認bat 阿摩司書chit本經冊

關係先知阿摩司kah伊ê時代背景
「Chiah-ê 話就是tī 猶大王烏西亞年間，就是以色列王約阿施ê kiáⁿ 耶羅波安ê 年間，地動以前兩年，所看tio̍h 講tio̍h 以色列ê tāi-chì。(全民版)」（一：1）簡單ê一段句話，除了「大地動前兩年」無詳確ê資料thang chhōe外，南、北二國王朝ê時代是非常清楚ê。

烏西雅做南國猶大ê王，這是tī主前792到740年之間。Á耶羅波安二世執政北國以色列ê王位期間，是tī主前793到753年。Á先知阿摩司則大約tī主前760到750年chit段ê時期，伊受tio̍h呼召出來傳達上帝ê信息。

先知阿摩司是南國猶大ê「提哥亞」人，he是設tī伯利恆以南約十公里，距離耶路撒冷大約有十八公里遠ê一個小村落。伊「是一個顧羊人，mā是看管桑樹ê作穡人」（參考七：14），m̄-koh卻hō͘上帝呼召向北國以色列傳上帝ê信息，chit點mā是比較khah特殊ê所在。

伊hō͘上帝呼召出來傳信息ê時，北國以色列tú好是耶羅波安二世執政統治。伊ē-sái講是北國獨立建國以來，siōng有成就ê一位國王。Tī伊執政之下，國勢ê興盛遠遠超過北國以色列建國了後ê任何國王。論經濟，呈現出來ê是一片繁榮ê景象；論軍事，列王記ê作者有án-ne描講述：

「伊收復了所有屬tī以色列ê領土，tùi北方ê哈馬隘口直到南方ê死海。」

「耶羅波安二世其他ê事蹟，伊tī戰場上ê英勇以及怎樣收復大馬士革kah哈 馬、重歸以色列版圖等，一一記載tī以色列列王史上。」（列王記下十四：25、28）這就thang看出耶羅波安二世ê英勇，kah伊tī軍事上ê成就。仝款ê，一個國王ē-tàng tī經濟上、軍事頂面有chit種成就，一定tio̍h有非常靈活ê政治手段，以及優秀ê統馭能力，若無，單單是beh指揮軍團出兵他國，就真可能會引發政敵覬覦權位，造成軍事政變，á是國內ê不安。Koh講，若是軍事、國防不足，mā真容易引起附近國家ê圍剿。

先知以「是m̄是遵行上帝ê話」看社會

M̄-koh，仝款是列王記作者，teh記載耶羅波安二世ê成就ê時，mā記了chit種一筆講：

「猶大王約阿施ê kiáⁿ 亞瑪謝十五年，以色列王約阿施ê kiáⁿ 耶羅波安tī撒馬利亞坐位，總共做王四十一年。伊行上主看做pháiⁿ ê tāi-chì，無離開尼八ê kiáⁿ 耶羅波安 hō͘ 以色列犯罪 ê。(全民版)」（列王記下十四：23—24）

為甚麼會有「做上主看做邪惡ê事」、「領以色列人犯罪」？這確實kah伊tī經濟、軍事、政治上ê成就有真大ê cheng差。其實這就是先知文獻中siōng寶貴ê所在，因為先知是上帝揀選ê僕人，in看一個民族、社會，á是國家ê優劣，並m̄是tùi經濟、政治、軍事ê強弱來看，卻是tùi信仰ê角度teh量、評鑑。對tī無遵行上帝話語ê，即使kui個國家、社會非常繁榮富裕，mā bē是上帝所賜福，chit種景象真緊to̍h會消失，甚至嚴重者iáu會帶來上帝嚴厲ê懲罰。因為無遵行上帝ê話，人民就會亂紀，各種敗壞ê行為會接連不斷。M̄-koh一般人lóng會歡喜tùi經濟、軍事、政治等方面看一國家、社會ê未來。北國以色列人民就是一個典型例，in tī耶羅波安二世ê治理之下，國家呈現出一片繁榮景象，lóng認為he是上帝賜福，必定會長治久安，而且會成做迦南地ê霸權。甚至迦特‧希弗人亞米太ê kiáⁿ兒先知拿單mā án-ne預言，認為耶羅波安ê出現，是上帝beh藉tio̍h伊來幫助北國以色列人民（參考列王記下十四：25—26）。

