認bat 申命記chit本經冊
是一本被猶太人列為必讀、必寫ê經冊
到目前為止，猶太人教導in ê子弟一定tio̍h tī十歲以前，學會曉暗唸申命記chit本經冊，koh tī十二歲國小畢業chìn前，一定tio̍h ài會曉默寫出埃及記kah申命記，就ē-tàng知影申命記chit本經冊tī以色列民族中所佔ê地位有多高。

值得注意ê是，申命記是新約聖經中siōng常被引用ê四本舊約經冊中ê其中一本，另外三本是：創世記、詩篇，kah以賽亞書。Á令讀者siōng-kài熟悉ê一段記事，就是有關耶穌tī曠野受tio̍h魔鬼引誘ê時，耶穌引用來回答魔鬼ê話，全部lóng是出自申命記。伊tī回答魔鬼第一個試探，是引用申命記第八章3節；回答第二個試探，則引用申命記第六章16節；回答第三個試探是引用申命記第六章13節（參考馬太福音四：1—10）。由此可見猶太人對申命記ê重視。耶穌tī回答法律教師「試探」性ê詢問ê時，mā是以申命記作為討論ê準則（參考路加福音十：25—28）。

有人形容申命記是一本相當具有「人道精神」ê法典，如果ē-tàng多用些時間詳細研讀，就會發現án-ne形容申命記是非常適當ê。Chit本經冊一再提醒人對tī「貧sàn-chhiah人、外僑、孤兒、寡婦」等，有照顧kah協助ê義務kah責任，chit種明文ê法令規定，即使是tī現今所謂「文明」ê時代，mā真oh chhōe-tio̍h有任何國家會訂定chit種法律。M̄-koh早tī兩千多年前，以色列人民ê法典就已經明文規定，人民一定tio̍h負起照顧孤兒、寡婦、sàn-chhiah人、外僑ê社會責任，而且m̄-nā是一pái提起，卻是koh再三地強調（參考申命記十：18、十四：29、廿四：17、19、20、21）。尤其是tī以色列人慶祝重要節期ê時，一定會邀請chiah-ê弱勢者同齊參加，bē-tàng kā in遺忘，á是排拒tī外面（參考申命記十六：7—12、13—15）。Chit種規定有一個重要ê歷史背景：hō͘以色列人民知影in bat tī埃及當過奴隸，hō͘人欺負。因此，照顧chiah-ê窮困、孤苦無助ê人，就等於是teh為家己重溫慘痛ê歷史課程仝款重要。讀chit種法律規定，koh來思考耶穌所講ê：「你辦桌請人客ê 時，tio̍h 請sàn-chhiah-.ê、破相ê、跛腳ê、chheⁿ-mê-.ê，14 án-ne，你一定會受祝福，因為in 無能力kā 你報答。Tī 義人koh 活ê 時，上帝會kā 你報答。(全民版)」（路加福音十四：13—14）。這mā是箴言第十九章17節所講ê：「賑濟sàn-chhiah人就是teh借hō͘ 上主；祂會照伊所行ê 好事來還伊。(全民版)」chiah-ê話語ê背後，其實lóng有chit種申命記派作者思想ê影像。

M̄-nā án-ne，申命記iáu特別強調，幫助chiah-ê孤苦無助ê孤兒、寡婦、外僑，以及利未人，是ná親像in每年繳納十分之一捐仝款重要（參考申命記廿六：12、13），是一種信仰kah社會責任。申命記作者tī最後以「chiù-chōa」ê方式，表明以色列人民teh幫助窮困者ê行為，是見證in對上帝ê忠實，若無，願意接受上帝ê咒詛（參考申命記廿七：19）。

所謂「申命記」，意思就是「重述法律」。顧名思義就是將頭前幾卷經冊中提起有關法律ê事koh再重述一pái。Mā因此，tī chit-ê本經冊中，會發現真chē資料lóng是tī出埃及記、利未記、民數記中已經有記載過ê。若詳細閱讀，就會發現它m̄-nā是koh一pái重述摩西法律，而且將以色列民族ê傳統、出埃及ê經驗、被上帝揀選，以及上帝tī西奈山kah以色列人民立約ê kui個過程kah對in kui個民族ê啟示等經歷lóng融入tī本冊卷中。

