讀 約拿書chit本經冊

先知約拿ê故事是聖經中siōng頂港有名聲下港有出名ê故事之一，自細漢tī教會生活長大ê信徒，差不多tùi幼兒開始就會聽tio̍h約拿ê故事，mā ē-sái講是一篇百聽不厭ê聖經故事。大多數ê人lóng是kā注意力khǹg tī約拿怎樣逃走，以及伊被一隻大魚吞進腹肚裡卻無死去等非常戲劇性ê過程；m̄-koh卻對往往疏忽了約拿書所beh詮釋ê信息，這是非常可惜ê所在。其實，約拿書有非常好koh獨有特殊ê信息，特別是對今á日ê人來講，約拿書koh khah是一本bē-tàng欠缺ê經冊，它所探討ê m̄-nā是種族ê問題，koh khah是拯救ê問題，值得大家ê注意kah深思。

約拿，chit-ê名字ê意思是「粉鳥」。通常「粉鳥」mā被用來teh代表以色列民族。Á在先知何西阿ê譬喻中，形容以色列人ná親像「無知ê粉鳥飛來飛去」，m̄知影家己ê巢tī tó位（參考何西阿書七：11）。

是m̄是真正有「約拿」chit-ê人？約拿是甚麼時代ê人物？伊真正被大魚吞進腹肚mah？尼尼微城ê人，上自國王，下到家禽動物lóng全部悔改，真有chit款tāi-chì mah？若是動物mā會禁食，án怎想像hit種情況會是怎樣ê狀態？類似chit種問題不時被提起。其實這並m̄是約拿書ê中心問題，因為類似ê問題mā發生tī其它經冊中。約拿書之真正重要ê，是探討chit本經冊所帶來信息。

Chit本經書寫作ê年代
Tī舊約聖經中有兩本經冊，篇幅真少，m̄-koh卻lóng是大家喜愛ê，除了約拿書外，另外一本就是路得記。Chit兩本經冊lóng有一個共同ê特色，就是對外國人讚譽有加，對家己以色列同胞雖然無嚴詞批判，m̄-koh tùi經文記載ê內容讀起來，卻thang聞出一股濃濃ê批判氣味。Á kā chit兩本經冊kah主前第六世紀末葉開始ê tńg來國內運動，以及後來寫做ê兩本經冊—以斯giú記kah尼希米記等對照來看，就會發見排外運動引起ê族群之間對立，以及高舉以色列民族獨尊、聖潔等觀念，就bē oh看出路得記kah約拿書chit兩本小經冊其實有它特別ê貢獻kah意義。因為án-ne，有bē少聖經學者寧可相信chit兩本經冊是採用古老ê歷史背景，寫出tī in當時社會中以色列人民kah外族人之間ê緊張kah衝突。

如果堅持chit本經冊ê作者就是列王記下第十四章25節所記載ê hit位先知約拿，he就是主前第八世紀ê時代，mā就是北國以色列王國siōng興旺ê耶羅波安二世ê時代，tùi chit-ê觀點來看尼尼微城ê事件，則thang理解為甚麼有kóa聖經學者會極力強調，約拿書就是ná親像冊中所提ê，背景就是主前第八世紀ê事件。因為主前第八世紀北國以色列所面對ê是亞述帝國，該國正開始嶄露頭角，不過尚無夠額來構成以色列ê危機。因為當時ê北國以色列國勢甚強，in眼中ê亞述，只不過是一個鄰邦小國而已。

不過，有bē少聖經學者是tùi經文所引用ê文字、詞句分析知影，chit本經冊內真chē是回國後所用ê亞蘭文風格，包括第一章7節、9節、12節、第二章1節、5節、10節、第三章7節、第四章6節、8節、10節等。Koh tī第三章3節所講ê尼尼微「是一座大城」，chit句話所用ê句型是「過去式」。換句話講，Tī作者寫冊ê時代，chit座城已經不存在à。尼尼微城是tī主前612年被巴比倫帝國毀滅ê。因為án-ne，如果用過去式形容hit-ê城真大，表明至少該冊是tī主前612年了後寫出來ê作品。另外一方面，tùi古老ê文獻中mā看tio̍h亞述帝國m̄免「尼尼微王」稱呼國王ê名號，in用ê詞句是「亞述王」á是「亞述ê王」，從來m̄-bat有用「尼尼微王」chit種講法。

