認bat 撒母耳記chit本經冊
撒母耳記，原本只有一本，kah列王記同被以色列人看做是「列國誌」（Book of Kingdoms）。因為這兩大經冊lóng是記載以色列人民tùi建立君王制度到國家滅亡ê kui個經過。後來有一本叫《七十人譯本》ê希臘文聖經，kā它分做四卷，前二卷是撒母耳記，後二卷是列王記。Tī第四世紀ê時chūn，《拉丁文譯本》kā它稱做「列王四卷」，直到第十六世紀ê時chūn，chiah kā它分開成撒母耳記上、下兩卷，kah列王記上、下兩卷。

有人歡喜ka7chit本冊當做「史冊」看待，因為它講述ê年代tùi主前1105年撒母耳出世（參考撒母耳記上一：20），到主前970年大衛王朝ê結束（參考列王記上二：12）。Tī這久長ê一百多年期間，對以色列人民kah非利士人，以及迦南人之間互動ê關係，有非常詳細ê描述。因為án-ne認為kā撒母耳記列入「史冊」來看，會比較貼切。因為kui個舊約歷史，就是tùi創世記開始，到列王記記載以色列人被掠到巴比倫做奴隸為止。Tùi chit-ê觀點來看，撒母耳記kah約書亞記、士師記、列王記等，lóng是屬tī「史冊」ê一部分。

不過，mā有學者歡喜kā chit本經冊列入「前先知書」ê一部分，因為tī chit本經冊中，提供了幾位先知ê事蹟，主要ê有先知撒母耳、the̍h單，in是屬tī亡國chìn前ê先知。Mā因chit-ê緣故，有學者kā撒母耳記列tī「前先知書」之列。原因除了記載重要ê先知運動之信息外，另有一個重要ê因素，就是chit本經冊主要是以先知ê觀點teh看歷史事件。

撒母耳kah以色列民族
撒母耳記siōng重要ê所在，就是hō͘讀者thang看tio̍h以色列民族tùi由先知治理，轉移到君王制度ê建立。雖然先知撒母耳是kā治理以色列民族ê權柄轉交hō͘了掃羅，並且後來mā膏立了大衛取代掃羅ê王位。表面上看起來，君王ê權柄比伊iáu重大，m̄-koh tùi伊thang罷黜（thut）掃羅，膏立大衛取代掃羅為王ê事件來看，就ē-tàng看出當時ê先知tī以色列社會中iáu-koh享受極高ê地位。Mā因為án-ne，後來先知tī以色列社會中，一直是扮演tio̍h舉足輕重ê角色，chit點thang tùi先知the̍h單當面指責大衛王犯罪ê記事（參考撒母耳記下十二：7—12）；米該雅對亞哈王ê詛咒（參考列王記上廿二：17、23），以及先知阿摩司、彌迦等諸眾先知，對以色列社會ê嚴詞譴責，lóng thang看會出來。

Tī以色列人民ê眼中，先知撒母耳ê地位，差不多kah摩西仝款重要（參考耶利米書十五：1）；伊是帶領以色列人民tī he混亂不安ê世代中，tùi士師手中重新恢復kah上帝之間「約」ê關係。伊mā ē-sái講是「先知運動」ê第一個先知。雖然伊tī君王制度中ê時間並無長，m̄-koh以色列君王ê設立，就是tī伊手中建立起來ê。Mā是藉tio̍h伊，君王kah先知之間維持一個平衡點，hō͘強有力ê王國制度中，mā有上帝僕人—先知，監督tio̍h國王、大臣們是m̄是有依照上帝ê旨意，管理上帝ê子民。Tùi先知撒母耳ê故事，thang幫助讀者知影怎樣tùi信仰ê角度，看社會問題kah國家大事，而chit點對今á日ê基督教會來講，是非常重要ê信仰功課。

作者kah寫作ê日期
Chit本經冊ê作者是甚麼人？ná親像聖經中真chē經冊仝款，並m̄知影作者到底是甚麼人。Thang來確定ê是，chit本經冊並m̄是一個人撰寫ê，因為伊所記載ê時間約是tùi主前1100百年左右開始，mā to̍h是tùi撒母耳ê出世（參考撒母耳記上一：20），寫到大約是tī主前970年左右，大衛王朝ê結束（參考撒母耳記下五：4—5、列王記上二：10—11）。Án-ne，此經書記錄ê年代前後跨越長到一百多年ê ê時光。因為án-ne，chit本經冊ē-sái講是一陣編撰者共同ê作品。In收集了真chē流傳落來ê片段史料，並且kā它彙編而成ê經冊。

