認bat 約書亞記chit本經冊
有kóa聖經學者歡喜將「約書亞記」chit本經冊，kah頭前五本經冊連做伙看，並且kā chit六本經冊看做是「六經」，這是因為大多數ê聖經學者將頭前五本經冊當做「五經」ê緣故。

之所以kā它當做「六經」（The Hexateuch），是認為「約書亞記」記載約書亞繼續申命記有關摩西未完成ê使命，tī約書亞ê身上達成上帝所交帶ê帶領以色列人民入迦南地。Mā就是講，摩西是帶領以色列人出埃及入曠野，來到約旦河東岸。Á約書亞是續接摩西將以色列人民chhōa過約旦河進入迦南應允之地。

M̄-koh無論它是m̄是為「六經」，約書亞記chit本經冊ê重點是hō͘咱知影，以色列民族án怎進入迦南應允之地。In m̄是等tio̍h被上帝平安帶入該地，卻是用性命奮勇kah當地原住民相刣，chiah取得ê。A2ti7戰爭ê過程中，in體驗tio̍h上帝ê同在kah帶領，以及各支族之間凝結ê力量。不過有一點tio̍h注意ê是，一般聖經學者將約書亞記kah士師記、撒母耳記、列王記，歷代志，以及以斯帖記等經卷，lóng列為先知書ê範圍。M̄-koh約書亞記卻是屬tī所謂ê前先知書，指主前第八世紀被俘虜chìn前。不過chit種分類法ná親像將「出埃及記」列入律法之冊仝款，不被普遍接受，原因是出埃及記是一本真典型ê史冊。

關於約書亞
Siōng早提起約書亞ê名字是tī出埃及記第十七章9節，講摩西派約書亞去挑選一kóa人kah亞瑪力人相刣，然後第13節講：「約書亞殲滅亞瑪力人。」這已經為後來約書亞被揀選做繼承摩西ê領導權，先記落來伏筆。然後tī第廿四章13節án-ne記載講：「摩西kah伊ê助手約書亞準備好勢；摩西開始行上聖山。」然後tī第三十二章17節記載約書亞kah摩西tùi山頂落來ê時，伊對摩西講聽tio̍h以色列人民ê營中有「戰爭ê聲音」，m̄-koh摩西講m̄是，卻是「歌唱ê聲音」，原來以色列人民teh拜鑄造ê金牛。Tī出埃及記第三十三章11節講約書亞是摩西ê「少年助手」，伊不時留tī聖幕裡。Tùi chia可見約書亞是摩西身邊ê得力助手，特別是teh用兵相刣上，伊確實是以色列人民中間富有非常經驗ê一個領導者。

民數記mā提起約書亞ê事，伊是摩西身邊ê助手，而且bat向摩西建議tio̍h處分兩位得tio̍h聖神感動soah講預言ê人，m̄-koh被摩西否決（參考民數記十一：28—29）。Koh來就是摩西差派十二個探á進入迦南去窺探，約書亞就是其中ê一位，伊是以法蓮支派挑選出來去窺探ê代表，後來摩西甚至將約書亞tùi原本ê「何希阿」改成現在chit-ê名字（參考十三：16）。Á約書亞是兩個極力主張進入迦南地ê探á之一，另外一位名叫迦勒。最後，tī民數記第廿七章18到23節講，上帝ài摩西tī祭司以利亞撒kah所有以色列人民面前hōaⁿ手tī約書亞頭頂，宣告伊就是摩西ê繼承人。續落來tī民數記第三十四章17節講約書亞kah祭司以利亞撒beh同齊分配土地hō͘以色列十二支派。然後tī申命記第三十四章9節紹介約書亞講：「嫩ê kiáⁿ 約書亞得tio̍h 智慧ê 神充滿，因為摩西bat tī 伊ê 頂面hōaⁿ 手，以色列人就遵thàn 伊，照上主所命令摩西ê 來行。(全民版)」

