認bat「路加福音」Chit本經冊
時到目前，「路加福音」kah「使徒行傳」Chit兩本經冊，lóng hō͘人認為是一位名叫「路加」Chit-ê人寫ê。Mā是四本福音書中，唯一thang來確定作者名字ê一本福音書。因為作者路加tī chit-ê本經冊ê起頭，講伊寫chit本福音書「lóng tùi頭詳細查考過了」，而且「按照秩序」編寫chit本冊（參考一：3）。因此，「路加福音」Chit本冊mā常hō͘人認為是四本福音書中，記述耶穌生平siōng-kài詳細，siōng有順序ê一本。M̄-koh，作者寫chit本福音書，m̄-nā是beh提供咱有關耶穌ê生平記事，主要目的koh khah是beh kā咱講，上帝án怎藉tio̍h耶穌向hiah-ê被社會遺棄ê人、外邦人、sàn-chhiah人，kah婦女等等當時社會ê邊緣人，表明上帝拯救ê大愛mā tī in身上，án-ne chiah是chit本冊ê重點。

作者路加chit位醫療傳道者
作者路加是位醫生（參考歌羅西書四：14），mā是一位真好ê傳道者，伊m̄-nā對文字真重視，而且真好ê同工。大約主後40年tī安提阿受洗，成做使徒保羅ê同工（參考腓利門冊24節）。Tī主後50到52年左右，使徒保羅第二pái旅行傳道ê時，路加mā tòe同伊到馬其頓ê腓立比城（參考使徒行傳十六：10—12）。大概tī主後53到58年，使徒保羅第三pái旅行傳道ê時，路加mā跟tòe伊到凱掖利亞，並且tī chia認bat了腓利（參考使徒行傳廿一：8）。伊mā是跟tòe使徒保羅到耶路撒冷ê同工之一，tī hia，伊認bat了耶穌ê兄弟雅各kah耶路撒冷教會長老（參考使徒行傳廿一：15—18）。Mā可能tī耶路撒冷教會，認bat了幾位同耶穌tùi加利利來ê婦女，in可能提供hō͘路加真寶貴ê資料（參考一：2、八：1—3）。Tī主後61年左右，伊kah使徒保羅同齊上訴到羅馬去（參考使徒行傳第廿七、廿八章）。因此，當使徒保羅tī羅馬被監禁期間，路加mā陪同在旁（參考歌羅西書四：14）。而且有好一陣子時間是只有路加陪同使徒保羅tī羅馬（參考提摩太後書四：11），可見伊kah使徒保羅之間關係ê親密。
真有可能因為路加是醫生ê緣故，工作上常需要寫病人ê醫病記錄。因此，當伊kah使徒保羅到各地去傳福音ê時chūn，lóng無bē記得將所tú-tio̍h ê事件記錄落來，結果為咱留落來了基督教會史上siōng-kài珍貴ê文獻—使徒行傳。

仝款ê，當路加tòe同使徒保羅四界傳福音ê時，伊發現流傳真chē文件teh述說耶穌ê各種言行事蹟，因此，伊就藉tio̍h閱讀並且考證過chiah-ê資料後，kā它整理編輯成chit本福音書，並用之來幫助當時ê外邦人、眾信徒認bat耶穌，希望in「所學ê道是正確ê」（參考一：4）。

作者路加是一位受過良好希臘教育ê非猶太人（所謂ê「外邦人」）。M̄-nā tī-chia本福音書中所用ê文字、詞句精美，mā因為伊對各種事件ê描述，hō͘咱發現伊有相當敏銳ê觀察力。親像：第五章描述耶穌呼召彼得ê時，作者詳細記錄了彼得ê心理反應狀況，ná親像咱tú-tio̍h神跡奇事ê時仝款，驚惶kah不安ê心情馬上顯露出來。彼得講：「主ah，請離開我，我是有罪ê人。(全民版)」（五：8）chit句話會hō͘讀者認為作者路加hit時就tī邊á看tio̍h現場實況。仝款，tī記載行洗禮約翰派門徒來問耶穌：「你就是約翰所講teh beh來臨ê hit位，á是阮iáu tio̍h等待另外一位？」作者真巧真有技巧來 巧寫落來chit句子：「tú好tī he時chūn耶穌治好真chē患病、患疫症，kah邪靈附身ê人，並且hō͘真chē失明ê重見光明。」（七：18—23）就án-ne耶穌回答行洗禮約翰ê門徒，ài in將親眼所看見ê事tńg去kā in講ê老師。Án-ne讀起來，就hō͘咱感覺真有臨場感，行洗禮約翰ê門徒是親目chiu金金看見，á m̄是聽tio̍h傳言而已。

