認bat利未記chit本經冊

前言
Tī出埃及記，咱看tio̍h作者用真chē篇幅記載有關聖幕建造ê規定，tī利未記則記載真chē有關祭司kah利未人應該盡ê職責，因此，後期ê猶太經學教師稱利未記為「祭司法典」，mā稱做「獻祭ê法典」。其實chit本經冊原本ê名字是根據第一章1節ê「召喚」chit-ê詞來ê。其原意是「耶和華上帝召喚人來過聖潔生活」，因為耶和華是聖潔ê上帝。因為希臘文翻譯本kā它譯做「利未記」，後來chit-ê名稱就成做所有翻譯本ê冊名。

Tùi創世記到申命記，chit五本經冊hông稱做「摩西五經」，甚至有人認為chit五本經冊lóng是摩西寫ê，因此，chiah會稱做「摩西五經」，其實不然。M̄-koh chit五本經冊kah摩西ê教導有密切關係，特別是有真chē關於法律規定ê事，是以色列人民進入迦南地了後，tī當地生活一段時間，根據當地ê環境、風俗，根據摩西tī曠野ná四十年時間所訂出來ê規律延伸發展出來ê。親像：利未記第十九章9到10節，in tī曠野生活，根本無算是「收割」ê事，有田耕作，這是進入迦南地了後ê事。M̄-koh mài「割田邊ê穀物，mā bē-tàng回頭拾ka-la̍uh ê穗」， tio̍h 「kā chiah-ê留hō͘ sàn-chhiah人kah外僑」，這應該是tùi利未記第十九章18節ê「tio̍h疼家己ê厝邊，親像疼家己仝款」發展出來ê法律。因為進入迦南地了後，in chiah有田地thang耕作，有穀物thang收割，並且栽種葡萄果子樹，chiah會討論到beh將掉落在地上農作物ê留hō͘貧sàn-chhiah人撿拾。

類似chit種法律tī利未記真chē，ná親像第十九章23到25節有關栽種果子樹kah採收果子ê規定，以及第29到31節記載有關異教神明ê事，這必定是進入迦南地了後，chiah有ê規律。因為tī曠野期間，in絕對bē可能hō͘家己ê cha-bó͘-kiáⁿ淪為神廟娼妓，mā不可能有招魂á是有巫師ê事出現。若有，必定會hō͘摩西當場刣死，甚至引發上帝降落瘟疫嚴厲懲罰全體以色列人民ê災難（參考出埃及記第三十二章）。即使in出埃及ê時，有真chē外族人跟tòe in離開（參考出埃及記十二：38），m̄-koh hiah-ê外僑不可能tī以色列人民中帶入in ê宗教信仰，以及娼妓kah占卜、巫師ê事。

本冊ê特色
Chit本經冊tī每一個段落ê開始，lóng會用án-ne話句「上主呼喚摩西」（參考一：1，á是用「上主命令摩西」（四：1、六：8、十一：1）、á是「上主吩咐摩西」（參考六：24、七：22、28、八：1、十二：1、十五：1、十七：1、十八：1、十九：1、二十：1、廿一：1、16、廿二：1、17、廿三：1、33、廿四：1、廿七：1），mā會用「上主向摩西頒布」（參考五：14、六：1、19、十四：1、33、十六：4）。Tī chit-ê中間有四pái是上主對摩西kah亞倫兩人講話（參考十一：1、十三：1、十四：33、十五：1）只有一pái是上帝單獨對亞倫講話（參考十：8）。

值得注意ê所在，是tī第八章有關祭司應該遵守ê規矩，每一段落了後，就會用「這一切lóng遵照上主ê命令做」chit句話作結尾（參考八：9、13、21、29、34、36）。表示帶領kah teh代表全體以色列人民用獻祭來敬拜上帝ê事，一定會遵守上帝ê命令行事，這kah以色列人民按照上帝ê命令，á是按照上帝吩咐摩西ê話建造敬拜上帝ê聖幕仝款（參考出埃及記第三十九到四十章）。因為建造聖幕就是beh敬拜上帝，á帶領人民敬拜上帝，一定tio̍h依照上帝ê指示，m̄是tòe家己ê喜愛。

因為這是關於遵守上帝所頒布ê規律，因此，lóng會強調m̄-nā是出埃及時代ê以色列人民tio̍h遵守而已，上帝ê規律一定會永遠遵守，因此，經文中lóng會一再強調chiah-ê條例tio̍h傳承到kiáⁿ孫（參考三：17、七：36、十：9、十六：29、31、34、十七：7、廿一：17、廿二：3、廿三：14、21、31、41、廿四：3）。

本冊主要內容
如果tio̍h用一句話來形容利未記chit本經冊，siōng好ê一句話就是：疼上帝kah疼厝邊。利未記全部共廿七章，thang分做兩個部分來看，其一就是第一到十六章kah第廿七章，談ê lóng是有關怎樣用敬虔ê心kah態度敬拜上帝。包括祭司kah利未人如何在各種祭典禮儀中做好應盡ê職責。其二是第十七到廿六章，講tio̍h有關án怎過聖潔ê生活，chit部分包括了對厝邊ê關心、責任，以及社會生活ê規範。

若tio̍h用一句話來說明chit本經冊ê主要內容，我認為siōng好ê一句話是：聖潔ê上帝（參考十一：44a）。綜觀kui本利未記，就會發現所有ê法律規例，目的就是beh hō͘以色列人民成做聖潔ê國民，原因tī「耶和華上帝是聖潔ê上帝」chit-ê主軸上。因此，每pái要求以色列人民一定tio̍h聖潔ê時，就會看tio̍h作者強調上帝是「聖潔」ê（參考十一：44、45、十九：2、二十：7、8、26、廿一：6、8、廿二：32）。所beh表達出來ê意義，就是「分別為聖」，mā就是kah其他族群有所無仝。