Koh講，tùi幾個所在經文thang看出chit本經冊並m̄是tī大衛王朝時代編撰完成，卻是到相hit暗期chiah完成ê。親像chit本經冊中一再使用「以色列kah猶大」chit種詞句（參考撒母耳記上十一：8、十五：4、十七：1、52、十八：16、廿三：23、三十：1，撒母耳記下二：10—11、三：9、五：5、十九：14、41—43、廿四：9），就thang看出這已經是以色列帝國分裂成南北二國了後ê事loh。

有kóa學者認為tùi撒母耳記下第七章4到16節ê經文記載，就thang看出he是亡國了後，對被掠到巴比倫做奴隸ê以色列人民siōng安慰ê話語。Beh hō͘ in知影當年in tī曠野流浪ê日子，並無甚麼聖殿之類可敬拜上帝，m̄-koh上帝每工lóng kah in同在，而he是tòa tī帳棚ê日子。M̄-nā án-ne，上帝iáu-beh hō͘大衛ê後裔，繼續做王統治以色列民族。Chit種話語lóng是帶有應允，並且鼓勵已經受掠tī外面國做奴隸ê以色列人民ê意思，ài in mài失望、餒志，tī苦難中tio̍h堅強、忍耐。Koh再tùi撒母耳記上第十二章22節：「上主會守tiâu伊ê諾言，絕對bē棄sak lín，因為伊決定beh lín作伊家己ê子民」Chit句話mā thang看出上帝會koh一pái帶領受難為奴ê以色列人民歸tńg來故鄉。若是án-ne，撒母耳記chit本經冊應該是tī亡國了後ê作品，he就是主前第六世紀了後ê事loh。

Chit本經冊ê結構kah主要內容
Chit本經冊主要以三個主軸作結構，一是先知撒母耳ê事蹟（tùi撒母耳記上第一到第七章）。二是掃羅被膏立為第一任以色列ê王，開創以色列歷史上ê君王政治制度（撒母耳記上第八到第十五章）。三是大衛王朝ê時代（撒母耳記上第十六到撒母耳記下第廿四章）。

Tī頂面所講ê三個主軸裡，作者提供了幾個非常重要ê主題：
一、以色列王國建立君王制度ê由來。
Tùi士師、先知ê領導，到君王ê設立，改變kui個以色列王國ê發展。王國制度ê建立，mā講出了以色列人民tī信仰上ê變化，in因為有君王帶領，無koh根據先知所傳達上帝ê信息。甚至後來iáu出現君王、大臣們想beh阻止先知講出上帝ê信息，chit種事件bat發生在先知米該雅身上（參考列王記上廿二：13），先知阿摩司仝款tú-tio̍h過（參考阿摩司書七：12—13），先知耶利米mā tú-tio̍h chit種情形（參考耶利米書廿六：8—11）。Á想beh殺害上帝僕人先知ê例mā一再發生（參考列王記上十九：1—2、10，耶利米書三十八：4—6）。因為án-ne，當以色列人民無koh是唯上帝ê信息為準則，卻是認為只聽從統治者、君王ê話，比聽從上帝ê信息koh khah重要ê時，離上帝ê道就會jú來jú遠，chit種結果，到最後就只有亡國一途，人民淪落為他國ê奴隸。

