讀 耶利米書chit本經冊
舊約聖經中有幾位hông稱做大先知ê，先知耶利米就是其中一位，另外iáu有先知以賽亞、以西結等人。Hông稱做大先知，是因為in ê作品篇幅chē。以賽亞書共計有六十六章，耶利米書有五十二章，而以西結書有四十八章。

先知耶利米出世tī亞拿突chit-ê小鎮，設tī耶路撒冷北pêng大約四公里ê所在，是一個土地肥、農產豐富ê所在，屬tī便雅憫支派。老父希勒家原本是一位祭司，可能是所羅門王時代亞比亞他ê kiáⁿ孫，因為亞比亞他遭遇tio̍h所羅門王放ta̍k（參考列王記上二：26），tùi án-ne了後，該家族無koh再做王朝ê祭司階級。

先知耶利米tī少年ê時代就被上帝揀選，呼召伊出來傳達信息，伊kah同時代ê先知以西結仝款，既是祭司，mā是先知（參考以西結書一：3）。M̄-koh先知耶利米接tio̍h上帝呼召ê時，kah摩西仝款，想出所有ê辦法一再藉詞推辭不接受。M̄-koh，當上帝呼召一個人成做祂ê僕人，無論án怎lóng無法度拒絕得了，就算論是潛入深淵，mā是無用，這就是先知約拿ê親身經歷。

先知耶利米是主前第七到六世紀時代ê先知，大約tùi主前627年到580年ê chit段時間內，擔任先知ê工作。Mā就是tùi約西亞作猶大王開始，經過約雅敬、約雅斤kah西底家等chit幾位猶大王ê hit段時間。Tī chit段時代中，mā是南國猶大siōng混亂動盪不安ê世代，耶利米負起先知ê工作長到將近五十年之久，chit對一位先知來講mā是一件真thiám ê事。特別是tī伊ê時代，m̄-nā非常少人會聽伊傳達ê上帝信息，社會領袖iáu迫害伊，kā伊下tī監獄中受苦（參考耶利米書三十二：2—3、三十七：11—16、21、三十八：13），甚至想beh kā伊害死tī監獄中。

先知耶利米無結婚（參考十六：1—2），朋友非常少，因為伊無法度kah其他人有社交生活（參考十六：5、8），有一位真重要ê秘書名叫巴錄幫伊寫記錄（參考三十六：4、18、四十五：1）。Chit本耶利米書真可能就是tī巴錄ê整理下成冊ê。

孤獨ê先知
先知耶利米是一位感情豐富ê先知。當伊被呼召出來傳達上帝信息ê時，心內充滿tio̍h熱情，真想看tio̍h家己ê猶大同胞會認真聽伊傳達上帝ê信息而趕緊悔改，án-ne有可能iáu有機會得tio̍h上帝ê憐憫、赦免。M̄-koh事kah願望相違背，伊看tio̍h而且親身經歷到ê，是伊ê同胞對伊誤解非常深，迫害伊，威脅beh殺害伊（參考十一：21、二十：1—2、廿六：7—11），對伊講各種侮辱難聽ê話，逼得伊只有ē-tàng Kā chit種痛苦向上帝盡量講出（參考十五：10）。M̄-koh上帝kah-ná並無tī伊感受tio̍h chit種心境難堪ê時chūn，hō͘伊一股支持ê力量（參考十五：17—18），顛倒地，iáu繼續ài伊去傳達信息，hō͘伊夾tī上帝kah人之間，m̄知如何是好。

就是tī chit種環境中，繼續不斷來擔任tio̍h先知ê使命kah工作，莫怪伊會像先知以利亞仝款，希望以死來解除chit項工作所帶來ê心痛（參考二十：14—18）。特別是tī眼見家己ê國家面臨滅亡ê時，苦勸koh得bē-tio̍h社會領袖kah民眾ê接納，hiah-ê人看伊像瘋子仝款（參考二十：7—8），甚至有真chē-pái，hiah-ê人kā伊看做是賣國賊，kah巴比倫帝國勾結出賣家己ê國家、同胞（參考三十七：13），特別是當巴比倫王尼布甲尼撒下令kā伊tùi監獄中被釋放tńg去厝裡ê時，chit種誤解koh khah深（參考三十九：11—14、四十：1—6），這致使伊心中ê孤獨感非常深，大大超過一般人所ē-tàng忍受。即使是án-ne ê情況下，先知耶利米卻iáu是得繼續完成上帝所交託伊傳達信息ê使命。Tùi chia來看，比較khah容易理解為甚麼先知約拿會想tio̍h tio̍h拒絕上帝ê呼召擔任先知，以及使徒保羅講ê：「我無理由為tio̍h傳福音誇口；我不過是奉命去傳ê。我不傳福音就有禍了！」（哥林多前書九：16）先知耶利米講家己tī「iáu未出世」chìn前，上帝已經「指定」伊「作萬國ê先知」（參考耶利米書一：5）。Chit種出世chìn前就被上帝揀選成做傳達信息ê僕人ê經驗，mā tī使徒保羅身上出現，伊就bat án-ne講：「因為上帝ê恩典，tī我出世以前伊已經揀選我，召我來事奉伊。」（加拉太書一：15）

