認bat 帖撒羅尼迦chit兩本書信

帖撒羅尼迦chit-ê城市
Chit-ê城市是tī主前315年左右，由馬其頓王腓力ê kiáⁿ婿「卡珊德」（Cassander）kā附近幾個鄉鎮ê居民集合起來建造而成ê。主要是為tio̍h記念家己ê bó͘，mā就是希臘亞歷山大大帝同父異母ê小妹「帖撒羅尼迦」，就kā hit-ê城命名為「帖撒羅尼迦城」。

Hit-ê城位處重要地帶，bat有過幾pái重要ê軍事行動，特別是tī主前168年，羅馬kah希臘ê「比特the̍h」（Pydna）之役，大大提升hit-ê城ê政治地位。主前42年，羅馬政府kā它設定tio̍h「自由城」，hō͘ hit-ê城成做內政上自治，而且無羅馬駐軍ê城市，有家己ê所在官約五到六名。Mā因為án-ne，hit-ê城成做商業非常繁榮ê城市，貿易往來興盛。Mā因為商業繁榮ê關係，真chē猶太人遷徙來chia經商。Hit-ê城人口多ê ê時期bat達到二十gōa萬，居民大多數是希臘人，直到現在iáu保存tio̍h非常chiok厚ê希臘文化傳統。

因為hit-ê城tú好設tī出名ê「伊革ná大道」（Egnatian Way），是歐亞大陸ê銜接口，因為án-ne，使徒保羅kah西拉kā福音傳到chia城，就有特別ê意義，因為福音thang藉此條大道傳入東方ê世界。

使徒保羅kah帖撒羅尼迦教會
帖撒羅尼迦教會是使徒保羅第二pái傳福音ê時chūn，kah西拉同行來到hit-ê城。根據使徒行傳第十七章ê記載，in來到hit-ê城後，使徒保羅「習慣進會堂，連續三個安息日，根據聖經kah別人辯論，講解並證明基督一定tio̍h受害，然後tùi死裡koh活。伊講：「『我對lín 宣揚ê 耶穌就是基督。」In 中間有人受感動來信，就來tòe 保羅kah 西拉。其中有真chē 是敬畏上帝ê 希臘人，尊貴ê婦人人mā bē 少。(全民版)」（使徒行傳十七：2—4）這就是帖撒羅尼迦教會ê開始。其中有一位後來成做使徒保羅好ê福音伙伴，就是「亞里達古」，伊是猶太人，bat陪使徒保羅上訴到羅馬去（參考使徒行傳廿七：2，歌羅西書四：10—11）。由此thang知，該教會m̄-nā有外邦人，mā有猶太人。雖然chit種教會ê時常會發生猶太人kah外邦人之間一定tio̍h學習tī基督耶穌內面「成做一體」ê問題，卻mā凸顯了外邦人教會ê特色。

可能因為有bē少猶太人歸屬耶穌基督，致使一kóa保守派ê猶太人非常不滿，in除了向hit-ê城「地方官」控告使徒保羅in「違反皇上ê諭令，講是另有一個王，名叫耶穌」。Mā因為chit件事，引起羅馬「地方官」kah當地居民高度ê關切（使徒行傳十七：7—8）。當使徒保羅離開帖撒羅尼迦城往庇哩亞城傳福音ê時，帖撒羅尼迦城ê猶太人mā接續tòe後面，in去「搗亂、煽動群眾。」為tio̍h beh保護使徒保羅ê安全，庇哩亞ê信徒koh kā伊護送到雅典城去（參考使徒行傳十七：13—15），m̄-koh留落來西拉kah提摩太繼續tī庇哩亞傳福音。當使徒保羅平安來到雅典後，chiah-ê護送伊ê信徒tńg去庇哩亞ê時，帶了使徒保羅ê口信，希望in兩人趕緊到雅典去kah伊會合。

大概是因為帖撒羅尼迦教會成立得太順利，因為án-ne引發保守派猶太人真大ê反感，tùi án-ne極盡所ē-tàng地攪亂，這mā致使使徒保羅心中感覺非常不安，伊tī雅典等到提摩太kah西拉來會合後，koh急tio̍h差遣提摩太tńg去帖撒羅尼迦去探究竟（參考帖撒羅尼迦前書三：1—5）。當提摩太到哥林多城kah使徒保羅會合相聚ê時（參考使徒行傳十八：5），mā同時帶tńg來該教會發展ê情況，這就是該書信ê背景。

