認bat出埃及記chit本史冊
這是一本信仰告白ê記錄
出埃及記chit本經冊thang講是一本記述以色列民族歷史ê史冊。描述上帝án怎tùi埃及帝國ê手中kā in拯救出來，hō͘ in tùi原本是埃及人ê奴隸，變成自由人ê一部血目屎之冊。因此，講出埃及記是一本以色列民族ê史冊是對ê。M̄-koh，如果講出埃及記是以色列民族信仰告白ê反省記錄則koh khah正確。

Ná親像創世記hit本古老ê經冊仝款，出埃及記mā是由至少三種以上ê資料交織編撰而成ê，chiah-ê資料包括有：「耶和華文獻」ê資料、「以羅伊文獻」ê資料，kah「祭司文獻」ê資料等三種。Tī頂面所講三種文獻中，以「祭司文獻」ê資料siōng豐富，所佔ê篇幅mā siōng chē，tī總共四十章ê篇幅中，「祭司文獻」ê資料長到十六章之多。Á chiah-ê資料多數是記述有關製造聖幕，以及kah聖幕裡外相關ê物品、祭典禮儀之條例規定。

無仝文獻資料ê特色
每一種資料lóng有它ê特色kah強調ê重點，這kah資料出品ê時代背景以及作者ê觀點有關係。親像：tī出埃及chìn前ê十大災難中，「祭司文獻」講摩西施行上帝透過伊顯示出來ê神跡，埃及ê巫師mā會。M̄-koh，chiah-ê巫師所行出來ê法術，m̄-nā無法度解決上帝藉tio̍h chiah-ê神跡所帶來ê懲罰，顛倒ê，巫師ê法術只是加重了災難ê嚴重性，甚至連巫師家己mā逃避不了chiah-ê災難降臨在in家己身上（參考出埃及記七：11—12、22；八：7、18；九：11）。「祭司文獻」Chit種寫法就是beh表明一個重要信息：想以人ê能力來對抗上帝ê旨意，m̄-nā lóng無意義，明明是就是siōng大ê愚戇！

基本上thang kā chit三種主要資料稱做「文獻」á是「底本」，大部分了解如下：
一、「耶和華文獻」，簡來稱呼「耶」典。

Chit種文獻tī中文《和合本》聖經譯文內面，通常是用「耶和華」Chit-ê名稱teh稱呼上帝（《現代中文譯本》已經改用「上主」à）。這是比較早期出現ê資料，大約是寫tī主前950年ê時代。Chit-ê資料ê特色是歡喜用「擬人化」ê筆法表達上帝出現kah人面對面講話。Chit-ê資料是tùi描述上帝ê特性開始，親像：上帝會受氣、痛心、會出現在人ê面前，kah人討論問題、對話。出埃及記第三、四章中記載上帝真清楚以色列人民ê苦楚，因此ài摩西代表上帝tùi埃及帶領以色列人民出來。Koh親像創世記第十八章描述ê上帝，祂kah亞伯拉罕討論beh懲罰所多瑪kah蛾摩拉城犯罪ê事。Chit種資料出現在所羅門時代，因為國勢甚強，人民生活非常富裕，á chiah-ê lóng是來自上帝ê賜福，隱約teh說明chit-ê時代ê人，kah上帝之間ê關係非常親密，ē-tàng kah上帝面對面交談。另外一方面mā teh隱喻上帝造人，hō͘人成做一切萬物ê中心。

Chit種資料描述人類心靈ê動態，筆法相當細膩，有ê時會hō͘人感覺tio̍h作者kah-ná就是teh述說家己ê經驗仝款。特別是tī第七章到十二章中，埃及法老王hit種反反覆覆ê心態，以及無顧人民苦難ê行踏，tú好講出人心墮落ê現象。

二、「以羅伊文獻」，簡稱做「以」典。
Chit種文獻tī中文《和合本》聖經內面通常是用「神」Chit-ê字來稱呼上帝。Chit-ê資料大約出現在主前750年ê時代，相差「耶和華文獻」大約有兩百年時間，是來自北方「以色列」（á是講「示劍」）ê資料。Chit-ê資料tī創世記中有一個比較明顯ê特色，就是上帝通常會tī「異象」中kah人講話。另外一個特色就是上帝mā會透過「夢」對人講出祂ê旨意。Tī出埃及記中chit-ê資料大部分是kah其他兩種文獻編撰做伙，m̄-koh tī頒佈十條誡命以及其他相關法律，則以chit-ê文獻為重（參考出埃及記第二十到廿二章）。特別是tī第三十二章描述以色列人民背棄上帝，並且強迫亞倫造金牛供人民敬拜ê記事，lóng是由chit-ê文獻所提供。