M̄-koh先知阿摩司卻tùi當時北國以色列社會ê敗壞，看tio̍h上帝ê憤怒真緊to̍h會臨到，除非以色列人民真正tńg來chhōe上帝，若無，嚴厲ê懲罰絕對躲不掉。先知阿摩司真清楚指出北國以色列tī耶羅波安二世統治之下，敗壞ê嚴重情況講beh上帝不憤怒mā難。先知阿摩司講：「為tio̍h 以色列人犯罪到第三pái，mā 到第四pái，我無beh免除它ê 刑罰；因為in 出賣義人來得tio̍h 錢，出賣sàn-chhiah 人來得tio̍h 一雙鞋。Sàn-chhiah 人頭殼頂ê 塵埃是in 所意愛ê，枉屈溫柔ê 人ê 做人道理。父 kiáⁿ 做伙親近一個少年 ê cha-bó͘ 人，致使褻瀆我ê 聖名。 In tī ta̍k 個壇邊倒tī 人做準當ê 衫，koh tī in ê 上帝ê 殿內lim 受罰ê 人ê 酒(全民版)」（二：6—8） 「因為in bē 曉行正直，就是用強暴kah 搶劫ê 物，積聚tī in ê 宮殿內。這是我— 上主講ê。(全民版)」（三：10）「Lín 巴珊ê 牛母，tiàm tī 撒馬利亞山ê，lín tio̍h 聽chit-ê 話：Lín 欺負sàn-chhiah 人，壓制艱苦人，對 in ê 丈夫講：捀（phâng）酒來 hō͘ 阮lim (全民版)」（四：1）

「Chiah-ê 人怨恨hit-ê tī 城門責備人ê， 討厭hit-ê 講正直話ê。因為lín thún 踏sàn-chhiah 人， 勒索伊ê 麥á；所以，lín 用雕琢ê 石頭起厝，總是，bē-tàng khiā tī hit 內面；栽種好ê 葡萄園，mā 無thang lim 它ê 酒。因為我知lín ê 罪過有jōa-ni̍h chē，lín ê pháiⁿ 是jōa-ni̍h 大。Lín pháiⁿ 款待義人， 接受人ê 烏紗，.tī 城門口冤枉sàn-chhiah 人。所以，通達ê 人看tio̍h chit 款時勢，伊會恬恬無講話，因為時勢真bái。(全民版)」（五：10—13）

「Lín倒tī象牙ê眠床，theⁿ tī安樂椅，食羊群中ê羊á kah稠內ê牛á ê肉，彈琴、彈瑟，唱家己隨意編ê歌曲，為家己做樂器，親像大衛。用碗lim酒，用siōng 好ê 油抹家己，總是，無為約瑟ê 敗壞擔憂(全民版)」（六：4—6）

「亞瑪謝koh 對阿摩司講：「你chit-ê先見， 你去，tio̍h 走去猶大地，tī hia thàn 食，tī hia 做先知。總是，m̄-thang koh tī 伯特利講先知話； 因為tīchia 有王ê 聖所，有王家ê 宮殿。」(全民版)」（七：12—13）

「Lín chiah-ê ài 吞食sàn-chhiah 人，hō͘ chit 所在 ê 困苦人衰敗 ê 人，tio̍ h 聽chit-ê 話！ 5 Lín 講：「月ê 初一甚麼時過去，hō͘ 阮 thang 糶五穀？安息日甚麼時過去，hō͘ 阮 thang 賣麥 á，用細 ê 伊法，用重ê 舍客勒，用詭詐ê 天秤來騙人，thang 用錢來買sàn-chhiah 人，用一雙鞋來換sàn kah 鬼都驚ê 人，kā pháiⁿ ê麥 á 賣 hō͘ 人？」(全民版)」（八：4—6）

