認bat 撒母耳記下卷chit本經冊

先知撒母耳手中建立君王制度
撒母耳記上卷是tùi祭司以利開始，續接先知撒母耳。先知撒母耳結束loh以色列人長到三百gōa年ê士師統治時代，tī伊ê手上建立了以色列人ê王國制度，伊膏立了第一位君王—掃羅，koh續落來膏立了大衛續接掃羅ê王位。Tùi chia thang看tio̍h tú開始ê君王制度，m̄是世襲制，卻是上帝揀選並且派先知膏立指定ê對象為王。Ē-sái講是，tùi大衛王了後，就無koh是上帝直接揀選君王來管理以色列人民kah國政，卻是變成父傳子ê世襲制度。有chit種世襲制度ê想法，是掃羅做王ê時就開始有chit種計劃，這mā是掃羅想出所有ê辦法beh殺害大衛ê原因（參考撒母耳記上二十：31），m̄-koh這m̄是上帝所歡喜ê事。

撒母耳記上卷，除了描述掃羅執政時代所發生ê tāi-chì外，其實，編者用真長ê篇幅，tùi第十八章開始直到最後ê第三十一章，lóng teh描述掃羅kah大衛之間ê互動關係。Á in之間ê故事，主要就是掃羅想盡一切辦法，非beh kā大衛除掉chiah罷休。M̄-koh最後掃羅kah伊ê三個kiáⁿ兒lóng戰死戰場，包括伊原本計畫培養來繼承伊ê王位ê大kiáⁿ約拿單，mā kah伊同時戰死tī基利波山kah非利士人ê戰役中。

撒母耳記下chit卷經冊
撒母耳記下卷，是tùi大衛續接掃羅了後，成做以色列人民ê領導者開始講起，直到伊年老tú-tio̍h宮廷真chē不如意ê事為止，總共長到廿四章ê篇幅，lóng是以大衛為主軸，紹介伊一生tùi掌權到墮落ê經過。作者tùi伊開始治理家己所屬ê猶大支派所轄區，到伊統一全以色列各支派，並且繼續擴張版圖，tú好應驗ā創世記第十五章18到21節記載ê，上帝應允亞伯拉罕ê話。而作者tī chit本經冊ê最後，是以大衛違背上帝ê旨意，致使以色列人民tú-tio̍h上帝以極大ê瘟疫災難懲罰in作為結束。這tú好說明一個中心觀念：一個人若m̄是一生lóng繼續遵守上帝ê旨意kah教示，真容易tī順境中，特別是顛峰ê時ê權勢中，bē記得上帝chiah是性命ê主宰，這mā teh顯明人ê有限kah軟弱。

Tī下卷chit本經冊中，共計廿四章ê篇幅，作者kā主要重點khǹg tī大衛建立耶路撒冷成做「聖城」。Chit-ê城後來就成做建立耶路撒冷聖殿ê基礎，chit點tùi大衛kā約櫃引chhōa tńg來耶路撒冷thang看會出來。自從約櫃遷徙入耶路撒冷城了後，hit-ê城就成做全以色列人民敬拜上帝ê中心城市，tī所羅門王建造聖殿完成了後，耶路撒冷城tī kui個以色列民族中達到siōng高峰。雖然大衛bat有想beh建造聖殿ê心願，ē-sái講是並無成功。M̄-koh，伊構畫出hō͘耶路撒冷成做榮耀上帝聖名ê中心，chit點則kui本下卷ê另外一個中心題旨。

Koh講，撒母耳記下卷ê作者mā特別記落來chit種認bat：就算像大衛án-ne偉大ê君王，是上帝所親自揀選ê僕人，mā會tī伊聲望達到siōng顛峰ê時chūn，bē記得上帝ê教示，做出違背倫常、傷天害理、殘害人命、奪人ê bó͘ ê事。Mā因為chit件事，其影響所及ê，是hō͘伊ê kui個家庭會失去秩序，m̄-nā kiáⁿ兒mā跟tòe做出亂倫ê行為，甚至是互相殘殺，續落來就是kiáⁿ兒背叛伊ê事等。其實，chiah-ê lóng tī說明父母ê行為，會成做子女學習ê樣式。撒母耳記ê作者想beh提醒所有ê讀者注意一件重要ê信仰認知：一個人若是bē記得上帝ê教示，就會失去性命ê根基，連帶ê就動搖性命siōng重要ê基礎。M̄-nā家己建立起來ê基業會敗壞，mā會連累到後代kiáⁿ孫，hō͘ in背離上帝ê旨意kah教示。

Tī長到廿四章ê篇幅中，作者tùi第十一章紹介大衛犯淫亂罪開始，直到第二十章止，用長到十章ê篇幅，就是teh說明自從大衛犯罪了後，kui個以色列國內，特別是宮廷內紛爭不斷、動盪不安。這lóng tī說明一件事：人性ê軟弱。Chiâⁿ如使徒保羅所講ê，家己所想beh做ê善，m̄-nā無去做，而家己無應該做ê惡，卻一犯koh再犯（參考羅馬書七：19）。聖經ê作者用chit種方式teh表達一個理念：人是真有限而且軟弱ê。Ná親像大衛仝款，即使有真好ê信仰，mā會有極軟弱ê一面。

本冊thang分做下列幾個段落
1.大衛作猶大王—第一到四章。
2.大衛作全以色列人民ê王—第五章。
3.運約櫃入耶路撒冷城—第六章。
4.上帝ê應允kah大衛ê感恩—第七章。
5.大衛執政後ê以色列國，其國政kah國家版圖擴張—第八到十章。
6.大衛犯罪，以及伊家庭紛亂ê記事—第十一到十四章。
7.kiáⁿ兒押沙龍叛亂，以及大衛逃離王宮—第十五到十七章。
8.大衛弭平叛亂—第十八章。
9.大衛重tńg去耶路撒冷執政—第十九到廿四章。