認bat約翰福音chit本經冊
是一本kah頭前三本福音書真無仝款ê福音書讀完四本福音書了後，一定會真緊to̍h發現約翰福音chit本經冊，無論是tī編輯á是資料ê來源，lóng kah頭前三本福音書真無仝款。Tùi下列幾點差異就thang看會出來：

一、作者認為耶穌基督傳福音ê地點，是tī kui個巴勒斯坦地區。
Chit點kah頭前三本福音書所強調只tī加利利周圍ê城鎮，直到最後一禮拜chiah到耶路撒冷去，相差真大。約翰福音ê作者認為：耶穌基督tī短短三年傳福音ê時間內，至少有五次去過耶路撒冷，親像：

1.第二章13節講：「猶太人ê Pôaⁿ過節快到à，耶穌上耶路撒冷去。」這一pái是去潔淨聖殿外院hiah-ê seng-lí人ê têng-tâⁿ行為。

2.第五章1節講：「chit項事以後，tú好是猶太人ê一個節期，耶穌上耶路撒冷去。」chit-pái去，mā去畢士大水池邊，醫治好一位病了三十八年ê癱瘓者。有三個節期是iáu太男人必定會去耶路撒冷參與過節期活動，一是Pôaⁿ過節，二是五旬節，三是tòa棚節。Chia雖然無講是toh一個節期，m̄-koh ē-tàng知影必定kah這三節期有關。

3.第七章2節講chit-ê節期是tòa棚節，然後tī第10節講：「耶穌ê兄弟行了以後，耶穌mā上去過節。伊m̄是公開出門，卻是秘密去ê。」

4.Tī第十章22節講耶穌去耶路撒冷參加「慶祝獻殿節」ê活動。

5.第十二章12節以後，記載耶穌基督kah門徒同齊去過Pôaⁿ過節，這一pái mā是四本福音書共同ê資料，就是耶穌基督特別以騎驢ê方式進城，民眾是the̍h棕樹枝沿路歡迎。

以上五次ê記錄是非常清楚。Mā因為約翰福音作者chit種記述，hō͘咱知影耶穌基督如果是三十歲時出來傳道（參考路加福音三：23），án-ne，伊經過了三pái Pôaⁿ過節，第一pái是記載tī約翰福音第二章13節tī耶路撒冷；第二pái是第六章4節，地點是tī加利利；第三pái是第十二章12節，mā是最後一pái。由此，一般講伊tī世上傳道ê時間kan-taⁿ有三年之久而已，kah chit-ê資料有密切關係，並且進一步koh推斷伊被釘死tī十字架時，tī世上年紀kan-taⁿ三十三歲。

M̄-koh mā tùi chia看出，約翰福音是kā耶穌基督傳福音ê地點，不局限tī加利利，卻是tī耶路撒冷kah加利利之間來tńg來。換句話講，伊傳福音ê地點，含括了kui個巴勒斯坦地區。Chit種編排方式，kah前三本福音書記載耶穌基督tī最後一禮拜chiah到耶路撒冷去過Pôaⁿ過節之活動，差異相當大。

二、約翰福音tī取材上重視耶穌基督所講ê話。Á前三本福音書則比較偏重tī耶穌基督所行ê事蹟。

約翰福音雖然mā寫耶穌基督所行ê神跡，m̄-koh所記載神跡ê經文比較短，往往tī神跡了後，用真長ê篇幅teh述說神跡所引申出來ê意義。親像tī第五章1到18節記載tī畢士大水池旁，耶穌基督醫好一位病了38年ê病患。作者用18節ê篇幅記載chit-ê tāi-chì，m̄-koh卻用長到29節ê經文記述耶穌由此件醫治神跡引申出來ê教示。Koh親像第六章1到15節，有關耶穌基督用五餅二魚hō͘五千餘人食飽ê神跡，tòe後就記載tùi這五餅二魚ê神跡引申出耶穌基督所beh傳講ê信息。

其它iáu有五個神跡ê記載mā是án-ne。Chiah-ê lóng ē-tàng看出約翰福音作者非常重視耶穌基督所講ê話kah教示。Siōng值得注意ê所在是：作者無記載耶穌基督趕鬼ê故事，á chit點卻是前三本福音書紹介耶穌基督所行神跡中重要ê內容之一。

另外，有關耶穌基督kah祂ê門徒守最後暗頓ê記事，作者用長到四章ê篇幅（tùi第十四章到十七章），記載耶穌基督所傳講ê話語，其中包括一篇福音書中siōng長ê祈禱文（第十七章），以及伊對眾門徒ê勸勉，這mā是前三本福音書所欠缺ê內容。

