認bat 彌迦書chit本經冊

認bat先知彌迦
主前第八世紀有四位重要ê先知，彌迦就是其中ê一位，另外三位就是先知何西阿（參考何西阿書一：1）、第一時期ê先知以賽亞（參考以賽亞書一：1），以及先知阿摩司（參考阿摩司書一：1，伊ê時代是tī主前793～753年，耶羅波安二世執政ê時期）等。

聖經提供非常少關於先知彌迦ê身世背景，tī耶利米書第廿六章18節bat提起伊ê名，講伊是摩利沙人，chit-ê城真可能就是tī猶大南部ê「摩利設‧迦特城」（參考彌迦書一：14）。佳哉tùi彌迦書第一章1節所提供ê資料，thang了解伊ê時代背景。

Tùi彌迦書thang知影先知彌迦ê時代，tú好是「約坦、亞哈斯、希西家諸王相繼統治猶大國期間」，mā就是主前750到686年之間，伊hō͘上帝呼召出來傳達關於撒馬利亞kah耶路撒冷ê信息。這表示伊所beh傳達信息ê對象，m̄是只有tī北國以色列，卻是包括南國猶大在內，意思是kah kui個以色列民族有密切關係。先知彌迦所針對ê對象範圍比較khah真闊，kah伊同時代ê先知阿摩司傳ê信息只針對北國以色列，而先知何西阿主要mā是針對北國以色列。先知彌迦ê信息主要是teh反映出希西家王（主前715到686年執政）宗教改革chìn前ê社會景象。伊真清楚預言北國以色列會淪陷（參考一：5—7），mā同時指出南國首都耶路撒冷mā會面臨無法度逃避ê荒蕪慘況（參考一：9—16）。用腳頭u想mā知，先知傳達chit種信息，並無會討好當時ê人民kah執政者。

彌迦，chit-ê名ê意思是：「甚麼人ē-tàng親像上帝？」Chit點thang tùi兩個方面看chit-ê名字ê意思：

其一，是teh指上帝ê子民以色列民族已經背離了上帝ê旨意，因為án-ne tùi in ê身上koh khah án怎都看bē-tio̍h上帝ê形像à。舊約聖經中iáu有一位tī希伯來文ê名是kah先知彌迦同名，mā仝款是先知，伊就是米該雅；伊出現在以色列王亞哈ê時代。Tùi列王記上第廿二章就thang看出，在先知米該雅ê時代，以色列人民已經無歡喜聽上帝ê話，顛倒歡喜聽虛偽、撒謊、諂媚ê話。Á chit點ma7thang tùi先知彌迦所傳出ê信息中看出，伊講：「地上虔誠ê人會死亡，tī人ê 中間無正直ê 人；in lóng埋伏beh刣死人，用羅網當伊ê兄弟(全民版)」（彌迦書七：2）

其二，是teh指有甚麼人ē-tàng親像上帝ê疼hit種深？聖經ê作者講，即使上帝ê子民一再背叛，上帝á是深深teh疼in，想盡一切辦法beh引chhōa in歸向祂。先知彌迦án-ne講：

「上帝ah，啥人親像祢，是赦免罪過，諒情祂所chhun 落來ê 子民ê 過失ê ？祂無永遠khǹg 受氣，因為祂歡喜憐憫。祂會oa̍t tńg 來憐憫咱，祂踏咱ê罪惡tī 腳前，祢會kā in 所有ê 罪惡hiat落去深海。(全民版)」（彌迦書七：18—19）

這就ná同詩篇ê詩人mā是án-ne描述上帝ê疼：
「上上主有憐憫，有恩典，bē 快受氣，koh 有豐盛ê 慈愛。祂bē 久長責備，mā bē 永遠khǹg 受氣。祂bē 照咱ê 罪過kā 咱處罰，mā bē 照咱ê 罪孽kā 咱報應。因為天離開地hiah-ni̍h koân，祂ê 慈愛對敬畏祂ê 人mā 是hiah 大！東離開西有gōa 遠，祂hō͘ 咱ê罪過離開咱mā是hiah遠！(全民版)」（詩篇一○三：8—12，另外參考詩篇八十六：15）

當先知約拿知影上帝不降災禍hō͘尼尼微城ê人民，tùi án-ne大生上帝ê氣ê時，就是像詩篇ê詩人teh唱chit首o-ló詩歌ê內容仝款，m̄-koh先知約拿m̄是用chit首o-ló詩歌來歌頌上帝，卻是用來表達對上帝高度ê不滿。伊抗議上帝對外族人ê疼，講上帝「常改變心意不懲罰人」，後來iáu想用死來抗議上帝chit種hō͘伊無法度瞭解kah接受ê疼（參考約拿書四：2—3）。使徒保羅mā án-ne詮釋上帝ê疼，伊講：「上帝有顯明祂對咱ê 疼，咱iáu 是罪人ê 時，基督有替咱死。(全民版)」（羅馬書五：8）

Tùi頂面所講chiah-ê thang án-ne瞭解：先知文獻雖然是teh譴責人犯罪背離上帝ê教示，m̄-koh卻teh譴責中mā同時強烈地表達出上帝是位滿有愛kah慈悲ê上帝，只要人悔改歸向祂，祂必定赦免人所犯ê罪。

彌迦書ê時代背景kah先知ê信息
先知彌迦時代bat發生三件重大ê事件：
一、主前734到732年期間，亞述皇帝提革giú、比列色佔領了北國屬地「以雲、亞伯‧伯‧瑪迦、亞挪、基低斯，kah夏瑣等城」，以及「基列、加利利，kah拿弗他利等地區，並且kā人民俘虜到亞述去」做奴隸（參考列王記下十五：29）。

