認bat 以西結chit本經冊

通常以賽亞書、耶利米書，kah以西結書等三本hông稱做「三大先知書」。其實先知無所謂「大」á是「小」之分，koh khah無所講ê「高」、「低」之別。先知ê意思，就是上帝ê代言人。M̄-koh會有所講ê「大先知書」ê講法，是因為chit三本經冊ê篇幅比其他先知ê文獻加出真chē。

以西結書chit本經冊有一個真大ê特色，總共有四十八章ê篇幅中，thang kā它分做前後兩個段落，而且tú好前後段真平均：第一段是tùi第一章到第廿四章，這是先知以西結tī耶路撒冷淪陷以前傳出ê信息；第二段是tùi第廿五章到第四十八章，這是tī耶路撒冷淪陷了後ê信息。

Koh講，以西結書第一章2節講先知以西結看見異象ê年代是發生「tī約雅斤王受掠後第五年」，這年代就是主前598年，chit件事tī第廿四章1到2節記載真清楚，講述巴比倫帝國圍攻耶路撒冷城，日期是九月10日。然後tī第三十三章21節記載耶路撒冷城被攻破，時間是流亡ê第十二年十月5日，這就是主前586年，猶大國滅亡。Á tī第廿九章17節，提起流亡ê第廿七年正月初一，he是主前571年，而chit一年是有關伊被呼召傳達上帝信息最後ê年代，以後就無關係伊ê消息á是記事。Mā thang tùi頂面所講chiah-ê年代，看出以西結kah耶利米是屬tī同一時代ê先知。

關係以西結chit位先知
先知以西結可能是tī主前623年出世tī耶路撒冷，伊ê老父是祭司布西（參考以西結書一：3）。「以西結」chit-ê名字ê意思，含有「剛強、有利」、「滿有上帝ê力量」（參考三：14），chit點tùi伊被聖神充滿soah ē-tàng一再看見異象知影。

依照祭司世襲ê傳統，tī以西結年輕時代必定受過頂真ê祭司養成教育，而且已經接受祭司ê職位（參考以西結書一：3，歷代志上廿四：16）。M̄-koh伊ê時代，國際政治環境對伊ê國家南國猶大真不利，是一個chē災chē難ê時代。北國以色列早tī主前721年被亞述帝國所滅。Á在先知以西結少年ê時，亞述帝國iáu-koh是一個強猛ê國家，kah埃及相抗衡tio̍h，當時巴比倫帝國tú-teh漸漸興起，為tio̍h防範chiah-ê帝國ê入侵，真chē附近小國ê特使不時穿梭彼此之間，希望組成聯盟共同抵抗亞述，mā有一kóa小國為tio̍h防範埃及ê入侵，而想beh kah巴比倫結盟。M̄-koh顯然地，無任何一個人ē-tàng想像會tio̍h，強猛ê亞述帝國竟然會tī主前612年被巴比倫帝國消滅，巴比倫帝國取代亞述，對埃及造成真大ê壓力，巴比倫帝國並且接受kui個亞述帝國ê版圖，hit時先知以西結年紀kan-taⁿ 11歲，卻已經看tio̍h國家面臨巴比倫kah埃及帝國ê威脅。

Tī chit年代中，南國猶大陷入一片驚惶不安ê中間，當埃及國王尼哥二世準備出兵攻打巴比倫ê時，猶大國王約西亞卻想beh趁此機會出兵，來擺脫埃及ê轄制，tùi án-ne引起埃及國王尼哥二世ê忿怒，tī米吉多射殺了猶大王約西亞（參考歷代志下三十五：20—24，耶利米書廿二：10—12），這是tī主前608年，埃及國王尼哥二世iáu俘虜猶大人民所膏立ê王—約西亞kiáⁿ兒ê約哈斯，並向猶大國強索賠償費，而且立約哈斯ê兄哥以利亞敬做猶大王，並kā伊改名為約雅敬（參考歷代志下三十六：1—4）。

