認bat提摩太前書chit本書信
提摩太前書、提摩太後書，以及提多冊等，chit三本書信通常hông稱做「教牧書信」。原因是使徒保羅寫chiah-ê書信ê目的主要是teh教導提摩太kah提多tī教會ê牧養事工中，應該tio̍h堅持á是注意ê事項。Ná親像tī主後1274年出名ê神學大師托瑪斯‧亞奎ná（Thomas Aquinas）mā講chit本書信ê內容是「教牧ê規條」。

Tī新約聖經中，屬tī使徒保羅ê書信總共有十三卷，其中寫hō͘教會ê書信有九卷，寫hō͘個人ê有四卷，這四卷除了頂面所講chit三本，另外iáu有一本就是腓利門書。

提摩太kah提多lóng是使徒保羅ê同工，深受使徒保羅ê器重。兩個人lóng被使徒保羅當做信仰上ê「真kiáⁿ兒」（參考提摩太前書一：2，提多冊一：4）。Á tùi篇幅起來看，伊寫hō͘提摩太ê書信篇幅大大超過提多冊。可見使徒保羅kah提摩太之間ê關係koh khah密切。不過chit三本書信是m̄是真正lóng是出自使徒保羅手筆，則聖經學界一再teh討論ê問題，時到taⁿ日，iáu未有確切ê答案。

關於提摩太chit-ê人
提摩太，是路司得人（tī今á日ê土耳其境內）。老父是希臘人，母親友妮基kah祖母羅綺lóng是非常敬虔ê猶太人基督徒（參考使徒行傳十六：1，提摩太後書一：5）。Mā因為án-ne，tùi提摩太細漢ê時chūn，就受tio̍h良好ê猶太宗教教育，對聖經有非常認bat（參考提摩太後書三：15）。可能因為老父是希臘人ê緣故，提摩太並無像一般猶太人gín-á，tī出世後第八工就受割禮（參考創世記十七：11—12，利未記十二：3）。直到使徒保羅第二pái旅行傳道訪問路司得ê時tú-tio̍h伊，而且beh chhōa伊跟tòe去傳福音ê時，chiah「替伊行了割禮」（參考使徒行傳十六：3），大概是為tio̍h beh減少猶太人阻擾福音ê事工pah。

使徒保羅對提摩太真信任，thang tùi kúi-nā pái差派伊去處理特別ê tāi-chì看出來。親像：派伊代表使徒保羅到帖撒羅尼迦教會去「堅固kah幫助」該教會信徒ê信心，因為該教會正面臨迫害，有真chē人棄sak了信仰（參考帖撒羅尼迦前書三：1—6）；哥林多教會mā發生真chē紛爭，使徒保羅mā是差派伊前去，為tio̍h是beh ài伊去指導該教會ê信徒tī「基督耶穌內面ê新生活所遵行ê道路」（參考哥林多前書四：17）；當使徒保羅kah其他同工tio̍h離開以弗所城，繼續前往馬其頓ê時，特別kā提摩太留tī以弗所教會，主要原因是該教會裡有人teh傳「無正確ê教義」（參考提摩太前書一：3—8）等。

Koh講，tī使徒保羅所寫ê書信中，有六封書信是用伊kah提摩太兩個人ê名字共同署名發出ê，包括有：哥林多後書、腓立比書、歌羅西書、帖撒羅尼迦前書、帖撒羅尼迦後書，以及腓利門書等。特別是teh寫hō͘腓立比教會ê書信中，伊特別提起提摩太kah伊ê關係，就「像kiáⁿ兒kah老父，為tio̍h福音ê工作同齊勞苦」（參考腓立比書二：22），tùi chiah-ê lóng ē-tàng看出提摩太teh導正信徒對信仰ê正確認知上，確實是有夠額ê能力。Mā thang看tio̍h伊tī信仰ê基礎上已經ē-tàng hō͘使徒保羅安心，而kā重要ê事委任伊全權處理。

寫chit本書信ê時間kah地點
Chit本書信應該是tī使徒保羅第一pái tùi tùi羅馬監獄被tháu放tńg來，經過以弗所到馬其頓了後無久寫ê。因為伊發現以弗所教會內部有真嚴重ê信仰問題，因為án-ne，伊留落來thang信任ê提摩太Tī該教會，希望提摩太ē-tàng Tī該教會「導正」眾信徒一kóa觀念。如果是án-ne，則時間應該是tī主後63年以後到主後65年間所寫。大部分起來講，使徒保羅是tī羅馬皇帝尼祿當政ê ê時期內殉道ê，而尼祿皇帝在位時間是tī主後54到68年。使徒保羅則tī主後67年左右殉道。

