認bat 瑪拉基書chit本經冊

這是舊約聖經最後ê一本經冊，原本tī希伯來文聖中，最後一本是歷代志。當宗教改革時代，馬丁路德重新編輯舊約聖經目錄ê時，kā瑪拉基書放tī舊約經典ê最後一卷，以後就照馬丁路德ê版本形成。M̄-koh這並無表示chit本經冊是最後寫做ê，親像：路得記、約珥書等lóng比chit本經冊iáu koh-khah晚期寫作ê。

Chit本經冊ê冊名就是根據第一章1節而來。M̄-koh並無任何koh khah進一步說明chit位先知ê背景。Ná親像先知約珥、俄巴底亞、約拿、那鴻、哈巴谷等仝款，冊中都無說明in身世背景。所以想beh明白in傳講信息ê時代，就需要tùi經文內容去探討。瑪拉基，chit-ê名ê意思就是「我ê使者」，ná親像第三章1節所講ê。

Chit本經冊ê信息kah特色
Chit本經冊是用上帝kah人之間ê「對話」方式編撰而成，而且是每pái上帝回答了後，馬上就會一句「Lín iáu問」類似chit種質問句出現（參考一：2、6—7、二：14、17、三：7—8、13）。表示上帝teh質問人所提出ê問題，mā說明了人對上帝ê怨言是無道理ê。先知瑪拉基用真嚴肅ê語句警告以色列人民，上帝kah將來當審判者，tī「hit-ê大koh thang驚畏ê日子」來臨ê時，無任何人bih會離上帝ê審判，而且上帝ê審判會非常嚴厲（參考四：1）。

先知瑪拉基特別指出帶領以色列人民墮落ê，就是祭司。In原本是beh帶領以色列人民用敬虔ê態度敬拜上帝，m̄-koh結果卻是連人民帶著有殘缺ê動物來獻祭ê時，in mā照樣接受（參考一：8、12）。先知瑪拉基提出嚴厲ê譴責，指出hit種ê行為已經m̄是teh敬拜上帝，顛倒ê，ná明明是就是tī輕視、玷污上帝神聖ê祭壇。所以tī所有以色列人民中間，上帝事(tāi)先beh審判ê對象就是祭司（參考一：9）。

伊mā提醒以色列人民，上帝ê審判會嚴厲到像「提煉銀á ê人」，mā像冶金ê工人提煉金銀」一般（參考三：3），chit種觀點kah先知撒迦利亞仝款，強調上帝會用chit種方式來重新「火煉」祂殘存ê子民（參考撒迦利亞書十二：9），á是用chit種方式來篩選祂ê子民，kā hiah-ê藐視上帝、懷疑上帝ê以色列人民去除掉。在先知瑪拉基ê信息中有幾點重點：

1.用婚姻之約看上帝kah祂ê子民之間ê「約」。
Chit點ē-sái講是瑪拉基書chit本經書信息siōng大ê特點之一。在先知瑪拉基ê時代，當時tùi巴比倫回鄉tńg來重建家園ê人中間，有bē少離婚者，in離婚了後koh去kah外邦人結婚，只是當in koh再婚了後卻跟tòe結婚ê對象去拜偶像神明。先知瑪拉基用上帝kah以色列人民就ná同「夫妻」般ê關係，來說明上帝無法度接受對婚約隨便ê人。伊特別強調任何婚約lóng有上帝參與其中（參考瑪拉基書二：14）。棄sak本來所立ê約，kan-taⁿ會引起上帝ê「討厭」，因為tī上帝看起來，chit種行為是真「殘忍ê事」（參考二：16）。Mā所以先知瑪拉基ê信息m̄-nā要求以色列人民重建聖殿，koh khah需要重新建立忠實ê心，嚴守kah上帝所立ê「約」。伊這思想大大影響以斯拉kah尼希米。在先知瑪拉基凸顯一個非常重要ê議題：如果一個人對婚姻ê約無忠實，chit-ê人koh kā怎樣對kah上帝所立ê約真誠？

2.真誠ê心獻祭，是teh表明敬畏上帝。
先知瑪拉基ê信息中一再提起有關獻祭ê問題，mā tùi獻祭延伸出來談起十分之一ê奉獻。伊ê時代，mā是用色列人民重建家園kah聖殿完成了後，有bē少以色列人民teh獻祭ê態度上非常隨便，而執行獻祭禮儀ê祭司，koh khah是m̄免心，mā無詳細檢視hiah-ê被帶到祭壇頂beh獻hō͘上帝ê祭牲，結果連殘缺ê動物mā被the̍h-tio̍h祭壇頂去當做燒化祭，引起上帝ê憤怒，認為he已經是teh輕視kah玷污聖殿祭壇ê神聖。先知瑪拉基tùi chia談起十分之一奉獻ê問題。伊認為如果一個人teh獻祭ê事頂面隨便，就是對上帝抱tio̍h懷疑ê心。仝款ê，如果連摩西律法規定ê十分之一奉獻lóng會斤斤計較，hit種ê態度已經失去奉獻ê意義。所以先知瑪拉基呼籲大家不妨試試看，是m̄是會因為奉獻而hō͘家己陷入sàn-chhiah ê生活中？伊beh大家對上帝有信心，用敬畏ê態度回應上帝揀選ê疼，就會有享受不盡ê恩典，豐富每一個人ê性命。