Tùi頂面所講chit份簡單ê履歷表，就thang看出tī曠野期間，約書亞早就表現kah-ná非常突出，是摩西身邊thang重用、信任ê副手。的確是án-ne，tùi伊帶領以色列人民行過約旦河進入迦南地，約書亞記作者描述tī伊身上，thang看見摩西ê款；摩西帶領以色列人民行過紅海，紅海ê海水分開；約書亞帶領以色列人民行過約旦河，約旦河ê河水就分開；摩西派約書亞phah亞瑪力人，伊ê手舉起，仗就phah贏；約書亞帶領以色列人民攻打耶利哥城，祭司跟tòe tī軍隊ê後面吹tio̍h號角，án-ne繞城行七kho͘-á，耶利哥城就倒塌摧毀；當摩西teh要往生ê時，伊呼天喚地作見證，tio̍h用色列人民teh祝福kah詛咒之間作一個明確選擇，最後摩西呼籲以色列人民「選擇性命pah」；而約書亞tī性命結束chìn前mā是苦勸以色列人民「一定tio̍h決定，lín beh事奉ê是甚麼人」，然後伊kā以色列人民講：「講tio̍h我kah我ê厝，阮beh事奉上主。」等等chiah-ê奇妙ê神跡奇事lóng有上帝特別ê恩典，主要teh說明約書亞確實就是摩西ê繼承者，而in lóng是窮一生ê力量teh勸勉以色列人民一定會忠實tī上帝，永遠信靠祂。

作者是甚麼人
如果詳細分析chit本經冊ê資料，就會發現chit本經冊ê作者ná親像頭前ê五本經冊仝款，bē是仝一個人，á是只有一個人，當然koh khah bē是約書亞本人，因為第廿四章29到33節記載，談起約書亞以及亞倫ê kiáⁿ兒以利亞撒死後埋葬ê事宜，必定是出自後人ê手筆。Á其中第31節講：「約書亞tī-.teh ê 日，kah 約書亞死了後，hiah-ê 知影上主為以色列人所行chiah-ê tāi-chì ê 長老iáu tī-.teh ê 時，以色列人lóng 服事上主。(全民版)」chit句話必定是tī約書亞死後過了一段ê時日chiah寫ê。Koh講，tùi第四章9節、第五章9節、第七章26節、第九章27節、第十章27節、第十五章63節、第十六章10節等處經文，lóng會出現「直到今á日」chit種話句，以及第六章25節講：「約書亞就保全娼妓喇合kah 伊老父ê 家眷，以及所有屬tī 她ê 人ê 活命，因為她有隱密約書亞所差去探看耶利哥城ê 使者(全民版)」這真明顯說明chiah-ê是後代ê資料，m̄-nā bē是約書亞ê手筆，而且mā說明chiah-ê資料是經過了真長一段時間了後chiah出現ê。

因為án-ne，thang án-ne瞭解：chit本經冊是有真chē資料來自約書亞ê手筆，á是tī伊ê指導下，由助手記錄落來ê。親像：有關進入耶利哥城kah艾城ê記錄（第二到八章），有真chē古老ê城市名稱出現在chit本經冊中，親像「巴拉」（參考十五：9）、「基列‧亞巴」（就是希伯崙，十五：54），lóng是非常古老ê名字。約書亞bē是chit本經冊ê唯一作者，mā bē是全部資料ê提供者，m̄-koh，，有真chē古老ê資料hō͘伊引用，而且tùi伊嘴中、筆下，留落來了bē少珍貴ê資料hō͘後代。講到甚麼人是編輯者，就真oh清楚知影了。不過mā thang tùi chia推敲，chit本經冊編輯成冊應該bē太早，因為tī第廿二章記載有關約旦河東岸ê三支派建造一座「祭壇」，引起西岸九支族ê隱憂，thang看出he是晚期分裂成南北王國ê時ê背景。如果是tī chit-ê時chūn編輯chit本冊，ná已經是約書亞往生了後七á是八百年ê事loh。