寫chit封書信ê目的
使徒保羅寫chit封書信siōng主要目的，是該教會內有人散布一kóa奇怪ê信息，就是有關耶穌基督koh一pái降臨ê問題。Á chit-ê問題就是後來使徒保羅koh一pái寫第二封書信ê主要原因。為tio̍h beh迎接耶穌基督第二pái降臨，已經有kóa信徒停止工作，「專心等待」耶穌基督koh再臨ê時刻。Ē-sái講是in ê生活所需要ê卻因為án-ne soah tio̍h仰賴別人工作所得來提供（參考帖撒羅尼迦前書四：10—12）。Á有kóa人因認為耶穌基督teh beh koh再臨，mā就是世界末日到à，因為án-ne生活有放蕩ê行為（參考四：3）。

另外有kóa人則對tī hiah-ê tī耶穌基督koh再臨前就已經死去ê人有真大ê擔憂，m̄知in會án怎？（參考四：13—17）？每間教會lóng有類似chit種tī信仰上ê認知無仝而帶來分裂ê事件發生，ná親像哥林多教會ê情況仝款，帖撒羅尼迦教會mā不例外。仝款ê，mā有人Tī該教會散布謠言，講使徒保羅是一個貪婪ê人，為tio̍h án-ne，使徒保羅解釋伊kah工做伙伴為傳福音ê事工所採取ê態度是：不加添該教會任何財物上ê負擔（參考二：9）。

寫前書tòe後koh寫後書
咱thang講帖撒羅尼迦前書kah後書之間並無甚麼特別大ê差別，後書主要是針對有關耶穌基督koh再臨ê問題作koh khah詳細ê解釋。另外一個原因是，對使徒保羅所寫ê前書，信徒中間有人誤會了（參考帖撒羅尼迦後書二：2—3），甚至有人利用使徒保羅tī前封phoe所講ê話，借題發揮，故意不工作，「游手好閒」，講甚麼是為tio̍h beh專心thèng候耶穌基督koh再臨，m̄-koh卻終日無所事事，「專管別人ê閒事，」（參考三：6、11）。為tio̍h án-ne，使徒保羅真受氣地警告chiah-ê人，並要求該教會信徒一定tio̍h「提防」chiah-ê人，「m̄-thang kah in仝伴，hō͘伊感覺慚愧」（參考三：14）。

無論是帖撒羅尼迦前書，á是帖撒羅尼迦後書，咱知影使徒保羅致意ê m̄是別人怎樣講伊，siōng重要ê是伊想beh說明清楚有關耶穌基督koh再臨ê事。這問題mā是早期教會一再引起討論ê事。其實，直到今á日，chit-ê信仰上ê問題iáu是爭論不休。
寫這兩封書信ê日期

一般來講，帖撒羅尼迦前書大概是tī提摩太來到哥林多城kah使徒保羅會合後無久寫ê。Tùi使徒行傳第十八章11到17節來看，時間大約是tī主後第51年左右，mā就是迦流就任亞該亞總督ê時chūn，地點就是tī哥林多城。然後過不jōa久，使徒保羅koh寫後書hō͘該教會。因為án-ne，前書kah後書之間，時間大概相差兩三個月pah（因為當時ê信件lóng是差人專程送去ê，需要加上交通往tńg去ê時間）。不過，必定bē相差真久chiah-tio̍h，因為第二封書信是針對第一封phoe而寫ê。

Thang分做下列幾個段落
一、帖撒羅尼迦前書部分：
1. 第一章1節：序言。
2. 第一章2到10節：為帖撒羅尼迦教會感謝上帝。
3. 第二章到三章：使徒保羅為家己ê行動解釋。並且o-ló該教會信徒tī信心上ê認真。
4. 第四章1到12節：基督徒應該有ê信仰行為。
5. 第四章13到第五章11節：有關耶穌基督koh再臨ê問題。
6. 第五章12到22節：最後ê勸勉。
7. 第五章23到28節：請安並代禱。
二、帖撒羅尼迦後書部分：
1. 第一章1到2節：序言。
2. 第一章3到10節：鼓勵並o-ló該教會信徒。
3. 第二章：用怎樣ê態度看待耶穌基督koh再臨ê事。
4. 第三章1到15節：請求代禱，並提醒大家注意hiah-ê pîn-tōaⁿ、不工作ê信徒。
5. 第三章16到18節：請安並祝福。