讀使徒行傳chit本教會歷史冊
如果tio̍h用一句siōng簡單ê話來說明使徒行傳chit本冊，它ē-sái講是siōng早記載基督教會歷史ê一本經冊。Thang tùi chit本經冊中清楚看tio̍h早期眾使徒宣教工作ê路線，以及in tī宣教工作中種種ê遭遇、經歷。

了解使徒行傳重要性ê人應該清楚，chit本史冊對基督教信仰發展ê影響非常ê大。當早期教會teh討論是m̄是beh kā使徒保羅所寫ê書信khǹg入新約正典裡ê時，chit本hō͘冊發揮了決定性ê影響，因為有chit本史冊，後代ê基督徒chiah會得thang明白使徒保羅tī宣教工作上ê努力kah貢獻。雖然tī使徒行傳、路加福音chìn前，使徒保羅ê書信早to̍h tī教會中流傳，m̄-koh真可能因為chit本史冊ê緣故，大家jú發加倍珍惜使徒保羅ê書信，chiah hō͘伊ê書信廣傳到各地ê教會去。

外邦人加入基督教會
Koh講，使徒行傳除了thang看tio̍h早期基督徒受tio̍h嚴重ê迫害外，mā tùi chit本經冊知影外邦人加入基督教會ê經過。使徒行傳第十五章記載基督教會歷史上非常重要ê一pái會議—耶路撒冷會議。Chit-ê會議是tī主後49年召開ê，主要ê目的是討論有關外邦人加入基督教會ê問題。作者談到chia次會議ê時，雖然kan-taⁿ用「經過長時間ê辯論」（參考使徒行傳十五：7a）chiah-ni̍h簡單ê一句話，m̄-koh卻thang想像其間必定經過非常冗長ê辯論，chiah得tio̍h外邦人m̄免接受割禮mā thang加入教會ê結果。當然，tùi加拉太書中thang發現：耶路撒冷教會ê眾領袖並m̄是真心、實在同意chit-ê決定，卻是出tī非常勉強，chit點tùi彼得以及原先kah使徒保羅siōng同心ê宣教同工巴拿巴，lóng m̄敢tī公開ê場合kah外邦人聚做伙食飯（參考加拉太書二：11—14）thang看會出來。

一本記錄教會受難史ê經冊
當使徒行傳記載有關教會受迫害ê事件ê時，mā同時看見上帝奇妙ê手teh帶動歷史ê行向。Thang án-ne講：使徒行傳就是一本教會受迫害ê歷史。Tùi第四章開始到第廿八章，lóng有眾使徒tī宣教事工上受tio̍h迫害ê記錄。包括：
彼得kah約翰受掠入獄（參考四：1—4）；
眾使徒被囚禁（參考五：17）、被phah、警告（參考五：40）；
司提反被殺害（參考六：8—13，七：54—60）；
信徒受tio̍h迫害，分散四界，m̄-koh卻未停止宣教工作（參考八：1—5）；
信徒繼續受tio̍h迫害（參考九：1—2）；
掃羅受tio̍h迫害（參考九：23—25，九：29—30）；
司提反事件ê延續（參考十一：19—21）；
希律迫害教會，約翰ê兄哥雅各被殺、彼得被關（參考十二：1—5）；
迫害使徒保羅kah巴拿巴（參考十三：45—50）；使徒保羅kah巴拿巴tī以哥念受tio̍h凌辱（參考十四：1—7）；

Tī路司得，使徒保羅被猶太人用石頭丟phah，差一點á死去（參考十四：19）；
使徒保羅kah西拉tī腓立比被棍phah kah監禁（參考十六：16—24）；
使徒保羅tī庇哩亞受干擾（參考十七：13—14）；
使徒保羅tī哥林多被拉上法庭控告（參考十八：12）；
Tī以弗所，該iáu kah亞里達古被掠（參考十九：29）；
猶太人設計beh殺害使徒保羅（參考二十：3）；
保羅受掠，以及伊上訴羅馬法庭ê經過（參考廿一：27到廿八章）。