Chit本經冊ê重要信息
讀耶利米書有一個困難，就是chit本經冊並m̄是依照年代ê順序編輯而成，不過真清楚ê是，伊ê信息是針對南國猶大講ê，chit點kah先知以西結是對全體以色列人民講話，大無相仝。Tī這本經冊中，咱會看tio̍h真強烈ê「上帝審判」ê信息，一再警告猶大ê以色列人民，tio̍h趕緊悔改，若無，上帝絕對bē對in闊手，祂會用「饑荒、瘟疫、戰爭」等嚴厲ê方法來懲罰背叛ê猶大人民。因為án-ne，tī chit本經冊中，就一再出現用「饑荒、瘟疫、戰爭」chit種驚人ê警告（參考十四：12、15、十五：2、十六：4、十八：21、廿一：7、9、廿四：10、廿七：8、13、廿八：8、廿九：17、18、三十二：24、36、三十四：17、三十八：2、四十二：16、17、22、四十四：12、13、27）。

在先知耶利米ê信息中，伊提起猶大以色列人民會án-ne引起上帝極大憤怒ê原因，就是棄sak上帝ê誡命，去拜in ê手所雕刻ê偶像神明。拜偶像ê嚴重情況差不多是到à全國大細城市、鄉鎮、村落lóng有，甚至是大街小巷lóng有。伊講：「猶大人ê神明kah in ê城鎮仝款chē；耶路撒冷人為ná見笑ê巴力所造ê祭壇mā kah in ê街道仝款chē。」（耶利米書十一：13）m̄-koh chiah-ê來自人ê手所雕刻ê偶像並m̄是真正神，因為án-ne，tī急難來臨時，一點點á作用mā無，m̄-nā無法度救猶大以色列人民，iáu因為án-ne惹起上帝極大ê受氣，真是得不償失。伊一再呼籲伊ê同胞tio̍h放棄拜偶像ê愚戇行為，趕緊悔改歸向上帝，有可能án-ne iáu有機會thang hō͘ kui個國家免遭遇淪亡ê懲罰。可惜，猶大人民並無聽信先知耶利米chit種聲音，原因是kui個社會充滿tio̍h「假先知」（參考五：13、31、六：13、七：4、八：10、十四：14、15、十八：18、二十：1—6、廿三：11、13、14、18、21、25—40、廿七：9、14、15、廿八：1—4、15、廿九：8—9、21、23、26、32—32、三十二：32），in傳出假ê信息，hō͘猶大人民掠做是一切lóng真平安，無問題。Mā因為án-ne，先知耶利米siōng困擾ê事，就是beh用真chē時間kah chiah-ê假先知對抗；伊m̄-nā tio̍h勸告家己ê同胞悔改，iáu-beh拆破假先知ê面目kah錯誤ê話語（參考廿八：1—9）。可惜ê是，人民歡喜聽假話，因為假話khah好聽，真正來自上帝ê信息往往hō͘人感覺痛苦oh得接受（參考希伯來書四：12）。M̄-kohm7聽從上帝話語ê結果，就是致使kui個國家滅亡，人民受掠，就án-ne，南國猶大tī主前586年亡國。