編寫此經冊ê主要目的
如申命記第十七章18到20節記載ê：「伊坐伊ê 國位ê 時，tio̍h 用一本冊抄寫chit-ê 律法，tio̍h tùi 存tī 祭司利未人ê面前ê hit 本來抄。Hit 本tio̍h hē tī 伊hia，一世人tio̍h 讀，thang 學習敬畏上主— 伊ê 上帝，tio̍h 執守chit-ê 律法所有ê 話kah chiah-ê 律例，來照án-ne 行。免得伊驕傲來看輕兄弟，koh 免得伊偏左偏右，來離開 chit-ê誡命；thang hō͘伊kah 伊ê kiáⁿ 孫tī 以色列中ê 國位久長。(全民版)」chit本經冊siōng主要ê目的，就是beh hō͘國王知影，tio̍h以上帝ê話治理伊ê國家。身為國王，tio̍h知影謙卑，bē-tàng擁兵自重。學習知影：如果無上帝ê話語做基礎，即使是擁有世上ê一切，mā將是枉然。Chit點thang tùi列王記下第十八到二十章猶大王希西家ê故事，以及約西亞王ê親身經驗看會出來；tī in統治猶大國ê時代，因為對上帝忠實，雖然國勢甚弱，m̄-koh tī仇敵兵臨城下ê時，卻ē-tàng得tio̍h上帝ê庇護。可惜ê是，人lóng是健忘ê，常常認為家己真有能力，á bē記得家己ê軟弱kah有限，因此，分裂後ê南、北二國，真正遵守上帝話語ê國王無chē。

Koh講，就ná同申命記第八章17到18節所講ê：
「『得tio̍h chit-ê 大ê 基業，是tùi 我家己ê 氣力kah 我ê 手ê 能力。』總是，你tio̍h 會記得上主— 你ê 上帝，因為你得tio̍ h 大基業 ê 氣力是祂 hō͘ 你 ê，是 beh來完成祂所對你ê 祖先chiù-chōa ê 約，親像今á 日ê 款式。(全民版)」

申命記會án-ne án-ne強調，是因為當時ê以色列人民，絕大多數lóng已經bē記得遵守上帝話語ê重要性，in bē記得祖先bat kah上帝立過性命之約。因此，編撰此本經冊，siōng主要ê目的，就是beh chhōa人民重新tńg來到上帝ê話語，知影以守約ê態度過頂真ê生活，chiah是社會安定之道，mā是上帝賜福ê主要根源。Tùi chit-ê觀點來看申命記編寫ê時代背景，真可能是寫tī北國以色列時代，當時北國君王差不多lóng偏離上帝ê教導。編寫者希望透過chit本經冊、法典，koh一pái提醒君王一定tio̍h beh tńg去到上主ê道，chiah ē-tàng帶領人民依照上帝ê教示過生活，hō͘國家社會安定，免tī被上帝棄sak á淪亡。

若是頂面所講ê觀點成立，則chit本經冊有可能就是比較晚期ê時chūn完成ê，á m̄是像一般所講ê，是tī摩西時代所寫ê。

另外一方面mā thang án-ne講，作者收集了摩西時代ê法律精神，當做當代社會曉背景一個非常重要ê信仰主題：堅持遵守上帝ê誡命來編撰chit本冊。

因此，申命記第六章4到9節就成做chit本經冊ê中心題旨：
「以色列人，你 tio̍ h 聽！上主 — 咱ê 上帝，是獨一ê 上主。5 你tio̍h 盡心、盡性、盡力，疼上主— 你ê 上帝。我今á 日所命令你chiah-ê 話，tio̍h 記tī 你ê 心，mā tio̍h 用這勤勤教示你ê kiáⁿ兒，無論你坐tī 厝內，á 是行tī 路裡，睏á 是起來，lóng tio̍h 講論。Mā tio̍h縛tī 你ê 手做記號，戴tī 你兩蕊目睭ê中央做記念； koh tio̍h 寫tī 你ê 厝ê 門框，以及你ê 門閂(全民版)」

