讀 何西阿書chit本經冊

舊約聖經中有先知書，先知書中有所謂「十二小先知」。所謂「小」ê意思，是teh指作品ê篇幅比較khah少。Á先知何西阿就是屬tī「十二小先知」中ê一位，並且tī編排上是排行第一本，m̄-koh這並無表示先知何西阿是十二位先知中年代siōng早ê，mā m̄是講伊ê地位siōng重要，只是小khóa以年代ê前後順序編排一下。

先知何西阿
先知何西阿是屬tī主前第八世紀四位重要ê先知之一，另外三位是（1）第一時期ê先知以賽亞（註:這是因為以賽亞書chit本經冊跨越ê年代真長，至少有超過兩百年ê時間，因為án-ne，通常聖經學者會kā它分做二到三個ê時期，主前第八世紀ê以賽亞，就kā它稱做第一時期），（2）先知阿摩司，以及（3）先知彌迦等。

除了知影先知何西阿是是北國以色列人「備利」ê kiáⁿ（參考一：1），以及冊中小khóa提起ê bó͘、kiáⁿê名外（參考一：2—9），咱對伊身世背景ê認bat確實是非常少。

tī chit本經冊中，提起伊三個kiáⁿê名—耶斯列、羅‧露哈瑪、羅‧阿米，m̄-koh並無提起chiah-ê kiaN2kah伊所傳達上帝信息有甚麼特殊關係，kan-taⁿ tī第一章4到9節中表達chiah-ê kiáⁿ名ê意義，用來說明上帝kah以色列人民之間緊張弓ân ê關係。當然重點是放在先知何西阿ê bó͘歌蜜身上；因為伊ná親像一個淫婦，一工到晚kah其他cha-po͘人做伙。Bat被丈夫先知何西阿休掉（參考何西阿二：2），然後何西阿koh koh再kā伊娶tńg來（參考第三章），而且是付出真大ê「聘金」chiah kā伊贖回來。作者用chit種方式teh說明上帝kah以色列人民之間ê關係，ná親像「丈夫」kah「bó͘」ê仝款；而「bó͘」則像一個淫婦，雖然「丈夫」一再苦勸ài伊tńg來到身邊，顯然並無得tio̍h所期待ê結果。

先知何西阿時代ê社會
作者tī第一章1節紹介先知何西阿ê時代背景ê時，就提起伊ê時代北國以色列是由「耶羅波安王統治」。Chit位「耶羅波安王」就是tī北國以色列歷史上hông稱做非常傑出ê「耶羅波安二世」；伊tī主前793到753年在位執政。Tī伊ê時代，ē-sái講是北國以色列自所羅門王死後以色列民族分裂以來，siōng有能力ê一位國王。Tī伊ê統治下，北國以色列達到空前ê興盛，國勢甚強，疆土向外擴張真緊。列王記作者chit種描講述：「伊恢復以色列交界ê 地，tùi 哈馬口到亞拉巴海，照上主— 以色列ê 上帝託祂ê奴僕Gat-he-huil 人A-mit-thài ê kiáⁿ— 先知約拿所講ê 話。(全民版)」（列王記下十四：25）m̄-koh卻mā是北國以色列犯罪、棄sak上帝siōng嚴重ê時chūn（參考列王記下十四：24），上帝呼召先知何西阿出來傳達祂ê信息。

舊約聖經學者羅賓遜（Theodore H. Robinson）tī伊所寫ê《以色列簡史》中有chit種評論講：「耶羅波安二世做王ê ê時期是一個興旺ê ê時期，超過所羅門以後ê任何君王之上。」m̄-koh就tī社會經濟、政治、軍事、外交án-ne富裕、強勢ê狀況下，先知何西阿卻有無仝ê信息傳出來，而且是用「丈夫」kah「淫亂ê bó͘」做譬喻，對當時ê以色列人民提出真嚴肅ê指控kah呼籲，這就真值得詳細思考其中原因à。

先知何西阿雖然無像先知阿摩司hit種，非常明確地指出當時北國以色列人民犯罪ê惡質實況，m̄-koh如果詳細看經文內容ê時，á是bē oh看tio̍h tī國勢甚強、經濟非常繁榮ê北國以色列社會，隱藏tio̍h嚴重ê罪惡行為。咱看先知何西阿是傳出chit種信息：

「以色列人，lín tio̍h 聽上主ê 話。因為上主kah chit 所在ê 人辯論，因為tī chit-ê 所在無誠實、無仁慈，mā 無人bat 上帝。只有chiù-chōa、背約、刣人、偷the̍h、姦淫、強暴、刣人無soah (全民版)」（四：1—2）

Koh再看伊所描述ê另外一段話：
「總是，in 親像亞當背約，.tī hia ǹg 我行詭詐。8 基列就是行pháiⁿ-.ê ê城，.bak-tio̍h 血跡。親像kui 陣ê 賊埋伏teh 當等人，祭司結黨，mā 親像án ne tī 示劍ê 路刣人，而且實在teh 行邪淫(全民版)」（六：7—9）

「我ài 醫治以色列ê 時，以法連ê罪過kah 撒馬利亞ê 罪惡就露現。因為in 做tāi-chì 虛假，內面有賊入來，外面有kui 陣ê 搶劫。In 心內無想講，我會記得in 所有ê pháiⁿ；taⁿ in 所做ê teh kā in 圍困，是tī 我面前。(全民版)」（七：1—2）

