認bat 以斯帖記chit本經冊

舊約聖經ê分類中，以斯帖記kah路得記、傳道書、雅歌、耶利米哀歌等chit五本經冊被歸類tī「聖卷」範圍裡。非常特別ê是chit五本「聖卷」lóng kah以色列人民ê節期有關係；親像：路得記kah傳道書lóng kah收成節、Tòa棚節有關，這是慶祝葡萄收成ê季節，有連續七工ê節期。雅歌chit本經冊是kah Pôaⁿ過節有密切關係，表明上帝kah以色列人民之間，就ná同新郎kah新娘hit種有親密ê戀情般。Á耶利米哀歌則kah「亞筆月」九日，是以色列人民teh記念耶路撒冷tī主前586年被巴比倫軍隊攻入，城被攻破，聖殿被燒毀，國家滅亡，人民hông擄去巴比倫做奴隸ê事件有關，koh khah嚴重ê，是tī巴比倫軍隊圍城期間，城內ê猶大人民想beh解飢，甚至無惜刣死親生ê子女煮充飢，詩歌內容充滿tio̍h因為iau餓致使死亡ê悲慘狀況。Á以斯帖記是kah「普珥節」有關，是記念猶太人tī波斯帝國統治下，tī上帝巧妙安排之下ē-tàng tùi被滅族ê危險中安然脫難。因為án-ne，chit本經冊就是beh提醒以色列人民一定tio̍h謹記chit節日（參考以斯帖記三：7、九：24、24—32）。

一直到現在，猶太人iáu繼續teh記念chit-ê節期。「普珥節」時間是猶太曆ê六月14日（大約是現在ê三月份）。Tī chit一工，in一定tio̍h讀以斯帖記，而且ài tī chit一工大食、大lim，盡情歡樂。此外，每一個家庭lóng tio̍h準備禮物分送hō͘親朋好友，ná親像teh過嘉年華會仝款，大家mā會盛裝打扮，並且有各項慶祝活動，m̄-koh並無因為án-ne停止工作。Chit點就kah Pôaⁿ過節、Tòa棚節大無相仝。

引起爭議ê問題
Chit本經冊hō͘讀者ê印象是，真像teh描述明普珥節ê由來，而chit節日ê由來koh kah過去發生過ê歷史事件有關，因為án-ne，kah-ná ē-sái講是一本史冊。比如講，chit本冊一再提起以色列人民kah亞瑪力人之間ê歷史冤仇，作者用末底改kah哈曼之間ê衝突來形容（參考三：1—6、九：6—9），而chit兩個民族之間ê衝突，是tùi以色列人民出埃及進入曠野了後就已經開始了（參考出埃及記十七：8—16，申命記廿五：17—19），而且繼續不斷來發生（參考撒母耳記上十五：1—3、廿八：18，歷代志上四：43）。Ē-sái講是，詳細讀起來koh無jōa像史冊，因為歷史確實證明，波斯帝國ē-sái講是過去所有統治猶太人ê外族人中，對猶太人siōng寬厚、仁慈ê帝國，無jōa可能發佈beh消滅猶太人ê詔書。Á tī第九章16節講猶太人「為tio̍h除滅仇敵，刣死了恨in ê人共七萬五千名」，這真無合理，不可能會有統治者許可被統治者tī其管轄版圖內做chit種事。

Koh講，猶太人ê cha-bó͘-gín-á可能當上波斯帝國ê王后mah？而且末底改是tī「巴比倫王尼布甲尼撒tùi耶路撒冷擄行猶大王耶哥尼雅ê時chūn，掠去一陣人」中ê一位（參考二：6），chit位雅哥尼雅就是約雅斤。Á依照列王記下第廿四章7到17節，chit-ê年代是tī主前597年，而亞哈隨魯王選擇王后是tī主前482到479年之間，án-ne看起來末底改ê年紀mā應該有一百三十gōa歲，怎樣可能iáu tī王宮裡擔任官職？一本短短167節ê經冊，就有真chē ê歷史疑點，tio̍h講它是史冊，確實不適當。因為án-ne，比較正確ê瞭解是：作者想借用一個古老ê傳說，解釋「普珥節」chit-ê節期ê由來kah意義。Ná親像約拿冊仝款，所beh傳達ê m̄是確切ê史料，卻是它beh詮釋ê意義。