看，tùi頂面所講ê經文就ē-tàng明白北國以色列雖然tī經濟上非常富裕，m̄-koh tùi官員到一般人民lóng是存tio̍h貪婪ê心，而且嚴重ê情況khah贏過以前ê任何世代。特別是有錢、有地位ê人，m̄-nā無存憐憫ê心對待家己貧困ê同胞，iáu用koh khah嚴苛ê手段欺負、搾壓in，甚至是用一雙鞋á ê價錢，就會因為sàn-chhiah來賣身ê同胞hō͘買了去做奴隸，而且tī法庭中m̄-nā無保護chiah-ê弱勢者，反卻是變本加厲地冤屈in。Koh khah嚴重ê是，連伯特利ê祭司亞瑪謝mā出來阻擋先知阿摩司傳達上帝ê信息。一個社會如果富足到連上帝ê話lóng m̄甩，甚至拒絕聽從ê時chūn，he chiah是真正危險訊號。這mā就是為甚麼後來先知阿摩司傳出上帝ê信息講：

「你看，日子the beh 到，我 beh hō͘ 飢荒臨到 tī chit 所在，飢荒m̄ 是因為無餅，嘴乾m̄ 是為tio̍h 無水，就是因為無thang 聽上主ê話。In 會四界去，tùi chit-ê 海到hit-ê海，.tùi 北到東， 走來走去， 走chhōe上主ê 話，mā chhōe 無。(全民版)」（八：11—12）

在先知阿摩司ê看法裡，若是無上帝ê賜福、看顧，所有強大ê經濟成就、軍事武力、政治勢力等等lóng會真緊成做泡沫化做烏有。Tùi chia mā thang了解到，kui本聖經ê作者就是teh見證一點：「祂 hō͘ 你謙卑，hō͘ 你 iau 餓，用你所m̄ -bat，你ê 祖先mā m̄ -bat ê 嗎哪養飼你，hō͘ 你 thang 知人 m̄ 是 kan-taⁿ óa 靠餅來活，人是óa 靠上主ê 嘴所講一切ê 話來活。(全民版)」（申命記八：3b）

先知阿摩司信息ê特色
先知阿摩司雖然是hō͘列為「十二小先知」中ê一位，m̄-koh，，伊ê信息卻是非常hō͘人震撼ê，因為伊提出ê信息kah以往以色列人民所認知ê無仝。親像：

一、伊是事(tāi)先重新解釋「上主日子」ê意思義ê先知，並且告知以色列人民期待這日子來臨是等於期待災難降臨仝款。

二、以色列人民過去期待ê「上主ê日子」，是一個榮耀、得勝ê日子。

傳統上in認為「hit日子來臨」ê時，就是萬國萬民lóng會歸順到以色列ê管裡之下。M̄-koh，，先知阿摩司卻警告in講，除非是悔改，若無，無論到tó位去，lóng躲不開上帝tī「hit-ê日子」來臨ê時，對以色列人民ê懲罰。伊kā民眾講，期待chit種日子ê來臨，kan-taⁿ會tú-tio̍h災難，而且痛苦ná親像魚被魚鉤鉤tòa仝款面臨死亡（參考阿摩司書四：2）。伊進一步提出警告講：「Lín 仰望上主ê 日子ê 有災禍！Lín án 怎仰望上主ê 日？ Hit 日是暗，m̄ 是光，是親像人閃避獅來逃走，koh 去tú-tio̍h 熊， 入去厝內手一下óa壁，就 hō͘ 蛇咬 tio̍ h。上主 ê 日子 kám m̄ 是暗暗無光，烏暗無光明？(全民版)」（五：18—20）

先知阿摩司是kā傳統以色列人民所期待ê歡喜日子，重新定義，伊講hit日子to̍h是災難臨到ê時刻。原因是人不應該一面做pháiⁿ，一面iáu teh期待koh khah chē ê賜福，這是絕對不可能實現ê事。

二、tī伊ê信息中非常突顯ê一點，就是信仰一定tio̍h kah社會生活親密結合做伙。

這mā就是講，一個人ê心中是m̄是真正有上帝，就是先tùi伊怎樣過社會倫理道德ê生活來看，如果一個人tī倫理道德生活上墮落，卻口口聲聲講伊信上帝，mā去參加敬拜，ná等於是撒謊，mā是藐視上帝ê尊嚴仝款。先知阿摩司就是用真強猛ê語調批判hiah-ê tī社會道德生活上墮落ê人，認為in ê心靈已經是麻痺到根本體會不出上帝ê憤怒to̍h是將來臨。