Tùi以上經文ê內容就thang看tio̍h tī繁榮ê社會中，人民卻tī暗中進行犯罪ê勾當。尤其是宗教領袖（祭司）竟然「像強盜仝款」會結夥phah劫、謀財害命，chit種社會是怎樣ê社會？恐驚是已經墮落到不堪聞問ê地步了！

而就tī chit種社會狀況下，以色列人民卻無思反省，反卻是想用宗教禮儀來掩蓋(khàm)社會道德行為ê敗壞，特別是tī偶像崇拜上ê嚴重，這就是先知何西阿tī第六章6節指出ê：「我要求ê是堅定ê疼，m̄是牲祭；我beh我ê子民認bat我，boài燒化祭。」所謂「堅定ê疼」kah「認bat」lóng是teh指實實在在ê心對上帝忠實，卻m̄是用宗教禮儀來隱藏家己所犯ê罪惡，欺騙上帝。因為上帝並無看外表ê獻祭行為，卻是看人心內是m̄是忠實tī祂。

Chit本經冊siōng大ê特色tī所有先知作品中，先知何西阿ê chit本經冊ē-sái講是siōng特別ê一本，它ê特色就是kā上帝kah以色列人民之間ê關係，以「夫妻」來形容；上帝就是丈夫，以色列人民就是bó͘。夫妻原本是應該非常恩愛、相結連ê。M̄-koh以色列人民卻棄sak上帝，去拜巴力偶像神明，並且kah之有「親密」關係（參考何西阿書十三：2），然後koh kā上帝所賞賜kā in賜福ê貴重物件獻hō͘ chiah-ê偶像神明，並且iáu講所獻ê chiah-ê祭品lóng是chiah-ê偶像神明hō͘ ê（參考二：5—8、13），這hō͘上帝非常ê傷心。

Chit本經冊有下列幾點特色：
第一，kui本經冊lóng以「夫妻」為主軸，teh討論以色列人民bē記得上帝ê恩典，特別是上帝kā in祖先tùi埃及帶出來ê救恩（參考十一：1、十二：9、十三：4），以及以色列人民kah上帝所立ê永遠之約（參考八：1）。因為bē記得上帝，in chiah會去拜偶像，而這mā是上帝siōng無法度原諒in ê所在。雖然án-ne，上帝á是想盡一切辦法呼喚以色列人民歸回到祂ê身邊（參考六：1、十四：2），ná親像一個非常疼疼家己ê bó͘ ê丈夫仝款，上帝beh以「仁義公平」、「慈悲無變ê疼」、「信實」對待in（參考二：19—20）。

第二，先知何西阿一再提起歷史事件，親像：tī第十二章3到4節、12節提起上帝揀選雅各；tī第十一章1節、第十二章9節、12到13節、第十三章4節等處，lóng一再提起出埃及ê事件。先知提起歷史事件主要目的，就是beh hō͘以色列人民回憶一下，in之所以ē-tàng存活落來，而且有今á日chit種富強國勢，並m̄是家己有甚麼偉大ê能力，卻是因為上帝拯救ê恩典。Ná親像列王記作者所講ê，上帝看見所有ê以色列人民tú-tio̍h真大ê苦難，無人幫助in，上帝「無希望以色列人永遠滅絕」，因為án-ne，特別差派耶羅波安二世來做in ê王，帶領in脫離不時被敵人侵犯ê苦難（參考列王記下十四：26—27）。上帝án-ne做，為tio̍h是beh希望以色列人民ē-tàng確實認bat拯救in ê耶和華上帝，祂是一位萬軍ê統帥（參考何西阿書十二：5），mā是一位創造萬物ê上帝，是大有能力ê性命之主。

第三，tùi第一章1節thang發現，何西阿書chit本經冊涵蓋ê歷史年代，是tùi猶大國ê「烏西雅、約坦、亞哈斯、希西家」等諸王，mā就是大約tī主前785年到687年，前後長到一百年ê時間。先知何西阿當然不可能活chiah-ni̍h久。因為án-ne，chit本經冊有可能就是tī北國以色列亡國了後，作者tī南國猶大整理出來ê作品，主要目的teh kā南國猶大ê以色列人民講，m̄-thang bē記得上帝ê恩典，mā m̄-thang bē記得北國以色列被亞述帝國消滅ê慘痛歷史教示。Koh khah特別ê是，作者提起北國ê君王時代，是以耶羅波安二世ê時代為背景，mā就是tī北國以色列siōng興盛ê世代，主要就是beh hō͘南國以色列人民知影：tī siōng興盛ê世代，koh khah需要小心，別hō͘外在ê經濟、軍事、政治等興旺ê景象迷失了心內對上帝ê忠實，若無，北國淪亡ê慘劇mā會發生tī南國猶大（參考四：15、五：10—14、十一：12、十二：2）。

Thang分做下列幾個段落
一、 先知何西阿ê時代背景；第一章1節。
二、 先知何西阿kah bó͘-kiáⁿ，譬喻上帝kah以色列人民；第一章2節到第三章5節。
三、 以色列人民所犯ê罪過；第四章到第七章。
四、 上帝kā懲罰以色列人民；第八章到第十章。
五、 上帝是信實ê上帝；第十一章到第十四章。