3.關懷貧困者ê需要，就是teh見證上帝ê疼。
Ná親像先知撒迦利亞ê信息仝款，先知瑪拉基仝款強調社會公義ê重要性。Tī伊ê觀念中，維護社會公義是一個人表達對上帝ê疼（參考三：5）。這thang看tio̍h當時社會曉背景所呈現出來ê問題，就是tùi奴隸之地巴比倫回鄉後，tī重建家園kah聖殿ê時，有kóa人趁機會發「災難財」，m̄-nā無發揮同胞愛，反tńg kā hiah-ê tī廢墟中求生存ê人當做thàn錢ê商品般販賣去做奴隸（參考尼希米記五：1—8）。這mā是後來有人teh問先知撒迦利亞，講聖殿已經建造好勢，是m̄是tio̍h繼續像過去仝款，tī每年ê五月禁食以記念聖殿被摧毀（參考撒迦利亞書七：3）。先知撒迦利亞ê回答就真清楚，伊kā以色列人民講講：「Lín tio̍h秉公行義，tio̍h用慈愛憐憫相待。

M̄-thang 欺負寡婦、孤兒、出外人kah sàn-chhiah 人。M̄ -thang 心內計謀pháiⁿ 事來相陷害。(全民版)」（撒迦利亞書七：9—10）所以mā tùi chia thang認bat先知信息中siōng重要ê一個內容，就是beh維護社會ê公義。因為有公義ê社會chiah ē-tàng顯示出上帝ê慈愛kah救恩。

4.先知歡喜用「萬軍ê統帥」來詮釋上帝ê權柄。
Chit本經冊kah先知撒迦利亞仝款，作者真歡喜用「萬軍ê統帥」chit-ê名詞來稱呼上帝，tī短短ê四章篇幅中，先知瑪拉基使用chit-ê名詞總共有十二次ê chē（參考瑪拉基書一：4、6、10、14、二：1、4、7、三：1、5、14、17、四：1）。伊用chit-ê名詞有一個主要用意，是beh hō͘以色列人民知影，上帝是公義ê神，而公義ê上帝絕對bē kā pháiⁿ人當做好人看待，mā bē許可pháiⁿ人一直囂張落去，祂一定會嚴厲審判hiah-ê做pháiⁿ ê人。全能ê上帝一直teh注意tio̍h甚麼人是忠實tī祂ê人，因為tī祂ê面前就有一本「記念冊」（參考三：16），記載tio̍h hiah-ê敬畏祂ê人ê名，上帝會注意注意聽chiah-ê人祈禱ê聲音。相對ê，hiah-ê做pháiⁿ ê人，上帝m̄-nā會拒絕in ê獻祭，連in ê祈禱lóng會拒絕。

Koh講，先知瑪拉基mā提起tī上帝「大koh thang驚畏ê日子」來到以前，會先「差派先知以利亞」來到世上（參考四：5），chit-ê觀念影響tio̍h初代教會非常深，連主耶穌基督認為行洗禮約翰就是「代表」先知以利亞ê koh一pái來到（參考馬太福音十七：11—13）。

Chit本經書寫作ê日期
因為chit本經冊ê內容kah尼希米記非常類似，所以讀起來kah-ná chit兩本經冊ê作者是tī仝一個時代ê人物。Ná親像頭前已經講述過ê，先知瑪拉基ê思想影響以斯拉kah尼希米。如果是án-ne，án-ne，尼希米是tī主前433年tńg來波斯去述職，koh一pái年（432）tńg去猶大，當伊tńg去耶路撒冷ê時，發見「什一奉獻」已經被忽視，而守安息日ê規定無koh hit種頂真，kah異族通婚ê例chia起hia落，甚至連祭司mā跟tòe腐敗（參考尼希米記十三：7—31）而chiah-ê lóng是先知瑪拉基tī文獻中所提起ê事。所以一般認為先知瑪拉基應該是比chit-ê時間koh khah早ê時代。有bē少聖經學者就tùi án-ne認為chit本經冊應該是tī主前450年就已經寫做。M̄-koh確切ê時間á是不詳，基本上bē離這年代siuⁿ遠。

Tùi巴比倫tńg去故鄉ê以色列人民，在先知哈該kah撒迦利亞ê激勵下，koh有省長所羅巴伯帶領，tī主前516年完成聖殿重建ê工程。然後tī主前458年，跟tòe以斯拉kah一陣以色列人民同齊回鄉，致使原本已經荒涼ê真chē村鎮，特別是耶路撒冷koh一pái熱烈起來，聖殿ê祭祀禮儀mā跟tòe活躍，以斯拉鼓舞回鄉後ê以色列人民一定會遵行摩西律法ê規律（參考以斯拉記七：25—26）。所以thang理解chit時ê耶路撒冷城，m̄-nā城牆已經修復完成，而且聖殿mā已經建造完成（參考瑪拉基書一：10、三：1、10）開始進行ná親像以前一般ê敬拜禮儀à。Ná親像真chē先知所期待ê，聖殿ê禮拜koh一pái成做以色列人民宗教信仰活動中siōng重要ê一部分。M̄-koh先知瑪拉基非常明確地強調：敬虔ê宗教心一定tio̍h有真實ê社會kah家庭生活相配kah chiah有意義，這就是伊tī本經冊中非常強調「婚姻之約」重要ê原因。所以chit本經冊應該是bē晚tī主前450年代chìn前chiah-tio̍h。

Thang分做下列幾個段落
1.第一章1節，說明chit本經冊ê來源。
2.第一章2到5節、第二章10到16節、第三章6到12節，對以色列人民傳講悔改ê信息。
3.第一章6節到第二章9節，是針對祭司傳講信息。
4.第二章17節到第三章5節、第三章13到21節，對懷疑者傳講信息。
5.第四章，宣告上帝審判ê日子teh要來臨。