Tùi頂面所講資料thang了解kui本使徒行傳，就是一部教會受迫害ê歷史。M̄-koh就tī人（尤其是手上握有政治權力ê人）看起來教會已經消滅了、無希望ê情況下，上帝奇妙ê手開始顯現出祂對人類歷史引chhōa ê方向。Tùi使徒行傳第八章kah第十一章，lóng thang看tio̍h chiah-ê受tio̍h迫害ê基督徒m̄-nā無退避，卻是換方向到各地去傳耶穌ê信息。上帝ê靈感動chiah-ê傳福音ê人，mā感動hiah-ê聽福音ê人，福音就án-ne傳開了。有甚麼人想tio̍h結果會是án-ne？有toh一位猶太人ê宗教領袖teh迫害基督徒ê時chūn，想tio̍h帶來chit種反效果？這mā就是有人án-ne描述基督教會：「教會是建立tī基督kah殉教士ê血ê基礎上。」chit句話tùi使徒行傳看起來確實是一點mā bē-bái。

宣教工作ê特色
眾使徒tī宣教ê過程中有幾個重要ê特色真值得咱注意：
1.宣教工作並m̄是固定tī一個所在。
這kah今á日ê傳道者固定守tī一間教會ê宣教型態真不相符；使徒保羅宣教上siōng大ê特色，是四界去傳福音；耶穌ê宣教工作mā是四界周遊，行遍各村鎮。福音書ê作者siōng常用ê一句話是「耶穌繼續tī附近各村莊教導人」（參考馬可福音六：6），á是「耶穌周遊各市鎮鄉村，tī各會堂內教導人，宣講天國ê福音，並治好民間ê各種疾病」（參考馬太福音九：35）。

Chit種情形mā是早期台灣基督長老教會傳道ê方式；眾宣教師是以一個據點為中心，然後四界向外傳福音。親像：in以台南府為中心，然後往台南府ê四周去傳福音、開拓教會。

2.有聖神ê同在，hō͘受迫害者無koh驚惶，反tńg koh khah勇敢地去傳揚福音ê信息。
Chit種信仰ê力量，m̄是來自人為ê訓練，卻是來自聖神ê充滿。掀開教會歷史ê資料，就會發現世界各地ê宣教史蹟充滿chit種經驗、經歷。迫害jú是嚴重ê所在，常常是jú有見證ê所在，chit種迫害kah見證呈正比ê情形即使tī今á日ê基督教會mā然。親像中國ê「地下教會」，tī中國共產黨政府ê政策下，它是違法ê宗教團體，m̄-koh，tī中國卻是基督教教勢發展siōng快速，mā是siōng興旺ê宗教團體，中國共產黨政府取締jú厲害，信徒ê信心是jú堅定。為甚麼會án-ne？坦白講，無人ē-tàng回答chit-ê問題。唯一ē-tàng說明ê理由，就是聖神ê同在。

聖神，這是使徒行傳chit本經卷非常重要ê一個主題。Tī第一章8節，耶穌對門徒講：「M̄ -koh 聖神臨到lín ê 時，lín 會得tio̍h能力，thang tī 耶路撒冷、猶太全地kah撒馬利亞，一直到天邊海角，為我來做見證。(全民版)」Chit句話講出基督教會teh傳福音事工上ê特色，就是根據聖神ê引chhōa做工，卻m̄是靠個人ê能力。Chit節mā ē-sái講是使徒行傳ê主軸。作者路加就是beh kā所有ê信徒講，ē-tàng帶領人歸屬基督耶穌ê，並m̄是人ê能力hō͘然，卻是聖神藉tio̍h人做祂拯救ê工作，chit-ê認bat非常重要。無聖神工作，人tī福音ê事工上ê努力不可能有任何結果ê，chit點是作者想beh表達ê信念。

