認bat馬可福音chit本經冊


Tī四本福音書中，到目前為止大部分ê聖經學者同意，馬可福音是四本福音書中siōng早寫成ê一本福音書。它可能是tī主後65到70年之間，tī羅馬城chit-ê地方寫成ê，對象是為tio̍h tī羅馬城ê基督徒。

寫chit本冊ê目的
早期教會因為受tio̍h迫害真嚴厲，致使tī信徒中間時常有人會問chit種ê問題：為什麼耶穌—chit位hông稱做彌賽亞ê救主，會落難tī猶太人kah羅馬統治者ê手中？就án-ne，作者提出伊ê看法：「因為人子來 chit-ê世間 m̄ 是 beh hō͘ 人服事，反tńg 是beh 來服事人，甚至犧牲家己ê性命來贖回真chē 人。(全民版)」（馬可福音十：45）Chit節mā是馬可福音siōng重要ê經文。作者就是beh kā大家講：Chit位成做人、降生tī世上ê耶穌，是一位受苦ê僕人，因為祂ê受難，hō͘咱人因罪致使kah上帝ê隔離，chiah ē-tàng重新修復和好。Kui本馬可福音，就是以耶穌受苦做主題寫成ê。作者用第十四到十五兩章ê篇幅teh說明耶穌受苦ê意義。這對當時主後65到70年ê基督徒來講，具有特別ê意義，因為in一直bē了解為什麼拯救者—耶穌一定會受苦來死？

馬可福音作者tùi第八章開始記載耶穌kā門徒講，講祂teh beh入去耶路撒冷去面對苦難，續落來tī第九章koh一pái記載耶穌提醒門徒，祂teh beh tī耶路撒冷受難ê事，然後tī第十章第三pái提醒眾門徒tio̍h清楚知影，祂teh-beh受難，受盡一切侮辱，m̄-koh tī第三工會 koh活。接連三pái預言受難，lóng提起三工後會koh活ê事。

謙卑ê人認bat耶穌
馬可福音siōng特別ê所在，就是將耶穌傳福音事工ê中心khǹg tī加利利。作者特別強調耶穌是加利利人，tī加利利地區，祂是家喻戶曉ê人物（參考一：28）；它祂tī傳道生涯ê最後一禮拜chiah離開加利利前往耶路撒冷（參考十：1）；祂tī koh活後，ài beh比門徒先到加利利，並且ài beh tī-hia kah in相見（參考十六：７）。
作者án-ne一再凸顯加利利chit地區是有一個目的，就是beh hō͘ 當時ê人知影：若想beh真正了解耶穌，就tio̍h tńg去加利利，á m̄是tī耶路撒冷。因為耶路撒冷是釘死耶穌ê所在。

為甚麼作者ài beh特別強調「加利利ê耶穌」？真有可能是因為當時tī耶路撒冷ê教會，已經hō͘早年跟tòe耶穌ê眾門徒把持tiâu-teh，甚至眾門徒已經被看做是教會ê權威階級，kah-ná耶穌時代ê 猶太教領袖leh。作者希望大家m̄-thang bē記得耶穌當時是怎樣teh改革猶太教領袖hit-ê腐敗ê信仰態度。因此teh編撰chit本冊ê時，m̄-nā kā重心tùi猶太人心目中ê信仰重鎮—耶路撒冷轉移到當時被看做是邊陲地帶ê加利利，而且kā耶穌 koh活了後kah門徒相約見面ê地點，mā khǹg tī加利利（參考十四：28、十六：７）。作者án-ne編輯，主要ê目的是teh kā讀者講，beh了解耶穌，就tio̍h tùi人ê「權威」觀念中行出來。為tio̍h án-ne，作者tio̍h chhōa讀者tńg來到加利利去，tùi認bat作為一個平凡人ê耶穌開始。這mā是teh表達出一個觀念：驕傲ê人m̄-bat耶穌。

