認bat 猶大書chit張phoe

作者猶大是什麼人
Chit張phoe tī踏話頭就真清楚講作者是「雅各ê兄弟猶大」。Thang來確定chit位猶大並m̄是耶穌基督ê門徒（參考路加福音六：16），因為tī第17節講：「親愛ê眾朋友，m̄-thang bē記得咱ê主耶穌基督ê使徒們所講ê話。」如果伊是使徒猶大，就bē寫chit種句話。不過，作者既然自我紹介講是「雅各ê兄弟猶大」，thang了解chit位雅各tī早期教會中必定真有名望而且非常活躍，因為án-ne chiah會án-ne說明作者猶大ê身分。

一般認為chia所提起ê「雅各」，就是耶穌基督ê小弟雅各。Á伊確實在早期教會真有影響力，thang講kah彼得、約翰同等重要（參考加拉太書二：9），是早期耶路撒冷教會使徒團ê發言人á是領袖。因為當使徒保羅tńg來到耶路撒冷教會去報告關於外邦ê信徒是m̄是需要接受割禮ê問題ê時，最後做出裁決ê就是chit位耶穌基督ê兄弟雅各（參考使徒行傳十五：13、19—21）；而當雅各派祂ê門徒到安提阿教會去訪問ê時，tú好hit時彼得mā tī安提阿訪問，一看tio̍h雅各ê門徒到訪，彼得隨時離開座位m̄敢繼續kah外邦信徒同齊用餐，對chit件事，使徒保羅對伊有真強烈ê批評（參考加拉太書二：12）。

不過奇怪ê是，如果chit位作者猶大是耶穌基督ê小弟，為甚麼bē明白講出來，卻是用「我是耶穌基督ê僕人，雅各ê兄弟」chit種句話？這可能kah後來耶穌基督koh活了後，in清楚知影耶穌基督無法度koh再用一般人ê身分看待，而應該是以救主ê榮耀視之，有上主kah子民之間ê無仝。因為án-ne，伊就用「雅各ê兄弟猶大」自稱。因為雅各tī早期教會具有非常影響力，所以掛雅各ê名字，講家己就是chit位鼎鼎有名、有影響力ê雅各之兄弟猶大，有助tī hō͘信ê傳閱koh-khah闊泛。

新約福音書iáu紹介了另外一位名叫「猶大」ê，是耶穌ê門徒之一，真奇妙ê伊ê老父mā是名叫「雅各」（參考路加福音六：16，使徒行傳一：13）。M̄-koh，in是父子關係，並m̄是「兄弟」，因為án-ne，chit本書信ê作者就不可能是耶穌ê chit位門徒猶大。

因為新約聖經並無紹介chit位「雅各ê兄弟猶大」到底做kóa甚麼事，因為án-ne，對chit位作者猶大ê認bat就非常有限，只有ē-tàng講作者真可能是beh藉tio̍h耶穌ê兄弟雅各ê名，來說明伊kah雅各之間有非常親密ê關係，希望因為án-ne所講ê話ē-tàng得tio̍h當時教會眾領袖ê注意。

收phoe者kah寫此信ê主要目的
Chit張phoe siōng主要ê目的tī第3節真清楚講出來，就是有關「救恩」ê問題。作者想beh討論chit-ê問題ê原因kah早期教會不時發生「假教師」ê事件有關，hiah-ê人lóng是ē-tàng言善道，而且受過高深學問ê人，in講究絕對「理性」，m̄-koh卻無一定是真理，有時甚至是故意狡辯、歪曲真理（參考第4節），為tio̍h是beh滿足tī生活上放縱情慾ê需要。Á chit種「假教師」對教會團契生活ê影響非常嚴重。一是chit種人ê言論siōng容易引人陷入迷惑；二是chit種人會迷惑koh-khah chē ê人跟tòe in ê生活方式，hō͘信仰生活ê敗壞淪喪（參考第23節），甚至到連基本ê道德mā無法度持守，而做出「見笑ê行為」（參考第13節）。

這就ná親像發生tī哥林多教會ê情形仝款，使徒保羅非常受氣，寫phoe hō͘ hit-ê教會，認為若信徒連一般siōng基本ê倫理道德lóng無法度持守，chit種人會koh有甚麼信仰見證？掠準hō͘ chit種人tī教會中作亂，不如kā它驅離出去iáu-beh有khah好（參考哥林多前書五：1—2）。

仝款ê，猶大書ê作者雅各認為有必要馬上寫chit張phoe來糾正發生tī教會內chit種錯誤ê信仰生活行為，ài眾信徒注意防範，特別是對hiah-ê信仰上尚且「憢疑不定ê人」，koh khah需要幫助in（參考第22節）。

因為án-ne，chit張phoe ê對象，就是teh指所有ê信徒，thang用tī猶太人基督徒，mā thang是hō͘外邦人基督徒看ê，ná親像tī第1節作者所提起ê「蒙上帝選召、生活Tī父上帝ê疼中、並蒙耶穌基督保守ê人」。

此書信kah彼得後書之間ê關係
有一種講法是：彼得後書是採取猶大書ê資料。因為發現chit二本書信中有真chē所在真相近；親像：彼得後書第二章就kah猶大書第4到18節真類似。若無，就是這二封書信ê作者引用了仝一個資料，ē-sái講是兩個都無寫明資料ê來源。一般ê看法比較傾向tī彼得後書引用猶大書ê資料，因為通常lóng是比較晚寫ê作品，會比早些完成寫出來ê作品koh-khah chē、koh khah完整。

Thang分做下列幾個段落
一、序言；第1到2節。
二、寫此書信ê目的；第3到4節。
三、假教師ê真面目；第5到16節。
四、勸勉大家tio̍h持守信仰；第17到23節。
五、最後鼓勵ê話；第24到25節。