二、主前722到721年，mā就是何細亞王執政ê第九年，撒馬利亞城被亞述攻陷，北國以色列滅亡，人民被掠到亞述各地去（參考列王記下十七：6）。

三、主前701年，南國猶大因為加入反抗亞述ê聯盟，亞述皇帝西拿基立為tio̍h beh懲罰南國猶大，派大軍圍困耶路撒冷城，因為希西家王聽從先知以賽亞ê勸勉，全心óa靠上帝，而hō͘耶路撒冷城佳哉免得tī難（參考列王記下第十九章）。

Tùi第一章1節所提供ê諸王歷史朝代背景，就thang看出先知彌迦ê時代，就是北國以色列tī主前721年滅亡ê時代，hit時亞述帝國消滅了北國以色列，並且kā人民俘虜到外國去販賣為奴，koh khah殘酷ê，是亞述帝國tùi附近國家巴比倫、古伊、亞瓦、哈馬，kah西法瓦音等地移民到撒馬利亞等過去以色列人民khiā起ê各城市，因為chit種政策，後來chiah-ê tùi外族人便kah留tī當地無被掠到亞述各地去ê以色列人民通婚，致使以色列人民跟tòe chiah-ê外族人拜偶像神明（參考列王記下第十七章）。亞述帝國chit種做法，其實是有計畫性beh消滅以色列民族。Kah外族人通婚而生落來ê後代，就成做後來以色列人民輕視ê「撒馬利亞人」，以色列人認為chiah-ê kah外族通婚生落來ê後代是無清氣ê族類，不kah in相來往（參考約翰福音四：9）。In kah主前第六世紀末期kah第五世紀時代回鄉回國ê以色列人民之間有極大ê鴻溝，甚至有彼此仇視ê現象（參考路加福音九：51—54）。北國以色列ê人民mā因為這通婚事件，tī以色列人民回鄉運動後，失去原本大多數ê主導力量，改由猶大領導kui個以色列民族。

一個國家ê滅亡，絕對m̄是單純tī國勢單薄、軍力衰退等chit種表面ê問題而已，卻是有其實際ê社會現象所呈現出來ê墮落、腐敗，án-ne chiah是造成一個社會動盪不安、民心bē穩、國家趨向滅亡ê主要因素。Chit點tùi先知彌迦ê言論中thang看會出來，伊是一再嚴詞譴責當代社會敗壞ê現象，指責有錢有勢ê人日瞑lóng teh圖謀詐欺、吞佔sàn-chhiah人ê財產（參考彌迦書二：1—2、8—9）；mā看tio̍h政府官員m̄-nā無依照上帝ê教示，用公義ê法則對待人民，顛倒ê，in是「憎恨善良、喜愛罪惡」，剝削人民（參考三：1—3），「用兩種天平kah升斗」對待人民（參考六：10）等等，而tī所有chiah-ê違背社會公義ê事中間，siōng嚴重ê to̍h是tī法庭上無公正ê審判（參考三：11）。先知彌迦就真明確地指出當時「官吏kah法官lóng接受o͘-se。有權勢ê人kah in成群結黨，狼狽為奸」（參考七：3）。

Thang án-ne瞭解：如果政府官員無維持公正ê律法，只知影接受o͘-se而辦案，án-ne就無法度期待商人會誠實。在先知彌迦ê時代mā kah先知阿摩司ê時代仝款，商人ê秤是偷斤減兩（參考六：10—12），受傷害、受欺騙ê lóng是hiah-ê貧困ê人民。Chit種社會不可能期待人民會誠實、忠心（參考七：2）。社會上無誠實ê就無信任。Chit種國家、民族，m̄免等敵人來攻擊，家己就會先沉淪落去，進來致使kui個社會動亂不安，進一步koh瓦解（參考七：6）。過去ê時代án-ne，今á日ê時代mā仝款。無公義準則ê社會，是不可能會久長存在ê。

Koh講，讀彌迦書應該有chit種認知：任何一個社會、族群，若ē-tàng培養出敬虔ê宗教心，就ē-tàng hō͘社會、族群產生強有力ê防衛力量。Á chit份敬虔ê宗教心，應該由宗教領袖帶頭顯示出信仰ê力量。可惜，先知彌迦時代ê宗教領袖，m̄-nā無án-ne做，反卻是帶頭墮落，in為tio̍h貪婪錢財，甚至違尻脊骿帝ê旨意欺騙人民（參考三：6、11）。Koh khah thang惡ê，是宗教領袖常以虛偽ê宗教儀式來迷惑人民，誤導人民認為上帝喜愛chiah-ê繁複ê宗教禮儀。其實，上帝並無喜愛chiah-ê，甚至厭煩chiah-ê不必要ê宗教禮儀。因為祂只喜愛咱人遵行祂ê教示，討厭咱人用豐富ê祭品來掩蓋(khàm)所犯ê罪行（參考六：6—8）。先知彌迦chit種信息，teh kah伊同時代ê先知以賽亞、先知何西阿、先知阿摩司lóng仝款（參考以賽亞書一：10—14、何西阿書六：6、阿摩司書五：21—24）。

因為án-ne，thang kā chit幾位先知ê信息歸納出一個基本原則：上帝所喜愛ê就是人ē-tàng kā祂ê教示落實在每日ê生活中，這遠比進行各項周全ê宗教禮儀koh khah重要。Mā thang án-ne講，先知傳達上帝ê信息，lóng離bē開上帝ê審判kah拯救。
Thang分做下列幾個段落
1. 第一到三章，對北國以色列kah南國猶大ê譴責。
2. 第四到五章，預言上帝ê子民kā重新聚集。
3. 第六到七章7節，說明上帝kah以色列人民之間ê關係。
4. 第七章8到20節，祈求上帝ê憐憫kah愛。