認bat 歷代志下chit本經冊

所羅門繼承王位後ê以色列
歷代志上ē-sái講是以大衛王ê事蹟為基礎。Kui個上卷共計有廿九章，第一到八章是記載以色列民族ê族譜，然後第九章提起利未族kah祭司ê家族，以及掃羅ê後代，第十章簡單ê記載掃羅死去ê記事。然後tùi第十一章開始，直到第廿九章止，全部lóng是以大衛ê事蹟為主要記事內容。Á tī chit長到十九章ê篇幅中，tùi第廿二章開始，直到第廿六章止，tī chit五章ê篇幅中，lóng是記載大衛王為tio̍h beh籌建耶路撒冷聖殿所做ê努力，連利未族人beh擔任ê工作lóng已經分配好勢。這thang明顯看出歷代志作者重視大衛，khah贏過其他ê經冊。

歷代志下是tùi所羅門執政開始，記載有所羅門ê事蹟，是tùi第一章直到第九章止。M̄-koh tī chit九章ê篇幅中，就有六章，mā就是tùi第二到七章10節等，lóng是記載kah建造耶路撒冷聖後面有關ê事。雖然Tī chit段經文中ê第六到七章是記載所羅門對以色列人民ê訓詞，以及伊代表以色列人民向上帝祈禱，以及上帝對所羅門祈禱ê回應，m̄-koh lóng thang看出這是kah聖殿ê建造、完成、奉獻有密切關係。真正記載有關所羅門事蹟ê，mā只有短短ê第一章、第八到九章而已。比起伊ê老父大衛王，顯得乏善thang陳，而in老父大衛王留hō͘伊ê，是一個「國勢非常穩固」ê以色列國（參考列王記上二：12）。照理，所羅門應該是ē-tàng tī chiah-ê非常穩固ê基礎上，hō͘以色列國koh khah堅強chiah-tio̍h，可惜ê所羅門並無án-ne。相對ê，依照列王記ê作者提供ê資料，伊晚年棄sak了上帝，跟tòe伊所娶ê真chē外國妻細姨去拜偶像神明（參考列王記上十一：3—5），這kah伊tī奉獻耶路撒冷聖殿ê時，對上帝ê祈禱內容大無相仝。

歷代志下有特別編輯ê方式kah資料
若是beh用一句簡單ê話來形容歷代志kah列王記siōng大ê差異，應該thang講歷代志作者tī以色列王國分裂後，對北國以色列寫了非常少，差不多lóng是以南國猶大為主。這當然thang講歷代志是以耶路撒冷為中心編撰此本經冊。雖然tī歷代志下第十八章mā有提起先知米該雅kah北國以色列亞哈王之間互動ê關係，其實，he是因為南國猶大約沙法tú好去訪問北國以色列王亞哈ê緣故，mā是為tio̍h beh凸顯約沙法是提醒亞哈王，tio̍h出兵去相戰，mā應該beh聽聽上帝忠實僕人先知ê話chiah有chit段記事。M̄-koh比米該雅koh khah需要紹介ê先知，親像：先知以利亞、以利沙等，卻lóng tī歷代志下中無出現過。

歷代志下tùi第十章開始，描寫北國以色列分裂出後，一直到第三十六章，lóng是以南國猶大作做記號錄ê材料，而且teh描述ê方式mā kah列王記作者差異真大。歷代志下作者收集了bē少列王記作者所欠缺ê資料，親像歷代志下第二十章有關以東出兵beh攻打猶大ê事件，就是獨有特殊ê資料。親像第廿四章14節b句到27節，記載有關約阿施王tī大祭司耶何耶大時代，敬拜上帝。M̄-koh當大祭司往生了後，伊就聽從幕僚ê話，棄sak上帝，去拜偶像神明，而且iáu teh耶路撒冷聖殿ê庭園裡phah死去祭司撒迦利亞，chit種資料mā thang看出南國猶大ê君王，是án怎悖逆上帝ê旨意kah命令。另外，tī第廿八章9到15節，作者mā收集到另外一個重要ê資料，就是先知俄德，以及北國以色列ê四個領袖，lóng反對北國以色列軍隊因為phah敗猶大軍隊，而beh kā猶大ê軍隊俘擄tńg來撒馬利亞去，in堅持beh kā chiah-ê俘擄送tńg去去iáu hō͘猶大。

