認bat 加拉太書chit本經冊

Teh讀使徒保羅ê書信ê時，通常lóng會先提出幾個問題：
1.作者是什麼人？這mā是teh查考聖經各卷經卷ê時，lóng會提起ê問題。因為知影作者是什麼人，就ē-tàng明白作者所處ê時代背景。

2.為什麼人而寫ê書信？這有幫助讀者明白寫這書信ê目的。比如講羅馬書，是寫hō͘ tī羅馬城教會ê信徒。Ē-sái講是該教會並m̄是使徒保羅開拓起來ê教會，伊為甚麼beh寫信hō͘ in？其中有一個主要目的，就是使徒保羅希望羅馬教會ê信徒會支持伊去西班牙傳福音（參考羅馬書十五：23—24）。

3.為甚麼beh寫這書信？每卷書信lóng有伊ê目的，像加拉太書，就是因為該地區ê教會tī信仰上已經出現問題，有人tī使徒保羅後壁進入該教會散播錯誤 ê信仰認知，致使信徒偏離正確之道，而chiah-ê教會是使徒保羅所開拓ê教會，伊認為有必要mā有責任kā真相澄清，導正信徒ê信仰。

作者是什麼人？
Tī新約使徒書信中，有十三本書信lóng是用使徒保羅ê名字寫ê，mā就是tùi羅馬書到腓利門書等，m̄-koh tī chit十三本書信中，只有七本書信thang確定是使徒保羅所寫ê，就是：1.羅馬書、2.加拉太書、3.哥林多前書、4.哥林多後書、5.腓立比書、6.帖撒羅尼迦前書，以及7.腓利門書等。雖然帖撒羅尼迦後書第三章17節講：「我親筆寫『保羅祝lín好。』我每一封信lóng án-ne簽字；這是我ê筆跡。」m̄-koh tī新約學者中間iáu是有爭議，ná親像其他書信作者是m̄是lóng是使徒保羅？一直lóng iáu有爭議。

其實chit種借用別人ê名字寫作並m̄是甚麼奇怪ê事，ná親像馬太福音、約翰福音等到底是什麼人寫ê？就有類似chit種講法，認為作者是借用耶穌ê門徒馬太、約翰等人ê名義寫做ê。有一種看法認為án-ne比較容易被信徒接受而願意閱讀。

寫chit-ê書信ê原因
使徒保羅所寫ê書信中，除羅馬書外，加拉太書thang講是另外一本真重要ê書信。因為tī chit本書信中，伊用真嚴厲，甚至是非常無客氣ê語氣，責備加拉太地區ê基督徒tī伊離開了後，隨時就接納傳「另外一種福音」ê人進入教會，而影響信徒ê信仰，棄sak了耶穌（參考一：6）chit本書信mā是使徒保羅teh探討有關摩西律法中ê割禮kah耶穌救恩之間ê關係，siōng徹底ê一本書信。

為甚麼使徒保羅寫hō͘加拉太教會ê chit本書信中，會提起耶穌乃是上帝白白賞賜hō͘人ê救贖恩典？為甚麼使徒保羅tī短短六章ê篇幅中，會用長到四章ê篇幅討論有關耶穌ê救恩kah摩西律法之間ê無仝？原因是有一陣歸屬耶穌ê猶太人信徒，in非常堅持：任何一個信了耶穌ê人，lóng一定tio̍h koh再遵守摩西律法所規定ê各項禮儀、規律，尤其是一定會守割禮，chiah ē-tàng得救，若無，就kah救恩無緣。使徒保羅反駁chit種講法，伊直截了當地講：傳達chit種信息ê人，是teh「傳另外一種福音」，kah伊所傳達ê「惟獨耶穌」ê救恩無仝。因為án-ne伊講，無論chit種人是什麼人，lóng「應受詛咒」（參考一：8—9）。伊甚至tī chit本書信ê結尾強調：「有受割禮kah 無受割禮lóng 無要緊，要緊ê 是咱tio̍h 成做新創造ê人。(全民版)」（六：15）做一個猶太人，tio̍h像使徒保羅講出chit種話，並m̄是一件容易ê事，因為本身是一個正港ê猶太人，守割禮乃是kah上帝建立性命之約，甚至是對家己族群ê認同（參考創世記十七：9—14）。M̄-koh使徒保羅傳福音到外邦人地區了後，已經跳脫猶太人傳統上ê框架，卻是以耶穌作為性命ê中心，chiah ē-tang3kah上帝和好，藉此mā kah所有ê族群和好（參考三：26—28），ná親像伊teh寫hō͘羅馬教會ê書信中，一再提起ê，咱是因為耶穌ê救恩kah上帝和好，卻m̄是因為遵守律法（參考羅馬書三：20）。

