認bat馬太福音chit本經冊


為甚麼tio̍h先讀福音書
　　Tú開始讀聖經ê時chūn，一般人lóng會習慣性地先掀開創世記第一章來讀。M̄-koh當讀tio̍h第五章，就會為tio̍h hit串族譜，而且每一個人lóng活到七百、八百、九百gōa等歲數感覺相當bē了解，然後繼續讀tio̍h第十章，kui章ê篇幅記載挪亞三個kiáⁿ兒後裔ê族譜，就會感覺真乾燥、無味，á有無想beh koh繼續讀落去念頭。因為常常會讀tio̍h族譜，而且真chē內容kah現今觀念，á是實際生活經驗有真大ê cheng差。其實，讀創世記iáu好，繼續讀出埃及記、民數記，特別是利未記，án-ne就會感覺koh-khah乾燥、無味loh。這mā就是我為甚麼beh先tùi新約福音書讀起ê原因，為tio̍h是beh先幫助大家明白、認bat耶穌是什麼人，因為咱是被稱做基督徒ê人。

有人開始讀福音書ê時chūn，koh會發生一個問題：為甚麼馬太、馬可、路加等chit三本福音書所記載內容有真chē重複ê記事、話句？為甚麼馬太福音內底常常會出現引用舊約聖經ê資料，其他ê福音書就比較無chit種ê情形？會發生chit種ê問題是表示讀ê人真用心，確實是真好ê問題。

為甚麼有真chē重複ê話句出現
　　咱ē-tàng án-ne了解：馬太、馬可、路加等chit三本福音書，是以馬可福音作底本寫成ê。Mā就是講，馬太kah路加chit兩本福音書，就是以馬可福音書ê材料作底，然後各自寫出作者ê風格、觀點ê福音書，因此，chiah會hō͘ 咱讀起來感覺有真chē「重複」、「雷同」ê所在。根據聖經學者kā咱講，tī馬可福音中總共661節ê經文內底，有606節經文被馬太福音ê作者所引用，被路加福音ê作者引用了320節。

　　如果是án-ne，馬可福音就應該是siōng早寫ê一本福音書loh，chit點mā是大多數聖經學者共同ê觀點。因此，koh有人會提出chit種ê問題：既然án-ne，ná會是馬太福音排tī第一本，á m̄是馬可福音neh？這又koh是一個真好ê問題。

　　其實會有chit-ê問題應該是近代發生ê，講近代，其實mā已經是第十九世紀ê事loh。因為tī第十九世紀中葉chìn前，聖經學界差不多lóng認為馬太福音是siōng早寫成ê一本福音書，比馬可福音koh khah早，因此被編列為第一本福音書乃是真自然ê。只是tī第十九世紀中葉之後，聖經學界tī研究上有了真大ê進展，發現馬可福音寫作完成ê時間，比起馬太福音to̍h早大約五到十年，並且確定馬太kah路加等這二本福音書lóng採用了馬可福音ê資料。Án-ne講起來，馬太福音應該是大約寫成tī主後七十到八十年之間，mā就是tī耶路撒冷城被摧毀之後。

寫chit本福音書ê主要目的
　　馬太福音ê作者是猶太人，伊寫chit本福音書ê主要目的，就是beh kā 猶太人講：「咱久長以來一直teh等待ê Hit位『彌賽亞』（救主），已經來臨à，祂就是耶穌lah！」譬如：tī馬太福音第三章14節，記載有關耶穌到約旦河準備ài beh接受行洗禮約翰為祂洗禮ê時，行洗禮約翰對耶穌講出chit種ê話：「我應當受你ê洗禮，你反tńg來chhōe我！」Chit句話只出現tī馬太福音，用意相當清楚，就是beh kā 猶太人：看，連行洗禮約翰lóng án-ne講，咱iáu teh等什麼人neh？

Koh譬如：馬太福音第十七章1到13節，記載有關耶穌kah伊ê三位門徒上山去，看tio̍h耶穌變形像ê故事，tī第13節作者án-ne記載講：「門徒án-ne chiah明白耶穌chit-ê話是teh指tio̍h施洗者約翰講ê。」chit句話mā只出現在馬太福音中。依照先知瑪拉基ê預言說，「彌賽亞」beh來臨chìn前，先知以利亞必定會先出現（參考瑪拉基冊四：5），耶穌則講先知以利亞已經來à，á馬太福音ê作者就進一步講出頂面所講第13節chit句話，為tio̍h是beh明確kā 猶太人講，in久長以來所期待ê chit位救主，就是被猶太人釘死tī十字架頂ê耶穌。因此，chit本福音書就是為猶太人寫ê。

