讀 但以理書chit本經冊

講tio̍h但以理書，第一個想tio̍h ê問題就是：它究竟算無算是先知書中ê一本？如果按照古希伯來聖經ê編輯方式，chit本但以理書是hō͘編輯tī「聖卷」部分，mā就是kah路得記、以斯帖記等chiah-ê冊同類，並m̄是歸類在先知文集中。Á希臘文譯本ê編輯，是kā但以理書khǹg tī「大先知」（to̍h是：以賽亞書、耶利米書、以西結書等）中。Ē-sái講是有kóa英文版本ê聖經koh kā它編列tī「小先知書」ê範圍中。Hō͘咱感覺比較khah困擾ê是：講chit本經冊是屬tī先知文獻，soah koh無先知作品ê特色，親像「上主向某某講ê話」（參考何西阿書一：1、彌迦書一：1）、「上主hō͘某某某ê kiáⁿ兒ê信息」（約珥書一：1，哈巴谷書一：1，西番雅書一：1）、「上主án-ne講」（阿摩司書一：11、二：4、6，撒迦利亞書十一：13，瑪拉基書一：2）等，chit種先知文獻特有ê句型tī chit本但以理書中都無出現過。Ē-sái講是soah koh有上帝ê天使kah但以理之間ê對話，而且chiah-ê對話中lóng有提起上帝對以色列人未來境況ê預言，chit點又koh是先知文獻ê特色。後代會kā chit本經冊歸類在先知文集中，應該是受tio̍h耶穌基督對這本經冊所講過ê一句話影響比較khah大，he就是記載tī馬太福音第廿四章十五節：

「所以，lín 看tio̍h 上帝託先知但以理所講hit-ê『可惡ê 毀滅者』khiā tī神聖ê 所在。( 讀ê 人tio̍h 理解chit 句話ê 意思) (全民版)

因為耶穌基督tī chia稱但以理為「先知」，因為án-ne，以後教會lóng真自然tek kā chit本經冊歸類在先知文獻中。

一提起「但以理」chit-ê名，tī基督教家庭長大ê信徒是一點mā不生份，原因是tùi兒童主日學開始，老師就歡喜講但以理被國王丟入獅穴中卻無hông獅咬死，iáu有伊ê三位朋友被丟入了火爐中，m̄-koh卻無受tio̍h任何一點點á ê燙傷等神跡故事，同時mā歡喜聽老師講伊ná堅定不移ê信心。M̄-koh chiah-ê lóng是屬tī chit本經冊ê第一部分，mā就是tùi第一章開始到第六章所記載ê主要內容，另外一部分則tùi第七章開始到第十二章，就kah頭前第一部分差別真大，這後一部分連續出現真chē「異象」，m̄-nā一般人看m̄-bat，就連非常有智慧ê但以理家己mā bē明白，需要天使加百列來幫忙伊解析，甚至說明了了後，但以理á是聽m̄-bat（參考八：27）。這部分就是聖經學者所稱謂ê「啟示文學」之作品，kah聖經內底其他幾本經冊仝款被歸類tī「啟示文學」中ê作品仝款，親像以西結書、啟示錄等經冊，lóng是真oh明白ê經冊。

Kah天主教聖經ê差別
如果咱kā天主教會出版ê聖經the̍h起來對照一下，就會發現天主教聖經ê但以理書第三章總共長到一百節，其中包含兩篇重要ê祈禱文，其一是亞撒利雅（Azariah）ê祈禱文，伊有可能就是三位青年中ê一位，名叫亞伯尼歌（三：26—45）。其二是chit三位被tàn tī火爐中ê青年o-ló歌頌上帝（三：52—90）。另外有一段短文描述chit三位青年被下令送入火爐中燒死ê時chūn，尼布甲尼撒王為tio̍h beh用koh khah大ê火燒死in，下令士兵kā火爐升溫到siōng koân點，火苗竄到廿四公尺hit種高，m̄-koh，上帝卻派天使下降到火爐內底，火爐中ê chit三位青年m̄-nā無被燒死，反卻是tī邊á加火升溫ê兵士被火爐噴出ê火焰燒死。然後天使khiā tī chit三位青年邊á，kā火種全部lóng推到火爐外去，並且hō͘火爐內底吹起了涼風，hō͘ chit三位青年tī火爐內都無任thài會無ài爽快á是損傷。

頂面chit段精彩ê經文，被基督教聖經hō͘遺落了，iáu好tī「次經」中thang chhōe tio̍h。

另外，天主教聖經ê第三章九十八到一百節，tī基督教ê聖經則編輯tī第四章ê一到三節。基本上，chit三節編輯tī第三章會比較khah順暢，因為tī第三章談起chit三位青年án怎有美好ê信仰，而得tio̍h上帝ê保護，hō͘ in Tī一般人看起來已經無生存ê希望情況下，卻ē-tàng安然無恙地pôaⁿ過危險陷害。因為án-ne，巴比倫王尼布甲尼撒為tio̍h án-ne真歡喜ê歌頌上帝。