Chit種資料出現ê時代，因為已經是tiāⁿ-tiāⁿ有戰亂，感覺上帝比較權威，距離人mā khah遠，無像頂面所講「耶和華文獻」所描述ê，上帝會直接kah人講話，卻是透過忠心ê僕人摩西代替轉達一切ê法令、誡命。當以色列人民離開埃及ê時chūn，「上帝ê天使」出現在人民中，行tī以色列人民前頭，tú-tio̍h危險ê時chūn，「上帝ê天使」會「轉到後面」去保護以色列人民免受傷害（參考出埃及記十四：19）。Tī曠野中，上帝透過「號角聲」來顯明家己ê威嚴（參考出埃及記十九：13、16、19；二十：18—21）。

三、「祭司文獻」。這是祭司主筆ê資料。
這大概是主前550年時代ê作品。Chit-ê年代mā是猶太人被掠到巴比倫做奴隸以後ê事loh。Tī摩西五經中，利未記kah民數記差不多lóng是chit-ê文獻ê資料。作者對族譜真重視，對「立約」koh khah致意。Tī文獻內thang mā看tio̍h「秩序」ê重要性，因為祭司ê工作kah敬拜、獻祭等宗教禮儀有密切ê關係，所以對「秩序」ê要求mā比其它文獻重視。Tī創世記內面，作者透過創造ê故事表明「秩序」，Tī出埃及記裡則用製造聖幕以及聖幕內一切ê備品，說明kah「秩序」相關ê祭典禮儀。親像：出埃及記第廿五到三十一章、第三十五到四十章等。

「祭司文獻」ê作者會án-ne強調敬拜禮儀、秩序等，是因為當時耶路撒冷聖殿已不復存在，為tio̍h beh保存聖殿祭典禮儀ē-tàng延續到後代kiáⁿ孫，作者真細膩地記錄相關ê資料。這當然mā講出作者ê心聲：國家會án-ne滅亡，就是因為過去ê日子，大家對敬拜上帝ê態度無夠敬虔kah真實所致。

Tùi「祭司文獻」mā thang看出祭司ê角色tī以色列民族中佔有真重要ê地位。M̄-nā是tī宗教事務上ê，mā是社會上ê。Tùi訂定ê法律規章中，thang看出祭司就是以色列社會中主要ê領導階級，á這kah in tī主前586年亡國tī巴比倫帝國，hông擄去做奴隸ê事件有密切關係。出埃及記表面上是描述以色列人民án怎tùi奴隸ê環境中脫離出來，其實「祭司文獻」ê作者是beh透過chit份資料，幫助已經淪陷tī巴比倫ê以色列人民知影：謙卑、悔改ê心，真實而且頂真ê態度敬拜上帝，是脫離奴隸生活ê惟一途徑。
是宗教改革，m̄是政治運動。

因此，出埃及記tùi文字表面上看起來，kah-ná是teh記錄以色列民族脫離被埃及帝國統治ê一部史冊，m̄-koh koh khah正確ê講法，應該講是一部描寫以色列民族án怎進行宗教信仰改革ê記錄。親像：上帝差派摩西去埃及見法老王ê時，就一再說明是beh帶領以色列人民到「曠野」敬拜上帝（參考三：18；五：1、3；七：16；八：27）。

「曠野」所顯現出來ê意義真無仝款；它是一片空無一物之地，mā是寸草不生ê所在。Tī án-ne ê所在，人ê生存就是一個真大ê威脅。這kah以色列人民原本tī埃及hit-ê富裕ê物質生活，ē-sái講是完全無仝ê景況。作者描述摩西離開埃及王宮ê榮華富貴生活，逃到米甸葉特羅家去避難，tī hia一待就是四十年之久，從事放牧ê辛苦、低賤工作（參考創世記四十六：31—34）。然後摩西帶領以色列人民出埃及tī曠野漂流四十年。

作者tī-chia beh表明一個重要ê意義：上帝重新洗滌以色列人民ê心靈，就kah-ná祂重新「改造」摩西仝款。Hō͘以色列人民tùi óa靠埃及帝國，成做埃及ê奴隸，到完全óa靠上帝ê帶領，成做上帝ê子民。上帝用ê方式是：由豐富ê食物到完全缺乏，甚至是iau餓；由多神ê偶像神明崇拜，到建立獨一真神耶和華上帝ê信仰。換句簡單ê話講，出埃及記是一本講述以色列民族kah上帝之間建立「永遠之約」ê告白冊。Tī chit-ê本經冊中thang清楚看tio̍h立約ê詳細過程，以及約ê內容。

