認bat 哈該書chit本經冊

舊約先知ê文獻分做三大類，其一就是tī亡國chìn前到受掠ê時期，chit時期ê先知lóng是teh勸勉以色列人民tio̍h悔改、歸向上帝，警告in千萬m̄-thang棄sak上帝ê教示，若無，會帶來koh khah大ê災難。就ná同阿摩司、彌迦、何西阿、耶利米等先知人。第二類ê先知是tī國家滅亡了後，安慰kah鼓勵hiah-ê被掠到外國去ê以色列人民，激勵in tio̍h對上帝有信心，因為上帝必定會懲罰hiah-ê欺負以色列人民ê國家、族群，並且會帶領in tùi受掠之地tńg去故鄉重建家園，第二ê時期ê先知以賽亞、那鴻、俄巴底亞等就屬chit類先知。第三類ê先知就是tī tńg去故鄉重建家園ê時，一再鼓勵以色列人民tio̍h重新建造正確信仰態度，以敬虔ê心回應上帝憐憫ê疼，ná親像哈該、撒迦利亞等先知ê信息。

哈該chit位先知
Tī先知ê作品中，有kóa作品有詳細紹介身世背景，m̄-koh有kóa則無。Chit本冊對先知哈該ê身世背景交帶得真清楚。Tùi第一章1節所提供ê記載：「大流士做波斯皇帝ê第二年六月一日，上主藉tio̍h先知哈該向撒拉鐵ê kiáⁿ兒猶大省長所羅巴伯和約掖達ê kiáⁿ兒大祭司約書亞講話。」tùi chit句話就thang看tio̍h真珍貴ê資料，就是時間。因為有明確ê時間就thang清楚看出ná時代社會之景象。Kā chia提供ê時間換算出來，就是主前520年8月29日（mā有學者認為是9月1日，相差兩工）。Á tī chit年kah伊同時代出來傳講起帝信息ê先知是撒迦利亞（參考撒迦利亞書一：1）。然後koh再tùi先知哈該講「上主第二pái」對伊講話ê時間是tī「9月24日」，mā就是同年ê 12月18日（mā ē-sái講是「中旬」，參考二：20）。Án-ne看起來，伊傳講上帝ê信息時間並無長，á是講伊留落來傳講記錄ê時間甚短。

Tī以斯拉記第五章1節mā提起chit種話：「Hit 時，有先知哈該kah 易多ê 孫撒迦利亞，奉以色列上帝ê 名，tùi 猶大kah 耶路撒冷ê 猶大人kā 先知ê 話傳 hō͘ in。(全民版)」然後tī第六章14節有chit種記載講：「猶大ê 長老因為先知哈該kah 易多ê 孫撒迦利亞ê 先知話，就起造，來興通。In 遵thàn 以色列上帝ê 誡命，kah古列、大利烏，以及波斯王亞達設西ê上諭，起造完工。(全民版)」這就koh khah清楚知影先知哈該是激勵以色列人民重tńg去家園後進行重建聖殿工程，真有貢獻ê一位先知。


Chit本經冊ê主要信息
雖然哈該書是舊約聖經中篇幅次少ê一本經冊（siōng短ê一本是俄巴底亞書，只有一章21節），tī總共二章ê經文總共chiah只有三十八節而已。M̄-koh chit本冊ê信息對重tńg去家園ê以色列人民來講非常重要，咱tùi聖殿重建工程ē-tàng tī艱難中順利完成，就thang看出chit對kui個以色列人民重建宗教心靈生活具有無法度磨滅ê貢獻。

Mā thang án-ne講，以色列民族ê kui個信仰中心就是tī耶路撒冷聖殿。在先知哈該ê時代，是一陣tùi受掠ê菁英由巴比倫tńg去故鄉，in除了beh維護平日生活之需要外，iáu ài面對撒馬利亞人kah無hông擄去做奴隸卻kah外族混合同齊崇拜偶像神明者ê攪擾、威脅；chiah-ê人知影若是回鄉ê以色列人民kā聖殿重建起來，就會凝聚成一股新ê力量影響tio̍h in原本已經得tio̍h、擁有ê利益。所以in極盡可能地離開in，m̄ hō͘ in重新整合起來。Á先知哈該則真清楚知影若無透過重建聖殿來恢復以色列同胞對上帝ê信仰，kui個以色列民族kā永遠無法度凝聚做伙，he必定會比所羅門王死後分裂ê南、北二國koh khah糟糕。