為tio̍h beh說明chit點，使徒保羅舉出猶太人siōng尊敬ê祖先亞伯拉罕為例，伊講亞伯拉罕kah上帝關係和好，是因為伊信上帝，而這信，hō͘伊tī上帝眼中成做一個義人（參考加拉太書三：6，創世記十五：6），因為án-ne，伊強調講咱是因為信而會得thang kah上帝和好。Á這信，是因為透過耶穌ê救恩，而成為上帝ê kiáⁿ兒（參考三：26）m̄是透過律法。真簡單ê理由，就是teh亞伯拉罕以後，至少beh經過四百多年，摩西ê律法chiah出現。

寫chit-ê書信ê日期
使徒保羅是甚麼時chūn寫出加拉太書chit本書信ê？這一直是聖經學者想beh確知ê事。寫作ê時間tùi主後48年到58年ê每一年lóng有人提出，m̄-koh大概thang分做兩個講法：一是主張tī耶路撒冷會議（主後49年）chìn前寫ê，二是tī chit會議了後。

依照第四章13節ê記載：「Lín知影，因為我身軀有病，我chiah有初次向lín傳福音ê機會。」chit封書信應該是使徒保羅第一pái到加拉太去以後ê事，則chit-ê書信極有可能是使徒保羅tī第二pái到加拉太去訪問了後寫ê。比較一下使徒行傳第十五章6節記載ê耶路撒冷會議，該會議是tī主後49年召開ê，因為án-ne使徒保羅寫chit-ê書信應該是tī chit年了後，特別是tī第二章1節有提起伊帶門徒提多同齊前往耶路撒冷。Tùi chit-ê觀點看本書信第一章6節，加拉太教會發生「另外一種福音」ê問題應該mā是tī chit pái會議了後。

不過mā有人主張chit-ê書信應該是寫tī耶路撒冷會議chìn前，因為tio̍h án-ne書信都無提起有關該會議決定ê事項。如果是寫tī該會議了後，使徒保羅總是ē-tàng kā hit-pái會議決議ê事項：1.外邦人教會ê信徒無一定tio̍h接受割禮。2.m̄食祭過偶像而無清氣ê食物。3.bē-tàng有淫亂ê行為。4.bē-sái食勒死ê cheng-seⁿ kah血（參考使徒行傳十五：20、29）等，án-ne mā thang堵住hiah-ê強烈主張tio̍h遵守摩西律法kah割禮ê人ê嘴。Koh講，根據加拉太書第二章11到14節，使徒保羅bat譴責彼得tī安提阿看tio̍h雅各派來ê人ê時，馬上kiu-kiu，m̄敢koh再kah外邦人同席食飯。假使是teh耶路撒冷會議了後，彼得總是ē-tàng m̄免án-ne。因為tī耶路撒冷會議中，彼得iáu bat為使徒保羅tī外邦人中所做ê事工仗義執言。若據此推論，有主張chit本冊應該寫tī主後49年ê耶路撒冷會議chìn前。

Chit本書信ê信息
雖然是簡短ê六章書信，m̄-koh內容卻非常ê明確。由使徒保羅tī書信一開始就是家己ê身分辯護，到伊譴責有人傳「另外一種福音」，thang知影chit封書信kah「辯護」有密切關係。伊m̄-nā提起上帝選召僕人ê信仰意義，koh-khah家己所做ê福音事工辯護，並且進一步為福音ê內容確定基本要義：「咱知人ē-tàng kah 上帝有和好ê 關係，是通過信耶穌基督，m̄ 是靠遵守摩西ê 律法；咱家己mā 信靠基督耶穌，來kah 上帝建立和好ê 關係，m̄是靠遵守律法，因為無人ē-tàng óa 靠遵守律法，來kah 上帝有和好ê 關係。(全民版)」（二：16a）chit點ē-sái講是使徒保羅ê中心思想。