Chit段經文就成做以色列人民看做siōng重要ê經文，無法度bē記得，而且tio̍h每日暗唸ê「示瑪」（Thema）經文。

本冊ê主要內容
申命記thang講比較像一本講道集，因為全冊除了開始有短短ê序言（參考申命記一：1—5），以及最後第三十一到三十四章是結論，提起摩西最後ê詩歌、遺言（包括祝福）、死kah埋葬外（參考三十一：1—三十四：12），其餘ê部分lóng是講道篇（á是演講）。Chiah-ê講道內容中，包含真chē勸勉、叮嚀，ài以色列人民一定tio̍h代代kiáⁿ孫lóng謹守tio̍h kah上帝之間「約」ê關係。因為「約」所顯明ê是上帝「揀選」ê疼，á上帝揀選以色列人民，就是teh表明祂特別ê救恩。這救恩並m̄是原先以色列人民有資格thang領受ê（參考七：7—8）。

咱thang kā它分做下列四個段落來看：
1.第一部分是tùi第一章6節到第四章49節。
Chit-ê部分是teh回憶過去歷史，向以色列人民闡明上帝如何在過去ê日子裡帶領in。Tùi出埃及到曠野；koh再tùi曠野入迦南應允之地以前，上帝帶領in對抗敵人，以及in定居了後，án怎分配土地到落尾in背叛上帝，激怒了上帝ê經過。Mā描述上帝怎樣赦免in，赦免in，繼續帶領in進入ná許可ê土地。勸勉in「獨獨上帝」，bē-tàng敬拜其他ê神明。然後tī第四章41到49節以附錄ê方式，記載摩西指定tī約旦河東邊設定三座城作為庇護城。

2.第二部分是tùi第五章到十一章。
Tī chit-ê部分主要是重申上帝tī西奈山上，頒佈祂ê誡命hō͘以色列人民ê重要性。重申遵守上帝誡命、法律、教導等，chiah是kui個民族生存ê根據，並且勸勉以色列人民tio̍h以感恩ê心來順從上帝ê帶領。

Tùi第九章描述以色列人民án怎背叛上帝，引起上帝ê憤怒。然後上帝koh重新頒發誡命，koh一pái諄諄勸勉以色列人民，ài in一定tio̍h會記得謹守上帝ê誡命，並且kā上帝ê誡命教導in ê kiáⁿ孫。

Tī第十一章13到21節，mā是一段被以色列人民列為每日一定tio̍h暗唸ê「示瑪」（Thema）經文。Chit段「示瑪」經文真清楚表示：遵守上帝誡命ê人，就ē-tàng在地上享長壽—天地存在一工，in就tòa tī hia一工。

3.第三部分是tùi第十二章到廿七章。
Chit-ê部分thang講是申命記siōng中心ê部分，是關於法律。它ê內容包括了倫理、禮儀、人際關係等。

第十二章到十八章，是有關獻祭、敬拜禮儀等方面ê規定。特別是tī第十七章14到20節規定了君王應該有ê規矩條例，這ē-sái講是聖經中kan-taⁿ有ê一段經文。

第十九章到二十章，關於祭司ê條例，設置庇護城ê用意，以及有關戰爭ê條例。

第廿一章到廿五章，有關個人、家庭以及社會生活ê規範。Mā就是人際互動關係。

第廿六章是有關獻初熟土產ê條例，以及十分之一奉獻ê規定。

第廿七章以色列人民誓約表明願意遵行。這mā成做後來禮拜ê一種範本。

4.第四部分是tùi第廿八章到三十章。
第廿八章清楚說明，如果in遵守上帝ê誡命、話語，thang tī應允之地安居樂業，長治久安。顛倒地，如果違背上帝ê誡命，in將必淪落到被放逐到外國成做奴隸，而且失去現在所有ê一切。

第廿九章koh一pái敘述上帝怎樣kah摩西立約ê經過。這約ê主要內容就是beh以色列人民記tiâu「獨獨上帝」，bē-tàng有別ê神。

第三十章則是摩西最後ê勸勉，伊以「呼喚天地來做證」ê方式，ài以色列人民確實遵守上帝ê教示，因為he是牽涉tio̍h kui個民族ê興盛kah滅亡ê區別。摩西差不多就是用伊ê性命teh呼籲以色列人民，一定tio̍h teh生存kah死亡之間作一個抉擇，mā就是講，信仰無含糊ê空間，無所謂「phú色」地帶，chit點mā是對今á日基督ê信徒來講非常重要。

