認bat創世記chit本古老ê經冊

真chē人讀過「創世記」chit本冊，而且對創世記中ê幾個出名故事真熟悉，像講宇宙創造ê開始、伊甸園kah人類犯罪ê故事、該隱殺害亞伯ê事件、大水kah挪亞造方舟ê故事、巴別塔ê事件、所多瑪城毀滅ê經過、亞伯拉罕獻以撒ê事件、雅各欺騙以掃、猶大kah媳婦塔瑪之間ê亂倫事件、約瑟解夢以及伊kah眾兄哥之間ê衝突、約瑟kah伊眾兄弟和解會面ê經過等等，類似chit種有趣味、生動，而且hō͘人印象深刻ê故事，tī創世記chit卷古老經冊裡真chē，一直是教會兒童主日學學生所愛聽ê故事，mā是聖誕節演話劇不時被引用ê題材。

另外一方面，只要講tio̍h創世記，真chē人lóng會馬上就聯想tio̍h另外一個問題：創世記中ê「創造論」kah科學界所講ê「演化論」，兩個之間是m̄是有衝突？Αń怎面對chit兩個之間ê問題？甚至有kóa基督徒表示：寧可接受「演化論」，á無想beh去討論「創造論」，因為認為chit兩個之間討論起來，會hō͘家己陷入信仰上ê矛盾kah衝突。

其實，讀創世記á是聖經中其它ê經卷mā好，lóng必須注意一點：聖經m̄是一本講科學ê冊，mā m̄是beh用來kah科學辯論ê經冊。聖經乃是一本性命ê冊，是teh探討人ê性命為甚麼會有苦難，以及因為苦難á期待得tio̍h拯救ê問題。

科學kah人ê心靈是兩種無仝ê領域，基礎點mā無相仝，因此，硬beh kā兩種無仝領域ê事khǹg tī仝一個基礎來看kah討論，是真oh對焦好勢ê。創世記ê作者á是編撰者，並m̄是beh kā咱講科學ê問題，伊（á是in）只想beh kā咱講：為甚麼咱ê性命會有痛苦？Tī痛苦ê性命中，上帝是jōa-ni̍h-á teh疼咱，án-ne chiah是編撰chit本創世記ê主要宗旨。如果硬ài the̍h「創造論」來否定「演化論」，á是the̍h「演化論」來論斷「創造論」，he會kan-taⁿ hō͘讀者彼此之間tī認知上造成koh-khah chē ê分歧而已，對信仰一點á幫助mā無。

關於「創造論」ê事，咱只要會記得一件事—創世記ê作者kan-taⁿ想beh kā咱講一點：宇宙萬物ê性命lóng是來自上帝ê創造。

創世記chit本經冊ê主要重點
「創世記」chit本經冊原來並無冊名，猶太人只是用該冊ê第一個字眼「起頭」á是「起初」來稱呼它。後來有《七十人譯本》ê希臘文譯本kā它稱做「創世記」，以後大家就kā chit本冊ê名稱做「創世記」。

Chit本經冊總共有五十章，它主要teh述說幾點內容：
一、宇宙萬物ê性命起源lóng是來自上帝ê創造，á上帝是以祂ê話來創造萬物。
二、說明為甚麼人ê性命會有痛苦。創世記ê作者想beh kā咱講ê是：痛苦是來自人犯罪—拒絕聽從上帝ê話語，並且企圖想beh取代上帝。
三、講述上帝怎樣透過族長ê揀選，顯明祂拯救ê慈愛。Tī chit-ê揀選過程中，立約成做一個重要ê記號。

什麼人寫chit本古老ê經冊？
「創世記」、「出埃及記」、「利未記」、「民數記」、「申命記」等五本經冊，通常hông稱做「摩西五經」，mā有人kā它稱做「法律冊」。會hông稱做「摩西五經」，是因為有人認為chit五本經冊lóng是摩西寫ê。Chit種講法有需要koh探討，因為chit五本經冊裡有真chē資料真明顯m̄是出自摩西ê手筆。親像：申命記最後一章最後一段話：

