認bat 哥林多後書chit本書信
一講tio̍h哥林多城，就會hō͘人真緊kah「淫亂城市」chit位詞連結做伙，m̄-koh chit種看法應該是tī希臘帝國統治時代ê情景，到à羅馬帝國統治時代已經無koh是án-ne，因為原本ê哥林多城已經tī主前146年被羅馬帝國摧毀，直到一百年後，羅馬帝國kā它重建，並成做羅馬帝國tī亞該亞ê首府，因為是屬tī商業發達ê城市，猶太人真chē。

Ná親像teh「認bat 哥林多前書chit本書信」中所提起ê，使徒保羅寫hō͘哥林多教會ê書信，m̄-nā「前書」、「後書」這兩封而已，至少應該有四封chiah-tio̍h。Thang án-ne瞭解，第一封書信可能就是tī前書第五章9節所提起ê「以前hō͘ lín ê信裡」。可惜，現在已經chhōe bē-tio̍h chit封信ê資料了。

然後就是所謂ê哥林多前書，它是使徒保羅寫hō͘哥林多教會ê第二封信。Chit封信主要是關於「革來」家ê人向使徒保羅提起哥林多教會結黨分派ê事件，致使教會內部發生了分裂ê現象（參考哥林多前書一：11），koh加上哥林多教會bat寫phoe問使徒保羅有關婚姻、祭偶像ê食物、聖神ê恩賜、死人koh活等等問題（參考哥林多前書第七章到十五章），所以伊寫chit封書信處理chiah-ê事並回答in所提出ê問題，chit封是伊tī以弗所ê時chūn寫ê。

Tùi哥林多前書第十六章10節thang看tio̍h，使徒保羅後來差派門徒提摩太去造訪哥林多教會，m̄-koh無想tio̍h提摩太帶tńg來hō͘伊鬱卒ê消息，就án-ne伊kā原本想beh訪問馬其頓了後，chiah去哥林多ê行程改變，使徒保羅先去哥林多，了後chiah去馬其頓，然後tī去耶路撒冷途中koh tńg來哥林多，伊講希望這會帶hō͘哥林多教會「加倍得tio̍h欣慰」。M̄-koh伊無想tio̍h當伊tùi以弗所來到哥林多後，卻發現家己反而成為被教會某一kóa人攻擊ê目標（參考二：5），而其他信徒kah-ná並無如伊所期待ê hit種全力支持伊，hō͘伊感覺非常ê艱苦心，就án-ne，伊koh一pái改變行程，tī結束訪問哥林多教會了後，就直接tńg來以弗所去（參考一：23）。

Koh來是第三封書信，chit-ê封信mā hông稱做「嚴厲ê書信」，bat hō͘哥林多教會ê信徒感覺「憂愁」（參考二：3—4、七：8—10）。Chit封信真可能已經遺失了，不過有bē少聖經學者認為哥林多後書第十到十三章，就是所謂ê「嚴厲ê書信」之一部分。Chit封信真可能是使徒保羅託伊信任ê門徒提多帶去ê，然後伊急tī想知影哥林多教會對chit封信反應，ē-sái講是一直等bē-tio̍h提多，因為án-ne，伊就直接tùi以弗所到馬其頓去（參考冊二：13）。後來，tī馬其頓tú-tio̍h了提多；伊帶了哥林多教會siōng新ê消息hō͘使徒保羅，chiah-ê消息hō͘使徒保羅感覺非常欣慰，mā得tio̍h真大ê鼓勵（參考七：6—7），就án-ne伊真緊koh寫phoe hō͘哥林多教會ê信徒，鼓勵in，並且安慰in，這就是有kóa學者所講ê第四封書信，chit部分就是哥林多後書第一到九章。Án-ne，thang知影chit封哥林多後書就是tī馬其頓寫ê，時間大概是tī主後55年ê時chūn，kah前書ê寫作時間相差無久。

Chit封書信ê主要信息
提多帶hō͘使徒保羅感覺欣慰ê信息，是哥林多教會已經懲罰hiah-ê tī教會內毀謗使徒保羅ê信徒了，可能是in kā hiah-ê信徒驅離教會，致使教會內部ê紛爭無koh，教會因為án-ne平靜了落來，chit點是使徒保羅siōng感欣慰ê事，chit種平靜並m̄是因為hiah-ê造謠生事ê人被驅離，卻是教會內部ê穩定。因為án-ne，伊寫這書信敘述了家己如何在以弗所地區工作，然後續接tī馬其頓地區傳福音所經歷ê各種困苦（參考一：3—11、二：12、七：4），m̄-koh並無因為án-ne就被phah倒，猶原以堅定ê信心仰望上帝ê帶領。
Tī chit-ê封書信ê第七到八章中，使徒保羅用足足兩章ê篇幅討論有關捐款濟助耶路撒冷教會貧困ê兄姊ê事。Chit點tī哥林多前書第十六章已經有提起，並且表示ài該教會信徒準備好，m̄免等到伊á是所派ê人去ê時chūn chiah籌募。M̄-koh tī後書chia卻koh一pái提起，而且用chiah-ni̍h長ê篇幅討論，必定有原因。