Chit本經冊teh寫作上ê特色
這是一本以「宴席」作做主題ê冊，總共提起九pái ê宴席（參考一：3—4、5—8、9、二：18、三：15、五：1—8、六：14、七：1—8、八：17—19）。開始就以「國王ê宴席」phah開故事ê序幕，中間提起前後兩位王后mā舉辦宴席，最後以猶太人ê歡樂喜宴慶祝勝利作結束。仝款是王后ê宴席，前者王后華實蒂辦宴席，卻遭遇tio̍h被罷黜ê運命，後者王后以斯帖連辦兩pái宴席，卻帶來siōng大ê勝利。這中間穿插tio̍h歡慶ê宴席，相對ê mā提起哀傷ê時ê「禁食」，突顯出兩個之間極大ê對比。

Koh講，作者真歡喜用「兩pái」chit種數字，chit種數字teh表明作者寫作上是採用「重複敘述」ê筆法，以強化故事ê戲劇性，並且藉此kā故事帶入高潮。親像：亞哈隨魯王連續舉辦兩pái宴席（參考一：3、5），伊tī第二pái宴席中，罷黜了王后華實蒂。新ê王后以斯帖mā是連續辦了兩pái宴席（參考五：4、七：1—2），tī第二pái宴席中，宰相哈曼被罷黜而且吊死tī絞刑架頂。這兩pái說明王后以斯帖都無kā家己猶太人ê身分暴露（參考二：10、20）；兩pái禁食（參考四：3、16）；哈曼有兩pái kah bó͘、朋友商議（參考五：10—14、六：13）；王后以斯帖有兩pái tī無被召入宮之下，m̄-koh卻冒性命危險為tio̍h beh晉見亞哈隨魯王（參考五：1—3、八：3—4）；兩pái提起太監辟探、提列（參考二：21；六：2），mā兩pái提起哈波the̍h（參考一：10、七：9）；兩pái提起亞哈隨魯王息了伊ê受氣（參考二：1、七：10）；hō͘猶太人兩工ê時間去進行大屠殺（參考九：1、15）；亞哈隨魯王兩pái同意以伊ê名字發出詔書，一pái是因為哈曼ê建議發ê，為tio̍h是beh消滅所有ê猶太人（參考三：12），另一pái是因為末底改提議發ê，為tio̍h beh保護猶太人免遭滅族，而且ē-tàng起來「武裝自衛」（參考八：9—14）。

作者kah寫作ê日期
截到目前猶原無人知影chit本經冊ê作者到底是什麼人，因為chit本經冊主要是記載「普珥節」ê由來，這是猶太人非常熟悉ê一個節日，而故事mā tī民間流傳甚久，因為án-ne，已經無法度確知chit本冊ê作者到底是什麼人了。

雖然chit本冊開始就講「故事是發生tī亞哈隨魯王ê時代」，m̄-koh，，除了頭前已經談過tī亞哈隨魯王hit-ê時代kah末底改ê時代背景有時間差以外，tùi冊中談及有關波斯帝國ê真chē風俗、政治慣例、王宮活動ê情況等內容mā thang看出，該書寫作ê年代應該bē離開波斯帝國滅亡前後siuⁿ遠，mā就是tī主前第二世紀左右。M̄-koh有bē少學者認為chit本冊應該是比第二世紀koh khah早，原因是tī「次經」──《馬加比傳》下卷第十五章36節有chit種句話講：「眾人決議定這日，永遠為節期，成做定例，就是tī十二月（敘利亞話叫做亞達月）十三日，末底改節ê前一日。」án-ne看起來，如果tī馬加比ê作品內面已經有提起「末底改節ê前一日」ê「亞達月十三日」，是m̄是mā teh暗示已經有「普珥節」chit-ê節期活動了？若是án-ne，則chit本冊卷應該tī主前第二世紀前就已出冊。