無反省ê信仰ē-sái人墮落、遠離上帝
無法度忽略ê一點是：出埃及記是以猶太人ê觀點寫成ê一部信仰史冊。作者雖然同時透過史料紹介以色列民族出埃及ê運動，m̄-koh，koh khah重要ê是說明上帝為甚麼會成做以色列民族獨一上帝ê由來。因為是khiā tī猶太人ê觀點，因此，chit本冊就kah一般史冊有一個共同ê態度：以家己ê民族為優，其他民族為次。這thang tùi參與守Pôaⁿ過節者，一定tio̍h先接受割禮chiah ē-tàng食用ê規定（參考出埃及記十二：48）看出來，in ê態度是：成做一個以色列人，就是成做上帝所拯救ê對象，是聖潔ê人，chit種人chiah thang進入聖幕裡敬拜上帝。M̄-koh，割禮這原本是表明立約、分別為聖ê信仰基礎，卻因為時間ê經過，缺少信仰反省ê心境，最後致使chit-ê相當有意義ê性命之約記號──割禮──會失去它存在ê價值。因為後代ê以色列人kā割禮看kah比順服耶和華上帝koh khah重要。Á chit點在先知運動中bat tú-tio̍h到嚴厲批評，先知耶利米嚴詞批評講：

「上主講：「你看，日子teh beh 到，我beh 刑罰所有受割禮ê kah 無受割禮ê，就是埃及、猶大、以東、亞捫族、摩押人kah 所有tòa tī 曠野有剃鬢邊ê；因為列國lóng 無受割禮，以色列人ê 心mā 無受割禮。(全民版)」（耶利米書九：25—26）

使徒保羅mā án-ne講：
其實外表是猶太人ê 人，並m̄ 是真正ê 猶太人；肉體受割禮mā m̄ 是真正ê 割禮。內在ê 猶太人chiah 是真正ê 猶太人；內心接受ê 割禮chiah 是真正ê 割禮，m̄ 是靠律法ê 條文ê 割禮。Chit 款人所受ê o-ló m̄ 是tùi 人來ê，是tùi 上帝。(全民版)（羅馬書二：28—29a）

伊寫hō͘加拉太教會ê書信中，mā án-ne講：
「有受割禮kah 無受割禮lóng 無要緊，要緊ê 是咱tio̍h 成做新創造ê 人。(全民版)」（加拉太書六：15）

Thang án-ne講，原本割禮是beh分別信仰ê，後來卻變成分辨民族，而且含有「優劣」區別ê意識型態tī內面，這是非常têng-tâⁿ ê信仰認知。因此，讀出埃及記chit本經冊，應該thang幫助咱認識一個重要ê信息：信仰一定tio̍h ê時刻確確實實地tùi內心反省開始，án-ne chiah bē陷入以色列人民所犯ê過錯，認為信耶穌ê人才是聖潔ê族類，m̄信ê人lóng是「lah-sap」、「罪人」、「bē得救」ê人。

Koh講，信耶穌siōng重要ê是成做「新造ê人」，á不是beh停留tī he些虛有其表ê敬拜禮儀，á是只致意是m̄是受洗chit件事，卻bē記得上帝tī咱性命中，透過耶穌所表達出來救贖ê恩典。就是出埃及記chit本經冊一個重要ê啟示。

Chit本史冊ê主要大綱
Thang將出埃及記分做幾個段落來看：
1.第一章到第四章：出埃及前ê序曲。
2.第五章1節到第七章13節：摩西kah亞倫向埃及法老王要求，hō͘ in帶領以色列人民出埃及。
3.第七章14節到第十一章10節、第十二章29到42節：十大災難發生，以及以色列人民出埃及。
4.第十二章1到28節、43到51節、第十三章1到16節：Pôaⁿ過節、除酵節ê規例。
5.第十三章17節到第十八章27節：以色列人民tī曠野ê經歷。
6.第十九章到第廿四章：頒佈西奈之約。
7.第三十二章到第三十四章：以色列人民背棄上帝。
8.第廿五章到第三十一章、第三十五章到第四十章：製造聖幕ê規定，以及敬拜ê禮儀。

（本冊經文採用opensource/copyleft ê《全民台語聖經》，tī chia特別致謝。）