讀 歌羅西書chit本書信
關於歌羅西城
歌羅西城是弗呂家ê一個城市，設tī「梅安德」（Meander）ê「里卡斯河」（Lycus）左岸。除歌羅西城之外，iáu有兩個重要城市mā位tī-chia河ê岸邊，就是「老底嘉」kah「希拉坡里」。因為水運ê便捷，早tī耶穌基督降生chìn前，hit-ê城就已經是出名小亞細亞地區ê商業大城。M̄-koh tī第一世紀中葉了後，hit-ê城漸漸沒落，而被「老底嘉」kah「西拉坡里」chit兩個臨近城市取代。雖然án-ne，chit三個城市iáu是相連親密，來往chit三個城市ê旅客、商賈真chē，真chē猶太人khiā起Tī chit三個城市。

Tī主前第二世紀初期，希臘將軍安提阿哥‧依皮法扭為tio̍h beh鎮壓猶太人ê叛亂，bat kā兩千個猶太人家庭tùi米索波大米kah巴比倫遷徙到弗呂家地區安置，chiah-ê遷居ê猶太人mā是促成該地區繁榮ê主要因素。因猶太人真gâu經商，koh加上in tī畜牧業上有非常好ê技術，成了「里卡斯河」羊毛業發達ê主力。根據使徒行傳第二章10節ê記載，五旬節ê時，tùi外地tńg去鄉去參與節期活動ê猶太僑民中，就有tùi「弗呂家」tńg來ê。無疑ê，chiah-ê人tī耶路撒冷ê時，因為聖神降臨在使徒們身上，大聲傳講耶穌基督koh活ê信息，in中間mā有人因為án-ne而得tio̍h此福音ê信息，然後kā福音帶tńg來in ê僑居地。

使徒保羅kah歌羅西教會
Ê時到目前，iáu是chhōe bē-tio̍h有關使徒保羅開拓歌羅西教會ê資料，使徒保羅mā m̄-bat訪問過歌羅西城（參考二：1）。Tī歌羅西書第一章7節記載講：「Lín tùi Ê-pa-hú-lah學習chit-ê 福音；伊是kah 阮平平做奴僕ê，mā 為tio̍h 阮teh 做基督忠實ê 差用。(全民版)」tùi chit節經文thang清楚看tio̍h該教會真可能就是以巴弗開拓ê。另外iáu有一個可能，就是hiah-ê tī五旬節ê時tńg去耶路撒冷參加節期活動ê僑民，in得tio̍h福音ê信息了後，帶聖神ê感動，kā福音帶tńg來僑居地，並且積極地參與以巴弗傳福音kah開拓教會ê事工。

若是tùi使徒行傳第十八、第十九chit兩章記事來看，使徒保羅tī第三pái旅行傳道ê時，bat tī以弗所停留三年gōa ê時間，Tī chit段時間中，真可能tī以弗所kah附近地區傳福音ê時，可能mā有接觸過來自老底嘉、希拉波里，kah歌羅西城ê人，chiah-ê地區ê人聽信了使徒保羅所傳ê福音，而tńg去開設了chiah-ê地區ê教會。有一種講法，就是以巴弗就是其中ê一位福音勇士。

使徒保羅寫此信ê目的
使徒保羅怎樣會想beh寫這封phoe hō͘歌羅西教會ê信徒？伊kah該教會有甚麼特殊關係mah？咱thang根據以下幾種情形來了解實際ê狀況：

Ná親像前一段所提起ê，使徒保羅bat tī以弗所城停留三年ê時間（參考使徒行傳二十：31），有可能就是Tī chit段期間，以巴弗得tio̍h福音而信主，並且成做使徒保羅ê好幫手。伊kā福音帶tńg來到歌羅西，同時幫忙建立「老底嘉」kah「西拉坡里」教會（參考歌羅西書四：13）。因為án-ne，使徒保羅會知影歌羅西該教會ê情況，就是以巴弗去探監ê時chūn kā伊講ê，當然mā有可能是該教會其他信徒寫hō͘伊ê書信中有提起ê（參考歌羅西書一：4、6—8）。伊聽tio̍h該教會信徒「對耶穌基督有信心，對所有ê信徒有疼心」（參考歌羅西書一：4），chit點thang講是基督徒siōng重要ê信仰見證。M̄-koh，，該教會mā發生了一kóa信仰上認知ê問題，顯然是有kóa「邪講」影響該教會信徒（參考歌羅西書二：8—10），使徒保羅認為一定tio̍h趕緊阻止chit種「邪講」，免得影響tio̍h信徒ê信仰內涵。