「上帝ê 奴僕摩西就死tī hia，tī 摩押ê 地，照上主所講ê。上主kā 伊埋葬tī 摩押地，Bia̍t-be-ol 相對ê 山谷；到今á 日無人知伊ê 墓。摩西死ê 時，一百二十歲，目睭無花，精力無衰退。以色列人tī 摩押平原為tio̍h 摩西哀哭三十工，為tio̍h 摩西憂悶哀哭ê 日滿à。嫩ê kiáⁿ 約書亞得tio̍h 智慧ê 神充滿，因為摩西bat tī 伊ê 頂面hōaⁿ 手，以色列人就遵thàn 伊，照上主所命令摩西ê 來行。後來，以色列中無koh 興起先知親像摩西，伊是上主面對面所bat ê。照上主差伊tī 埃及地，對法老kah 伊所有ê 人臣，以及伊ê 全地所行ta̍k 種ê 神跡奇事，mā 照大權能ê 手， 大kohthang 驚ê tāi-chì，就是摩西所行tī 以色列人民ê 目睭前ê。(全民版)」（申命記三十四：5—12）

Koh再舉另外一個例：就是出埃及記第二十章1到17節寫tio̍h上帝十誡，á tī出埃及記第二十章11節是講：「因為六日內，上主創造天、地、海kah hit 中間ê 萬物，第七日就歇睏，所以上主賜福tī 安息日，設立它做聖。(全民版)」

Á申命記第五章15節則寫講：「你mā tio̍h 會記得你以前tī 埃及地做奴僕，上主— 你ê 上帝用大權能ê 手，伸出來ê 手骨，chhōa你tùi hia 出來，因為án-ne，上主— 你ê 上帝命令你tio̍h 守安息日。(全民版)」

如果chit五本經冊lóng是摩西所寫ê，伊怎樣可能會寫家己死亡ê事？假使lóng是摩西寫ê，伊怎樣會寫出兩種無仝版本ê上帝十誡？Chit中間必定是因為時空環境ê改變，由無仝ê作者所寫來致使ê結果。其實，類似chit種ê資料真chē，像創世記第一章kah第二章tī論述創造ê過程就無仝款，á tī講tio̍h挪亞方舟內tio̍h入去裡面ê動物ê時，講：「見若有活氣ê 肉體，ta̍k 種一對，一隻公ê，一隻母ê，你tio̍h chhōa in 入大船，kah 你做伙保全活命。(全民版)」（六：19）m̄-koh tī另一份資料中to̍h án-ne講：「見若清氣ê cheng-seⁿ，你tio̍h 帶七隻公ê，七隻母ê。無清氣ê cheng-seⁿ，你tio̍h 帶一隻公ê，一隻母ê。3 天頂ê 鳥mā tio̍h 帶，七隻公ê，七隻母ê，thang留in ê 種活tī 全地。(全民版)」（七：2—3）因此，咱thang án-ne瞭解：會án-ne稱chit五本經冊做「摩西五經」，是因為chit五本經冊主要lóng kah「約」有關係，á這「約」kah「法律規例」ê訂定koh有關係，而且chiah-ê「法律規例」kah摩西當年帶領以色列人民出埃及、入曠野ê tāi-chì分bē開。

另外一點，講in是「法律冊」，siōng主要是因為chit五本經冊中，有bē少關於法律規例ê記述，詳細說明有關人kah上帝之間ê關係，以及人kah人之間共同生活ê規範。Tùi創世記到申命記，lóng有記載chit方面ê內容，因此kā它稱做「法律冊」比較khah符合chiah-ê經冊ê內容。

是tùi無仝ê資料編撰而成ê經典
詳細看創世記，就會發現chit本經冊並m̄是出自一個人ê手筆，á是來自單獨一個資料。它至少是由一陣人編撰，á是來自幾種無仝ê資料彙編而成，當然chit種講法mā同時說明創世記無可能是出自摩西一個人ê手筆。親像：有關上帝創造宇宙萬物ê故事，tùi第一章1節到第二章4節a句，是一種創造ê故事；tùi第二章4節b句到第25節又koh是另外一個創造ê故事。前者講述創造ê過程非常有節奏感、有秩序；後者則加真簡單。Á tī造人ê方面，前者講上帝造人是「有男、有女」，m̄-koh後者是講上帝先造「人」，然後koh再用chit-ê已經被造出來ê「人」身上ê「一條肋骨」，造出另外一個「人」，後來被造ê chit-ê人被稱做「女人」，原先被造ê hit-ê「人」就kā它稱做「男人」。Án-ne完全無仝ê創造故事，所顯示出來ê就是：創世記chit本經冊乃是由無仝ê資料來源編撰而成。類似chit種ê例tī創世記內面bē少。