Bē少特有ê資料
馬太、馬可、路加chit三本福音書，通常hông稱做「共觀福音書」，á是「符類福音書」。原因是「馬太」kah「路加」Chit兩本福音書lóng是採用馬可福音ê資料作底，至少tī路加福音1,149節ê資料中，就有350節經文kah馬可福音仝款。Á馬可福音共有661節，馬太福音有1,068節，m̄-koh馬太福音引用馬可福音ê經文就chē kah 606節。因此讀chit三本福音ê時，不時會發現仝款ê話句，á是真類似ê句型。

Koh講，除了頭前三章記述有關耶穌ê出世、童年kah家譜外，其餘ê章節作者mā是按照馬可福音書ê結構來編撰。M̄-koh，作者強調chit本冊ê編寫是「lóng tùi頭詳細查考過」有關ê資料，所以tī路加hit本福音書中，會發覺有bē少資料是它獨自擁有ê。親像：

A.Hō͘寡婦ê kiáⁿ兒koh活（參考七：11—17）。
B.有kóa婦女用家己ê財物供應耶穌kah祂ê門徒傳福音ê事工（參考八：1—3）。
C.耶穌另外揀選七十二人，並差派in去傳福音（參考十：1—12、17—20）。
D.好撒瑪利亞人ê比喻（參考十：25—37）。
E.無知ê財主（參考十二：16—21）。
F.失錢ê比喻kah仁慈ê老父（參考十五：8—32）。
G.機警ê管家（參考十六：1—12）。
H.治好十個痲瘋病人（參考十七：11—19）。
I.寡婦kah法官、法利賽人kah稅吏ê祈禱（參考十八：1—14）。
J.耶穌kah掖該（參考十九：1—10）。

以上chiah-ê lóng是咱非常耳熟ê故事，lóng是來自作者路加ê獨有特殊資料，其他iáu有bē少資料，mā lóng是作者路加所特有ê。

這是一本為外邦人á寫ê福音書。

因為作者路加m̄是猶太人，伊kah使徒保羅四界去傳福音，就是為tio̍h beh幫助koh-khah chē人認bat耶穌。因此，伊寫chit本冊ê目的真清楚，是為tio̍h hō͘「外邦人」（mā就是非猶太人）知影耶穌是什麼人。因此，teh寫chit本福音書ê筆法真無仝款：

A. Tī時間記載上，lóng是以羅馬皇帝kah當時統治者ê統治年代來表明（參考一：5、二：1、三：1—2）。這對當時ê外邦人來講感覺比較親切。

B. 伊用「猶太」來表示kui個巴勒斯坦（參考一：5、四：44、六：17、七：17）；m̄-koh tī馬太福音、馬可福音則將「加利利」kah「猶太」地區分開使用（參考馬太福音四：25，馬可福音一：39）。

C. 路加mā真少引用舊約聖經á是猶太先知ê預言，á這兩項lóng是馬太福音siōng-kài出色ê所在，原因是馬太福音乃是針對猶太人á寫，引用舊約經文á是先知ê預言，對猶太人來講會感覺親切而且容易進入狀況。


D. 對「外邦人」比較敏感ê記事，路加則kā它排除á是用khah緩和ê方式記載，親像：馬太福音第十章5節耶穌差派門徒出去傳福音ê時，交帶mài進入外邦人kah撒馬利亞人地區去，仝款差派門徒出去傳福音ê吩咐，tī路加並無記載chit種交帶。馬可福音第七章24節到30節，有關耶穌tī泰爾kah一位婦女對話ê記事，tī路加福音則有省略。