二、耶路撒冷城ê建立，並成做以色列人民生活kah宗教信仰ê中心。
Chit-ê城後來被稱做上帝ê聖城，直到現今一直是以色列人民，kah全世界基督教、伊斯蘭教ê宗教心靈凝聚之城市。不過值得注意ê是作者mā提醒：上帝並m̄是khiā起tī人ê手所建造ê建築物中，卻是tī人ê生活中間（參考撒母耳記下七：6）。先知以賽亞mā傳出chit種信息（參考以賽亞書六十六：1—2），耶穌mā講出敬拜上帝m̄是tī有形ê殿宇，卻是tī人心內ê心靈kah誠實（參考約翰福音四：24），使徒保羅甚至講，每一個人ê身軀lóng是上帝khiā起ê殿（參考哥林多前書六：19）。因為án-ne，當人知影以上帝為性命ê主ê時，hit時，用人ê手所建造ê建築物，縱然是簡陋，á是無華麗ê裝飾，lóng會因真誠純潔ê心靈而顯示出上帝ê神聖kah威嚴。相對ê，當人以家己為中心ê時，即使有siōng美麗堂皇ê聖殿，mā是枉然，真緊to̍h會hō͘摧毀（參考列王記上九：6—9）。因為ná無koh是上帝所khiā起ê殿宇，mā m̄是敬拜上帝ê所在，kan-taⁿ會ná親像耶穌所講ê，變成「賊窩」（參考馬可福音十一：17），是騙取別人錢財ê所在，á是成做「市場」，kan-taⁿ知影利益ê所在（參考約翰福音二：16）。

三、上帝揀選一個人，並m̄是chit-ê人有甚麼好ê條件，卻是因為上帝beh藉tio̍h chit-ê人來完成祂拯救ê旨意。

任何人，只要是hō͘上帝所揀選出來當僕人，chit種人一定tio̍h有絕對真誠之心服從上帝旨意ê心志。先知撒母耳講：「上主歡喜燒祭ê 祭祀，kám 親像歡喜人遵thàn 上主ê 話？你看，遵thàn 贏過獻祭，遵thàn 是贏過羊káng ê 油。(全民版)」（撒母耳記上十五：22）伊ê chit句話，thang講為「揀選」chit-ê詞下了siōng好ê定義。撒母耳記siōng特別ê所在，就是to̍h是便是第一任君王掃羅，kah以色列人民siōng-kài尊敬ê君王大衛，都無記錄in出世ê背景，只有記載in被先知撒母耳膏立為王ê經過，這lóng tī說明上帝揀選君王，kah in ê出世背景lóng無關係。

四、teh設立君王制度了後，先知ê角色kah地位作了真大ê調整。
以前，先知就是以色列民族ê領袖，m̄-koh自從設立君王制度了後，先知無koh是以色列社會ê領導者，卻是轉變成做諫言者，á是鑒察者。換句話講，原本設立君王並m̄是beh遠離上帝，而是beh透過君王制度ê設立，藉tio̍h先知所傳達ê上帝信息，帶領以色列人民保持對上帝忠實之心，依照上帝ê教示（誡命）去遵行。M̄-koh ná親像頭前已經敘述過ê，後來chiah-ê君王並無歡喜聽從上帝透過眾先知所傳達ê信息，因為上帝ê話，有ná「雙刃ê劍」hit種鋒利（參考希伯來書四：12），會刺透人ê心內意念，hō͘人無法度隱藏。Mā因為án-ne，會hō͘ chiah-ê社會ê領導者感受tio̍h威脅。因為án-ne，無敬畏上帝ê心ê領導者，會對hiah-ê真心傳達上帝信息ê人—先知，產生討厭、排斥，甚至會設法beh殺害眾先知（參考列王記上十九：10）。後來iáu有一kóa國王乾脆tī家己王宮裡豢養「先知」，chiah-ê「先知」mā就是先知耶利米嚴厲譴責ê「假先知」。在先知耶利米ê時代，是假先知siōng猖獗ê世代（參考耶利米書五：31、六：13、十四：14—16、十八：18、廿三：15—32、廿七：8—9、21、22），結果kan-taⁿ會帶來以色列帝國ê滅亡，人民hông擄去巴比倫做奴隸而已。因為án-ne，申命記派ê作者就bat án-ne提醒過：若是beh用君王帶領人民，「伊坐伊ê 國位ê 時，tio̍h 用一本冊抄寫chit-ê 律法，tio̍h tùi 存tī 祭司利未人ê面前ê hit 本來抄。Hit 本tio̍h hē tī 伊hia，一世人tio̍h 讀，thang 學習敬畏上主— 伊ê 上帝，tio̍h 執守chit-ê 律法所有ê 話kah chiah-ê 律例，來照án-ne 行。免得伊驕傲來看輕兄弟，koh 免得伊偏左偏右，來離開 chit-ê誡命；thang hō͘伊kah 伊ê kiáⁿ 孫tī 以色列中ê 國位久長。」(全民版)」（申命記十七：18—20）可惜ê是chit段話不時被bē記得、疏忽了。

