認bat 彼得前書chit本書信

Chit本書信ê作者
彼得前書kah彼得後書，kah雅各書、約翰一、二、三冊、猶大書等這七本書信，chiah-ê使徒ê書信通常lóng被稱做「教會牧函」，意思就是chiah-ê書信是beh公開hō͘所有教會ê信徒閱讀ê。親像tī彼得前書第一章1節真清楚講寫chit本書信ê對象，是為tio̍h hiah-ê「散居tī本都、加拉太、加帕多家、亞細亞、庇推尼各地ê眾信徒」，而in中間有猶太人，m̄-koh可能koh-khah chē是外邦人（參考彼得前書二：10）。

而雅各書則tī第一章1節講：「我— 雅各，是上帝kah 主耶穌基督ê 奴僕，beh kā 所有四散tī ta̍k 所在ê上帝ê 子民請安。(全民版)」猶大書ê踏話頭則：「我是耶穌基督ê 奴僕，雅各ê 兄弟，猶大。我寫 phoe 寄 hō͘ hiah-ê 受選召，得tio̍h 天父上帝ê 疼，koh 受耶穌基督保守ê 人。(全民版)」（猶大書第1節）

彼得後書第一章1節講：「我— 西門彼得，是耶穌基督ê 使徒kah奴僕，寫chit張phoe寄hō͘ hiah-êóa 靠咱ê 上帝kah 救主耶穌基督ê 義，kah 阮做伙分享仝款寶貝信仰ê 人。(全民版)」

約翰一書則只用「Lín」這代名詞，m̄-koh真清楚ê，這「Lín」指ê就是共同信仰ê「團契」（參考約翰一書一：1—3）。Tī約翰二書1節清楚指出收phoe ê對象是「蒙揀選ê夫人，mā hō͘你ê kiáⁿ兒」。約翰三書收phoe ê對象雖然是「該iáu」，m̄-koh伊是一位教會領袖，書信內所談ê是教會ê事務。

Tùi頂面所講chiah-ê句話lóng thang看出chiah-ê書信並無特定地區ê對象，卻是針對所有因為蒙揀選而信耶穌基督ê信徒。

Mā是tùi彼得前書第一章1節：「我— 彼得，是耶穌基督ê 使徒，寫chit 張 phoe 寄 hō͘ 四散避難，tī Pongto͘、加拉太、Ka-pa-to-kiah、亞西亞 kahPí-chhui-nî teh khiā 起ê 上帝選民。(全民版)」Tùi chit節知影作者是使徒彼得。另外koh再tùi第五章1節清楚提起作者就是「見證基督受苦ê人」。使徒彼得就是親眼看見耶穌基督被釘十字架ê門徒之一。Koh講，tī第五章12節mā真清楚講，伊寫chit本書信是經由「西拉」ê幫助之下寫做ê。因為án-ne，真可能是透過使徒彼得ê口述，然後由西拉執筆，chit種「代冊」情形mā發生tī使徒保羅ê身上（參考羅馬書十六：22，帖撒羅尼迦前書一：1，帖撒羅尼迦後書一：1）。以上chiah-ê記事lóng清楚說明chit本書信ê作者就是使徒彼得。

M̄-koh，chit種看法mā有持反對意見者，認為根據彼得前書第四章16節ê記載，當時迫害已經是來自羅馬帝國官方ê手，而使徒彼得所受tio̍h ê迫害應該是來自猶太宗教當局，á是外邦人ê團體，何況「基督徒」chit-ê名稱ê出現是tī福音傳達到外邦地區了後（參考使徒行傳十一：26）。因為án-ne，彼得前書記載相關ê迫害事件，lóng是屬tī羅馬帝國政府確定ài beh進行迫害基督徒ê政策了後。Koh khah重要ê，in認為彼得無jōa可能寫出chiah-ni̍h美妙ê詞藻，而西拉kah使徒保羅lóng是受過高等希臘教育ê高階知識份子，chiah有辦法寫出chiah-ni̍h優美ê書信。

因為án-ne，另有一種講法，認為書寫此書信ê作者真可能就是西拉，m̄-koh伊用了使徒彼得ê名字寫ê。因為西拉kah使徒保羅仝款lóng是屬tī羅馬公民，因為án-ne，談起政治ê事務lóng會比起其他使徒koh-khah敏感（參考彼得前書二：13—14），伊除了強調koh尊重每一個人，敬畏上帝之外，mā tio̍h敬畏君王（參考二：17）。