Chit點thang tùi幾個所在經文看出來，一是使徒行傳第十一章27到30節，記載有幾個tùi耶路撒冷落去安提阿ê先知，其中有一位名叫亞迦布ê，伊預言天下會有嚴重ê飢荒，結果chit件事果然發生，因為án-ne，眾門徒決定鼓舞所有信徒捐款濟助tī猶太ê信徒；二是加拉太書第二章8到10節ê記載，使徒保羅tī耶路撒冷使徒會議了後，確定伊kah巴拿巴到外邦人地區去傳福音，被雅各、彼得，kah約翰等門徒要求，當使徒保羅kah巴拿巴tī外面邦傳福音ê時，mā tio̍h會記得tī猶太人中sàn-chhiah人ê需要。

其實，早tī飢荒發生chìn前，耶路撒冷教會就已經有發生過因為每日生活費分配不均，而tī教會內發生bē爽快（參考使徒行傳六：1—2）。後來使徒保羅tī外面邦地區開拓福音事工、建立教會了後，lóng會鼓勵信徒捐款濟助耶路撒冷教會貧困信徒ê需要，伊所持ê理由是：「這是in 歡喜做ê tāi-chì，其實mā 是in所欠ê 債。因為既然猶太信徒有kah 外邦人做伙分享in 屬靈ê 福氣，外邦ê 信徒mā tio̍h 應該tī 物質上kā in 幫助。(全民版)」（羅馬書十五：27b）使徒保羅雖然án-ne講，伊koh khah大ê用意應該是beh hō͘耶路撒冷ê猶太人信徒知影，外邦ê基督徒確實真有疼心，並遵行摩西律法ê教導—疼家己ê厝邊，像疼家己仝款（參考利未記十九：18b）。希望透過chit種方式來改善猶太人基督徒對外邦人基督徒ê態度。

教會內部出現嚴重ê問題
Tùi加拉太書第一章，就會發現使徒保羅離開加拉太後，隨時有人趁機會滲透進入教會傳「另外一種福音」，tī哥林多教會mā有發生類似ê問題。使徒保羅提出為甚麼哥林多教會ē-tàng容忍有人傳「另外ê靈kah另外一種福音」ê疑問（參考哥林多後書十一：4）。所謂「另外一種福音」，指ê就是beh接受割禮chiah ē-tàng得救。使徒保羅非常受氣，認為chit種論調，就是kā耶穌死tī十字架上救贖ê功勞hō͘褻瀆了。伊真受氣ê講傳講chiah-ê信息ê人lóng應該受tio̍h詛咒（參考加拉太書一：9）。因為tī使徒保羅ê觀點中，除了耶穌kah伊死tī十字架上ê救贖功勞外，就無其他任何福音thang傳（參考哥林多前書二：2）。

Koh講，chiah-ê滲透進入哥林多教會內部，造成該教會tī信仰認知上有偏差ê人，並m̄是信仰上純正ê，siōng明顯ê所在，是in歡喜誇耀家己真有能力，語意上mā同時是teh貶低使徒保羅tī福音事工上ê努力kah用心。因為án-ne，使徒保羅強調：一個真正傳福音ê人，若是beh誇口，是kan-taⁿ會誇耀上帝奇妙ê作為（參考哥林多前書一：31，哥林多後書十一：17），若無，，就是只誇口家己ê軟弱，因為只有知影家己軟弱ê人，chiah會明白kah凸顯耶穌救贖恩典ê寶貴（參考哥林多後書十一：30—31）。

Chiah-ê滲透進入教會而且自命是「使徒」ê人，使徒保羅真諷刺地用「超等使徒」來稱呼in（參考哥林多後書十一：5、十二：11），意思真清楚，chiah-ê人已經m̄是「使徒」，是超過了使徒ê角色了，使徒保羅講chiah-ê人lóng是想beh騙錢。M̄-koh in卻反tńg來講使徒保羅teh騙哥林多教會信徒ê錢財，chit點hō͘使徒保羅非常受氣，因為這明明是就teh褻瀆使徒保羅傳福音ê使命。因為án-ne，伊真清楚表白伊傳福音hō͘哥林多教會，並無tùi該教會得tio̍h甚麼。因為伊傳福音到哥林多地區去，lóng是馬其頓地區ê教會供應伊，mā因為án-ne，伊無成做tú開拓起來ê哥林多教會信徒ê負擔（參考哥林多後書十一：7—9）。其實，使徒保羅傳福音有一個特色，就是家己開拓教會，並tī教會ê教勢穩定了後，表明希望該教會支持伊去開拓另外一間教會。

每一個時代、每一個地區，lóng會有人利用教會chit-ê單純ê信仰團契，設法進入該教會，表面上看起來kah-ná是真關心教會事工，其實是想ài beh進行欺騙ê事，chit款tāi-chì直到今á日iáu繼續teh發生。因為án-ne，讀哥林多後書確實thang幫助今á日ê信徒，用koh khah頂真ê信仰認知來省思信仰團契該有ê特質kah信仰要義，mā thang tùi chia來檢驗傳道者ê獻身使命感。

Chit本書信ê大綱
1. 第一章1到11節：請安ê話。
2. 第一章12節到第二章13節：解釋改變訪問哥林多教會行程ê原因。
3. 第二章14節到第六章18節：作為使徒ê職分，應該有ê認bat kah態度。
4. 第七章：為哥林多教會信徒對使徒保羅譴責ê事，已經清楚伊ê用心kah疼惜ê疼，令保羅感覺欣慰。
5. 第八到九章：論到有關捐款救助耶路撒冷教會信徒ê事。
6. 第十到第十三章10節：使徒保羅為家己ê角色kah使命辯護。
7. 第十三章11到13節：祝福哥林多教會ê信徒。

（本冊經文採用opensource/copyleft ê《全民台語聖經》，tī chia特別致謝。）