時到目前，關於提摩太前書、後書，以及提多冊chit三本「牧會書信」是m̄是真正為使徒保羅所寫，iáu有待聖經學界ê考證。目前大部分上講起來有三種無仝ê觀點：

一是認為chit三本確定是使徒保羅所寫無錯。

二是認為chiah-ê書信並m̄是使徒保羅所寫，只是掛伊ê名字寫。因為chiah-ê書信kah使徒保羅所用ê文字風格無符合，而且書信內所寫ê教會組織型態mā kah使徒保羅ê時代無lóng仝款。

三是認為chit三本書信有使徒保羅ê資料，m̄-koh經過別人修改過了後，koh附加其它ê資料合編做伙。

無論以上ê三個論點án怎，chit三本書信對今á日ê基督徒kah教會來講，確實有真大ê幫助，m̄-nā hō͘咱看tio̍h早期教會ê問題，mā thang kā它當做今á日教會ê借鏡。咱thang tī chiah-ê書信中學習使徒保羅怎樣teh勸勉身為牧者，tī牧養事工上應該有ê盡責態度，對今á日ê傳道者來講是真值得一再細讀、省思ê書信。

寫chit本書信ê目的
基本上chit本書信是寫hō͘提摩太ê，因為án-ne，thang瞭解主要目的是表明了對提摩太tī牧養工作ê關心。因為提摩太beh處理以弗所教會內部發生ê信仰問題，而處理信仰ê問題如果不小khóa注意，真容易致使教會內部分裂。如果有分裂，第一個會受tio̍h傷害ê，就是傳道者。Ná親像使徒保羅teh處理哥林多教會內部ê紛爭仝款，真chē人lóng kā「砲口」對準伊，hō͘伊lóng受困擾，甚至艱苦心到「焦慮不安」（參考哥林多後書二：1—13）。因為án-ne，寫這書信hō͘提摩太是teh鼓勵伊，為tio̍h是beh表明了支持伊，希望伊m̄-thang因少年而自薄（參考提摩太前書四：11—15）。

另外一方面，伊希望教會眾領袖有好ê生活行為，án-ne才能帶領所有信徒活出好ê信仰見證（參考提摩太前書第三章）。同時mā希望教會眾領袖ē-tàng明白真、假教師teh傳揚上帝信息ê差別（參考提摩太前書四：1—5、六：3—5）。

以前、後兩本書信中，咱lóng thang看tio̍h使徒保羅真清楚說明真、假教師之間ê差別，兩個除了teh教導聖經ê信息有落差，假教師ê另外一個特徵，就是貪愛錢財。因為án-ne，使徒保羅一再提醒提摩太一定tio̍h tī錢財ê事頂面非常小心（參考提摩太前書六：6—10），mā只有身為傳道者對錢財無貪戀ê想beh，chiah有辦法教導信徒tī錢財ê事頂面有koh khah健康ê態度（參考提摩太前書六：17—19）。使徒保羅這兩方面ê教導，tī基督教會這兩千年來ê發展中，對所有傳道者lóng真受用，即使是今á日Tī台灣ê傳道者koh-khah是真好ê教材。

咱thang講chit本書信並m̄是teh傳授教義上ê認知，卻是偏重teh教導教會內外信仰生活上ê規律。這mā就是此書信被編列tī「教牧書信」ê原因。雖然án-ne，這書信iáu是非常重視教義ê認bat，因為對教義有正確ê認bat，chiah是減少á是降低教會偏離正確信仰之道siōng好ê途徑，這mā是使徒保羅一再勸勉提摩太，為甚麼一定tio̍h tī「宣讀聖經、講道kah教導工作上多下功夫」（參考提摩太前書四：13），以及「正確地講解真理ê信息」（參考提摩太後書二：15）ê原因，因為án-ne才能抵擋hiah-ê「傳無正確ê教義」ê人，tī教會中製造分裂kah紛爭ê機會。

Thang分做下列幾個段落
第一章1到2節：請安ê話。
第一章3到11節：譴責無正確ê教示。
第一章12到20節：鼓勵提摩太（一）。
第二章1節到第三章16節：教會ê禮拜kah揀選同工。
第四章1到5節：注意教會中ê假教師。
第四章6節到第六章21節：鼓勵提摩太（二）。