M̄-koh，chit種看法mā有bē少學者持無仝ê觀點，除了頭前已經敘述過ê列王記下第十四章25節所記載，講約拿確實是「迦特‧西弗人亞米太ê kiáⁿ」之外，mā認為tī主前第八世紀kā上帝ê信息傳hō͘外國人，並且認為外國人mā會聽從先知ê話語之例，Tī聖經中並m̄是無，親像先知以利亞kah以利沙lóng bat傳上帝ê信息hō͘外國人，而且外國人mā相信in所講ê話（參考列王記上十七：7—24，列王記下五：1—18），並且koh khah重要ê是，包括約拿ê事蹟在內，lóng bat被耶穌基督引用來當做教示ê材料（參考馬太福音十六：4，路加福音四：25—27）。

Chit種對作者ê真實性之爭論到taⁿ未休。不過，iáu-koh有bē少聖經學者認為chit本經冊是寫tī以色列人回鄉重建家園時代ê作品，因為tùi經文所beh傳達ê信息中ē-tàng看出，作者努力teh見證慈悲ê上帝，只要有人真誠ê悔改，祂就會珍惜、疼，並且會因為án-ne改變原本懲罰ê計劃，無論toh種民族，上帝lóng喜愛。因為án-ne，被呼召、揀選成做上帝子民ê以色列人民，並bē-tàng獨佔上帝ê慈愛，而應該tio̍h分享上帝ê疼，án-ne chiah是作者撰寫此本經冊ê主要目的。

Chit本經冊ê主要信息
約拿書teh寫作上siōng大ê特色，就是它kah其它先知文獻無仝款；通常先知文獻lóng會提起有關以色列人民á是其它國家ê問題，以及上帝對chiah-ê違背祂旨意ê子民kā採取ê懲罰。M̄-koh約拿書卻m̄是án-ne，雖然提起有關尼尼微城人民犯罪，上帝beh懲罰它，m̄-koh卻無提起in犯罪ê內容，只有講in ê行踏是「jōa-ni̍h-á邪惡」（參考約拿書一：2），以及國王下令全國人民一定tio̍h「停止邪惡ê行為，m̄做強暴ê事」（參考三：8），並無其它koh khah詳細ê記載。Koh khah特別ê所在是，chit本經冊是用「故事」ê型態來寫，而tī故事中則含有真深ê隱喻。

Chit本經冊ê主要內容，是teh述說上帝愛全人類，祂並m̄是只愛以色列人民而已，ná親像先知約拿家己所講ê，上帝是一個「慈悲憐憫ê上帝」；祂「不輕易受氣，滿有仁慈，常改變心意不懲罰人」（參考四：2）。耶穌基督mā án-ne講：「M̄-koh， 我kā lín 講，tio̍h 疼lín ê 對敵，tio̍h 替迫害lín ê 人祈禱。 Lín 若án-ne 做，就會成做天父ê kiáⁿ 兒，因為祂 hō͘ 日頭照 pháiⁿ 人 kah 好人，mā 為tio̍h 義人kah 不義ê 人落雨。(全民版)」（馬太福音五：44—45）約拿書ê作者khah強調一個基本信念：上帝ê疼甚至kah tī所有ê受造物，包括動物在內，lóng是祂所珍惜ê對象。

另外，kah其他先知運動所傳達ê信息仝款，約拿書mā teh kā所有讀者講：上帝所喜愛ê，是人ài有確實悔改ê心，無論是什麼人，只要是真實悔改歸向上帝，祂就會赦免、赦免。Chit種信息在先知文獻中到處可見（參考耶利米書三：12—13，以西結書三十三：11，何西阿書六：6，彌迦書六：6—8）。Chit種信息對tńg來國內後重建家園ê以色列人來講，有真特別ê感受，因為tī he排外氣氛非常chiok厚ê環境中，chit種信息帶hō͘ hiah-ê因為kah外族人通婚而硬被拆掉分離ê家庭來講，是非常溫馨mā真安慰人ê信息。Á對hiah-ê堅持「純化」種族主義ê以色列人民來講，則有真大ê冷卻作用。

本冊thang分做下列幾個段落
1.第一章，約拿蒙召kah逃避上帝ê呼召。
2.第二章，約拿tī大魚中悔改而得救。
3.第三章，約拿順從上帝ê命令，去尼尼微城傳信息。
4.第四章，約拿對上帝ê不滿kah上帝ê回應。