認bat 以弗所書chit本書信

使徒保羅tī旅行傳道ê工作中，以弗所是伊khiā起siōng久長ê一個城市。伊tī chiah-ê城裡至少tòa長到三年ê時間（參考使徒行傳二十：31），而且kah該教會信徒ê關係非常密切。當伊決定beh去耶路撒冷ê時chūn，iáu特別派人去chhōe以弗所教會ê長老到米利lóng來kah伊會面，以非常懇切地ê語氣對in講一段「臨別贈言」（參考使徒行傳二十：18—35），並且teh講完後，kah hiah-ê眾長老同齊跪落來祈禱，「大家大聲哭，kā 保羅攬teh，kā 伊chim。(全民版)」（使徒行傳二十：37）chit種關係親密ê場面，即使是tī今á日，傳道者與會友之間ê關係koh再好，mā真少án-ne，可見使徒保羅tī以弗所確實非常用心傳福音。如果以án-ne來看chit封phoe，會感覺不出以弗所書chit本書信有顯露出chit種密切ê關係，顛倒地，感覺使徒保羅kah in kah-ná是有點á距離。因為以弗所書是用真頂真ê語氣teh談教會ê問題，尤其是寫了teh釐清「教會觀」方面ê論述比較多。

有bē少學者就認為以弗所書是一封「傳閱」ê書信，m̄是專為以弗所教會所寫ê書信，因為tī一kóa古老ê抄本中並無第一章1節所講「hō͘以弗所地方」chit種話句。Iáu有，chit封phoe除了提起「推基古」chit-ê人ê名字外，並無提起任何信徒ê名字，因為án-ne，真可能這真正是一封屬tī「傳閱」ê書信，beh傳hō͘ tó一位ê教會信徒看，就填上hit-ê教會ê名字á是信徒ê名字。親像：歌羅西書第四章16節就án-ne寫講：「Chit-ê phoe 讀了，tio̍h 設法轉 hō͘ 老底嘉人 ê 教會讀。Lín mā tio̍h 讀tùi 老底嘉轉來ê phoe。(全民版)」這thang幫助讀者瞭解：tī使徒保羅所開拓設立ê教會中，伊所寫ê書信通常lóng會成做眾信徒歡喜「傳閱」ê書信。這就引發近代聖經學者歡喜提出ê一個問題：以弗所書是m̄是真正是使徒保羅所寫ê書信？為tio̍h探討chit-ê問題，咱thang tùi幾個方面來思考。

以弗所教會
是什麼人kā福音傳到以弗所chit-ê城市ê？根據使徒行傳第十八章19節ê記載，使徒保羅是tī第二pái旅行傳道ê時來到以弗所，伊bat tī chia kah百基拉、亞居拉夫婦同齊傳福音，然後伊離開，留落來百基拉夫婦tī以弗所，繼續伊ê旅行傳道。Á tī使徒行傳第十九章1節koh記載伊tńg來到以弗所城，tī chia伊tú-tio̍h一kóa信徒，作者路加án-ne描講述：「亞波羅tī 哥林多ê 時，保羅經過內陸ê 地區，來到以弗所，tī hia tú-tio̍h幾nā個門徒。(全民版)」（使徒行傳十九：1）tùi chia thang看tio̍h使徒保羅來到以弗所城ê時chūn，hit-ê城已經有基督徒了。是什麼人傳福音hō͘ in ê？是使徒保羅kah百基拉夫婦第二pái傳福音ê時傳hō͘ in ê mah？不可能，因為如果是in所傳ê福音，使徒保羅bē tī使徒行傳第十九章2節講：「Lín信主ê 時kám 有領受聖神？」(全民版)」chit種問題。然後koh為in施行洗禮，hō͘ in領受聖神（參考使徒行傳十九：5—6）。因為án-ne，chiah-ê信徒真可能就是當年tī耶路撒冷tú-tio̍h迫害，而四散各所在ê基督徒tńg來到家己ê tòa所pah。使徒保羅tī chia三年時間，m̄-nā強化該地信徒ê信仰內涵，甚至組織了in，成做一間有力ê教會作為好模樣，希望該教會ē-tàng成做其他教會學習ê典範。