本經冊ê中心信息
如果tio̍h用一句話來形容約書亞記chit本經冊ê中心信息，應該thang án-ne講：上帝是一位堅守誓約ê上帝，祂所應允ê事必定達成。Tùi創世記裡ê亞伯拉罕開始，上帝呼召伊出哈蘭，到伊ê kiáⁿ兒以撒、孫á雅各，上帝一再講beh賞賜hō͘ in ê kiáⁿ孫有khiā起ê土地，而且真清楚說明beh chhōa伊們進入迦南人所khiā起ê chit塊土地（參考創世記十五：18—21、廿六：3，出埃及記三：8）。如今，上帝就是呼召約書亞帶領祂ê子民用各種方式進入chit片應允之地。約書亞記裡一再重複講chit片土地乃是上帝所應允beh賜hō͘ in ê，親像：第一章2到6節、11節、15節、第九章24節、第十四章9節、第廿一章43到45節、第廿三章5節、第廿四章13節等。Tī這「賞賜土地」ê背後，mā說明一個重要ê信息：無上帝ê帶領，即使以色列人民擁有精銳ê軍隊、武器精良，mā是枉然。因為真正帶領in對抗hiah-ê看起來高大、碩壯ná親像巨人ê迦南人（參考民數記十三：25—33）ê是上帝。

約書亞記用以色列人民ê軍隊第一pái進入耶利哥城ê經驗，說明tī上帝領軍之下就會出現奇妙ê神跡（參考第五章），這mā teh說明雖然以色列人民有軍隊、有約書亞指導in怎樣準備作戰，m̄-koh實際tī背後幫忙in ê，就是上帝親自帶領in作戰。這說明一個非常重要ê信息：上帝應允ê，祂必定會親自成就，絕對bē落空。即使像迦南地hit種發達ê物質文明地方，遠遠超過以色列人民ê經驗、生活水準，m̄-koh只要是出自上帝ê作為，即使人有siōng堅強ê防衛武器、城鎮，以及各種能力，iáu是無法度阻止上帝所決定beh成就ê事，出埃及ê故事說明chit-ê行動ê意義，攻佔耶利哥城又koh是一例。

因為án-ne，相對ê，以色列人民面對堅守誓約ê上帝ê時，in mā應該是一個堅守kah上帝所立ê「性命之約」ê民族。這就是為甚麼約書亞記被看做是「六經」ê原因之一。因為tùi創世記開始，談起kah上帝之間ê關係ê時，lóng會tī chiah-ê基本信仰精神上表示以色列人民ê態度：「以色列人，你 tio̍ h 聽！上主 — 咱ê 上帝，是獨一ê 上主。5 你tio̍h 盡心、盡性、盡力，疼上主— 你ê 上帝。(全民版)」（申命記六：4-5）mā就是除了上帝以外，in絕對不敬拜其他任何神明，並且kā chit-ê信念看做是kui個民族生存á是滅亡ê分界線（參考申命記第三十章、約書亞記廿四：14—26）。

不時引起討論ê問題
約書亞記hō͘讀者感覺siōng大困擾ê記事，就是一再強調進入迦南地了後，beh kā當地ê居民全部「殺滅」，這tùi約書亞記第二章10節開始，然後就下達連串ê命令，tio̍h用色列人民攻取城鎮了後，tio̍h「刣了了」所佔領城鎮內所有ê人（參考六：21、七：9、八：24、九：24、十：30、32、33、35、37、十一：8、12），而且一再強調講，這是依照上帝ê命令所做ê。這mā是後來大家比較熟悉ê「聖戰」chit-ê詞。M̄-koh這卻kah kui本聖經所講ê一個中心主題：上帝是慈愛ê性命之主，不相符。值得注意ê是，約書亞記mā一再重複地講，某一個個支族ê人，並無kā當地ê居民「趕行」（參考十三：13、十五：63、十六：10、十七：12），特別是tī第十七章13節án-ne講：「到以色列人強盛 ê 時，就 hō͘ 迦南人做苦工，無全部kā in 趕出去。(全民版)」tùi chit句話這就thang看出頂面所講字面上所講ê ài kā當地人全部「刣了了」，並m̄是chiâⁿ實án-ne，若無，當以色列人民進入迦南地了後，就bē學了當地ê民情風俗，特別是當地ê宗教信仰。因為有當地人iáu存在，而且留落來真chē當地風俗kah信仰。這mā是為甚麼摩西律法中一再提醒in，禁止in學習ê原因。