五、撒母耳記chit本經冊，提供有關「約櫃」chit方面資料豐富ê一本經冊。
「約櫃」，它m̄-nā象徵tio̍h上帝kah以色列人民同在，mā teh代表以色列人民kah上帝之間「約」ê關係。因為án-ne，當大衛王kā「約櫃」移入耶路撒冷城後，hit-ê城kah聖殿後來就成做以色列人民耶和華宗教ê中心，其重要性khah贏過示羅、伯特利，即使是王國分裂後，北國領導者暗利也bat試圖建造撒馬利亞城，hō͘伊成做另外一座耶路撒冷城（參考列王記上十六：24），好改變人民對耶路撒冷聖殿ê向心力，m̄-koh結果只是白做而已。因為撒馬利亞並無「約櫃」，就算北國以色列有真強ê君王，親像耶羅波安二世、亞哈王等，m̄-koh iáu無法hō͘北方以色列ê十個支派因為án-ne而建立以撒馬利亞城為敬拜耶和華上帝信仰中心ê向心力。撒母耳記ê作者就是beh說明：kah上帝立「約」，就需要一個強有力ê明顯「記號」仝款。

六、撒母耳記提供了真chē早期耶和華宗教信仰ê內容。
Chiah-ê內容包括：國王家己mā扮演tio̍h祭司ê角色（參考撒母耳記上十三：9—10、撒母耳記下六：14—16）；kā戰爭所奪得ê cheng-seⁿ獻祭hō͘上帝（參考撒母耳記上十五：21）；戰爭期間對食物ê禁忌（參考撒母耳記上十四：24—46），以及對男女之間「性」ê禁忌（參考撒母耳記下十一：8—11）；使用「烏陵」、「土明」kah「以弗得」等物品詢問上帝ê旨意（參考撒母耳記上十四：41、廿三：6、9、廿八：6）；mā有詢問巫師（靈媒）招魂ê事件（參考撒母耳記上廿八：3—25）等等，chiah-ê lóng thang看tio̍h早期以色列人民tī信仰上活動ê景象，而這部分mā是構成撒母耳記chit本經冊真重要ê文獻。因為tùi chia ē-tàng看出以色列人民tī耶和華宗教信仰上ê演變，以及in進入迦南地了後，接受了當地人民ê多神信仰，同時mā影響tio̍h in原本kah立上帝「永遠ê約」之間ê關係，並tī亡國了後chiah koh再重新tńg來到獨一神論信仰。這mā說明了以色列民族tī信仰成長ê過程中，並m̄是行了一條簡單ê道路，卻是經過了亡國、受掠為奴之痛後，chiah得tio̍h ê教示。舊約聖經中所有先知ê作品lóng是朝ǹg chit-ê方向，teh進行信仰反省ê運動。這thang學習tio̍h一門真重要ê信仰功課：信仰若m̄是ê時常反省，就真容易墮落。

Chit本經冊帶hō͘咱ê信息
讀撒母耳記確實有幾點值得咱深思反省ê信仰功課，就是以色列人民要求像其他國家仝款，ē-tàng設立君王管理in（參考撒母耳記上八：5）。In ê觀點，是希望有君王制度ê建立，會幫助、帶領in「上戰場相刣」（參考撒母耳記上八：20）。就án-ne先知撒母耳領受上帝之命，成全了in ê希望。M̄-koh聖經ê作者khah強調一個重要認bat：真正ē-tàng贏過敵人ê，並m̄是在tī是m̄是有軍事裝備，mā無tī tī擁有精銳部隊，卻是知影óa靠全能ê上帝（參考詩篇三十三：16—20）。出埃及ê事件說明了chit-ê信息，是上帝替以色列人民phah敗了埃及ê精銳部隊（參考出埃及記十五：3—5），先知以賽亞mā傳出chit種信息，是上帝phah垮了亞述帝國ê大軍（參考列王記下十九：35）。

