認bat列王記下chit本經冊

列王記下chit本經冊，是繼續列王記上記載有關以色列王國分裂了後ê南北二國之發展情景。原本只有一本ê列王記會án-ne分做現在ê「上」、「下」二本，是因為有一本kā它稱做《七十人譯本》ê希臘文聖經，kā列王記kah撒母耳記同齊編列成王國史第一卷、第二卷、第三卷、第四卷。列王記就是屬tī第三kah第四卷，mā就是目前chit種「上」kah「下」兩本，後來ê拉丁文譯本mā跟tòe分做「上」kah「下」，就án-ne保留到taⁿ。

Mā有ê聖經學者比較歡喜kā列王記分做三個段落看：

A.列王記上第一章到第十一章，這是以色列王國iáu未分裂ê時代。

B.列王記上第十二章到列王記下第十七章，這是分裂後ê南國以色列kah北國以色列時代，以及北國以色列滅亡，以色列人民受掠kah被販賣到各地做奴隸。

C.列王記下第十八章到第廿五章，北國以色列滅亡後ê南國猶大之景況。

因為án-ne，有人認為若是分做上、中、下三卷koh-khah貼切。不過chit種觀點並無被接受，只有ē-tàng當做分段閱讀ê一種方式。

作者kah寫作ê日期
Ná親像聖經中其他經卷仝款，咱無法度確認真正作者是什麼人，列王記mā是仝款，時到今á日聖經學者iáu是無清楚作者是什麼人。雖然有ê學者認為作者是先知耶利米，理由是伊當時是出入宮廷頻率算是高ê先知，因為án-ne，thang tī列王記內面看tio̍h kah耶利米書仝款ê內容，親像：列王記下第廿四章18節到廿五章30節，差不多就kah耶利米書第五十二章1到34節仝款。M̄-koh，chit種觀點mā被懷疑，認為無jōa可能，原因是列王記下第廿四章講約雅斤王是hō͘掠到巴比倫去，而先知耶利米則被帶去埃及（參考耶利米書四十三：6）。因為án-ne，比較可能ê作者，是一位kah耶利米同時代ê先知，伊看tio̍h當時社會ê景況，心中有真chē憂慮，而寫落來chit本史記。

若án-ne，則chit位先知引用了bē少撒馬利亞kah耶路撒冷官方（á是王室）檔案ê資料，親像：列王記上第十一章41節提起ê「所羅門史」；列王記上第十四章19節ê「以色列列王史」，kah第29節ê「猶大列王史」等。不過mā有聖經學者持無仝ê看法，in認為頂面所講ê「所羅門史」、「以色列列王史」、「猶大列王史」等，是m̄是就是官方史料，iáu需要考證。原因是在列王記上第十六章20節講：「心利其他ê tāi-chì kah 伊所行背叛ê tāi chì，kám無記tī以色列chiah-ê王ê記錄？(全民版)」mā可能咱會講心利只當短短「七工」北國以色列ê王而已，伊ê惡行當然thang記錄tī官方史料上，chit種講法mā同時thang用在列王記下第十五章15節有關「沙龍」ê事蹟，因為伊當以色列王mā是只有短短一個月而已。

不過mā thang án-ne想：就是每一個時代lóng有人會記錄當代王朝ê各項事蹟，chiah-ê事蹟有真chē lóng是類似公開ê年鑑，特別是眾先知siōng歡喜寫chit種年鑑，並kā它提出信仰上ê觀點，列王記就是tī chit種情況下寫出來ê作品。

甚麼時chūn寫chit本冊ê？這mā是一個iáu未確定ê問題。原因是chit本經冊最後提起約雅斤受掠後ê「第三十七年十二月二十七日」，伊被巴比倫王以未‧米羅達tùi監獄tháu放出來（參考廿五：27），依照chit-ê年代，應該是tī主前562 á是561年之間。M̄-koh，只有提起伊被tháu放，而且被恩待thang終生kah巴比倫王同桌進餐（參考廿五：29），m̄-koh卻都無提起伊tùi巴比倫被釋khǹg tńg去國ê記事，因為án-ne，應該bē是tī主前536年了後寫ê。