其實，tùi馬可chit本福音書中ē-tàng看出，作者是一再描述耶穌ê門徒根本就m̄-bat耶穌，祂「驚kah gāng去」、「非常驚奇」、「思想遲鈍」等字眼來形容門徒對耶穌所講所行ê反應（參考四：41、六：50—52、八：17—21、八：33、九：10、32、十：24、32）。當早期教會信徒認為耶穌ê門徒真有權威時，馬可福音ê作者卻teh暗示chiah-ê門徒，並m̄是真正認bat耶穌。

作者筆下ê彼得
馬可福音另外一個真特別ê所在，就是提起有關耶路撒冷ê宗教領袖到加利利造訪耶穌ê事（參考三：22，七：１）。如果耶路撒冷是宗教權威重鎮，hiah-ê宗教領袖總是ē-tàng m̄免án-ne辛苦，放落身段去到加利利，而且m̄-nā是一pái，是一pái koh一pái派人去。M̄-koh非常有趣味ê是，彼得竟然否認家己是加利利人（參考十四：70），作者kah-ná有意思beh諷刺彼得，因為伊是當時tī耶路撒冷基督徒團體ê權威者。後來ê彼得甚至mā會tī福音事工上軟化家己ê立場，為tio̍h chit-ê tāi-chì，使徒保羅相當不滿，bat嚴詞譴責伊（參考加拉太冊二：11—12）。Tùi chiah-ê觀點來看，chit本冊是m̄是真正親像一kóa聖經學者所講ê，是由彼得所提供ê口述資料，實在有值得懷疑ê所在。

作者身分iáu未確知
四本福音書，除路加福音ê作者thang khah明確知影是由作者路加所寫ê之外，其餘三本福音書ê作者是什麼人？In確切ê身分是甚麼？目前lóng iáu teh探討中。聖經學者久長以來大部分認為馬可福音是約翰‧馬可（參考使徒行傳十二：12）所撰寫ê，伊ê母親馬利亞是耶路撒冷早期基督教團ê重要份子。Chit位約翰‧馬可bat kah彼得、巴拿巴同齊去傳福音，mā bat是使徒保羅ê重要同工（參考使徒行傳十三：５）。M̄-koh是m̄是就是伊，iáu是無法度確定，只ē-tàng講是作者用「馬可」chit-ê名字寫chit本福音書。

對當時環境情況ê看法
馬可福音作者kah-ná無好好á處理時間á是地點ê問題，這可能是tī迫害ê緊急情況下，作者努力beh趕快kā耶穌拯救ê信息描述出來。伊用真chē pái ê「koh」、「kah」、「馬上」、「隨時」等ê關係字詞，特別是「馬上」chit-ê詞至少就用了chē ka四十pái以上，容易hō͘人有一個感覺，認為事件ê發生是一件接一件續接teh來。Á事實上mā是有án-ne急迫ê事件發生，彼得是tī主後64到66年間，因為羅馬皇帝尼祿迫害基督徒ê時á殉道。教會內部mā因此有無仝ê意見；有ê人因迫害事件發生á信心koh-khah堅定，m̄-koh mā有人因此á信心大為退卻，心灰意冷，甚至棄sak信仰。因此，作者寫chit本書信ê另外一目的，就是beh幫助tī苦難中ê信徒重建in ê信仰，堅定in ê信心。這mā就是為甚麼作者tī寫chit本福音書ê時，語氣上顯得急迫ê原因之一。
另外一方面，作者認為耶穌一生ê時間，siōng值得注意ê就是tī最後七工tī耶路撒冷ê時間。因此，作者用第十一到十五章等共計五章ê篇幅描寫耶穌tī耶路撒冷ê大小事，包括：耶穌m̄-nā潔淨聖殿，mā公開kah 猶太當權者辯論，並且一屑á都無細jī預言堂皇ê聖殿會成做廢墟，祂甚至講chit座猶太人認為是上帝ê聖城，而且引認為傲、尊為到聖ê耶路撒冷聖殿，會被摧毀到無一塊石頭ē-tàng疊tī另外一塊石頭頂面。作者mā用兩章ê篇幅記錄下耶穌tùi被捕到被殺害ê經過。

編輯上ê特殊技巧
馬可福音書siōng-kài頂港有名聲下港有出名ê所在，就是伊tī編輯上特有技巧—「三明治」編輯法。所謂「三明治」編輯法，就是描述一段故事iáu無結束ê時chūn，中間插入了另外一個故事，然後koh再繼續描述頭前hit段未完ê故事。親像：