受tio̍h強敵ê環伺、攻擊，不時會hō͘小國感覺膽戰心驚，而且會想beh四界chhōe庇護ê力量。主前604年，約雅敬ná親像約西亞仝款，決定脫離埃及ê轄制，轉向巴比倫靠lóng。主前601年，巴比倫kah埃及帝國爭奪中東霸權，約雅敬利用兩大帝國紛爭ê時，背叛巴比倫，想走chhōe獨立，m̄-koh遭遇tio̍h巴比倫聯盟—包括敘利亞、摩押kah亞捫等國在內ê軍隊，強烈攻擊，致使耶路撒冷被佔領，人民受掠ê慘劇（參考列王記下廿四：1—4）。

主前597年，巴比倫帝國koh一pái舉兵攻入耶路撒冷，並且kā繼承王位ê約雅敬ê kiáⁿ約雅斤俘虜，人民hông擄去巴比倫做奴隸者真chē，南國猶大完全臣服tī巴比倫，巴比倫帝國另立約雅斤ê叔父瑪探雅做猶大王，另hō͘伊改名為「西底家」（參考列王記下廿四：10—17）。

就是tī chit種環境之下，先知以西結看見ê，就是國家動盪，民心不安。主前587年，mā就是tī伊大約37歲hit年，巴比倫帝國對不順服ê南國猶大王西底家來一個徹底打擊。尼布甲尼撒派兵攻打耶路撒冷，圍城一年六個月，tī主前586年完全消滅猶大，燒毀耶路撒冷城，連聖殿mā同齊燒毀。先知以西結mā tī chit時chūn kah伊ê同胞同時被掠到巴比倫做奴隸，tòa tī巴比倫ê迦巴魯河邊（參考以西結書一：1）。「迦巴魯」ê意思是teh指「大河」，真可能就是teh指幼發giú底河。這mā是當時被巴比倫帝國俘虜去ê猶太人集中khiā起ê營區，ná親像現在ê俘虜營。

先知以西結就是tī被巴比倫統治ê時chūn受呼召當先知ê（參考以西結書一：3）。Án-ne，伊既是祭司，mā同時是先知。伊受呼召擔任先知ê職分是tùi主前593到571年（參考一：2、廿九：17），而自主前571年以後就無關係伊ê記事。Á tī chit二十幾年ê期間裡，到底發生過甚麼事件？並無明確記述，m̄-koh thang明確知影ê是tī主前597年kah主前586年，耶路撒冷bat遭遇tio̍h掠奪、圍困，包括來自埃及ê（參考列王記下廿三：31—34）、巴比倫ê（參考列王記下廿四：1、廿五：1—7），以及主前582年了後，巴比倫帝國koh連續kúi-nā pái kā以色列人民俘虜伊去（參考耶利米書五十二：28—30）。Chit對身為先知ê以西結來講，一定有真chē深刻ê感觸，而hō͘伊非常痛苦ê事，to̍h是tī伊得tio̍h bó͘往生ê消息ê時，卻無ē-tàng為伊舉哀、痛哭、流目屎（參考以西結書廿四：15—18）。

Kah先知耶利米受呼召當先知有點á類似ê所在，就是先知以西結受呼召ê時，就已經hō͘上帝警告過，伊所傳出ê信息，並m̄是當時ê以色列人民所歡喜聽ê，伊會聽tio̍h反對ê聲音，mā會遭遇tio̍h極大ê阻力，m̄-koh上帝beh伊m̄免驚惶（參考以西結書二：3—7），祂behhou7伊有夠額堅硬ê力量抵擋chiah-ê固執人民ê反彈（參考三：9）。Á咱知影，聖經中出現ê先知lóng有一個共同特色，就是對國家ê政治發展非常敏感，先知所傳達ê信息往往kah社會混亂、失序，統治者ê行為無公義，以及有權勢ê社會領袖貪婪、欺壓貧困者等等有密切關係。Mā因為án-ne，先知ê處境往往是孤獨、危險ê。