Chit本經書寫作ê年代
但以理書ê文學類型是屬tī「啟示文學」類。Chit種「啟示文學」特別盛行tī主前第四到二世紀之間。Mā因為án-ne，有bē少聖經學者認為但以理書是成冊tī主前第二世紀ê時代。不過chit種講法mā有bē少聖經學者持反對ê意見，原因是對tī chit本經冊所用ê語言、文字ê認定有無仝ê看法。因為chit本經冊是用亞蘭文（二：4—七：28）kah希伯來文（一：1—二：、八：1—十二：13）寫做ê，因為án-ne，它不可能是出自一個人ê手筆，卻是收集了古老ê故事kā它編撰而成ê經冊。Á Tī聖經中，咱往往會看tio̍h作者（á是編者）歡喜用古老ê故事講述當時ê社會。Tùi án-ne，咱看tio̍h ê雖是古老ê文字，卻是近代ê產物，這mā是聖經中時常引起著作年代不明確ê另外一個原因。

傳統上，認為但以理書chit本經冊是寫tī主前第六世紀，mā就是巴比倫王尼布甲尼撒ê時代（主前六○五到五六二年，參考但以理書一：1—7），主要是teh記念hiah-ê因為被俘虜到巴比倫去做奴隸，m̄-koh卻擁有堅定信仰ê一kóa偉人；in雖然生活tī非常艱苦ê環境中，mā因為對上帝堅定ê信心，而持守tio̍h對未來拯救ê ǹg望（異象）。

另外一種看法是kā此本經冊認定編寫tī主前第二世紀ê時代，mā就是大約tī主前168到165年之間。持chit種看法ê原因是當時巴勒斯坦ê統治者依皮法扭‧安提阿哥四世（Antiochus IV Epiphanues. 215～164BC），伊tī主前167年佔領耶路撒冷，強迫以色列人一定tio̍h完全希臘化，下令tī耶路撒冷聖殿ê至聖所祭壇刣豬獻祭，並kā希臘敬拜ê主要神明宙斯ê神像移入聖殿內底，禁止以色列人守安息日，而且對行割禮ê以色列人處以死刑，同時燒毀聖經等等chiah-ê tī以色列人看起來極端污穢聖殿ê舉止，引起真chē以色列人受氣難消。咱thang tùi但以理書第七章24到25節、第八章11到13節、第十一章31節、34節、39節等等經文看ê到chiah-ê事件ê背景。M̄-koh後來有馬加比帶領以色列人無顧性命地投入反對運動，並且是kúi-nā pái戰贏安提阿哥四世ê軍隊。以色列人ē-tàng tī主前165年12月25日進入聖殿，重新潔淨聖殿。不過chit段記事卻無出現tī但以理書內底，因為án-ne，有kóa聖經學者認為chit本經冊成冊時間tī主前165年chìn前。

Chit本經冊ê主要內容
大概一般人mā會án-ne問：為甚上帝hō͘祂ê子民受苦？為甚麼上帝會許可祂ê聖殿遭遇tio̍h污穢？為甚麼祂忠實ê僕人會hō͘殺害？到底有無上帝？若有，祂tī tó位？類似chit種問題m̄-nā出現tī古老ê時代，mā繼續出現tī今á日ê世代內底，特別是tī tú-tio̍h苦難ê基督徒中間。Á但以理書ê價值就是tī chia；作者就是用一kóa過去大家熟悉ê故事，á是熟悉ê信仰偉人事蹟來kā讀者講：上帝ê審判隨時會來到，堅持到最後ê人必定會得tio̍h上帝ê祝福（十二：13）。Tī chiah-ê世上有真chē迫害，m̄-koh公義、真理會贏過chiah-ê人為ê逼。Hiah-ê受迫害來死去ê人，tī將來ê日子內底會得tio̍h koh活ê恩典，相對ê，hiah-ê棄sak信仰ê人，會遭遇tio̍h永遠ê侮辱（參考十二：1—2）。換句話講，但以理書中ê信仰人物分做兩種：一是堅守信仰而受難ê人，chit種人會得tio̍h koh活ê恩典。另外一是棄sak信仰ê人，in會被丟入永遠ê痛苦中。作者beh kā讀者講：上帝chiah是永遠ê掌權者，祂統治萬有，祂ê國度永遠存在（參考二：44、七：27）。對敵祂ê人，無論是什麼人，即使是地上siōng有權力ê君王，上帝mā會嚴厲懲罰。

Thang分做下列兩個大段落
Chit本經冊主要thang分做兩大部分；一是第一到六章，作者描述但以理是一位非常優秀ê以色列青年；伊雖然身處外國成做奴隸，卻無改變對上帝ê忠實信心。上帝賜hō͘伊智慧面對苦難，雖然有人設計beh陷害伊，mā是徒然。

第二部分是第七到十二章，作者用「異象」來說明統治以色列人ê chit-ê強大國家，tī上帝摧毀它chìn前，會發生真chē奇異ê事。M̄-koh最後就是上帝ê國度來臨。Tī chiah-ê奇異ê事蹟中，特別強調kā有連續四個大國支配tio̍h世界。