三、有關耶穌基督kah行洗禮約翰之間ê關係mā有真大ê差異。
約翰福音作者認為耶穌基督kah行洗禮約翰，二人是同時認bat約翰福音chit本經冊teh進行傳福音ê工作，á chit點tī前三本福音書ê看法並無是án-ne；前三本福音書，lóng是記載耶穌基督開始出來傳道ê工作，是tī行洗禮約翰受掠入獄了後，耶穌基督chiah開始續接出來傳福音（參考馬可福音一：14）。因此，行洗禮約翰並無清楚耶穌基督所做ê事，以及所傳講ê信息，伊對耶穌基督ê認bat，lóng是祂ê門徒kā in所看見、所聽見ê，kā伊講ê。因此，後來伊差遣兩個門徒去問，到底耶穌基督是m̄是就是in等待甚久ê「teh beh來臨ê hit位」（參考路加福音七：18—20）？m̄-koh約翰福音ê作者有無仝ê看法；伊特別強調講耶穌基督出來傳福音時，行洗禮約翰「iáu未被囚禁」（參考三：24）。作者認為耶穌基督出來傳福音時，行洗禮約翰iáu繼續teh傳福音（參考三：22—30）。Koh khah特別ê是：行洗禮約翰也bat紹介家己ê學生kah耶穌基督認bat（參考一：35—39）。Mā因為耶穌基督傳福音ê工作，hō͘行洗禮約翰ê學生有kóa giâu疑，認為耶穌基督kah-ná比行洗禮約翰ê能力khah強（參考三：26）。

四、記載最後暗頓ê篇幅siōng長，內容mā siōng豐富。M̄-koh約翰福音欠缺耶穌基督tī客西馬尼園裡心靈交戰ê描述，á這卻是前三本福音書ê重點。

四本福音書lóng有記載最後暗頓ê事，m̄-koh約翰福音就是有真無相仝ê內容，特別是tī日期上，約翰福音講耶穌基督kah門徒食ê是「晚飯」（參考十三：2），並無強調he是Pôaⁿ過節暗頓。而且tī猶太人眾領袖審問完耶穌基督了後，kā伊移送到彼拉多總督府時，約翰福音作者特別記明講：「天phú 光ê 時，in tùi 該亞法ê 所在押耶穌去到總督府。In 家己無入去總督府，因為驚去bak tio̍h lah-sap，soah bētàng食Pôaⁿ 過節ê 晚餐。(全民版)」（十八：28b）

Tùi chia thang看出，約翰福音作者認為：耶穌基督是kah門徒食Pôaⁿ過節chìn前ê暗頓。M̄-koh頭前三本福音書卻lóng真清楚講，耶穌基督kah門徒同齊食ê最後暗頓，是「Pôaⁿ過節暗頓」（參考馬可福音十四：16—17，馬太福音廿六：19—20，路加福音廿二：8、13）。

另外，前三本福音書lóng同時強調，耶穌基督tī最後暗頓中ê儀式，談起餅kah酒所代表ê意義，是伊ê性命（參考馬可福音十四：22—25，馬太福音廿六：26—29，路加福音廿二：19—20）。約翰福音雖然有提起食暗頓ê事，m̄-koh卻kā暗頓ê重點hē tī兩件事頂面：一是teh指出祂kah門徒講in「中間有一個人ài beh出賣」祂（參考十三：21），然後眾門徒有各種無仝ê反應。Á伊並無阻止猶大去做chit件傷天害理ê事。二是kā kui個暗頓ê重點放tī耶穌基督用水替門徒洗腳ê事頂面，並且強調伊留落來chit-ê重要ê「僕人」模式ài in去學習（參考十三：1—17）。

M̄-nā án-ne，ná親像頭前所提起ê，約翰福音iáu用了整整四章ê篇幅記落來了耶穌基督tī暗頓中，kā門徒講們有關聖神會來臨，kah in同在，並且一再吩咐in一定tio̍h用疼相連做伙，以及耶穌基督為門徒kah所有跟tòe者ê需要，代替向上帝祈禱，á chiah-ê lóng是前三本福音書所欠缺ê。Ē-sái講是，前三本福音書lóng同時記落來了耶穌基督帶tio̍h門徒到客西馬尼園去祈禱，mā特別描述tī he園裡，耶穌基督ê心靈深處有過一段相當煎熬ê交戰；伊向上帝祈求，若是ē-tàng，hō͘這性命ê「苦杯」離開祂（參考馬可福音十四：32—42，馬太福音廿六：36—46，路加福音廿二：39—46）。Á約翰福音則完全無chit段記事，實在可惜。