E. 為tio̍h hō͘受過希臘教育ê外邦人看會bat，作者kā一kóa希伯來語專用ê字句直接用希臘文標寫出來，親像：希伯來文用「各各伊」（Golgotha，參考馬太福音廿七：33），路加則用希臘文叫「髑髏岡」（Kranion，參考路加福音廿三：33）。伊甚至像馬可福音作者仝款，解釋猶太人ê風俗（參考路加福音廿二：1、7）。

F. Tī耶穌ê族譜記載上，路加福音推演到人類ê始祖亞當（參考三：38），為tio̍h是beh說明耶穌是屬tī全人類，m̄是只屬猶太人而已，chiah-ê lóng hō͘咱看出作者寫chit本冊ê時ê用心。

編寫上ê特色
一、作者路加歡喜用「聖神」kah「天使」Chit兩種資料，á chit兩個資料mā一再出現tī使徒行傳中。Tùi行洗禮約翰出世開始，作者路加就講行洗禮約翰tī母胎裡「就beh被聖神充滿」（參考一：15），續落來講伊利莎白、撒迦利亞被聖神充滿（參考一：41、67）；天使kā馬利亞講聖神beh降臨tī她身上，hō͘她有娠（參考一：35）；á當約瑟kah馬利亞將出世後無久ê耶穌帶到聖殿去，年老ê西面看tio̍h，就得tio̍h聖神ê啟示mā跟tòe來聖殿，並且受tio̍h聖神感動（參考二：26、27）á ē-tàng看見嬰á耶穌；行洗禮約翰為耶穌行洗禮了後，隨時有聖神降臨在耶穌身上（參考三：22）；耶穌tùi約旦河tńg來，就充滿tio̍h聖神，á伊mā接受聖神ê引chhōa（參考四：1）；然後作者用「耶穌tńg來到加利利，聖神ê能力kah伊同在」（參考四：14）；「主ê能力kah耶穌同在，hō͘伊ē-tàng治好病人」（參考五：17b），chiah-ê話句lóng teh說明耶穌tī宣教工作ê旅程中，聖神一直陪伴tio̍h伊。其實mā thang án-ne講，耶穌所做ê每件事，無論是teh宣講起帝國信息，á是所行ê神跡奇事，lóng有聖神ê能力kah伊同在（參考十：21）；耶穌mā kā門徒講，上帝一定會kā聖神賜hō͘向祂祈求ê人（參考十一：13），甚至交代門徒，tú-tio̍h迫害á被送審問ê時，m̄免擔心beh講甚麼，聖神會指示in該講ê話（參考十二：12）等等。路加chit位作者mā hō͘咱知影，無論是行洗禮約翰、耶穌ê出世，á是耶穌ê koh活，lóng有天使teh宣告這信息（參考一：11、26、28、34、二：9、10、13、廿四：4）。

二、作者kā耶穌傳道ê重點hē tī耶路撒冷。路加福音一開始就描述發生tī耶路撒冷聖殿ê奇妙事（參考一：9），á tī耶穌koh活了後，mā以使徒們「ê時常tī聖殿裡頌讚上帝」作本冊ê結束（參考廿四：53）。尤其是作者偏重tī耶穌kah祂ê門徒tùi加利利前往耶路撒冷這趟邁向受難ê旅途意義，kui個旅程之篇幅由第九章51節開始，直到第十九章45節耶穌進入耶路撒冷聖殿為止。

另外一方面，作者teh描述魔鬼試探耶穌ê時，siōng koân峰ê所在乃是耶路撒冷聖殿，是連續三個試探中最後一招。M̄-koh tī馬太福音書中，耶路撒冷聖殿則編tī第二段試探中。Tī作者路加看起來，對抗質疑上帝之試探，遠比對抗世間ê榮華富貴koh khah引人入勝，m̄-koh同ê時mā siōng-kài oh得抗拒。如果koh再配合使徒行傳來看，耶穌是tī耶路撒冷受難、埋葬、koh活、升天，而且基督教會ê誕生地mā是tī-chia。