伊是一位有特殊靈力kah感應力ê先知
先知以西結mā是一個真有特殊靈力ê人；伊有真chē-pái神遊魂外（參考三：23—27、八：1、十一：1、三十七：1、四十：1—3、四十三：5、四十四：1、4）。Tī伊ê神遊中，上帝親自帶領伊，對伊講話。Mā因為伊不時神遊魂外，因有人認為伊患有精神異常ê破病，親像：第三章1到3節記載先知以西結「食冊」，koh tī食下了後iáu講「這冊卷像蜜仝款甜」。不過先知以西結每pái神遊tńg來了後，馬上就恢復正常ê狀態。

另外一點，伊mā不時用身軀ê動作來表演，傳達上帝hō͘伊ê信息（參考三：25—26、四：1—15、五：1—4、十二：1—4、十二：17、三十七：15—17），伊用ê chit種方式，比起先知以賽亞kah耶利米，lóng有過之。伊bat有長到七工之久，到家己流亡ê同胞所tòa ê所在，卻m̄知ē-tàng做甚麼（參考三：15）；伊也bat變成啞口，無法度講任何一句話（參考三：26）；上帝mā bat ài伊tī磚á角上畫一個城，代表耶路撒冷，以鐵片做城牆，用這來象徵耶路撒冷城被圍困（參考四：1—3）；倒長到390天了後，上帝koh ài伊ǹg正pêng側倒40天之久，用chit種方式來象徵以色列人民受懲罰ê痛苦等等，先知以西結chit種經驗kah能力tī所有先知中是siōng特別ê一位。

Mā因為chit-ê緣故，先知以西結不時hō͘人看做是一位精神異常ê人。伊雖然是常看見ê異象，m̄-koh卻thang kā chiah-ê異象真清楚ê描繪出來。伊甚至thang真清楚講出新建造ê耶路撒冷聖殿，而原本ê耶路撒冷城kah聖殿，lóng已經tī主前586年被巴比倫帝國kā它摧毀ā，當時伊人是tī巴比倫ê俘虜營中，卻ē-tàng一五一十清楚描繪出重新建造ê耶路撒冷聖殿之景象，而且是連寸尺、方位等lóng詳細說明出來（參考第四十到四十五章）。若是幻覺，絕對bē可能án-ne細膩。

雖然kah先知耶利米同一時代，而且仝款lóng真關心並對猶大社會敗壞ê現象傳出譴責ê信息，m̄-koh先知以西結koh khah是關心ê，是猶大人民teh敬拜ê禮儀上，無保持純潔ê心。Chit點對今á日ê基督教會來講，以西結書確實是本真好ê反省教材。

Chit本經冊ê信息
Ná親像頭前講過ê，以西結書chit本經冊ê時間背景thang分做兩個ê時段；一是tùi主前593到586年，這是tùi第一章到第廿四章，mā就是tùi伊被呼召開始，到耶路撒冷城淪陷。Tī chit段時間內，伊所傳出ê信息chē屬tī「哀悼、吐氣、悲痛」等做主題內容（參考二：10）。主要lóng khǹg tī耶路撒冷teh beh被毀滅ê警告（參考第四、五、十二、廿四章）。Kah先知耶利米所提起ê問題仝款，就是以色列人民棄sak上帝去拜偶像ê問題非常嚴重，而且屢勸m̄聽，致使上帝一定tio̍h用非常嚴厲ê手路，包括戰爭、饑荒、瘟疫來懲罰in，並且差遣敵人hō͘以色列民族分散到各地去，並會hō͘耶路撒冷城—原本以色列人民看做堡壘、堅固無法度摧毀ê聖城—變成廢墟，無人khiā起。

二是tùi第廿五到第四十八章，chit段是teh描述耶路撒冷城被毀壞，以色列人民被掠到巴比倫了後（主前586年以後），tī異鄉痛苦ê生活中。此期ê先知以西結無koh以嚴厲、警告ê話語為信息ê主題，卻是改以鼓勵、安慰為主要信息ê中心（參考第三十四到三十八章）。Tī以色列人民差不多完全絕望ê時chūn，伊講上帝teh-beh重新koh再造in，而且kā koh再恢復原本已經分裂ê以色列民族成做一個完整ê國家（參考第三十七章），koh khah重要ê是：上帝會親自牧養in，成做in ê牧者，看顧in（參考第三十四章）。