Chit本經冊ê主要信息
如果kā此本經冊單純當做「史冊」看，he是真冤枉ê，因為聖經ê作者m̄-nā是單純teh記載王國史料á是社會檔案而已。聖經ê作者寫冊，有一個共同ê目的，是beh hō͘後代kiáⁿ孫，學習認bat上帝tī in祖先行過ê路上，所hō͘ in ê一切恩典，以及上帝kah祖先之間互動ê關係。因為án-ne，編撰此本經冊ê時，年代ê順序m̄是chit本經冊siōng主要ê考量，卻是kā重點khǹg tī kah上帝之間約ê關係基礎上。因為án-ne，以色列人民是m̄是遵行祖先kah上帝立約ê教示，就成做此本經冊tī編輯上ê重點。作者想beh表達一個基本觀念：無論是hit位國王，伊tī經濟、政治、社會ê繁榮上有jōa-chē貢獻，作者考量ê重點lóng是chit位國王怎樣帶領人民敬拜上帝，伊根據chit點來衡量一個國王ê好á無，mā tùi chit點teh評定一個國家、民族ê興衰。

以北國以色列為例，如果beh tùi政治、軍事考量一個國王ê成就，則暗利國王對北國以色列，ē-sái講是貢獻匪淺，伊定lóng撒馬利亞（列王記上十六：23－24），伊mā是帶領北國以色列征服摩押人ê優秀君王，甚至tī伊ê後代beh描述王朝ê輝煌時代，lóng會以「暗利王朝」來做指標。M̄-koh，，伊卻是帶領人民拜偶像ê君王，因為án-ne，在列王記ê作者筆下之評語是：「暗利行上主看做pháiⁿ ê tāi-chì，比伊以前所有ê 王koh khah pháiⁿ(全民版)」（列王記上十六：25）。

Koh再以耶羅波安二世為例，伊mā是對北國以色列非常有貢獻ê君王，tī伊統治長到四十一年之久ê期間內，「收復了所有屬tī以色列ê領土，tùi北方ê哈馬隘口直到南方ê死海。」mā收復了「大馬士革kah哈馬，重歸以色列版圖」（參考列王記下十四：25、28），tī伊ê時代，ē-sái講是北國以色列達到顛峰ê時代，m̄-koh，，作者hō͘伊ê評語是：「伊行上主看做pháiⁿ ê tāi-chì，無離開尼八 ê kiáⁿ 耶羅波安 hō͘ 以色列犯罪 ê(全民版)」（列王記下十四：24）
Tùi列王記thang看tio̍h作者就是用chit種句話──伊做上主看做邪惡ê事──形容一個君王是m̄是有依照上帝ê教示帶領人民。Chit-ê教示是對上帝忠心，禁止以色列人民敬拜偶像。因為án-ne，如果有一個國王帶領以色列人民剷除境內ê偶像神明、祭壇，帶領人民敬拜上帝，chit-ê王就會hō͘評定tio̍h是上帝所歡喜ê王，因為伊行上帝看做對ê事。親像猶大希西家就是一個例，tī伊統治猶大王國廿九年ê時間，列王記ê作者寫落來chit種評語：

「伊行上主所看做好 ê tāi-chì，照伊ê 祖先大衛所行ê 一切。伊廢除山頭壇，毀壞柱像，剉亞舍拉，phah 碎摩西所造ê 銅蛇，因為到hit 時以色列人對它燒香，kā 它叫做Ne-hu-si-tàn1。伊óa 靠上主— 以色列ê 上帝，tī 伊以後ê 猶大列王中無一個會比得伊，伊以前mā 無。因為伊結聯tī 上主，tòe 祂無離開，執守上主所命令摩西ê 誡命。上主kah 伊同在，伊無論去tó 位，全部lóng 興通。伊背叛亞述王，無kā 伊服事。(全民版)」（列王記下十八：3─7）尤其是teh紹介猶大王約西亞ê時chūn，用ê句話koh khah特別，講：「伊行上主所看做好 ê tāi chì，照án-ne 行伊ê 祖先大衛一切ê 路，無偏左mā 無偏右。(全民版)」（列王記下廿二：2）伊並且帶領全國人民「一心一意遵守律法誡命」，koh khah重要ê，是伊重新舉辦已經真久無慶祝ê Pôaⁿ過節，而且成做國家祭典（參考列王記下廿三：21─23）。