是一本關懷社會邊緣人ê福音書
因為是針對非猶太人寫chit本福音書，作者對當時猶太人社會所鄙視ê族群特別重視。Tī作者路加ê筆下，siōng先得tio̍h耶穌降生好消息ê人，是夜間tī曠野看守羊群ê顧羊人（參考二：8—12）；tī猶太人眼中ê掖瑪利亞人是無清氣ê，拒絕kah in來往（參考約翰福音四：9），m̄-koh，作者路加則一再對掖瑪利亞人o-ló有chhun（參考路加福音十：30—37、十七：11—19）；猶太人討厭、而且以「罪人」看待ê稅吏，作者卻描述耶穌對稅吏ê接納，而且認為tī稅吏ê身上thang看tio̍h上帝ê救恩（參考十八：9—14、十九：1—10）；tī耶穌ê比喻中，令老父傷透腦筋，兄弟怨恨ê浪子，最後因醒悟á tńg去厝裡chhōe老父，卻因為伊ê痛改前非，mā得tio̍h天頂ê天使為tio̍h án-ne歡唱吟詩，因為上帝就是án-ne慈愛、憐憫ê上帝（參考十五：11—32）；hit位同耶穌釘tī十字架上ê囚犯，tī最後ê時刻，因為承認家己ê過錯，祈求耶穌ê赦免，因此á得tio̍h進入樂園ê許可（參考廿三：40—43）。
作者對女性相當重視，而且tī記載上真細膩，親像：伊描述婦女tī耶穌心目中地位ê重要（參考七：11—17）；婦女知影感恩（參考七：36—50）；特別強調耶穌teh傳福音事工之背後，就是有婦女全力支抱tio̍h（參考八：1—3）。Chiah-ê故事lóng teh說明，猶太人所自高、瞧不起ê人，tī作者ê筆下，卻是福音事工siōng重要、mā需要關懷ê對象。

另外一方面，咱mā看tio̍h作者對富人ê自大kah貪婪明確地提出警告。第十六章19到31節「財主kah拉撒路」ê比喻中，刻畫出耶穌對貧sàn-chhiah人ê關注kah憐憫；當稅務長掖該決定分享伊ê財富hō͘貧sàn-chhiah人ê時，耶穌o-ló伊（參考十九：9），m̄-koh，hit位kan-taⁿ知影一心一意為家己累積財寶ê富翁，耶穌所下ê評語是「糊塗人」（參考十二：20—21）。Tī耶穌ê眼中，被邀請來享受盛宴ê hiah-ê sàn-chhiah ê、殘廢ê、瘸腿ê、chheⁿ-mê-.ê人是「有福」ê（參考十四：15—24），這mā是四本福音書中描述耶穌對富人kah sàn-chhiah人ê看法siōng獨有特殊ê所在。

作者筆下ê耶穌會án-ne án-ne關懷社會邊緣ê族群，主要ê一句話乃是：「我來m̄ 是beh 招義人，是beh 招罪人來悔改。(全民版)」（五：32）顛倒ê，hiah-ê自認為有亞伯拉罕祖先庇蔭á驕傲ê人，只有hông棄sak tī上帝救恩ê門外哀哭、咬牙切齒ê份而已。因為上帝國度是tī認罪、悔改ê人ê身上出現。

本冊thang分做下列幾段
一、前言：寫chit本冊ê目的，第一章1到4節。
二、耶穌kah行洗禮約翰ê出世，第一章5到第二章52節。
三、耶穌ê宣教事工kah跟tòe伊ê人，第三章1到九章50節。
四、往耶路撒冷ê路上，第九章51到十九章44節。
五、tī耶路撒冷ê工作，第十九章45到廿一章37節。
六、受難kah koh活，第廿二章1到廿四章53節。

（本冊經文採用opensource/copyleft ê《全民台語聖經》，tī chia特別致謝。）