Tùi先知哈該tùi上帝啟示所得tio̍h ê信息中thang知，亡國是因為in沈溺tī奢侈ê物質生活，取代了應有ê敬虔宗教心。如果重tńg去家園後ê以色列人民mā照過去生活ê態度，m̄-nā無法度重建家園，甚至iáu可能會koh一pái淪落為四散各地ê奴隸。所以tùi重建聖殿是beh建立正確ê宗教信仰認知，更新心靈生活，這就是chit本經冊ê中心信息。

thang kā先知哈巴谷ê信息比較khah一下主前第八世紀先知阿摩司所傳ê信息，就會看tio̍h in兩人共同ê信息，就是呼籲以色列人民m̄-thang過奢華ê物質生活，in認為這siōng容易hō͘人心靈墮落，離開上帝。

哈該書第一章6節 阿摩司書第八章11節
Lín掖種chē，m̄-koh收成少；lín有飯食，m̄-koh總食bē飽；lín有酒lim，m̄-koh總lim無夠；lín有衫褲穿，m̄-koh總穿不暖。工人所得ê工資無夠維持生活。時chūn已經到à，我beh hō͘以色列遍地饑荒。In iau餓，並m̄是無餅食；in乾渴，並m̄是無水lim。In飢渴是因為聽bē-tio̍h上主ê話。這是我—至高上主講ê。

先知哈該談起人真正問題是tī心靈上ê貧乏，而這是hō͘人ê性命lian去之主要因素。心靈ê貧乏，並m̄是因為欠缺糧食，卻是因為bē記得上帝ê恩典，甚至棄sak上帝ê教導，去拜偶像神明。所以先知哈該鼓勵重建聖殿ê重要性，並m̄是在tī beh建造一座富麗堂皇ê硬體建築物，卻是在tī透過聖殿ê重建，幫助以色列人民koh再以敬虔ê心靈敬拜上帝。在先知哈該ê觀點裡，這mā是幫助in建立對上帝有信心ê方式。Mā所以tī chit本經冊中會一再看tio̍h先知哈該tùi「Lín檢討家己ê景況」（參考哈該書一：5、7）、「以前/chit-má」（參考二：3、15、18）chit種警語著手，希望以色列人民ē-tàng切實反省。

另外一方面，為tio̍h beh hō͘以色列人民ē-tàng排除重建聖殿ê驚惶kah不安，hō͘ in知影即使外有撒馬利亞人kah hiah-ê已經崇拜偶像神明ê人teh干涉攪擾、威脅，而內有財力上ê壓力，先知哈該á是一再鼓勵in不要害驚重建聖殿ê工程，因為上帝已經有信息出來，祂答應behkah in同在（參考一：13、二、4、5、19）。

對以色列人民來講，無甚麼信息比「上帝答應behkah lín同在」koh khah珍貴ê à。In ê祖先bat歷過tī埃及做奴隸，而in ê時代則有被掠到亞述、巴比倫去做奴隸ê切身經驗。做奴隸，ē-sái講是失去所有ê一切。M̄-koh創造萬物、帶領萬軍ê統帥耶和華上帝hō͘ in ê祖先ē-tàng tùi埃及平安行出來，而且擁有珍貴財寶，taⁿ mā hō͘ in tùi巴比倫安然tńg去故鄉，而且擁有真chē財寶thang重建聖殿。所以先知哈該提醒以色列人民，in tńg去故鄉已經有二十年時間，大家lóng已經有「天花板」ê厝thang tòa（參考一：4，《現代中文譯本》用「建築華麗ê厝」），卻iáu m̄知影tio̍h趕緊kā荒廢ê聖殿重建完成起來，若án-ne落去，in會失去上帝同在ê恩典，而hit時真可能kā會hō͘ in重蹈亡國ê覆轍。

Thang分做下列幾個段落
1.第一章1節，紹介先知哈該ê身世背景。
2.第一章2到15節，第一pái傳達上帝ê信息。Chiah-ê信息主要是針對以色列人民ê領袖講ê。
3.第二章1到9節，這是第二pái傳出來ê信息，是安慰kah希望ê信息。鼓勵以色列人民tio̍h對上帝有信心。
4.第二章10到19節，這是第三pái傳達上帝ê信息，先知哈該向以色列人民解釋m̄-nā需要有聖殿，koh khah需要有聖潔ê禮儀敬拜上帝，用聖潔ê心kah上帝來往。
5.第二章20到23節，第四pái得tio̍h上帝ê啟示，chit pái是hō͘猶大省長所羅巴伯ê信息，鼓勵伊勇敢承接落建造聖殿kah帶領以色列人民ê使命。