根據頂面所講ê中心思想，tī chit封書信中，使徒保羅用第三到四chit兩章討論摩西律法kah上帝tī耶穌裡所顯明ê救恩兩個之間ê關係kah差異。伊清楚指出：律法是hō͘人知影家己ê過犯，m̄-koh並無ē-tàng hō͘人因為án-ne得救。咱所期待ê是性命得救，m̄-koh得救卻一定tio̍h靠上帝ê恩典，這恩典就tī耶穌ê身上。因為án-ne，凡信靠耶穌ê人，lóng會成做上帝ê kiáⁿ兒（參考三：26）。

使徒保羅書信中有一個特色，就是談起基督徒ê社會生活。伊非常強調基督徒一定tio̍h「成做新造ê人」（參考六：15），而新造ê人就是tī當時社會中，有「分別為聖」ê生活態度。伊進一步強調：基督徒一定tio̍h óa靠聖神ê力量結出果子（參考五：22—23），kā hiah-ê iáu未信靠耶穌chìn前，敗壞人性命ê慾望—kah聖神互相對敵ê惡行lóng釘死tī十字架上（參考五：19—21）。

若講chit本書信ê中心主題，he就是：基督徒是無受律法轄制ê，基督徒是一個「自由」ê人。這「自由」是因為耶穌活tī伊ê性命裡，成做伊性命ê力量。Ná親像使徒保羅所講ê：「Án ne，chit-má teh 活ê我m̄是原來ê 我，是基督tiàm-tī 我內面teh 活；我chit-má teh 活，是靠信上帝ê Kiáⁿ teh 活；基督疼我，為tio̍h 我放sak 性命。(全民版)」（二：20）因為án-ne，伊知影該怎樣過每一工ê日子，m̄是因為有律法ê規範chiah去做應該做ê事，mā m̄是因為別人ê勸勉chiah遵守規則。

使徒保羅對猶太人一再堅持遵守摩西律法所規定ê割禮，持有無仝ê看法。伊認為無論摩西ê律法怎樣規範，其基礎kah目的lóng是teh表明上帝ê疼。因為án-ne，伊講：「因為咱若kah 基督耶穌結聯，有受割禮á 是無受割禮lóng 無要緊，要緊ê 是tùi 疼心表現出來ê 信心。(全民版)」（五：6）另外，伊mā真清楚講tio̍h，一個真正tī基督裡ê人應該有ê性命觀，to̍h是家己是「自由人」（參考五：1）。伊講上帝選召一個人，是beh hō͘ chit-ê人成做「自由人」，這「自由人」並m̄是放縱情慾ê人，顛倒地，是tī疼心ê事頂面koh-khah有見證。這就是為甚麼有人稱加拉太書是一本「自由主義信仰思想ê藍本」。

其實，使徒保羅chit種tī耶穌裡，成做一個自由ê人ê思想，影響馬丁路德siōng-kài深遠。馬丁路德講加拉太書，ná親像伊ê「bó͘」仝款，伊深深teh疼chit本書信。Mā因為án-ne，有kóa學者認為加拉太書是基督徒自由ê「大憲章」，這是因為馬丁路德發現當時ê基督教會，ná親像猶太人仝款，除了摩西律法之外，koh加添了真chē人間ê風俗、傳統等當做律法規矩，hō͘人ê性命受tio̍h koh-khah chē ê束縛。因為án-ne，宗教改革運動ê一個重要改變，就是beh大家koh一pái tńg來到聖經ê教導，而這教導ê中心思想：就是tńg來到上帝ê救恩裡，這救恩是超越beh束縛人性命ê自由有ê律法規範。伊會án-ne強調，是因為當時ê基督教會用了真chē律法來訂定得救ê條件，甚至認為需要透過神職人員ê媒介chiah ē-tàng得tio̍h上帝ê救恩，伊講chiah-ê lóng限制了人得tio̍h上帝tī耶穌裡ê自由。

Thang分做下列段落
一.寫書信ê原因。第一章1到10節。
二.為家己ê成做使徒kah工作辯護。第一章11到第二章21節。
三.解釋律法ê功用以及律法kah上帝救恩ê差別。第三章1節到第四章31節。
四.基督徒應該有ê社會生活態度第五章1節到第六章10節。
五.結論：第六章11—18節。