Ná親像其他先知所傳出ê信息仝款，先知以西結mā hō͘咱一個清晰ê信息：無真實ê宗教信仰，就體會不出上帝ê慈愛。因為上帝是性命ê主，祂是神聖ê，祂ê子民mā一定tio̍h以聖潔ê心回應祂ê疼。這聖潔ê心就是bē-tàng心懷二意，以偶像來取代上帝。

另外，先知以西結ê信息mā提供給當時淪亡tī巴比倫帝國ê以色列人民一個嚴肅ê問題：如果無上帝，in ê希望tī tó位？如果上帝棄sak了以色列人民，ná in iáu有得救ê希望mah？先知以西結hō͘ in ê答案是非常清楚—無。Chit本經冊已經清楚kā所有ê讀者講：上帝是歷史ê主，mā是咱性命ê主宰。Chit位性命ê主宰，m̄-nā是施行審判ê上帝，mā是一位滿有慈悲、憐憫ê上帝。伊tī第四十七章1到12節提出新性命ê景象—tùi敬拜上帝ê所在開始。因為敬拜上帝就是得tio̍h上帝話語ê來源，chit-ê話語mā是性命ê泉源。

貫穿kui本經冊ê中心思想
Chit本冊一再出現mā是siōng中心ê主題，就是「承認（á是「知影」）我是上主」。Chit句話tī kui本冊裡超過五十pái ê chē（參考六：7、10、13、14、十一：10、12、十二：16、20、十三：9、14、21、23、十四：8、十五：7、十六：62、二十：38、42、廿二：16、廿三：49、廿四：24、廿五：5、7、11、17、廿六：6、廿八：22、23、24、26、廿九：6、9、16、21、三十：8、19、25、26三十二：15、三十三：29、三十四：24、30、31、三十五：4、9、15、三十六：23、28、38、三十七：6、14、27、28、三十八：23、三十九：7、28）。Á配合tio̍h chit句「承認（á是「知影」）我是上主」Chit句話ê，就是貫穿kui本經冊ê「至koân ê上主」Chit句話，chit句話thang說明先知以西結所beh傳達hō͘以色列人民ê信息是：只有耶和華上帝，chit位帶領in祖先出埃及ê上帝，mā是創造宇宙萬物ê上帝，祂chiah是真正上帝，其它ê神明lóng是虛假ê，特別是hiah-ê偶像神明lóng m̄是真實ê。

這是一本無容易明白ê經冊
會講以西結書「無容易明白」，主要原因是經文記載真chē「異象」。先知以西結siōng大ê特色是伊有kúi-nā pái神遊魂外，別人tī巴比倫，伊ê神魂卻被帶到耶路撒冷，這到底是怎樣ê一個神態？án-ne情況之下所講ê話，beh表達ê意義是甚麼？比如第三章24節到第五章12節，Tī chit段經文中，上帝beh先知以西結kā家己囚禁起來，每工食用「人糞做燃料」烘ê餅（參考四：12）；lim一點點á ê水（參考四：11）；刮鬍鬚、剪頭毛等等。Chit種動作ê象徵確實m̄是真容易瞭解，尤其是chiah-ê動作lóng是tī公開ê場合表演hō͘群眾看ê，而原本chiah-ê象徵ê動作，lóng是希望大家ē-tàng明白上帝ê話，以達到警告ê作用。Ē-sái講是，chiah-ê動作卻m̄是一般民眾ē-tàng一看就明白ê時，án-ne，chiah-ê動作koh有何意義？

Thang分做下列幾個段落
1. 第一章到第三章；先知以西結蒙召出來傳達上帝ê信息。
2. 第四章到第廿四章；警告耶路撒冷會hō͘毀滅。
3. 第廿五章到第三十二章；對列國ê審判。
4. 第三十三章到第三十九章；預言以色列teh beh復興。
5. 第四十章到第四十八章；復興後ê以色列景況。