Tùi聖經學者研究ê資料知影，會有chit種ê情形發生，是因為創世記至少是由三種以上ê資料編撰而成ê，thang kā chiah-ê資料用「文獻」á是「底本」來稱呼。

一、「耶和華文獻」。
Chit種文獻tī《和合本》聖經譯文內面，通常是用「耶和華」來稱呼上帝（《全民台語聖經》已經改用「上主」à）。Chit種資料算是比較早期出現ê，大約是形成tī主前950年ê時代。

形成chit種資料ê背景真可能kah大衛以及所羅門ê時代有關。Hit時，社會經濟相當繁榮，政治mā穩定，人民ê生活真富裕，甚至用「歌舞昇平」來形容mā無過份。因此，感恩ê詩歌不時出現。Mā因為án-ne，人tī描述kah上帝之間ê關係ê時，顯示出來ê tú好是chit種資料ê特色，就是上帝kah人之間ê距離真近，非常親密，ē-tàng面對面交談，作者歡喜用「擬人化」ê方式來描述上帝，親像：上帝會受氣、痛心後悔，上帝mā會出現tī人ê面前kah人對話；tī第三章出名ê伊甸園故事，亞當、夏娃kah上帝講話；第四章該隱kah亞伯ê故事中，該隱kah上帝有過一段對話；á是第十五章，上帝kah亞伯拉罕談起有關怎樣明白上帝真正ê意思問題；第十八章，上帝kah亞伯拉罕對話中，提起有關所多瑪城ê事件等，lóng是chit種文獻表現出來ê特色。

二、「以羅伊文獻」。
Chit種文獻tī《和合本》聖經內面通常是用「神」chit-ê字稱呼上帝，chit-ê「神」原本ê名稱做「以羅伊」（參考馬可福音十五：34）。Chit-ê資料大約出現tī主前750年ê時代，距離「耶和華文獻」大約有兩百年ê時間，它是來自北方「以色列」（á是講「示劍」）ê資料。Tī創世記，chit種資料是tùi第十五章亞伯拉罕受呼召開始出現。第二十到廿二章、三十一章、第四十到四十二章，以及第五十章15節以後差不多lóng是chit-ê資料，其它散見tī創世記內面。

Chit-ê資料有一個特色，就是上帝通常會tī「異象」，á是tī「夢」境中出現kah人講話，親像：第十五章1到2節，上帝tī「異象中」對亞伯拉罕講話；第二十章講上帝tī「夢」中對亞比米勒講話。上帝mā會以「天使」ê型態出現kah人講話，譬如講tī第廿二章亞伯拉罕獻以撒ê tāi-chì件後，講話ê語句是上帝ê形式，m̄-koh身分則「天使」。「以羅伊文獻」iáu有另外一個特色，就是上帝mā會透過「夢」對一般人啟示祂ê旨意。Siōng hō͘大家歡喜ài講ê，就是上帝hō͘法老王、酒政長kah廚房長lóng做夢，á chiah-ê夢因為是來自上帝，所以必須是上帝所啟示ê人，chiah ē-tàng解開夢ê意義，á m̄是一般術士、巫師等人所ē-tàng理解（參考第四十到四十一章），約瑟就是因為有上帝ê靈同在，chiah有能力解釋上帝啟示ê夢（參考四十：8b）。

Chit-ê資料出現ê背景，因為是來自北方以色列地區，而且主前750年代，hit時北方已經是tiāⁿ-tiāⁿ有戰亂，人心相當不安，感覺上帝kah人之間ê距離khah遠，無koh像頂面所講「耶和華文獻」資料所描述ê，上帝會直接kah人講話，卻是透過「夢」、「異象」、「天使」等間接方式來傳達祂ê旨意kah信息。

三、「祭司文獻」。
這是由眾祭司所執筆寫作ê資料，大概是tī主前550年時代ê作品。Chit-ê年代mā是猶太人被掠到巴比倫（主前586年）做奴隸以後ê事loh。Tī摩西五經中，利未記kah民數記全部lóng是屬tī chit-ê文獻ê資料。Tī創世記中，它ê特色表現tī對族譜真重視，親像：第五章、第三十六章、第四十六章8到27節等。