編寫上ê特點
　　讀馬太福音ê時，iáu會有一種感覺，就是時常會讀tio̍h chit種ê話句：「chit項事是beh應驗主藉tio̍h先知講ê話。」（一：22，二：15、17、23，四：14，八：17，十二：17，廿一：4，廿七：9）á是常常引用舊約聖經ê經文，會有chit種ê筆法，siōng主要ê原因，就是因為chit本福音書是寫hō͘猶太人看ê，因此，引用舊約聖經經文ê目的，á是是所謂「應驗主藉tio̍h先知講ê話」，chit種強調先知講過ê話，如今出現在新約耶穌ê身上，chiah-ê lóng tī表明一件事：耶穌，伊就是舊約先知所預言ê hit位beh來臨ê救主。頂面所講chiah-ê特色tī馬可、路加、約翰等三本福音書中非常少見。

Koh講，馬太福音引用舊約典故時，非常少解釋原因，因為猶太人對舊約經典所記載ê法律、規矩，以及傳統習俗á是規律lóng真熟練，無kā伊解釋ê必要。譬如：馬太福音第十五章1到20節，記載有關耶穌ê門徒飯前無洗手，違背法律規定ê事，仝款ê記事mā記載tī馬可福音第七章1到13節，馬太福音並無解釋為甚麼飯前需要洗手，m̄-koh tī馬可福音中，就進一步解釋洗手ê背景kah應用ê範圍。

　　另外一點，tī兩千年前ê時代，書寫文字記錄實在是相當困難ê。因此，為tio̍h hō͘讀者好記憶，作者tī編寫上mā費了相當ê功夫；馬太福音ê作者大部分上是用「三、五、七」ê數字結構了此福音書ê基礎。

　　譬如：約瑟三pái得tio̍h天使ê指示（一：20—21、二：13、二：19—20），彼得三pái否認kah耶穌ê關係（廿七：69—75），彼拉多teh審判耶穌ê時chūn，三pái提出問題（廿七：11、13、22），三個比喻（廿五章）。

　　Tī「五」ê數字上，譬如：耶穌出世ê時發生了「五」件事，包括降生、東方ê星象學家來訪、逃亡到埃及、希律殺嬰孩、以及耶穌家人tùi埃及tńg來等（一：18～二：23）；耶穌用「五餅二魚」hō͘「五千」gōa人食飽（十四：13—21）；有「五個」聰明ê kah「五個」愚笨ê少女（廿五：1－12）；主人交「五千塊錢」hō͘僕人（廿五：14—30）。

　　Tī「七」ê數字上，譬如：第十三章有七個天國ê比喻，第十八章提起tio̍h赦免人七十個七次，第廿三章有經學教師kah法利賽人ê七個災禍。作者用chit種方式編寫此福音書，siōng主要ê目的乃是beh幫助讀者容易了解。

作者到底是什麼人？
　　這mā是一個真值得討論ê問題，只是chit-ê問題到現在iáu是無確切ê答案。一般來講，大家lóng認為馬太福音ê作者是hit位被耶穌呼召成做門徒ê稅吏馬太（馬可kah路加等這二本福音書lóng kā伊稱做「利未」）。提出chit種看法ê聖經學者認為：馬太福音記載有關銀錢ê比喻特別chē，mā只有馬太記載耶穌納聖殿稅（參考十七：24—27），葡萄園雇工ê比喻（參考二十：1—18），記載經學教師kah法利賽人ê問題mā siōng chē。Chiah-ê lóng tī暗示作者乃是被chiah-ê猶太人權貴階級所鄙視ê稅吏馬太。

　　不過，咱thang án-ne了解，四本福音書除了路加福音確定作者乃是路加以外，其它三本福音書ê作者確切ê身分，lóng iáu teh探討中。咱thang分做下列幾個段落：

1. 第一到二章：耶穌ê出生kah童年。
2. 第三到四章：行洗禮約翰kah耶穌。
3. 第五到七章：山頂ê寶訓。
4. 第八到九章、十一到十二章、十四到二十章16節：耶穌ê傳道工作。
5. 第十章：呼召門徒，以及對門徒ê教示。
6. 第十三章：天國ê比喻。
7. 第二十章17節到廿三章：進耶路撒冷城，以及tī耶路撒冷ê各種事蹟。
8. 第廿四到廿五章：末世ê警告。
9. 第廿七到廿八章：耶穌ê死kah復活。

（本冊經文採用opensource/copyleft ê《全民台語聖經》，tī chia特別致謝。）