本經冊ê作者是什麼人
自古以來，申命記一直hō͘人認為是摩西寫ê（參考申命記三十一：9）。M̄-koh tī第十九世紀ê時chūn，chit種看法受tio̍h相當質疑，因為tī chit-ê本經冊中，thang看tio̍h真chē規定lóng kah主前621年ê宗教改革有密切關係；依照列王記下第廿二章ê記載，猶大王約西亞在位ê第十八年，大祭司希勒家tī聖殿發現了法律冊，就án-ne採取淨化耶和華宗教信仰ê改革運動，就是將聖殿本身以外，所有外國ê敬拜儀式lóng廢除掉，並且將慶祝Pôaⁿ過節ê典禮遷徙到聖殿中舉行，tī-chia chìn前，Pôaⁿ過節ê慶祝lóng只限tī家庭中舉行。Á tī舊約聖經中，申命記是唯一記載將敬拜上帝ê所在特別「選定」出來ê經冊（參考十二：5、11、13—14、18、21、26、十四：25、十五：20、十六：2、5、11、15、16、廿六：2），chit種選定特別ê所在敬拜上帝，應該是kah當時約西亞王摧毀所有神壇，強烈要求實踐獨獨耶路撒冷聖殿是敬拜上帝之地ê做法有關。

Koh講，申命記第五章12到15節，十誡中之第四誡有關遵守安息日ê規定，申命記作者認為tio̍h beh守安息日，是因為以色列人民「bat tī埃及做過奴隸」ê緣故。Á kā它對照出埃及記第二十章8到11節ê記載，守安息日是因為「上主tī六日內創造了天、地、海，kah其中萬物」ê理由，顯然二者之間有明顯ê差異。

若是koh再對照耶利米書第十七章9到27節，上帝ài先知耶利米傳信息hō͘以色列人民ê時，真清楚提起耶路撒冷城ê毀滅，是kah以色列人民忽略了遵守安息日ê規定有密切關係。Tī以色列人民看起來，遵守安息日，就等於是尊崇上帝為性命ê主宰，是領受上帝賜福ê源頭（參考創世記二：3）。相對ê，疏忽安息日，等於失去上帝ê賜福，chit種人必定會喪失所有一切，這mā包括性命在內。因此，tī亡國tī巴比倫帝國以後，宗教kah社會眾領袖進行了深切ê反省，開始tùi遵守安息日ê規律做起，作為悔改認罪ê第一要件。
以chit-ê角度來看申命記，即使chit本冊是出自摩西之筆，mā因為經過相當長ê時間koh透過經學教師，法律、規章等作了真chē ê修改、增刪。

親像：第十九章1到13節有關「庇護城」ê條例，應該就是teh進入應允地了後，對tī hiah-ê無辜者需要一個頂真庇護之地chiah設置。Tī曠野漂流時代，根本不可能有chit種城池。Koh講，第十五章1到11節有關安息年ê條例，這是kah耕作有密切關係，ná親像tī第十六章提起有關Pôaⁿ過節規定，「tio̍h tī上主—lín ê上帝所選定ê敬拜場所宰Pôaⁿ過節ê祭牲，bē-tàng tī祂賜hō͘ lín ê其他土地上宰殺」，chit種規定並無適合曠野時代。因為摩西kah以色列人民ê時代，lóng是tī每一個人各自厝裡進行獻祭，無規定ài tī「所選定ê敬拜場所」宰殺祭牲。Á koh khah清楚ê是收成節、tòa棚節，chiah-ê lóng是進入迦南地了後，過穩定農業生活後chiah有ê，並m̄是tī曠野漂流時代ê規定。

另外值得注意ê是，tùi第十二章到廿六章，chit段長到十五章ê篇幅中，完全無提起摩西ê名字。

類似chit種例真chē，咱只有ē-tàng講chit本經冊有真chē法律規章，是以摩西當年ê教導，á是制訂ê規則為根基，了後，跟tòe tī迦南地生活，以及被掠到巴比倫、tńg來國內重建家園後，漸漸發展出koh khah具體ê行事規章。