類似頂面所講chit種資料編撰上之差異ê例iáu有真chē，如果用些時間kā經文提出對照比較就會清楚發現。

Chit本福音書ê作者是什麼人
到底約翰福音chit本經冊ê作者是什麼人？講法紛紛；有人講是西庇太ê kiáⁿ兒約翰，因伊kah彼得、雅各等三個人一直被看做是耶穌基督傳福音時ê核心人物（參考馬可福音五：37、九：2、十四：33）。M̄-koh chit種講法iáu是需要等待釐清，因為約翰福音有一個特點，作者非常重視耶穌基督所傳揚福音中「愛」ê真諦。Á根據路加福音第九章51到56節ê記載，有一pái，耶穌基督kah門徒到一個撒馬利亞人村莊去，ná村莊ê人並無啥歡迎耶穌基督kah門徒到訪ê款，結果雅各kah約翰看見chit種情形，就對耶穌基督講：「主ah，你kám ài阮呼喚天頂ê火來燒滅in？」結果馬上就被耶穌基督責罵。這hō͘咱看出門徒約翰並m̄是屬tī chit種「慈悲、憐憫」性格ê人物。馬可福音作者teh紹介門徒約翰ê時chūn，iáu特別講耶穌基督為伊取了一個名字叫「半尼其」，意思是「性如暴雷ê人」（參考馬可福音三：17），可見伊bē是一個溫柔ê門徒。

另有一種講法是chit-ê作者真可能指ê是拉撒路，就是tùi死裡被耶穌基督救治koh活過來ê。持chit種講法強調ê人認為，拉撒路是耶穌基督「所愛ê朋友」（參考十一：3）。Á tī chit-ê本福音書中一再提起「耶穌所鍾愛ê門徒」chit種字眼（參考十三：23—25、十九：25—27、二十：2、廿一：20）。因此，認為拉撒路就是chit本冊ê作者。

除以上講法外，iáu有其他講法，不過到現在iáu是無任何資料ē-tàng肯定地講真正作者是什麼人。

作者寫chit本冊所努力ê方向
無論作者是什麼人，顛倒是有一點是一定tio̍h提出來ê，就是約翰福音ê作者一再努力，beh kā行洗禮約翰ê角色kah地位貶低，為tio̍h是beh強化耶穌基督角色ê重要性，chit點非常重要。因為tī初代教會內，已經發生嚴重ê紛爭，原因是有人常以家己受洗ê傳承作為認定權威ê根據。Tùi使徒保羅寫hō͘哥林多教會ê書信中，ē-tàng看tio̍h chit種問題ê背景：「有ê講：『我是保羅ê人』；有ê講：『我是亞波羅ê人』；有ê講：『我是屬彼得ê』；有ê講：『我是屬基督ê。』基督竟被分割了！」（哥林多前書一：10—17）án-ne thang看出，早期教會發生紛爭ê問題之一，就是大家teh chhōe權威，尤其是當行洗禮約翰對當時猶太人社會ê影響非常大，作者有意透過行洗禮約翰家己所講ê話，明耶穌基督chiah是大家所beh認bat、跟tòe ê對象。

約翰福音大約是tī主後90到100年之間完成ê。作者藉tio̍h行洗禮約翰ê學生tī giâu疑ê時所講ê：「老師，你看，早前tī 約旦河東岸kah 你做伙，你為祂做證ê Hit位，chit-má 祂teh kā 人洗禮，群眾lóng去祂hia。」(全民版)」（三：26）伊回答學生講：「祂一定會ná 興旺，我一定會ná 衰微。(全民版)」（三：30）作者用chit種話beh表明出一個重要ê信息：kui個救贖運動ê中心是tī耶穌基督，這m̄是任何人ē-tàng取代ê。即使是行洗禮約翰mā無法度同耶穌基督相比擬。初代教會對使徒保羅是尊崇有加，對行洗禮約翰ê悔改洗禮之重視koh-khah是oh得bē記得，甚至有人只聽過行洗禮約翰ê信息，尚且m̄知影有耶穌基督（參考使徒行傳十八：24—25、十九：3）。約翰福音ê作者為tio̍h án-ne特別用「我就是替伊脫鞋子mā不配」（參考一：27），chit句話闡明kui個福音運動ê中心就是tī耶穌基督，á m̄是其他任何人。Á chit點，作者tī本冊ê第二十章31節為chit本冊之寫作目的講得真清楚：「本書記述ê目的是beh lín信耶穌是基督，是上帝ê kiáⁿ兒，並且ài lín因信伊來得tio̍h性命。」

如果咱kā約翰福音研讀過，koh來kah前三本福音書同齊對照tio̍h讀，必定會幫助咱koh khah清楚耶穌基督所做過ê事、所講過ê話ê意義，因為這四本福音書是彼此有hō͘補ê關係。

Thang kā chit本冊分做下列段落
一、序言：第一章1到18節。
二、行洗禮約翰ê事工，kah耶穌基督出來傳福音：第一章19到51節。
三、耶穌基督ê工作：第二章1到第十二章50節。
四、最後暗頓：第十三章1到十七章26節。
五、受難kah埋葬：第十八章1到十九章42節。
六、koh活kah顯現：第二十章1到廿一章25節。