Tùi書信ê文體來看
有bē少學者認為tī chit封書信裡，真chē文字、用詞是使徒保羅從來無用過ê，親像第一章23節：「教會是基督ê身軀，是充滿宇宙萬物ê hit位基督所充滿ê。」chia ê「身軀」，以及第三章2節ê「職務」，第三章3節ê「奧秘」等詞字，雖然mā同時出現在歌羅西書，m̄-koh所詮釋ê意義卻真無仝款，而歌羅西書卻被接受為使徒保羅ê作品。Koh講，tī以弗所書siōng特別ê所在，是用冗長、複雜ê話句，親像：第一章3到12節，原本tī希臘文是一句話，m̄-koh，太長了，thang講是聖經中經文siōng長ê一句話。M̄-koh chit種寫法kah使徒保羅以往teh寫ê書信所用ê話句是簡潔、有力，讀起來就感覺真無仝款。特別是tī第三章4節：「Lín讀了就會知影我對基督ê奧秘所領悟ê是甚麼。」這絕對bē是使徒保羅ê筆法。因為使徒保羅向來lóng是清楚交帶信仰內容，bē留落來一kóa曖昧不明ê話句。Á比較受質疑地ê是：kā以弗所書kah歌羅西書相比，就會發現在以弗所書中有一半以上ê經文thang tī歌羅西書中chhōe得tio̍h，而且句型完全仝款者就達四十處之多，而tī編輯ê秩序上mā仝款。因為án-ne，mā有人懷疑是m̄是有toh位使徒保羅ê學生，抄襲了歌羅西書，然後掛上使徒保羅ê名字，寄hō͘以弗所教會。

Koh講，tùi第二章11節講：「Lín chiah-ê 出世to̍h 是外邦人 ê，lín hō͘ hiah-ê 自稱受割禮 ê 猶太人kā lín 稱做無受割禮ê；in ê 割禮是人用手tī 身軀行割禮。(全民版)」chit句子thang hō͘咱明顯看出收phoe ê人是外邦人基督徒，ē-sái講是tī以弗所教會中有信徒是猶太人（參考使徒行傳二十：21）。Án-ne，如果信是寫hō͘全體教會信徒看ê，ná對chiah-ê猶太人基督徒來講，是真不適當ê。

因為án-ne，咱比較確信chit封phoe並m̄是特別針對以弗所教會所寫ê書信，卻是屬tī真chē教會信徒teh「傳閱」ê書信之一，mā可能是真正出自使徒保羅ê意思，m̄-koh可能是別人代筆，不過是用使徒保羅ê名字發出ê。
Chit封書信ê中心信息

Chit封書信thang用這簡單ê一句話來形容chit本書信ê中心信息，就是：教會ê元首就是耶穌基督，教會就是基督ê身軀（參考一：22—23）。使徒保羅之所以有chit種觀點，是因為伊teh寫chit封書信ê時，人是tī羅馬監獄中（參考三：1、四：1、六：20），而chit封書信mā可能就是伊所寫ê書信中最後ê一封。當伊聽tio̍h以弗所教會ê信徒tī信仰上有真好ê見證，伊就tī書信中o-ló，並且一再肯定in ê信仰見證。伊kā in講，無論是什麼人，tī教會內，等於是tī耶穌基督內面仝款，就是一體ê，是成做一體ê教會，因為大家lóng結連tī耶穌ê主體上。Á合一ê教會是無分別種族ê，大家lóng有一個共同ê ǹg望，有仝款ê主，是仝款ê洗禮，mā是仝一個位上帝（參考四：4—5）。伊講：