幾個所在引起議論ê法律條例
申命記中有幾個所在條例是非常特別ê，像第十二章一再強調「上主要選一個特定ê場所，hō͘人tī hia敬拜祂」（參考第5、11、14、21、26等節），這應該是teh進入迦南地了後，有穩定ê khiā起生活chiah ē-tàng要求ê。特別是這「特定ê場所」mā有kóa學者指出，是講耶路撒冷，甚至認為應該是tī希西家王時代（主前715～609）發展出來ê（參考歷代志下廿九到三十一章）。
Ē-sái講是，tī以色列人民進入迦南地後，並無明確之「特定ê場所」作為敬拜上帝ê所在，是後來所羅門王建造耶路撒冷聖殿，chiah漸漸形成以耶路撒冷聖殿作為敬拜場所，m̄-koh tī掃羅王kah先知撒母耳時代，示羅iáu-koh是以色列人民認為siōng重要ê敬拜ê所在。Á分裂後ê北國以色列，則以撒馬利亞作為敬拜ê中心。

親像tī第二十章記載有關戰爭ê條例，ē-sái講是非常特別ê一章。Tī chit-ê章相關ê條例中，thang看出編者ê用心，teh強調上帝同在ê重要性。爭戰得勝無tī tī兵力chē少ê問題，卻是對上帝是m̄是有絕對ê信心。出征ê時，「m̄免驚惶」，原因ná親像祖先出埃及ê時，上帝帶領以色列人民離開埃及，並且親自kah埃及曠野中ê其他民族相刣（參考出埃及記十四：30—31、十七：8—16），只要有上帝同在ê戰爭，就m̄是óa靠軍事武力。Mā beh hō͘ hiah-ê羸弱殘兵免除加入軍伍行列出征。Koh講，tī iáu未攻打敵方chìn前，需要先hō͘敵方有講kah ê機會。以及新婚ê青年m̄免服兵役、公職（參考申命記廿四：5）等等，chiah-ê lóng teh說明就算tī艱困ê環境中，mā tio̍h考慮tio̍h人性性命尊嚴。M̄-koh chit種條例是m̄是thang行？有淡薄á受爭議。

Koh講，第二十章13到18節記載ài kā敵方趕盡殺絕，特別指出迦南原住民等七族，絕對bē-tàng存憐憫之心，一定會剷除殆盡。Chit種條例，以今á日ê觀點來看，確實真oh理解。Á tī第廿三章3到6節、第廿五章17到19節等經文，對tī亞捫、摩押、亞瑪力人ê排斥，雖然kah祖先出埃及ê經驗有關，m̄-koh真實原因何在？chiah-ê lóng有待學者研究釐清真正原因。

Chit本經冊ê影響
申命記chit本經冊確實對後代聖經編輯工作影響真大，á後期聖經作者mā受tio̍h申命記派作者ê影響甚鉅，特別是在先知文獻裡，lóng真容易chhōe-tio̍h申命記派思想ê脈絡。細讀申命記，會幫助讀者重新思考兩件事：

1.應該用怎樣ê態度看待信仰ê問題。
因為申命記ê中心主題是「用全部ê性命疼上帝」。Á這「疼」字，是teh表示對上帝絕對忠實。作者Kā chit種「疼」用teh遵守kah上帝之間所立ê「約」。Á這「約」ê基礎是tī十誡。

2.án怎將信仰落實在現今ê社會kah家庭生活中。
申命記作者認為上帝選召以色列民族，並且一再施恩hō͘以色列人民，因此，若是in無對上帝忠心，去拜別ê神明，就是m̄知影感恩ê人，chit種人，tī申命記作者眼中ē-sái講是siōng-kài卑鄙ê人。作者強調，上帝ê選民應該用感恩ê心來回應上帝揀選ê疼。Chit種回應siōng好ê方式，是遵照上帝ê教示去行。Mā就是beh kā kah上帝之間所立ê「約」，kā它行teh生活kah工作中，並以頂真ê態度遵守，m̄-nā是tī家己ê家庭，mā包括tī kui個社會生活中。尤其是對貧困者應盡ê責任。Chit種對社會ê責任，hō͘ kui個社會ê關係彼此聯繫得koh khah親密。

（本冊經文採用opensource/copyleft ê《全民台語聖經》，tī chia特別致謝。）