Chit種資料iáu有另外一個特色，就是特別注重kah上帝之間所立ê「約」，親像tī第九章12到17節、第十七章、第廿二章、第廿六章3到5節、第廿八章10到19節等。作者mā強調「秩序」ê重要性，因為祭司ê工作kah敬拜、獻祭等宗教禮儀有密切ê關係，所以tī秩序kah規律ê要求上，比起其它文獻會khah受重視。比如tī創造ê故事中，第一章就是「祭司文獻」ê作品，它kah第二章ê「耶和華文獻」siōng大ê無仝，乃是作者特別強調上帝ê創造，是一工接一工真有秩序來完成創造ê工作。上帝tī每一工中lóng有祂ê計畫，並且是依照計畫teh進行祂創造ê事工。作者tī記載族譜ê時，會記明什麼人活了jōa久，年齡幾歲，á chiah-ê歲數kah「五」、「七」á是「十」lóng有關係（參考五：1—32，十一：10—26）。

「祭司文獻」ê作者會án-ne強調敬拜ê禮儀、秩序等，乃是因為當時耶路撒冷聖殿已無存在，為tio̍h beh hō͘聖殿祭典禮儀ē-tàng延續到後代kiáⁿ孫，作者無嫌費氣kā chiah-ê相關ê資料記錄落來。這當然mā teh說明作者ê心聲：國家會án-ne滅亡，就是因為過去ê日子，大家對上帝敬拜ê態度無夠敬虔kah真實所帶來ê結果。作者ài beh提醒下一代注意：以色列民族所建立ê國家會án-ne滅亡、人民會hông掠去做奴隸，就是因為bē記得kah上帝ê「約」所致。

當然，除了以上ê資料以外，創世記iáu有其它ê資料混合tī各種資料中，親像：第十四章四王kah五王ê戰爭，就是比較晚期形成ê，大約是主前四百年ê作品。Mā有一kóa零散ê資料是tī編撰創世記ê時，編者酌情加入ê。

創世記ê中心信息
一般會kā創世記分做兩大部分來看，其一：第一章到第十一章；其二：第十二章到第五十章。
第一個部分thang講是kui本創世記ê基本結構，ài beh說明幾點基本信仰觀念：

一、萬物lóng是來自上帝ê創造。其中包括人在內lóng是上帝所創造ê。
無論是第一á是第二章，創世記ê作者非常清楚teh表達一個重要ê基本觀念：世上一切萬物lóng是來自上帝創造，特別是tī創造人ê部分寫了siōng chē。作者透過chit種方式teh說明：人既然是上帝所創造ê，表示人m̄是萬物之主，只要是受造物，就m̄是造物者—上帝。

二、罪ê由來。
作者用真簡單ê方式來說明：罪乃是來自人背叛創造ê上帝，而且是想beh「親像上帝」仝款（參考三：5）、kah上帝「競爭」、比高低（參考十一：4）。因此，人因為犯罪á付出痛苦ê代價。Mā因為人ê罪，連帶ê是人所khiā起ê大地受tio̍h連累（參考三：17）。最後，人發現家己ê有限、無力了後，chiah明白如果無上帝ê恩典，人根本無法度做甚麼，甚至連想beh生存落去lóng會有困難。創世記編者以約瑟所講ê「我無法度代替上帝」（參考五十：19）chit句話來作結論。

Mā thang án-ne講，kui本創世記就是以人想beh「親像上帝」開始，以「無法度代替上帝」作結束，chit種方式kah-ná用一條直線kā kui本創世記串連起來。Tī人想beh「親像上帝」到「無法度取代上帝」之間，所記載ê lóng是因為人想beh「親像上帝」仝款，想beh取代上帝成做萬物之主所帶來犯罪ê結果：性命有苦難。Tī chit-ê過程中，人到最後chiah深深體驗tio̍h性命痛苦ê經歷。

三、罪ê擴散。
Chit點mā是tī讀創世記ê時特別tio̍h注意ê。創世記編撰者開始ê時是描述人kah上帝之間ê關係破壞後，續落來ê就是人kah所khiā起ê土地mā無和諧。Koh來就是人kah人之間ê關係破裂，有人殘殺家己ê兄弟，有ê造成族群對立（以撒kah以實瑪利，以掃kah雅各，約瑟kah兄長，雅各ê gín-á kah示劍城ê人）。