先知耶利米mā kah先知以賽亞仝款，提出「殘存ê人民」（參考五：18、六：9、廿三：3、三十一：2、7、三十二：37、四十二：13、19、四十四：12、28）chit種信息，就是tī kā以色列人民講，上帝雖然非常憤怒而懲罰in，m̄-koh祂確實是一位仁慈、信實ê上帝。因為án-ne，原本想beh消滅in ê，卻因為愛in，而留落來了「殘存ê人民」作為重建家園ê準備。因為án-ne，tī chit本經冊中，mā會看tio̍h預言回鄉重建家園ê信息（參考十六：14—15、廿三：3—8、廿七：22、廿九：10—14、三十：2—3、8—12、18—22、三十一：1—34、38—40、三十二：15、36—44、三十三：1—26、四十二：12、四十六：27—28、五十：4—5、17—20）。

本冊siōng特別ê信息
Chit本經冊ê另外一個特別ê所在，就是kā猶大人民看做仇敵ê巴比倫帝國看做是「上帝ê僕人」（參考廿五：9、廿七：6），這在先知運動中是非常特別ê觀點，mā是唯一kan-taⁿ有ê例。在先知耶利米ê看法裡，即使是強猛如巴比倫帝國，mā是上帝ê僕人。上帝thang透過各種方式，掌管祂創造ê宇宙萬物，仝款mā thang借用kui個受造物來教示背叛ê選民，親像饑荒、瘟疫就是其中之一。Á巴比倫帝國ê興起，乃是上帝為tio̍h beh用它來懲罰以色列ê人民。M̄-koh，，僕人一定tio̍h聽從主人ê話，如果僕人想beh家己當主，則主人會「撤換」這m̄聽話ê僕人。巴比倫帝國後來就是遭遇tio̍h chit種運命（參考以賽亞書十四：12—15）。因為它「狂傲地對敵上主—以色列ê聖者」（參考耶利米書第五十章）。因為án-ne，透過先知耶利米chit種信息，就是tī kā咱講：上帝賜福hō͘咱，hō͘咱有能力成就各種ê事業，並m̄是beh hō͘咱對敵上帝，á是自認「親像上帝仝款」（參考創世記三：5）驕傲起來，想beh kah上帝比高低，這是siōng愚戇ê念頭，因為這kan-taⁿ會為家己帶來滅亡而已。受揀選者，是beh因為被揀選而獻上感謝，而且koh khah重要ê，是應該koh khah謙卑，順服上帝ê旨意。

Koh講，耶利米書mā提供另外一則非常特殊ê內容，就是先知耶利米一再替猶大以色列人民祈求上帝憐憫，m̄-thang降hit種大ê災難tī伊ê同胞身上（參考耶利米書十四：19—22、十七：16），m̄-koh，上帝m̄-nā不許可，而且iáu要求先知耶利米m̄-thang koh再替猶大以色列人民祈求（參考七：16、十一：14、十四：11），而且tī上帝眼中，以色列人民犯罪、m̄聽勸勉ê情況，嚴重到甚至是即使摩西kah撒母耳khiā tī上帝面前向上帝祈求，上帝mā bē憐憫in，iáu會kā in趕走（參考十五：1）！主要原因是猶大以色列人民並m̄是初犯，卻是連續地、一pái koh一pái拒絕上帝僕人傳出ê信息（參考七：25—26、十一：7—8、廿五：4—7、廿六：5、廿九：19、三十二：33、三十五：15、四十二：21、四十四：4—5）。

本冊ê中心題旨
Kui本經冊環繞tio̍h一個中心主題，就是tī kā咱講：以色列人民會淪落到成做外族人ê奴隸，乃是因為in「向別ê神燒香，m̄聽從上主ê話，m̄遵守上帝ê誡命，得罪了上帝」ê結果（參考四十四：23）。這mā是kui本聖經中心思想—tio̍h對上帝忠心，遵行祂ê誡命。Án-ne chiah是性命得tio̍h永恆ê唯一途徑。

Thang分做下列段落
一、先知耶利米受呼召；第一章。
二、猶大諸王ê預言，包括約西亞、約雅敬、約雅斤、西底家等王朝時代，先知耶利米ê信息；第二到廿五章。
三、先知耶利米ê事蹟；第廿六到廿九章。
四、預言以色列人民kā重tńg去家園；第三十到三十三章。
五、西底家王時代ê先知耶利米、巴錄ê工作；第三十四到三十八章。
六、耶路撒冷淪陷後ê先知耶利米；第三十九到四十五章。
七、列國kā受tio̍h審判ê預言；第四十六到四十九章。
八、巴比倫帝國ê滅亡；第五十到五十一章。
九、附錄：歷史資料—耶路撒冷陷落，南國猶大滅亡，人民被掠到巴比倫。第五十二章。