認bat 耶利米哀歌chit本經冊

冊名由來ê背景
耶利米哀歌加上路得記、以斯帖記、雅歌、傳道書等，chit五本經冊lóng是屬tī舊約聖經中所謂ê「聖卷」。Chit五本「聖卷」lóng kah以色列民族ê特別節期有密切關係。像耶利米哀歌是teh記念耶路撒冷城毀滅ê日子，mā就是猶太曆ê五月九日（亞筆月），祭司á是長老就會向民眾宣讀整卷「哀歌」。時到目前，á是有猶太人不時會去khiā tī聖殿殘垣ê「西牆」（koh kā它稱做「哭牆」）頭前誦讀chit卷「哀歌」，記念主後70年耶路撒冷聖殿被羅馬將軍提多（Titus）所摧毀。

耶利米哀歌原來ê希伯來文冊名是「ekah」，意思是「án怎講會án-ne」，用比較khah白話ê句話來講是：「Aih，怎樣會án-ne？」。Tī希伯來文聖經，chit-ê字用tī第一章1節、第二章1節、第四章1節ê起頭第一個字lóng是用「ekah」。Chit-ê字通常mā用來做親朋好友往生ê時，寫輓歌詞句ê起頭語，「哀歌」ê冊名由此而來。因為tī希臘文ê譯本中，kā「哀歌」ê名字以「Threnoi」來稱呼，chit-ê字mā含有「目屎」ê意思。《七十人希臘文譯本》tī冊名chìn前加上「耶利米ê」，然後koh加上註明講：「當以色列人民被掠到巴比倫後，耶路撒冷變成廢墟，耶利米坐tī城門口哀哭，唱此哀歌。」這mā就是中文冊名「耶利米哀歌」ê由來。原本tī希伯來文聖經是kā此經冊khǹg tī「聖卷」中。

作者是什麼人、寫作ê時間
一般人lóng講chit本詩歌是由先知耶利米所寫ê，因為先知耶利米mā是一個詩人，tī伊ê「耶利米書」中就有bē少ê詩歌，親像第二到五章、第八到十章、第十二到十五章等lóng是屬tī詩歌。Koh講，認為先知耶利米親目看tio̍h耶路撒冷城被毀（參考二：6-10），第三點是根據歷代志下第三十五章25節ê記載：「耶利米先知為約西亞王作輓歌。直到今á日，所有ê男女歌手lóng唱chit-ê首歌來哀悼伊；這tī以色列中成了一種風俗。Chit首歌記tī哀歌集內。」m̄-koh，，chiah-ê理由lóng真牽強，因為第一：chit本經冊並無提起作者是先知耶利米。第二：歷代志下提起先知耶利米為約西亞王寫ê哀歌，應該無tī chia，因為tī耶利米哀歌裡，並無任何關係哀悼約西亞王ê作品。第三：既然先知耶利米tùi上帝得tio̍h啟示，知影巴比倫帝國乃是上帝ê「僕人」，用來懲罰猶大ê以色列人民（參考耶利米書廿五：9），並且知影上帝決意毀滅耶路撒冷城，因為án-ne，當城破變成廢墟，是先知耶利米早已經知影ê事，而且bat勸伊ê同胞向巴比倫投降，ná會啼哭而且寫哀歌？
Án-ne，án-ne，koh是什麼人寫chit本「哀歌」？時到目前iáu chhōe bē-tio̍h答案。一般聖經學者同意chit本「哀歌」經冊，是真chē位無仝作者ê作品彙編而成ê一本詩集，因為各章ê內容無相仝，而且字母ê排列秩序mā無仝款。

不過，tùi第二kah第四章ê詩歌來看，作者顯然是親目看tio̍h了耶路撒冷毀滅，而tī城破毀滅了後寫chiah-ê詩歌。耶路撒冷城是tī主前586年被巴比倫帝國所毀，因為án-ne，chit本「哀歌」必定是tī chiah-ê時間了後寫做ê。大概是主前576年左右pah！

Chit本經冊ê詩歌特色
Chit本「哀歌」有一個真大ê特色，就是全部用詩歌寫做，而且五首詩歌中，除了第三首有六十六節外，其餘ê四首詩歌每一首都是廿二節。第三首ê六十六節tú好是廿二節ê三倍，而且前四首ê詩歌lóng是依照希伯來文二十二個字母ê順序細膩安排創作而成。Á第一首、第二首ê冊歌中，lóng是以三行組成一節，每節ê第一陣ê起頭字依希伯來文字母順序排列，前三行ê起頭字首是第一個字母，然後接落去ê三行起頭是第二個字母，第五首比較khah特別，無依照chit種排列方式。

其實chit種排列ê方式有一個好處，就是tī吟唱ê時，會眾比較khah容易會記得清楚接落去beh唱ê詩句。

Chit本經冊ê中心思想
作者寫「哀歌」ê主要目的，是teh鼓勵hiah-ê Tī痛苦中哀哭ê同胞只要悔改認罪，就ē-tàng得tio̍h上帝ê安慰，因為in原本是上帝ê選民。耶路撒冷城原本是上帝祝福ê城市，而聖殿是上帝kah祂子民會面、親密對話ê所在，taⁿ卻lóng成了廢墟，這是因為原本聖潔ê以色列人民已經腐敗到極點所帶來ê結果。詩人相信：上帝是公義ê，mā是仁慈、信實ê上帝。只要以色列人民悔改歸向上帝，祂一定會赦免，一定會拯救。

另外一方面，作者mā看tio̍h巴比倫帝國入侵耶路撒冷後，以殘酷ê手段對待以色列人民，因為án-ne，tī「哀歌」中，詩人祈求上帝懲罰án-ne殘酷ê敵人。

Chit本經冊ê主要大綱
1.第一章：哀嘆耶路撒冷城ê荒廢，坦承是因為犯罪所帶來ê結果。
2.第二章：敵人攻擊耶路撒冷城ê慘況，m̄-koh認為這是出自上帝懲罰ê結果。
3.第三章：雖然上帝ê懲罰帶來極大慘痛之教示，m̄-koh承認家己ê罪過了後，相信慈悲ê上帝必定會憐憫、赦免，並且會出手施行拯救。
4.第四章：過去輝煌ê耶路撒冷城kah taⁿ已成廢墟ê耶路撒冷城相對照，並認為這kah先知kah祭司無盡責任有關係。因為án-ne，m̄是任何人ê力量ē-tàng解救chit-ê苦難，只有上帝chiah有辦法，因為這是上帝ê懲罰結果。M̄-koh詩人mā認為以東會遭遇上帝ê懲罰。
5.第五章：祈求上帝憐憫、赦免祂ê子民。