甚麼是「邪講」？有下列幾節經文thang看出一kóa看出：
一、錯誤ê認知致使信仰陷入迷惑。
使徒保羅ài歌羅西教會ê信徒m̄-thang「被任何人用花言巧語」kā in「引入歧途」，tùi第一章15到20節經文中看ê出來，是有人teh傳神秘ê靈界邪講，hō͘信徒陷入了「歧途」。所謂ê「歧途」，應該是teh指tī歌羅西教會裡有「虛妄ê哲學迷惘」了信徒ê心。Chiah-ê學說是「根據宇宙間所謂星宿之靈，卻m̄是根據基督」。Chit點kah聖經所記載ê：上帝乃是宇宙萬物創造ê主ê信仰有衝突。

基督教信仰ê真諦，在tī上帝創造了天地「萬有」，這「萬有」乃是包括看ê見kah看bē-tio̍h ê，mā包括靈界ê在位者、主宰者、執政者kah掌權者。「因為上帝通過祂來創造萬物，就是tī 天頂kah tī 地上ê，看會tio̍h kah 看bē tio̍h ê，包括靈界坐王位ê kah 統治者、執政者以及掌權者。上帝通過祂，mā 是為tio̍h 祂創造萬物。(全民版)」（歌羅西書一：16）。因為án-ne，kui個宇宙中，即使是有一工上ê「星宿之靈」，mā是屬tī上帝所掌管，人應該tio̍h敬拜創造宇宙萬物ê上帝，卻m̄是chiah-ê被造ê「星宿之靈」。

二、有人tī教會內提倡禁慾主義ê思想。
為tio̍h chit種思想，對tī「lim食、節期、月朔，á是安息日」等問題教會中開始有爭論，造成信徒之間ê困擾。使徒保羅認為chit種認知，往往hō͘人無tùi認bat耶穌基督ê信仰中，得tio̍h性命e5thau2放、自由（參考加拉太書五：1），反卻是成做生活ê另外一種綑綁，被要求「『bē-tàng動chit-ê，bē-tàng嘗hit-ê，bē-tàng摸chit-ê』chit-ê類ê禁忌」（參考歌羅西書二：21）。Á chiah-ê束縛可能是保守派猶太基督徒所堅持beh遵行ê傳統風俗。Chiah-ê人雖然是信了耶穌基督，卻iáu-koh堅持beh遵守摩西律法ê規範，包括食ê物件受tio̍h利未記第十一章ê約束，而遵守安息日ê規定mā成做in tī信仰生活上ê另外一種負擔。使徒保羅雖然主張基督徒ê「自由」，m̄-koh伊主張大家應該有體貼別人軟弱ê雅量（參考哥林多前書十：23—24）。當然，咱mā thang想像會tio̍h，一個堅持遵守摩西律法ê人，隨時會馬上tú-tio̍h ê困難是：如果有外邦人在身邊，伊kā ài怎樣kah之同桌共食？á是看tio̍h有摩西律法上規定ê「無清氣」之食物ê時，m̄食mah？á是接受？這雖然m̄是大事，卻往往成了hō͘教會分裂ê無形因素。

三、有人是信奉耶穌基督，卻mā同時「崇拜天使」（參考歌羅西書二：18）。
這是比較嚴重ê問題，因為福音ê本質是tī耶穌基督ê死kah koh活。無任何一位天使thang用來kah耶穌基督ê死kah koh活相比並。天使，是上帝ê僕人，耶穌基督卻是上帝ê「獨生kiáⁿ」，這是非常無仝ê。即使有千千萬萬ê天使，耶穌基督是上帝獨一ê疼子。使徒保羅bat對哥林多教會信徒講：「因為我決定，tī lín 中間除了耶穌基督kah 祂hông 釘十字架ê 信息以外，無beh 提起其他ê tāi-chì。(全民版)」（哥林多前書二：2）只有一個理由，m̄是天使贖回了人ê罪，是耶穌基督，伊chiah是所有ê人性命ê救主，是福音ê中心（參考歌羅西書一：14）。