團契生活ê重要性
這mā是使徒行傳提供ê寶貴資料。作者路加描述早期教會充分表現出信仰團契ê特質：大家如仝一個家人。基督教會chit-ê信仰團契有幾個特點：
1.同心祈禱（參考一：14，二：42，四：24、31，六：6，八：15，十二：5，十六：25，二十：36，廿一：5）。同心祈禱是行過艱困ê力量來源，to̍h是幫助人行過艱困siōng有力ê方法。

2.分享kah分擔（參考二：42—47、六：1—7，比較出埃及記十六：17—18）。這是信仰團契ê基礎，mā是基督教信仰ê特質。分享是見證信仰siōng好ê方法，分享本身就是siōng奇妙ê神跡。

3.真實不欺ê心。Chit點是成做信仰團契siōng-kài重要ê條件，原因是誠實就是teh見證信仰。任何人加入基督ê信仰團契，一定tio̍h有chit種態度，若無，，就是teh欺騙上帝。Tùi亞the̍h尼亞kah掖非喇ê欺騙事件（參考五：1—11），thang體會tio̍h「誠實」對信仰團契ê重要性：無誠實，就無法度達到真正「同心合意」（參考二：46，四：32，五：12）。信仰團契若beh減少紛爭，siōng重要ê就是真實ê心，缺少它，chit-ê信仰團契不可能平靜，甚至會因為有人不誠實，而hō͘信仰ê本質丕變。

寫作ê日期
Chit本冊是甚麼時chūn寫ê？一般來講有兩種講法：
其一，是tī主後62年左右。原因是chit本冊只記載到使徒保羅來到羅馬城，並無進一步記載關於主後65年羅馬城被焚，基督徒遭遇tio̍h大迫害ê事件。而且以作者路加是án-ne細膩記載宣教事蹟ê人，尤其是記載眾門徒tī宣教工作上tú-tio̍h ê迫害，無jōa可能kā chit件事bē記得，á是忽略掉。使徒保羅kah彼得lóng可能tī chit pái羅馬城被焚事件後殉道。另外一點，主後70年，耶路撒冷聖殿被羅馬kā軍提多（Titus）率軍摧毀。這是大事件，是猶太人傷痛至極ê境遇，對基督徒來講有真大ê意義。M̄-koh，，作者路加mā無提起chit pái事件。Koh講，chit本冊只記錄到使徒保羅被送到羅馬，無進一步記錄有關伊受審ê情形。因為án-ne，chit本冊真可能是tī主後62年左右寫成ê。

其二，此書寫tī主後72年以後。持chit種看法ê理由是：a.路加福音大約寫tī主後70到80年之間，使徒行傳無jōa可能比chit-ê時間koh-khah早成冊，因為使徒行傳是比路加福音iáu-beh晚期ê作品（參考使徒行傳一：1）。B.因為tī第一章8節作者路加有講tio̍h福音beh傳到「耶路撒冷、猶太，kah撒馬利亞全境」，而使徒保羅tī主後67年左右殉道，耶路撒冷聖殿tī主後70年被摧毀，如果作者kā使徒保羅ê殉道、耶路撒冷聖殿ê破碎lóng記錄落來，顯然kah第一章8節ê主軸思想無符合。C. Án-ne，為甚麼chiah-ni̍h注意社會事件發生ê作者，會kā頂面所講兩個重大事件—羅馬城被焚、耶路撒冷聖殿被摧毀—忽略了？有可能是因為tī路加福音第廿一章20到24節中，作者已經有提起相關ê暗示：

「當lín看見耶路撒冷被敵軍圍困ê時，lín就知影它teh要被毀滅了。Hit時候，tòa tī猶太ê，tio̍h逃到山頂去；tòa tī城內ê，tio̍h出來；tòa tī庄腳ê，mài進城。因為這是『懲罰ê日子』，beh hō͘聖經上ê話lóng得應驗。Tī he些日子裡，孕婦kah哺育嬰á ê母親就苦了！嚴重ê災難kā臨到chit-ê所在，上帝ê義憤beh降tī chiah-ê人民身上。In會死tī刀劍下，á是被俘虜到各國去。異教徒beh踐踏耶路撒冷，直到in ê期限滿。」
而使徒保羅殉道á是受審ê過程，tī當時ê基督徒中是人盡lóng知ê事，無必要siuⁿ加贅述。因為án-ne第二種看法認為chit本冊是比較晚期ê作品。