值得注意ê，是tī歷代志下第廿九到三十一等三章，作者真詳細地紹介猶大希西家王宗教改革ê用心，除了重新整理耶路撒冷聖殿外，mā帶領人民重新依照聖經ê教導守Pôaⁿ過節。描寫希西家王確實非常用心ê teh帶領人民tńg來到耶路撒冷聖殿敬拜上帝。即使伊派信差kā送去北國以色列ê以法蓮、瑪拿西、亞設，甚至北部到西布倫等，邀請in tńg來到耶路撒冷來守Pôaⁿ過節，雖然被嘲（sau）笑，mā不認為意。Tùi chia thang隱約看見歷代志下作者ê觀念中，就是以耶路撒冷chiah是以色列民族ê中心。

M̄-koh siōng特別ê記事，莫過tī歷代志下第三十三章10到20節chit段經文，作者講瑪拿西王因為悔改被上帝赦免，因為án-ne，hông擄去巴比倫後，koh被tháu放tńg來，m̄-nā án-ne，伊iáu拆毀了所有ê偶像神明ê祭壇，而且iáu命令猶大人民一定tio̍h敬拜上帝。Chit點kah列王記ê作者所記載差異siōng大；列王記作者甚至講瑪拿西刣死真chē無辜ê人民，koh領猶大人民拜偶像（參考列王記下廿一：16），甚至認為猶大亡國ê原因，就是kah上帝m̄肯赦免瑪拿西ê惡劣行踏有關（參考列王記下廿四：3—4）。

Chit本經冊ê資料
Teh紹介歷代志上經冊ê時，已經有紹介過歷代志chit本經冊，會發現有真chē內容kah撒母耳記上、下，以及列王記上、下等經冊真雷同，原因是它至少有一半ê資料是取材自頂面所講chiah-ê經冊，另外mā取材自摩西五經、士師記、以賽亞書、詩篇、耶利米書、耶利米哀歌等經冊。比較特別ê是，作者mā提起了幾個重要ê資料來源。Tī歷代志下mā有chit種資料，諸如：
以色列列王史（參考歷代志下二十：34、三十三：18）；猶大kah以色列列王史（參考歷代志下十六：11、廿五：26、廿七：7、廿八：26、三十二：32、三十五：27、三十六：8）。另外，作者mā引用所謂ê「先見史」（參考歷代志下三十三：19）、示羅人亞希雅預言冊、先見易多異象冊（參考歷代志下九：29）等。Thang看出作者引用ê資料相當廣闊泛，用心整理ê認真程度當thang明白。之所以án-ne用心整理，是為tio̍h beh hō͘ tùi巴比倫回鄉ê猶大子民知影，in ê頂一代祖先會淪落到被俘去異鄉做奴隸，是因為棄sak了上帝ê誡命、教示所致。伊希望回鄉tńg來ê猶大子民lóng會認真地tùi歷史記錄學習tio̍h新ê教示，免得重蹈覆轍。

Chit本經冊ê特色
Tùi chit本經冊thang看出作者對耶路撒冷聖殿作為敬拜上帝ê唯一殿宇，帶有一份特殊ê感情，chit點tùi頂面所講希西家王派特使帶伊ê親筆邀請信，送去邀請北部以色列ê以法蓮、瑪拿西、亞設、西布倫等支族ê人來耶路撒冷敬拜上帝一事thang看出來（參考歷代志下三十：10—12）。希西家王甚至tī phoe中勸勉北國以色列人民，tio̍h tńg來歸向上帝，有可能án-ne，thang得tio̍h上帝憐憫，hō͘受掠去ê以色列同胞thang早日得tio̍h tháu放（參考歷代志下三十：8—9）。其實，希西家王ê講法，就是認為in無tńg來到耶路撒冷聖殿來敬拜上帝，chiah會棄sak上帝。Chit種觀念kah申命記派ê作者不謀而合。申命記ê作者就非常強調「上主要選一個特定ê場所做為敬拜ê所在」（請參考申命記十二：5、11、14、18、21、26、十四：25、十五：20、十六：2、5、11、15、16）。歷代志ê作者則認為耶路撒冷聖殿是唯一合法ê聖所，其他地方ê敬拜lóng m̄屬tī上帝所祝福ê所在。Tùi chia mā thang理解chit本經冊作者有一個主要思想，就是為tio̍h beh保持猶太民族tī種族、宗教信仰上ê純潔。

Chit本冊tī最後結尾ê所在，mā就是第三十六章22到23節，特別記落來了波斯皇帝塞魯士登基ê第一年，就決定了tháu放被巴比倫帝國俘擄ê所有以色列人民，hō͘ in thang tńg去故鄉重建家園。Mā因為án-ne，有一種看法，就是chit本經冊是tī回鄉了後ê作品。

Chit本經冊ê主要大綱
1.歷代志下第一章到第九章：所羅門王朝ê ê時期
2.歷代志下第十章到第三十六章：王國分裂後ê南國猶大景況。