過節，而且成做國家祭典（參考列王記下廿三：21─23）。

Chit本經冊ê特色
Tùi先知以利亞到先知以利沙，就thang看出作者對先知角色kah使命ê看重，先知ê使命就是傳達上帝ê信息，因為án-ne，當以色列人民偏離上帝ê教示ê時，上帝就會差遣先知去警告in。M̄-koh，，好ê君王會聽從先知ê話語，只有惡劣ê君王拒絕聽從，因為án-ne，拒絕上帝ê話語，常會為家己ê國家、民族帶來災難。列王記作者提供真chē先知ê記事，雖然kah舊約聖經中ê先知文獻無仝，m̄-koh基本精神是一致地ê。表面上看起來，列王記是teh記載以色列民族ê「諸王歷史」，其實，貫穿tī chiah-ê史料中ê，則以先知運動為主軸，kā kui個南北王國歷史hō͘串連起來。先知阿摩司時代ê北國以色列耶羅波安二世時代，雖然有真繁榮ê經濟、堅強ê軍事武力，m̄-koh，阿摩司卻傳出上帝chit種話：「你看，日子teh beh 到，我 beh hō͘ 飢荒臨到 tī chit 所在，飢荒m̄ 是因為無餅，嘴乾m̄ 是為tio̍h 無水，就是因為無thang 聽上主ê話。In 會四界去，tùi chit-ê 海到hit-ê海，.tùi 北到東， 走來走去， 走chhōe上主ê 話，mā chhōe 無。當hit 日，súi ê 在室女kah 少年êcha-po͘ 人會因為嘴乾來暈去。Hiah-ê kí 撒馬利亞ê 罪來chiù-chōa，koh kí 但ê 活ê 上帝來chiù-chōa，kohkí 別是巴ê 活路來chiù-chōa ê，in 一定會跋倒，永遠bē koh 起來。」(全民版)」（阿摩司書八：11─14）

Chit段話ē-sái講是先知眼中ê一個社會、民族、國家ê存在基礎。列王記就是以是m̄是遵行「上帝ê話」作歷史評價。Mā thang án-ne講，列王記作者是tùi chit-ê角度下筆，記錄tī以色列南kah北兩國君王治理之下，hō͘ in中肯ê評鑑。

因為án-ne，閱讀此卷經冊，m̄-thang單純tùi政治ê角度看，卻是kā它當做一卷信仰反省ê經冊來讀，án-ne會koh khah了解作者ê用心。作者是tùi歷史ê經歷作例，teh述說一個國家ê君王若是會失去對上帝真實信仰ê基礎，以上帝話語ê教導來帶領人民，治理國家大政，chit種君王kah人民就會敗壞，而chit-ê信仰ê基礎一定tio̍h tńg來到上帝ê話裡，chit-ê論點mā是申命記派作者所強調ê（參考申命記十七：18—19）。

Chit本經冊ê主要大綱
1.第一章1節到第二章12節：大衛王朝結束。
2.第二章13節到第十一章43節：所羅門王登基。
A.第五章到第七章：所羅門王建造聖殿kah王宮。
B.第八章：迎接約櫃入聖殿，奉獻聖殿，並kah上帝立約。
C.第九章到第十章：所羅門王ê豐功偉業。
D.第十一章：所羅門王棄sak上帝，以及王國ê分裂。
3.第十二章1節到第廿二章：王國分裂ê開始，kah先知運動ê興起。
A.上卷第十二章1節到十四章20節：北方支族ê分離。
B.上卷第十四章21節到第十六章34節：猶大kah以色列諸王。
C.上卷第十七章到第廿一章：先知以利亞ê工作。
D.上卷第廿二章：先知米該雅ê工作。