Chit本冊ê特色
作者路加真用心地講述對基督教信仰應有ê正確態度，就是相信耶穌是上帝所差來ê救主，伊ê救贖並無只是hō͘猶太人ê，卻是為tio̍h全人類。
向人傳講耶穌ê死kah koh活，是相信耶穌主要ê見證方式，chit點mā是使徒行傳chit本冊ê siōng重要ê記事。它記載早期ê基督徒四界去見證耶穌，是為tio̍h咱ê罪來死，上帝hō͘伊tùi死裡koh活。這見證就是「福音」ê主體。

讀完使徒行傳，thang了解今á日ê教會其實繼續teh寫「使徒行傳」，á是講應該有chit種認知：今á日教會存在ê使命，就是繼續眾使徒未完成ê工作—到天涯海角為koh活ê耶穌作見證（參考使徒行傳一：8）。用chit種心境來à解作基督徒ê意義，用chit種瞭解來看今á日基督ê教會，就會比較清楚作者路加ê用心了。

Thang分做幾個段落來看
一、耶穌koh活升天，以及門徒揀選馬提亞取代猶大。第一章1到26節。
二、聖神降臨在門徒身上，福音事工大大興旺。第二章1到六章7節。
三、教會受tio̍h迫害，以及福音向外邦傳播。第六章8節到八章40節，第九章32節到十二章25節。
四、掃羅歸屬主耶穌並開始傳福音。第九章1到31節。
五、耶路撒冷會議。第十五章1到35節。
六、使徒保羅ê宣教工作：
1.第一pái旅行傳道。第十三章1節到十四章28節。
2.第二pái旅行傳道。第十五章36節到十八章22節。
3.第三pái旅行傳道。第十八章23節到廿一章16節。

七、使徒保羅tī耶路撒冷受掠kah審問。第廿一章17節到廿六章32節。
八、使徒保羅赴羅馬上訴ê經過。第廿七章1節到廿八章31節。

Mā thang分做下列無仝ê段落
一、依照人物來分：
1.彼得kah其他使徒，以及siōng早ê信徒。第一章1節到六章7節。
2.司提反事件。第六章8節到八章3節。
3.腓利ê宣教工作。第八章4節到八章40節。
4.掃羅歸屬基督。第九章1到31節。
5.彼得ê見證。第九章32節到十二章25節。
6.使徒保羅ê見證：
A.第一pái旅行傳道。第十三章1節到十四章28節。
B.第二pái旅行傳道。第十五章36節到十八章22節。
C.第三pái旅行傳道。第十八章23節到廿一章16節。
7.使徒保羅tī耶路撒冷受掠kah審問。第廿一章17節到廿六章32節。
8.使徒保羅赴羅馬上訴ê經過。第廿七章1節到廿八章31節。

二、依照城市、地區分段落：
1.以耶路撒冷為中心ê宣教工作。第一章到六章7節。
2.發展到猶大kah掖瑪利亞地區。第六章8節到九章31節。
3.發展到該撒利亞kah安提阿地方。第九章32節到十二章24節。
4.使徒tī小亞細亞地區。第十二章25節到十六章5節。
5.使徒保羅到馬其頓、雅典、哥林多、以弗所ê經歷。第十六章6節到十九章20節。
6.tùi耶路撒冷到羅馬。第十九章21節到廿八章31節。

三、按照經文記事分段落（這mā是使徒行傳chit本冊特別ê所在，tī下列ê段落處，lóng會有類似「上帝ê信息傳開，信徒人數增加」chit種話句出現）：
1.第一章1節到六章7節。
2.第六章8節到九章31節。
3.第九章32節到十二章24節。
4.第十二章25節到十六章5節。
5.第十六章6節到十九章20節。
5.第十九章21節到廿八章31節。

（本冊經文採用opensource/copyleft ê《全民台語聖經》，tī chia特別致謝。）