Án怎明白chit本冊ê信息
這是一個比較嚴肅ê問題，因為本冊中最後是猶太人採取殘酷ê報復手段，就是對仇敵亞瑪力人展開反擊、刣戮、滅絕，連同in ê bó͘、kiáⁿ兒mā lóng無放過，而且奪取in ê財物等，m̄-koh chit種手段絕對m̄是聖經ê教示。因為án-ne，當teh讀此經冊ê時，應該tùi另外一個角度來看，就是咱kám ē-tàng採取殘酷ê手段去報復仇人？人kah人之間相處ê意義是甚麼？聖經ê作者想借用chit-ê故事暗示、提醒讀者，當時猶太人án-ne ê行踏，並無為in ê民族、社會、國家帶來koh-khah好、koh khah和諧ê生活環境，顛倒ê，因為siuⁿ chē ê刣戮，致使暗伏koh-khah chē ê災禍連累kiáⁿ孫。箴言ê作者án-ne講：「你 ê 對敵若腹肚 iau，tio̍ h 用米糧 hō͘伊食；若嘴乾，tio̍ h 用水 hō͘ 伊 lim。Án-ne，你是用熱熱ê 火炭疊tī 伊ê 頭殼頂，hō͘ 伊知見笑；上主mā 會kā 你報賞。(全民版)」（箴言廿五：21—22）使徒保羅mā án-ne講：「M̄ -thang hō͘ pháiⁿ 贏 過lín，tio̍h 用好來贏過pháiⁿ。(全民版)」（羅馬書十二：21）耶穌基督ê話kā咱講：「M̄ -koh， 我kā lín 講，tio̍h 疼lín ê 對敵，tio̍h 替迫害lín ê 人祈禱。」（馬太福音五：44）對抗惡勢力，基督徒不應該手軟，m̄-koh，當有機會處置hiah-ê作惡ê人ê時，m̄-thang採取「趕盡殺絕」ê心態，tio̍h用khah寬容ê胸襟回應，因為只有án-ne，chiah有平息仇恨ê希望。Ná親像諾貝niâ和平獎ê得主南非大主教圖圖（Desmond Tutu）所講ê：「無赦免，就無未來。」這是一句真值得今á日ê基督徒kah基督教會所beh學習kah謹記ê功課。

Koh講，chit本經冊一再提出一個問題：有權位ê人，應該用甚麼態度對待人民？亞甲人（亞瑪力人）哈曼有機ē-tàng上宰相，只因為為猶太人末底改對伊不尊敬，就起了消滅kui個猶太民族ê心，這m̄是擁有高官爵位ê人應該有ê態度。仝款ê，當擁有權位ê猶太人官吏末底改得tio̍h權柄ê時，mā是採取kah哈曼仝款殘酷ê手段來對待哈曼ê家族，以及其他對猶太人不懷善意、敵視ê人，chiah-ê lóng m̄是讀者所beh學習ê對象。使徒保羅講：「你若做好，to̍h m̄ 免驚掌權者；只有做pháiⁿ ê 人chiah tio̍h 驚in。你ài 做一個m̄ 驚掌權者ê 人á 無？若ài，tio̍h 做好，你就會得tio̍h 褒獎；(全民版)」（羅馬書十三：3）基督徒如果有機會成做掌權者，就koh khah應該ài有chit種信仰告白：beh hō͘所有人民tī基督徒身上體驗出上帝tī耶穌基督內面所散發出來ê慈愛、憐憫、赦免之愛。

Chit本經冊ê主要大綱
1.第一章到第二章18節：以斯帖入宮被選做后ê時代背景。
2.第二章19節到第三章15節：末底改揭發王宮太監ê陰謀，以及宰相哈曼圖謀消滅猶太人ê計畫。
3.第四章：末底改kah王后以斯帖對宰相哈曼計畫ê反應。
4.第五章：王后以斯帖計畫搶救猶太人，宰相哈曼陰謀絞死末底改。
5.第六章：弄巧成拙ê宰相哈曼。
6.第七章：王后以斯帖宴請亞哈隨魯王，並揭發宰相哈曼ê陰謀。
7.第八章到第九章19節：猶太人進行反撲，大肆進行屠殺仇敵，末底改高升為宰相。
8.第九章20到32節：設定「普珥節」ê節期活動kah內容。
9.第十章：附錄。