因為án-ne，tī伊ê信息中，真明顯ê ē-tàng看出伊非常強調：富人有使命去關心貧困、窮乏人ê需要，有權勢ê人就一定tio̍h照顧弱小、軟弱無力ê人。伊傳出ê信息中，一再譴責hiah-ê為富不仁ê人，以及hiah-ê收受o͘-se而手中卻握司法大權ê審判官。In因為欺詐、收受o͘-se所累積起來ê財富，kan-taⁿ會加速社會ê敗壞，甚至為國家、社會帶來滅亡ê結果。其實，就tī伊傳達信息了後，無jōa久，主前721年，北國以色列就被亞述帝國hō͘消滅，人民被掠到亞述去做奴隸了（參考列王記下十七：1—6）。

三、先知阿摩司ê信息特別強調實踐社會公義khah贏過獻祭，為hiah-ê受冤屈ê人伸冤，比tī聖殿裡唱好聽頌讚ê詩歌koh khah重要。

先知阿摩司指出當時北國以色列充滿tio̍h不公平ê景象，真chē有權勢ê人奉獻貴重ê牲祭，m̄-koh in ê奉獻卻是tùi貧困ê窮乏人中剝削得tio̍h ê。因為án-ne，無論in所獻上ê牲祭是jōa-ni̍h-á貴重，對上帝來講lóng是一種侮辱，kan-taⁿ會hō͘上帝感覺見笑，污穢了上帝神聖ê名。伊傳出上帝ê信息án-ne講：

「上主án-ne 講：「我討厭，我看輕lín ê 節期，mā 無歡喜lín ê 嚴肅會。Lín 雖然獻燒祭 kah lín ê 素祭 hō͘ 我，我mā 無歡喜，lín 獻肥ê cheng-seⁿ 做謝恩祭，我無 beh 鑒納。Tio̍ h hō͘ lín 唱歌ê 聲離開我，因為我無beh 聽lín 彈琴ê調。獨獨 tio̍ h hō͘ 公平親像大水直直流，hō͘ 公義親像長流 ê 江河。(全民版)」（五：21—24）

Chit段話thang講是阿摩司書siōng重要ê一段經文，mā是chit本冊ê中心信息。

四、先知阿摩司是tāi先提出：耶和華上帝m̄-nā kan-taⁿ是以色列人民ê上帝，mā是所有族群ê上帝，祂管理萬族萬民，是一個無所不在ê上帝。

Chit點tùi tī chit本經冊ê起頭就thang清楚看tio̍h，先知阿摩司就先對以色列四周ê民族、國家提出上帝審判ê信息，所講述ê方式lóng kah對以色列人民所提出ê控訴仝款，親像：

「為tio̍h 大馬士革犯罪到第三pái，.mā 會到第四pái，我無beh 免除對它ê 刑罰；因為伊用phah 五穀ê 鐵器phah 基列。(全民版)」（一：3）

「為tio̍h 迦薩犯罪到第三pái，mā 到第四pái， 我無beh 免除對它ê 刑罰；因為in 掠kui 族ê 人民交hō͘ 以東 。(全民版)」（一：6）

「為tio̍h 推羅犯罪到第三pái，mā 到第四pái， 我無beh 免除對它ê 刑罰；因為in kā kui 族ê 人民交 hō͘ 以東，mā 兄弟 ê 盟約。(全民版)」（一：9）

「為tio̍h 以東犯罪到第三pái，mā 到第四pái， 我無beh 免除對它ê 刑罰；因為伊gia̍h 刀jiok 伊ê兄弟，lóng 無憐憫，伊ê 受氣猛烈，發出來就無soah，永遠khǹg 受氣。(全民版)」（一：11）

「為tio̍h 亞捫族犯罪到第三pái，mā 到第四pái，我無beh免除它ê 刑罰；因為in 破開基列有娠孕ê cha-bó͘ 人，beh 開闊 in ê 境界。(全民版)」（一：13）

「為tio̍h 摩押犯罪到第三pái，mā 到第四pái，我無beh免除它ê 刑罰；因為伊kā 以東王ê 骨頭燒做灰(全民版)」（二：1）

「為tio̍h 猶大人犯罪到第三pái，mā 到第四pái，我無beh免除它ê 刑罰；因為in 棄sak 上主ê 教示， 無遵守祂ê 律例。In ê 祖先所遵thàn ê 虛假 hō͘ in 行迷路(全民版)」（二：4）