Tī一般人看起來，mā可能先知撒母耳是結束「神權統治」ê時代，mā同時是以色列民族邁入君王政治制度ê開始。其實，作者beh努力說明ê是：一個國家ê領導者kah伊ê人民，若是無敬畏上帝ê心，即使有君王統治，mā是枉然。因為一個民族、國家ê興衰，並m̄是在tī領袖是甚麼人，á是建構甚麼款ê政治制度，卻是在tī chit-ê領導者、人民，以及國家ê政治制度等，是m̄是建立tī敬畏上帝ê基礎上。換句話講，有敬虔ê宗教心靈，是建立一個國家強盛ê基礎，遠比強人領導、先進ê政治制度koh khah重要。如果無敬虔ê宗教心，強人可能變成獨裁，siōng周延ê制度mā ē-sái人腐化，甚至成做箝制人性命尊嚴ê鎖枷。

Koh講，上帝ê懲罰是嚴厲ê。任何棄sak上帝ê罪，long2ka7付出極大ê代價，尤其是上帝所揀選ê僕人，koh khah應該知影chit-ê教導，掃羅、大衛ê事蹟lóng tī說明chit項教示。大衛王雖然bat因為拔示巴ê事件而懺悔、認罪（參考詩篇第五十一篇），m̄-koh這並無表示伊無罪，上帝iáu-koh懲罰伊，這thang tùi伊kiáⁿ兒押沙龍背叛ê事件看會出來。雖然後來押沙龍ê叛亂被彌平了，大衛mā重新掌權，ē-sái講是並無因為án-ne而解決王宮內部爭權奪利、紛擾不安ê問題等，chiah-ê事lóng tī大衛死後一一呈現出來（參考列王記上第一章）。一個國王犯下謀人ê命、奪人ê妻ê罪，表面上看起來kah-ná無甚麼，m̄-koh，，tī上帝ê「天平」裡ē-sái講是非常嚴重ê。當大衛王做chit款tāi-chì ê時，便說明了伊心中已經bē記得上帝，伊m̄知影上帝當teh看tio̍h伊所做刣人滅口ê邪惡ê tāi-chì。上帝所揀選ê人，竟然敢án-ne，伊一定tio̍h為tio̍h án-ne付出代價。
另外，撒母耳記雖然說明了以色列民族建構了君王制度，m̄-koh並無表示設立君王ê事，就ē-tàng排除上帝ê旨意，拒絕上帝ê話語。大衛王kā統治權tùi上帝揀選、先知膏立，演變到kā王位世襲hō͘家己ê kiáⁿ兒所羅門，chit點已經teh說明一個非常重要ê信息：伊無走chhōe上帝旨意，就bē有上帝ê賜福，chit種君王，即使tī人看起來是一個真有智慧者，mā是枉然。因為無論人是jōa-ni̍h-á有智慧，lóng無法取代上帝賜福ê。Chit件事tī所羅門王往生了後，王國就隨時分裂ê事件看會出來（參考列王記上第十二章）。
Kui本聖經lóng teh重複一個重要ê信仰認bat：遵從上帝ê旨意。知影遵從上帝旨意ê人，就會知影tio̍h約束家己。因為án-ne，摩西ê律法真清楚記載，君王絕對bē-tàng bē記得上帝ê旨意kah命令。Mā只有án-ne，才能hō͘王權繼續統治落去（參考申命記十七：14—20）。

Chit本經冊thang分做下列大綱
1.先知撒母耳出世kah被揀選做先知（撒母耳記上一：1～七：17）。
2.以色列人民設立君王（撒母耳記上八：1～22）。
3.掃羅被膏立為以色列王（撒母耳記上九：1～十五：35）。
4.大衛被膏立為王，以及伊kah掃羅之間互動ê關係（撒母耳記上十六：1～三十一：13）。
5.大衛登基為猶大ê王（撒母耳記下一：1～四：12）。
6.大衛作全以色列ê王（撒母耳記下五：1～25）。
7.大衛kā約櫃運tńg來耶路撒冷（撒母耳記下六：1～23）。
8.大衛王朝ê成就（撒母耳記下七：1～十：19、撒母耳記下十二：26～31）。
9.大衛犯罪（撒母耳記下十一：1～25）。
10.大衛宮廷內部ê問題，以及kiáⁿ兒押沙龍叛亂事件（撒母耳記下十三：1～十八：33）。
11.大衛重新掌權統治以色列（撒母耳記下十九：1～廿三：39）。
12.大衛因調查人口干犯上帝（撒母耳記下廿四：1～25）。

（本冊經文採用opensource/copyleft ê《全民台語聖經》，tī chia特別致謝。）