認bat 彼得後書chit本書信

關於後書chit本書信
雖然tī第一章1節寫tio̍h：「我—西門‧彼得是耶穌基督ê僕人kah使徒。我寫phoe hō͘ hiah-ê藉tio̍h咱ê上帝kah救主耶穌基督ê義、kah咱分享仝款寶貴信仰ê人。」，然後tī第17到18節koh講：「伊tùi父上帝接受尊貴、榮耀ê時chūn，咱mā lóng在場。Hit時，至高榮耀ê上帝對伊講：『這是我親愛ê kiáⁿ兒，我喜愛伊。』咱親自kah伊同齊tī聖山頂，親耳聽見這天頂來ê聲音。」（另外參考馬可福音九：2—9）而後tī第三章1節講「我現在寫hō͘ lín ê是第二封phoe」，特別是tī chit句話，有意在表明了chit封後書ê書信kah前書lóng是出自使徒彼得所寫ê。Án-ne看起來，真明顯ē-thang證明作者就是使徒彼得ê身分確實無錯。M̄-koh，，因為「前書」kah「後書」兩封phoe tī文體有顯tio̍h ê無仝，「前書」是以流利ê普通希臘文寫做，而後書則差不多是以比較接近頂真ê文言文體寫做，有點á像正式ê講道篇，mā真像希伯來書所用ê文體。Mā因為án-ne，chit本冊ê作者一直引起聖經學界ê議論。

有人替chit-ê問題做chit種解釋，講是因為使徒彼得所用ê「代冊」無仝，chiah會有「前書」kah「後書」之間ê差異。M̄-koh chit種講法並無被認同，原因是彼得後書ê信息有真chē所在kah猶大書非常相近。因為án-ne，有另外一種看法：彼得後書ê資料來自猶大書ê作者，mā因為án-ne，有人認為chit兩本書信可能出自仝一個人ê手筆。M̄-koh chit種講法mā有真chē值得探討ê所在，因為án-ne，到底彼得後書chit本書信ê作者是什麼人，taⁿ iáu是真chē聖經學者teh討論ê問題。

寫chit本書信ê目的kah時間
作者寫chit本書信有明確ê幾個主要目的：
一是教會受tio̍h ê迫害jú來jú嚴重，因為án-ne，作者寫此書信ê目的就是teh鼓勵信徒，hō͘ in知影基督耶穌teh beh koh再臨，保持聖潔ê生活，才能得tio̍h kah基督耶穌和好ê ǹg望（參考彼得後書三：14）。

二是當時ê教會裡，出現所謂ê「假教師」（參考二：1—3、11），in不時擾亂信徒，有ê信徒tùi án-ne受tio̍h影響偏離了信仰。早期教會出現chit種「假教師」，in mā是siōng令使徒保羅頭殼痛ê人物，in ē-tàng言善道m̄-koh所講ê並無符合聖經ê教示。Chit點mā thang tùi使徒保羅寫phoe hō͘哥林多教會，非常無客氣ê譴責chiah-ê「超等使徒」（參考哥林多後書十一：1—15）。因為án-ne，chit本書信ê作者希望大家tio̍h真確明白聖經ê教示（參考彼得後書一：20—21），才能阻止chiah-ê「假教師」tī教會中隨意散佈荒謬ê言論。

三是作者提醒信徒，tio̍h時時刻刻保持「警醒」ê心靈，m̄免不時替上帝數算末日來臨ê時間。作者beh hō͘信徒清楚知影：替上帝算時間，tī信仰上並m̄是正確ê態度，因為「tī主ê眼中，千年ná一日，一日ná千年。」（參考三：8）

四是希望眾信徒tī信仰上ē-tàng日日進步，án-ne chiah bē ná親像俗語所講ê「豬洗清氣了，koh tńg來到泥沼裡phah滾」（參考二：22），卻是會tī「救主耶穌基督ê恩典中，以及對伊ê認bat上，繼續長進」（參考三：18）。

寫作ê日期必定kah作者是什麼人有關，如果確定是使徒彼得所寫，he應該是tī主後第65年左右。因為使徒彼得是tī尼祿皇帝火燒羅馬城嫁禍hō͘基督徒ê時殉道ê。Án-ne，此本書信應該bē晚tī主後65年。M̄-koh如果m̄是使徒彼得所寫ê，而且若是採自猶大書ê資料，án-ne就必定tī猶大書了後，án-ne就可能tī主後65年了後，甚至koh khah晚。

Thang分做下列幾個段落
一、 序言，第一章1到2節。
二、 被揀選是為tio̍h見證基督ê榮耀，第一章3到21節。
三、 假教師ê言行舉止，第二章。
四、 耶穌基督koh再臨ê日子，第三章。