Chit本經冊ê特色
Tùi列王記上、下兩卷經冊ê記事，就thang看出編撰者對先知角色kah使命ê重視。先知ê使命就是忠實地傳達上帝ê信息（參考列王記上廿二：14），因為án-ne，當以色列人民偏離上帝ê教示ê時，上帝就差遣先知去警告in。M̄-koh，好ê君王會聽從先知ê話語，只有惡劣ê君王會拒絕聽從上帝忠實僕人先知所傳達ê信息。因為án-ne，拒絕聽從上帝ê話語，等於是teh為家己ê國家、民族帶來災難。列王記編撰者提供真chē先知ê記事，雖然其中有kóa kah舊約聖經中ê先知文獻無仝，m̄-koh基本精神是一致地ê。

Tùi記事ê表面來看，列王記kah-ná是teh記載以色列民族ê「諸王歷史」，其實，貫穿tī chiah-ê史料中ê，則以先知運動為主軸，kā kui個南、北兩個王國歷史hō͘串連起來。Á先知運動ê主軸，就是tī上帝ê話語kah信息。Chit點tùi先知阿摩司傳達hō͘北國以色列耶羅波安二世ê話就thang看出來。雖然耶羅波安二世治理之下ê北國以色列，有真繁榮ê經濟、堅強ê軍事武力，m̄-koh，先知阿摩司卻傳出上帝chit種信息：「你看，日子teh beh 到，我 beh hō͘ 飢荒臨到 tī chit 所在，飢荒m̄ 是因為無餅，嘴乾m̄ 是為tio̍h 無水，就是因為無thang 聽上主ê話。In 會四界去，tùi chit-ê 海到hit-ê海，.tùi 北到東， 走來走去， 走chhōe上主ê 話，mā chhōe 無。當hit 日，súi ê 在室女kah 少年êcha-po͘ 人會因為嘴乾來暈去。Hiah-ê kí 撒馬利亞ê 罪來chiù-chōa，koh kí 但ê 活ê 上帝來chiù-chōa，kohkí 別是巴ê 活路來chiù-chōa ê，in 一定會跋倒，永遠bē koh 起來。」(全民版)」（阿摩司書八：11─14）

Tùi頂面所講chit段話就thang看出在先知ê眼中，in看一個社會、民族、國家存在ê基礎，就是tī tī該國君王怎樣帶領人民聽從上帝ê話語。列王記就是以是m̄是遵行「上帝ê話」作歷史評價。Mā thang án-ne講，列王記編撰者是tùi chit-ê角度下筆，記錄以色列南kah北兩國tī君王治理之下，hō͘ in中肯ê評鑑。

因為án-ne，閱讀此卷經冊，m̄-thang單純tùi政治ê角度看，卻是kā它當做一卷信仰反省ê經冊來讀，án-ne會有koh khah深刻ê瞭解。編撰者是tùi歷史ê經歷作例，teh述說一個國家ê君王若是會失去對上帝真實信仰ê基礎，m̄知影以上帝話語教導來帶領人民，治理國家大政，chit種君王kah人民就會敗壞。Á tńg來到上帝ê話裡，chit-ê論點mā是申命記作者所強調ê（參考申命記十七：18—19）。

Chit本經冊ê主要大綱
1.第一章，記載以色列王亞哈謝kah先知以利亞。
2.第二章，記載先知以利亞kah門徒以利沙。
3.第三章到第八章15節，記載先知以利沙ê事工。
4.第八章16節到第十六章，記載猶大kah以色列諸王ê紹介。
5.第十七章，記載北國以色列被亞述帝國滅亡。
6.第十八到二十章，猶大王希西家ê記事。
7.第廿一章，是關於猶大王瑪拿西kah伊kiáⁿ兒亞們。
8.第廿二章到第廿三章30節，猶大約西亞王ê記事。
9.第廿三章31節到第廿四章，記載關於猶大王約哈斯、約雅敬、約雅斤、西底家。
10.第廿五章，記載猶大被巴比倫帝國所滅，人民受掠到巴比倫做奴隸。