四、上帝kah人之間ê立「約」關係。
創世記tùi創造完成開始，造物者kah人之間ê「約」to̍h已經存在。親像上帝ài人好好「管理」一切受造物就是一種「約」；上帝kā人安置tī伊甸園裡，園中有一叢樹ê果子bē-sái食；上帝tī該隱ê「額頭做記號」，這mā是一種「約」ê表示；大水了後，空中出現ê虹就是「約」ê記號；亞伯拉罕kah以後ê kiáⁿ孫lóng必須守割禮，koh khah明確講出he是一種kah上帝之間「永遠ê約」。

五、上帝拯救ê疼。
人每pái犯罪了後，lóng會有上帝ê懲罰，m̄-koh tī懲罰ê背後，lóng thang看見上帝拯救ê恩典，hō͘人有再生、延續性命ê機會（參考九：1）。原本罪ê結果（á是代價）就是死亡（參考羅馬冊六：23），m̄-koh上帝是一個滿有慈愛ê上帝，祂hō͘人tùi痛苦中學習tio̍h悔改，並tùi悔改中看tio̍h祂ê救恩。

編輯上ê特色
創世記tī編輯上siōng大ê特色，就是用族譜來區隔一個時代ê結束，kah另外一個新時代ê開始。親像：第四章17到22節ê族譜，就是beh說明該隱時代ê結束，然後tī第25節是一個新時代—塞特後裔ê開始。

第五章ê族譜重點並無在tī什麼人活jōa久，卻是teh說明其所代表ê「時代」有jōa久，ná親像歷史上teh說明「朝代」仝款。

第十章ê族譜說明挪亞ê時代結束，一個嶄新ê時代「閃」族開始。

第十一章說明閃ê時代結束，並且說明伊拉ê後裔出現。

第十二章就續接第十一章27節ê伊拉ê kiáⁿ亞伯拉罕，開始一個嶄新ê時代。

第廿五章ê族譜，說明亞伯拉罕ê時代結束，mā同時說明以實瑪利ê時代無koh出現，續接ê是以撒ê時代開始。

第廿六章34節簡單ê族譜，說明以掃時代ê結束，隨續接落來ê是雅各ê時代開始。

第三十五章22節到第三十六章ê族譜，說明雅各ê時代結束，約瑟ê時代來臨。

Chit種ê編輯方式，m̄-nā kā族譜ê重要性凸顯出來，mā同時說明性命ê延續，就是上帝極大ê恩典—賜福hō͘人類，會得thang延續性命，並且是生湠chē-chē，遍滿大地（參考一：28、九：1）。

雖然tī每一個時代中，lóng明顯記載人類犯罪ê情形，m̄-koh編者mā同時運用族譜來表明上帝有極大ê恩典，並無依照人所犯ê罪懲罰人（參考詩篇103：10）。

族長歷史故事ê具體化
創世記分做兩大部分，其一就是第一到十一章。Chit部分ē-sái講是創世記siōng精華、siōng重要ê段落。Chit部分已經清楚說明kui本創世記ê基本觀念：性命ê起源、上帝ê揀選、救恩、立約等。

然後tùi第十二章開始，就是kā第一到十一章ê精髓，以族長ê故事hō͘ in具體化說明出來，thang hō͘ 讀者ē-tàng koh khah清楚人類犯罪ê狀況，以及上帝拯救ê恩典。挪亞ê出現說明揀選kah拯救ê意義，仝款ê，亞伯拉罕kah以撒、雅各、約瑟mā lóng是teh說明揀選kah拯救之間ê關係。Á立約就是teh表明上帝ê救恩，tī每一個時代lóng有約ê出現，同時一再說明約ê重要性。

Tī第十二到五十章chit段經文中，thang kā它分做四個族長歷史來看；
一、亞伯拉罕ê故事。Tùi第十二到廿五章。
二、以撒ê故事。第廿六到廿七章。
三、雅各ê故事。第廿八到三十六章、第四十六章、第四十八章到四十九章。
四、約瑟ê故事。第三十七到四十五章、第四十七章、第五十章。

（本冊經文採用opensource/copyleft ê《全民台語聖經》，tī chia特別致謝。）