「所以，lín 外邦人無koh 做外國人，m̄ 是生份人；lín 已經是上帝子民ê 同
胞，是上帝厝內ê 人。Lín kah 猶太人仝款，是起造tī 使徒kah 先知ê 地基
頂面，基督耶穌家己mā 做厝角頭siōng重要ê 基石。 21 Kui 個建築物靠基督來結合，互相接連，漸漸擴展，成做聖殿來獻 hō͘ 主。 22 Óa 靠聖神 ê 幫助，lín mā 做伙受起造，來成做上帝所tòa ê 所在。(全民版)」（二：19—22）

Tùi使徒保羅ê書信中，thang瞭解伊ê用心，無論是toh間教會，伊siōng驚惶ê事，就是聽tio̍h教會裡發生分裂ê事，為tio̍h派系（如哥林多教會），á是為tio̍h權威、傳承（如加拉太教會有人「傳另外一種福音」），á是因為族群ê問題（如耶路撒冷ê教會）等，致使大家彼此不kah。因為án-ne，伊寫chit封書信，m̄-nā鼓勵眾信徒beh建立tī基督ê基礎上，ná親像一間房屋有共同ê基石，大家lóng是厝ê一部分，不分彼此，chit點是非常siōng重要ê信仰認知，過去án-ne，對今á日ê基督教會mā是仝款。

Mā tùi chia thang看tio̍h使徒保羅有án-ne深切ê期待：教會，應該是上帝拯救世人ê一個榮耀記號，因為它teh代表基督耶穌。因為án-ne，基督徒ê生活應該是活出新性命ê歡喜kah力量，如果無chit種記號，就無法度見證出信仰ê意義。伊講：「所以， 我奉主ê 名苦勸lín，m̄ -thang koh 再繼續過未信者hit 款ê 生活。In ê 思想空虛 koh hàm-kó͘ ，in ê 心思烏暗，隔斷上帝賞賜ê 活命，因為inlóng 無知又koh 固執。In 喪失良心，就放縱家己ê 私慾，koh 貪戀ta̍k 種污穢ê 行為。M̄ -koh，lín 並m̄ 是án-ne teh 學習基督。Lín 應該有聽過基督ê tāichì，koh 有學習祂ê 教示；耶穌本身就是真理。 Án-ne，lín tio̍h 脫離以前ê生活，thǹg 去舊ê 人，kā 舊ê「我」換新；舊ê「我」因為私慾ê 引誘已經teh敗壞。 23 Lín ê 心思意念mā tio̍h 換新，tio̍h 成做新ê 人，就是照上帝用真理所產生ê 公義kah 聖潔來創造ê 新人。(全民版)」（四：17—24）

這真清楚講出一個基督徒應該有新性命，tī新性命裡有koh khah高ê社會道德標準kah要求，為tio̍h是beh對抗chit-ê誘惑人墮落ê烏暗世代。Tī伊ê觀念中，基督徒ná親像一個穿插全副武裝ê軍人仝款，隨時準備ài出征去phah屬靈ê戰爭（參考六：10—17）。有新性命ê人就是chit-ê樣式，伊m̄是閒tio̍h無事，mā m̄是kui工悠閒四界遊蕩，卻是為tio̍h福音ê緣故，像個已經準備好勢ê戰士仝款，隨時lóng teh等待出征ê號召令一響，就ē-tàng隨時開赴戰場。換句話講，基督徒ê性命是活潑、有力ê，因為伊ê性命已經被上帝ê靈所充滿。

Thang分做下列段落
一、tī耶穌基督內面；第一章1到14節。
二、基督是教會ê元首，tī伊ê內面是成做一體ê體；第一章15到第二章22節。
三、合一ê教會應該ê信仰準則；第三章1節到第四章16節。
四、基督徒tio̍h活出新ê性命；第四章17節到第六章9節。
五、準備作戰ê信仰武士；第六章10節到24節。