聖潔ê意思是teh指「無殘缺」，mā就是完美ê意思。因此，身軀有殘缺ê人無法度擔任祭司，to̍h是便是利未人mā是仝款（第一到七章）。所獻ê祭牲上mā是絕對無法度有任何殘缺、 瑕疵（第八到十章）。聖潔ê上帝bē許可祂ê子民無清氣，koh-khah免講是隨便、無秩序。尤其tī對上帝忠實ê部分，一定tio̍h絕對要求，因為這是所有潔淨規律中ê基礎。因此，án怎過聖潔ê生活，就成做chit本經冊ê主要內容。

為tio̍h beh達到chit項聖潔ê目標，使用ê方式是透過祭典禮儀，mā包括lim食等等規律ê制訂，好幫助以色列人民明白潔淨ê方式，kah潔淨ê目的。Siōng特別ê是tī第十六章，提起有關贖罪日ê條例，它teh說明人犯罪了後，án怎hō͘家己koh再成做潔淨ê人，ē-tàng安然面對神聖上帝赦免ê恩典。除了安息日一定tio̍h歇睏bē-tàng工作，贖罪日m̄-nā bē-tàng工作，iáu一定tio̍h禁食（參考十六：31）。Tùi chit件事就ē-tàng看出，犯罪了後到贖罪，這過程無法度隨便，一定tio̍h用頂真ê性命態度（禁食就是teh代表性命ê苦難）來表明真心ê懺悔。因此，tùi文字起來看，利未記是寫有關法律條文ê經冊，koh khah重要ê是teh kā以色列人民講，tio̍h守chiah-ê法律規例，thang hō͘ kui個民族成做上帝聖潔ê子民，這就是chit本經冊siōng重要ê中心信息。

因為有建造聖幕，因此，敬拜ê主要方式，就是用獻祭來表達。Á利未記teh強調祭司ê條例之外，祭司之獻祭工作主要就是有關獻祭ê條例，這tùi第一到七章，佔四分之一ê篇幅。Tī chiah-ê獻祭條例中，包括有：獻燒祭（第一章）、素祭（第二章）、平安祭（第三章）、贖罪祭（第四到六章7節），以及祭司teh執行頂面所講獻祭ê時，一定tio̍h遵守ê條例（第六章8節到第七章）。

怎樣看chit本經冊
世界上無一種法律是一成無變ê，因為生活ê環境一直teh變，人kah人之間互動ê關係mā一直跟tòe變遷。一成無變ê法律，到最後m̄-nā窒礙oh行，恐驚mā無法度約束人民ê秩序。仝款ê，利未記強調獻祭hō͘聖潔ê上帝，bē-tàng用有殘缺ê祭牲，mā不准身軀有殘缺ê人擔任祭司，chit種法律已經無爽快用tī今á日ê時代，原因是現今ê人對性命看法，無koh是外表上ê健康。仝款ê，古代ê人看婦女生理週期是無清氣ê，今á日已經知影婦女有生理週期是正常現象，若無就可能是破病。Tī食物上ê看法mā有改變，現在對tī豬肉á是無鱗ê魚ê食用比較無爭議了。因此，咱ài beh看ê是利未記ê法律精神，á m̄是逐字、逐條ê文字照tio̍h傳承落來。

利未記中一再提起上帝帶領以色列人民出埃及ê故事，並m̄是ài in一直teh回想tī埃及ê歷史，卻是ài in會記得過去tī埃及hō͘人欺壓，in bat哭求上帝救助in，上帝有應允（參考十一：45、十八：3、十九：34、36、廿二：33、廿三：43、廿五：38、42、55，廿六：13、45）。如今in已經成做自由人，tī迦南地khiā起，因為he是一塊肥流奶kah蜜之地，hō͘ in過tio̍h富裕ê生活，就是ài in bē-tàng bē記得，過去in tī埃及bat有過富裕ê生活，卻因此墮落á bē記得上帝，致使變成奴隸，過tio̍h非常痛苦ê日子。因此，一再提起tī埃及奴隸ê生活，就是beh提醒in bē-tàng重蹈覆轍，包括對待厝內ê奴隸、外族人，kah家己族群中貧困ê人，lóng tio̍h ná親像家己ê親人仝款，好款待伊們、幫助in。這對咱tī今á日ê社會生活，應該是真好ê教材。當咱過去接受過痛苦ê生活經歷，就mài kā chiah-ê痛苦ê經歷加tī他人身上。特別是當以色列人民bē記得上帝á去拜偶像神明ê時，等於是bē記得上帝ê教示，這是致使性命苦難ê基本原因。因此，利未記siōng重要ê，就是teh kā今á日ê咱講，無論生活環境án怎變遷，lóng tio̍h謹記遵守參與敬拜ê重要性，聽取上帝話語並kā上帝話語運用tī今á日ê家庭、社會生活，án-ne，就會幫助咱得tio̍h有上帝賜福ê性命。

Chit本經冊ê主要大綱
1.第一到七章：五種祭典條例。
2.第八到十章：大祭司亞倫kah其後裔祭司ê職責。
3.第十一到十五章：潔淨ê法律條例。
4.第十六章：贖罪日ê條例。
5.第十七到二十六章：成做聖潔子民ê法律。
6.第二十七章：附錄。下願ê條例；十一奉獻ê條例。

（本冊經文採用opensource/copyleft ê《全民台語聖經》，tī chia特別致謝。）