因為án-ne，mā thang án-ne看chit款tāi-chì，就是後來以色列人民teh反省，為甚麼當in進入迦南上帝應允之地後，最後會淪陷被掠到亞述，然後被賣到世界各地去做奴隸，北國以色列人民差不多面臨滅族，而且留落來ê子民iáu被逼kah外族通婚，接受外族人引進ê信仰，而南國猶大人民則hông擄去巴比倫做奴隸，為甚麼會發生chiah-ni̍h殘酷ê事？Án-ne chiah是in關心而且一再省思ê信仰功課。In所得tio̍h ê一個結論，就是無將當地人完全隔絕出來，卻是混雜做伙，即使引進厝內做奴隸，卻mā深受影響。後來反省一個重要ê結論：只有完全隔絕chiah ē-tàng避免chit種事koh一pái發生。但beh完全隔絕，卻mā有tāi-chì實上ê困難，這mā是為甚麼所有先知kah忠實ê僕人一再呼籲以色列人民一定tio̍h tùi歷史回顧，了解上帝怎樣用憐憫kah慈愛容忍in悖逆了後，koh期待in悔改認罪，歸tńg來上帝ê原因。因為上帝知影以色列人民ê軟弱。Chit種tī信仰上ê軟弱，表現出來ê是每pái遇tio̍h所喜愛ê對象、物品，就會受tio̍h迷惑，而這mā是今á日基督徒所面臨仝款ê問題。怎樣堅持不kah世俗ê價值觀念、性命態度妥協、完全隔絕出來，chit點chiah是需要時刻反省kah學習ê性命功課。

Chit本經冊ê主要大綱
1.第一章1-9節：上帝對約書亞ê呼召，ài伊帶領以色列人民過約旦河。

2.第一章10節到第二章24節：準備過約旦河。Ài呂便、迦得、瑪拿西等三支派遵守chìn前ê約定，協助其他支族進攻約旦河西岸，並且打發探á進入耶利哥城去窺探虛實。

3.第三章到第四章：以色列人民過約旦河，情形有若早年以色列人民tī摩西帶領下過紅海仝款。上帝行了奇妙ê神跡，約旦河ê河水停止流動，hō͘以色列人民會得thang安全地行過約旦河ê河床。

4.第五章1-12節：以色列人民tī吉甲行割禮，表明了kah上帝之間ê特殊關係。

5.第五章13節到第六章27節：以色列軍隊攻佔耶利哥城。

6.第七章：亞干事件。

7.第八章1-29節：攻下艾城。

8.第八章30-35節：Tī以巴路山宣讀摩西律法，建造祭壇。

9.第九章：基遍人欺騙約書亞，以及說明in為甚麼成做以色列人ê奴隸ê原因。

10.第十章：Tī迦南地南部ê戰爭。

11.第十一章：Tī北部ê戰爭，以及征服了大部分ê土地。

12.第十二章：Phah敗其他諸王。

13.第十三到十九章：Iáu未攻佔ê一部分土地外，其他已經攻佔ê土地，kā它分配給猶大等九個半支族。

14.第二十章：設定庇護城。

15.第廿一章：分配給利未族人ê城市，共計有四十八座。

16.第廿二章：呂便等三支族tńg去河東，並且建造祭壇記念約旦河東、西兩岸人民ê永遠bē分離關係。

17.第廿三章到第廿四章：約書亞koh一pái帶領以色列人民kah上帝立約，表示絕對忠心tī上帝，以及約書亞臨終前ê勉勵。