認bat 哈巴谷書chit本經冊
Chit本經冊ê名稱就是用先知哈巴谷ê名（參考一：1）號名ê。在先知文獻中，不時看bē-tio̍h有關先知ê身世背景，像約拿、那鴻等人都無詳細地紹介，只有簡單ê一句話而已，因為án-ne，mā kan-taⁿ ē-tàng tùi chit本經冊中所提供ê資料來認bat外，無koh khah chē ê資料thang進一步認bat先知哈巴谷相關之身世背景。

先知ê年代kah信息
因為聖經中有關先知哈巴谷ê資料非常少。因為án-ne，beh想明確知影伊傳講ê年代背景只有ē-tàng tùi經文ê內容來分析、判斷。

Tī第一章5到6節先知哈巴谷傳出上帝ê信息thang看出，先知哈巴谷傳講信息ê時間，kah-ná tú好是巴比倫國勢開始興旺ê ê時期。如果是chit-ê時間，ná大概就是tī主前625年到539年之間。Á chit段期間ê南國猶大，tú好極力teh進行宗教改革運動ê約西亞王時代（主前640～609），而同這時代mā有先知耶利米kah西番雅（參考耶利米書一：2，西番雅書一：1）出來傳揚上帝ê信息。因為án-ne，in三位ē-sái講是仝一個時代ê先知。M̄-koh有學者認為chit本哈巴谷書真可能是寫tī約西亞王統治ê末期，á是tī伊kiáⁿ兒約雅敬執政ê初期（主前609～598年），mā就是tī主前605年迦基米施戰役了後，埃及為tio̍h beh支援亞述，tī chia戰役中被巴比倫phah敗，而且被巴比倫追擊到à埃及邊界（參考耶利米書第四十六章）。然後tī主前597年，巴比倫王率領軍隊來攻打耶路撒冷ê時，先知哈巴谷kah耶利米lóng bat親眼看見猶大瀕臨滅亡ê危機。

M̄-koh，如果先知哈巴谷kah耶利米若兩人是tī仝一個時代出來傳揚上帝ê信息，所傳ê信息卻帶有極大差別；先知耶利米認為巴比倫帝國乃是上帝揀選ê奴僕（參考耶利米書廿五：9、廿七：6、四十三：10）。上帝就是故意beh用以色列人民ê仇敵巴比倫王尼布甲尼撒，作為祂懲罰以色列chit-ê「奴僕」。Á先知哈巴谷看tio̍h ê是巴比倫人ê罪惡，而手段是非常殘酷ê惡質民族。親像伊講：「伊用鉤kā in 全部釣起來，伊用網á 掠in，用大網拋in；為tio̍h án-ne，伊歡喜快樂。(全民版)」（一：15）而siōng hō͘伊無法度接受ê，就是巴比倫人iáu會向使用來迫害以色列人民ê「武器」膜拜（參考一：16），án-ne chiah是hō͘伊大惑bē了解ê事。伊一直teh問上帝，怎樣會許可一個拜偶像神明ê民族來懲罰家己ê子民？上帝為甚麼會用chit種人來做「僕人」？不過，伊雖然bē了解上帝chit種決定（參考一：12—13），m̄-koh伊á是堅信上帝是公義ê，深信只有忠心tī上帝ê人必定會得救（參考二：4）。

Chit本經冊ê特色
Chit本經冊siōng大ê特色，kah其它經冊無仝款ê所在：一般先知文獻lóng會記載上帝透過奴僕先知對以色列人民傳出信息，m̄-koh哈巴谷書並無ài先知對以色列人民講出甚麼信息，卻是先知哈巴谷kah上帝之間ê對話。Á chiah-ê對話ê內容是記述了先知哈巴谷無法度理解一件事：為甚麼上帝beh揀選一個比祂子民iáu-beh惡質ê國家—巴比倫帝國做僕人，並且iáu用chit種國家來懲罰以色列人民？

先知哈巴谷提出chit種問題á是質疑地ê時，並m̄是teh表示伊認為猶大（á是以色列人民）有好ê行為，無，伊無án-ne講，伊mā承認猶大並無甚麼好行為。先知哈巴谷坦白指出：「祢 ná 會 hō͘ 我看tio̍h 罪惡？橫逆ê tāi-chì，祢ná 會恬恬teh 看？毀滅kah 強暴tī 我面前，相爭、相phah lóng teh 發生。4 因為án-ne，律法放鬆，無行公平；pháiⁿ 人圍困義人，所以審判無正直。(全民版)」（一：3—4）

Tùi伊對上帝提出之質疑地中，mā thang看tio̍h伊話中隱含對上帝ê埋怨。如果tùi一開始，上帝就出手阻止以色列人民犯chit種罪，mā可能in iáu有機會悔改、歸向上帝。M̄-koh hō͘伊感覺bē了解ê是：上帝為甚麼tī猶大犯罪ê時chūn，是靜默不語（參考一：2）？這就有點á像先知約拿仝款，無法度接受上帝對以色列ê仇敵—亞述施hō͘極大ê恩典，為tio̍h án-ne伊甚至tio̍h用死來抗議上帝對待亞述人ê憐憫之愛。先知約拿bat用嚴厲ê口語對上帝chit種「奇怪」作為，提出伊強烈質疑地（參考約拿書四：9b），雖然伊bat表示真清楚上帝ê慈愛kah特性（參考約拿書三：2），m̄-koh就算伊hit種ê講詞，mā已經含有真強烈ê抗議語氣tī其中（參考約拿書三：3）。先知哈巴谷mā是án-ne子，伊無法度忍受上帝chit種作法，甚至質疑上帝chit種作法是正確ê（參考哈巴谷書一：13、14、17）。伊希望ē-tàng tùi上帝得tio̍h明確ê答案。

第三章kah前二章有極大ê無仝；tī前二章lóng是先知哈巴谷teh kah上帝對話，而第三章則伊teh向上帝祈禱。其實，第三章只有第2節chiah是先知哈巴谷ê祈禱，其它lóng m̄是，卻是先知哈巴谷回顧上帝tī以色列民族之歷史中奇妙ê作為，用這來勸勉以色列同胞。因為án-ne，kā第三章看做是一篇先知哈巴谷ê信仰告白會比較khah正確些。不過mā有聖經學者認為chit章並無像是先知哈巴谷ê作品，卻是以色列人民khah為晚期ê詩歌，而且是整體民族teh吟唱ê詩歌，表明了in對上帝有絕對ê信心。

Thang分做下列幾個段落
1.第一章1節，說明chit本冊ê作者是先知哈巴谷。
2.第一章2到4節，先知哈巴谷第一pái向上帝提出疑問。
3.第一章5到11節，上帝回答先知哈巴谷ê問題。
4.第一章12節到第二章1節，先知哈巴谷第二pái向上帝提出疑問。
5.第二章2到20節，上帝koh一pái回答先知哈巴谷ê問題。
6.第三章，先知哈巴谷ê信仰告白。