1.第三章20到35節，故事開始講耶穌厝裡ê人ài beh chhōe祂（第21到22節），然後插入一段tùi耶路撒冷來ê經學教師，in認為耶穌是被鬼王附身，chiah有能力趕出真chē鬼。耶穌聽了之後提出反駁（第22到30節），最後koh再繼續講耶穌ê家人來chhōe耶穌ê結果（第31到35節）。

2.第五章21到43節，起先是管會堂ê葉魯來請求耶穌治好伊ê cha-bó͘-kiáⁿ（第21到24節），續落來是有一位患血漏病長達十二年ê女人跟tòe tī耶穌ê背後，偷偷á摸耶穌ê衫褲，結果她ê病得tio̍h醫治，然後耶穌公開詢問是什麼人摸祂ê衫褲（第25到35節），最後koh再續落來記載祂chhōa彼得等三個門徒繼續前往葉魯ê厝，救活hō͘當時ê人宣告已死去ê cha-bó͘-kiáⁿ（第36到43節）。

3.第十一章12到21節，開始講tio̍h耶穌kah門徒tùi伯大尼前往耶路撒冷ê途中，看tio̍h路邊有一棵無花果樹，其葉子生做真茂盛，m̄-koh卻無結果實，因此，耶穌講該棵無花果樹將bē koh再有人食它ê果實（第12到14節），續落來講耶穌kah門徒去耶路撒冷潔淨聖殿ê事件（第15到19節），隔一工了後，耶穌kah門徒看tio̍h hit叢無花果樹枯焦死去（第20到21節）。
另外，iáu有第二章到12節；第六章到32節；第十四章1到11節；第十四章22到42節等，lóng是屬tī「三明治」編輯法ê經文。

留落來ê問題
大多數學者認為馬可福音原作者只有寫到第十六章8節而已，第9到20節chit段經文是後來編者加添入去ê。原因是若福音書只寫到聽tio̍h耶穌 koh活ê消息hō͘去探墓ê眾婦女heⁿh驚kah m̄敢講出來，he是真不符合信仰原則。

因此，第9到11節關於koh活之後ê耶穌顯現hō͘抹大拉馬利亞看見，chit件事tī馬太福音kah約翰福音lóng有記載。因此，可能後來tī編輯之後，kā chiah-ê資料mā併入，會比較khah完整。Á第12到13節，則同時出現tī路加福音第廿四章13到35節，馬可福音編輯kā它濃縮成做短短兩節。第14到18節關於耶穌顯現hō͘其他十一位門徒看見，這tī其他三本福音書lóng有記載，只是比較khah特別ê所在，是第16到18節是馬可福音所收集siōng特別ê資料。最後，第19到20節，thang tùi路加福音第廿四章50到53節，以及使徒行傳第一章9到11節ê經文看tio̍h類似ê記載。Chiah-ê lóng tī說明真可能是後來tī編輯ê時，chiah kā chiah-ê資料加添入去，為tio̍h是beh希望hō͘耶穌ê事蹟記載kah koh khah完全，因為若是無敘述祂ê koh活，就會失去福音ê意義。

Tī第十六章加添chit段 koh活了後ê經文，可能是beh hō͘大家知影：耶穌確實是有koh活。只要相信，就必得tio̍h上帝奇異ê恩典。

Chit本冊thang分做下列幾個段落
一、第一章1到13節：序言，紹介行洗禮約翰。
二、第一章14到八章26節：耶穌基督ê宣教事工。
三、第八章27到十章31節：耶穌預言受難，準備行向耶路撒冷。
四、第十章32到52節：耶穌往耶路撒冷城。
五、第十一章1到十四章31節：耶穌tī耶路撒冷地區ê活動。
六、第十四章32到十五章47節：耶穌受難、埋葬。
七、第十六章1到8節：耶穌 koh活ê事蹟。
八、第十六章9到20節：耶穌ê顯現kah升天。

（本冊經文採用opensource/copyleft ê《全民台語聖經》，tī chia特別致謝。）