收phoe者、讀者
使徒彼得寫chit本書信ê主要對象，就是hō͘ hiah-ê tī避難中ê信徒閱讀ê。Tī第一章1節提起是寫hō͘「散居tī本都、加拉太、加帕多家、亞細亞、庇推尼各地ê眾信徒」讀ê，chiah-ê地區就是現今ê土耳其境內。M̄-koh並無明確資料顯示使徒彼得bat tī chiah-ê地區傳過福音。這就產生了使徒彼得怎樣kah chiah-ê地區ê信徒有聯繫？特別是tī第五章13節講tio̍h chit本書信可能是tī「巴比倫教會」寫ê，ē-sái講是這mā無夠額ê資料證實使徒彼得bat tī chiah-ê地方khiā起過。Án-ne，使徒彼得寫chit封書信ê用意何在？不過，thang tùi使徒保羅並無去過羅馬傳福音，ē-sái講是伊mā寫書信hō͘羅馬教會ê信徒，to̍h是《羅馬書》，tùi chit種例看tio̍h早期教會ê使徒寫書信，收phoe ê對象並無一定就是家己所開拓起來ê教會，有ê是為tio̍h處理教會發生ê問題而寫書信，ná親像猶大寫phoe ê對象是「該iáu」，談ê就是有關教會領袖ê問題。

不過，mā thang由第一章1節看tio̍h hit-ê些逃難ê基督徒，是逃到外邦去避難，thang想像會tio̍h in中間必定是外邦人比較多，koh加上作者tī第五章12節提起伊siōng忠實ê同工西拉。如果參考使徒行傳第十五章40到第十八章5節，就ē-tàng知影西拉也bat kah使徒保羅同工過（另外thang參考哥林多前後書一：19，帖撒羅尼迦前書一：1，帖撒羅尼迦後書一：1），án-ne，有可能án-ne thang理解：即使使徒彼得無Tī頂面所講五個地區傳福音，mā會因為西拉ê敘述，hō͘伊聽tio̍h並且明白到各地教會所受ê迫害情形。

Mā有可能其中有kóa是出自西拉ê意見，希望ē-tàng藉tio̍h使徒彼得具名寫phoe鼓勵chiah-ê tī患難中ê信徒，hō͘ in ē-tàng堅持已經建立起來ê信仰。因為使徒彼得tī早期ê教會中有一定ê份量，特別伊是耶穌基督十二個門徒中被看做是siōng核心ê一位，尤其是當時耶路撒冷教會是所有基督教會中被看做是領導中心ê教會，使徒彼得ê發言有非常ê力量（參考使徒行傳十五：6—11），chit點是無庸置疑ê。

Chit本書信寫作ê年代
因為第一章ê起頭就提起有迫害ê事件發生，早期教會發生基督徒受迫害ê事，tùi耶穌基督koh活事件被傳開以來，chit種消息就一直無停接踵而來，事(tāi)先是tùi猶太教開始，然後續接而來ê是羅馬政府kā基督徒看做kah叛亂團體有關，致使基督徒受迫害ê情況koh khah嚴重。Á tī猶太人迫害ê階段，並bē致使kā基督徒用殘酷ê「火」刑，á是以犯姦作科為藉口（參考四：12—16）kā它迫害，這應該是來自羅馬政府ê殘酷手段。Á羅馬政府迫害早期教會ê統治者有：

一、尼祿皇帝（Nero），伊ê時代是tī主後54到68年。
二、多米田皇帝（Domitian），伊ê時代是tī主後81年到96年代。
三、伊雅奴皇帝（Trajan），伊ê統治時代是主後98年到117年。

Thang án-ne瞭解：如果使徒彼得是活teh ê時chūn寫chit本書信，hit定bē是tī多米田kah伊雅奴皇帝ê時代，比較有可能是tī尼祿ê時代。因為án-ne，咱thang講chit本書信大約是tī主後60年代左右寫ê。

寫chit本書信ê目的
因為信是寫hō͘受tio̍h迫害ê信徒，主要是teh鼓勵當時ê眾信徒ài有堅定ê信心，並且tio̍h tī生活上kah未信ê人有所無仝，chiah bē致使被迫害者以「凶刣，作賊，犯刑案，á是好管閒事」作為藉口來羅織罪名而kā它迫害（參考彼得前書四：15）。換句話講，做一個基督徒一定tio̍h有koh khah頂真ê生活規範，好hō͘家己kah異教徒teh生活態度上有明顯ê區隔，bē-tàng ná親像「生活tī淫亂、放蕩、酒狂、宴樂、狂歡、狂飲，kah thang憎惡ê偶像崇拜中」（參考四：3），而應該過「有節制」ê新生活，bē撒謊，偽善，嫉妒，á是講人pháiⁿ話等（參考二：1、四：4），hō͘家己tī眾人面前表現出聖潔ê樣式（參考二：5），án-ne ē-tàng顯明受迫害並m̄是因為tī社會道德、倫理生活上有問題，卻是確實在信仰立場上受tio̍h ê侮辱，因為所有ê人lóng一定tio̍h向上帝交帳（參考四：5）。作者強調「應該不斷來以好行為來表示完全信賴Hit位頭尾信實ê創造主」（參考五：19），這是基督徒信仰ê社會責任。

Thang分做下列幾個段落
一、序言，第一章1到2節。
二、基督徒ê ǹg望tī耶穌基督，第一章3到12節。
三、án怎過聖潔ê生活，第一章13到二章10節。
四、基督徒ê性命觀，第二章11到25節。
五、夫妻之間ê關係，第三章1到7節。
六、受苦難中應該有ê生活態度，第三章8到四章19節。
七、最後ê勸勉，第五章1到11節。
六、最後ê請安，第五章12到14節。