「為tio̍h 以色列人犯罪到第三pái，mā 到第四pái，我無beh免除它ê 刑罰；因為in 出賣義人來得tio̍h 錢，出賣sàn-chhiah 人來得tio̍h 一雙鞋」(全民版)（二：6）

續落來chit-ê思想發展出來ê，就是上帝乃是個無所不在ê上帝。Chit點在先知文獻中表現kah-ná非常清楚，而先知阿摩司則kā chit種信息傳達得siōng具體；伊講無論以色列人民躲到tó位去，上帝lóng會kā in一個不漏地chhōe出來，kah in算帳。即使是上高山，á是落去到海底、陰間去，lóng逃不出上帝ê掌握（參考九：1—4）。

這真清楚teh說明以色列人民kah其他族群之間並無甚麼特別，上帝bē因為以色列民族是祂ê選民，kah祂立有「性命之約」，對in就比較khah特別。顛倒ê，因為是選民ê緣故，in應該表現kah-ná koh khah好chiah-tio̍h。真可惜ê是，in無án-ne做。因為án-ne，先知阿摩司就傳出上帝ê信息講：「tī全世界hiah-ni̍h chē國厝內，我選上了lín，lín iáu犯hiah-ni̍h chē ê罪；正因為chit-ê緣故，我一定會懲罰。」（三：2，thang對照中文《和合本》ê譯文：「在地上萬族中，我只認bat lín；因為án-ne，我必追討lín ê一切罪孽。」）

先知阿摩司ē-sái講是第一位kā宗教信仰kah民族主義ê優越感分開ê先知，mā是第一位公開談論國家大事ê先知。伊無認為上帝只照顧以色列人民，即使in ê祖先kah耶和華上帝之間有立過「性命之約」。M̄-koh，，上帝mā關心其他ê民族，正親像上帝關心以色列民族仝款。換句話講，上帝所關心ê是所有ê民族，bē只單單賜福以色列民族而已。Ē-sái講是，因為以色列民族ê祖先kah上帝立過「性命之約」，而這代ê以色列人民卻kā chit「性命之約」hō͘忘掉à。因為án-ne，in kā加倍受tio̍h懲罰，因為上帝無法度接受以色列人民án-ne輕視「性命之約」。

是一本反省咱台灣社會siōng好ê信仰經冊
像伊chit種先知，無論ē-tàng toh一個時代，lóng會感覺孤獨，因為伊ê言論kah當時社會ê價值觀cheng差過大。而且tī社會道德生活上要求甚嚴，hō͘當時ê人甚難接受。Ē-sái講是伊對世界ê影響卻是非常深遠，主要原因是伊對當時北國以色列社會ê生活型態ê觀察非常入微，thang講差不多是無微不到，連cha-bó͘人「擦siōng上等ê香水」伊lóng聞得出來！chit對今á日ê傳道者來講，是真值得學習ê功課，就是傳道者一定tio̍h注意社會ê現象，tùi其中看出上帝ê信息。

另外一點，伊ê信息針對hiah-ê達官顯要一屑á都留情，因為伊m̄是teh講家己歡喜ê話，卻是忠實地kā上帝ê信息傳達出來，chit點koh khah是今á日所有傳道者siōng該學習ê忠僕態度。

Koh講，對tī今á日ê基督徒，先知阿摩司ê信息實在是太重要ê了，因為伊kā咱講，一定tio̍h kā信仰實踐tī社會生活上，若無，敬拜方式即使koh再美，奉獻ê金額真chē，mā是枉然，因為上帝對chiah-ê都無興趣。上帝所關心ê是kui個社會倫理生活秩序ê建立，特別是對hiah-ê貧困ê人ê關懷，乃是基督徒ê社會責任。特別是tī今á日台灣社會中，一再貪婪地teh追求經濟發展，卻對貧困ê原住民、農工族群們之疏忽，就ná親像看見耶羅波安二世統治下ê北國以色列ê翻版，而先知阿摩司所傳達ê信息，mā to̍h是對現今台灣社會ê提醒。

Chit本冊thang分做下列段落
一、先知阿摩司受呼召kah上帝對以色列鄰國ê信息。第一章1節到二章5節。
二、上帝對以色列ê審判。第二章6節到五章17節。
三、預言災難會臨到以色列。第五章18節到六章14節。
四、先知阿摩司看tio̍h ê異象。第七章1節到九章15節。