四、信徒中有人tī道德生活上墮落了。
Chit點是真chē基督徒tī社會生活上一犯koh再犯ê事，mā顯示出人ê軟弱。Tī哥林多教會án-ne，tī歌羅西教會mā不例外。有ê人行極端，講beh守「禁慾」ê生活，m̄-koh mā有ê人卻是放蕩不羈。使徒保羅一再tī伊所寫ê書信中強調：基督徒一定tio̍h活出一個全新ê「新我」（參考羅馬書十二：1—2，哥林多後書五：17，加拉太書六：18，以弗所書四：20—24）。伊kā xx講歌羅西教會ê信徒講：「成做一個新ê 人。創造主照家己ê 形像繼續teh kā chit-ê 新 ê 人換新，來 hō͘ 伊 ē-tàng徹底認bat 上帝。(全民版)」（歌羅西書三：10）tùi chia ē-tàng看出使徒保羅對信徒tī信仰生活上ê要求真嚴格，伊beh hō͘信徒知影，無全新ê生活態度，就無法度活出信仰ê力量；而全新ê生活態度，是tùi性命建構起新ê價值觀開始ê。

關於chit本書信ê寫作日期
歌羅西書、腓立比書、以弗所書，kah腓利門書等，這四本書信lóng是hông稱做使徒保羅ê「監獄書信」，原因是這四本書信hō͘人認為lóng是使徒保羅tī羅馬監獄囚禁期間所寫ê，時間大概是主後第63年左右。有可能就tī使徒保羅tī羅馬坐監期間，以巴弗去探望伊，除了kā伊講有關歌羅西教會信徒tī信仰上ê見證外，mā順續提起教會內部發生ê一kóa問題。伊聽了後，感覺有需要寫chit本書信hō͘歌羅西教會ê信徒，並且希望mā kā這封phoe轉交hō͘老底嘉教會ê信徒讀（參考歌羅西書四：16a）。Tùi chia mā thang看tio̍h，除了歌羅西教會有頂面所講ê問題之外，tī老底嘉教會mā仝款有類似ê問題發生。Tī chit種情況下，使徒保羅寫chit封書信用來勸勉chit兩間教會ê信徒。其實，mā thang án-ne瞭解，希拉坡里教會大概mā差不多，因為這三間教會彼此之間ê距離並無遠。因為án-ne，這mā是使徒保羅會交帶看完chit張phoe了後，tio̍h kā它轉交hō͘老底嘉教會讀ê原因。仝款ê，伊寫另外一封hō͘老底嘉教會ê書信，mā提起ài tī看完了後轉hō͘歌羅西教會信徒讀（參考歌羅西書四：16b）。真可惜ê是現在已經chhōe bē-tio̍h伊寫hō͘老底嘉教會ê書信了。

Tī第四章7到8節有án-ne記載講：
「我tī chia ê一切情形，咱親愛ê兄弟推基古會詳細地kā lín講。伊是一位忠心ê僕人，tī事奉主ê工作上kah我同做僕人。我特意派伊到lín hia去，報告阮chia ê情況，thang hō͘ lín得tio̍h鼓勵。」

Tùi頂面所講chit兩節經文就thang清楚知影，chit封書信就是託推基古帶去歌羅西教會hō͘信徒閱讀ê。推基古是「亞細亞人」（參考使徒行傳二十：4），bat陪伴tio̍h使徒保羅一路上耶路撒冷去，真可能就是親目看tio̍h使徒保羅被猶太人掠入監牢ê見證者。伊ē-sái講是使徒保羅身邊ê好幫手，真清楚知影使徒保羅ê狀況。

本書信thang分做下列幾個段落
1.第一章1到2節，請安ê話。
2.第一章3到14節，為歌羅西教會獻上感恩kah代禱。
3.第一章15到23節，耶穌基督就是信仰ê中心。
4.第一章24節到第二章5節，使徒保羅紹介家己ê工作。
5.第二章6到第三章4節，tī耶穌基督內面同享koh活ê恩典。
6.第三章5到第四章6節，tī耶穌基督內面ê新生活。
7.第四章7到18節，最後ê請安。