認bat 那鴻書chit本先知書

通常tī舊約聖經中thang kā先知ê文獻分做大先知書kah小先知書兩大部分。會án-ne分做「大」kah「小」先知書，並m̄是講chiah-ê先知ê社會地位ê高á是低小，卻是以in所寫ê作品份量chē kah少來區別。以賽亞書總共有六十六章，是所有先知文獻中份量siōng chē ê；koh來是耶利米書有五十二章；篇幅第三chē ê就是以西結書共有四十八章。Chit三位先知lóng hông稱做「大先知」。

小先知書就是tùi何西阿書開始，直到瑪拉基書，總共有十二位，因為án-ne，koh kā它稱做「十二先知書」。In ê作品篇幅少大多數只有三、四章而已。寫得比較khah長ê，是先知何西阿kah撒迦利亞，chit兩位先知ê作品lóng各是十四章。比較khah值得注意ê，是先知但以理ê作品，並無被列入小先知ê文獻中。

Tī十二小先知ê作品中，那鴻書是排第七位，chit種排序並m̄是依照年代來排，因為若是依照年代，則約珥書寫作ê年代真可能會比那鴻書ê時代khah慢，約珥書大約是tī第六世紀ê末期完成ê。

先知那鴻chit-ê人
先知那鴻，chit-ê名字ê意思是「安慰」。Chit-ê名字kah「尼希米」chit-ê名字ê意思真接近。先知那鴻是伊勒歌斯人（參考一：1），chit-ê城市位tī tó位？已經無法度考證。Tī小先知ê文獻中，有kóa有詳細紹介先知ê身世背景，而那鴻書則只有講伊是伊勒歌斯人外，其餘ê資料lóng闕如。因為án-ne，有關伊ê生平事蹟，差不多都無任何資料thang chhōe。只有tùi伊chit本經冊中，thang看tio̍h伊是一個真活潑、樂觀ê先知，有真好ê信仰，又koh是一位富有愛國情操ê詩人。伊ê時代，北國以色列已經早to̍h被亞述帝國滅亡（主前721年），以色列人民被掠到亞述去，甚至賣到奴隸市場上（參考列王記下十七：6、十八：11），並且iáu tùi亞述所統治ê區域大量移送人民到撒馬利亞來khiā起，逼kah留tī北國ê以色列人民kah chiah-ê移民入來ê外族人通婚（參考列王記下十七：24）。亞述皇帝採用án-ne對待北國以色列ê手路，主要目的就是beh消滅以色列族群，這mā就是所講ê「滅族」政策。

Chit種殘酷歷史ê經歷，對後代ê以色列人民來講，是一件無法度bē記得ê心頭之痛。因為án-ne，當主前614年，巴比倫帝國強力攻擊尼尼微城ê時，先知發出ê信息就充滿「伸冤」ê期待。這就是chit本經冊tī第一章15節所提起ê，講先知那鴻傳出ê信息是一個「好消息」，內容其實就是有關亞述被攻擊ê事。先知那鴻甚至呼籲所有ê猶大人民lóng tio̍h高聲歡呼、慶祝。因為亞述帝國被攻擊à。Mā因為án-ne，一般聖經學者認為先知那鴻應該就是猶大ê以色列人，而chit本經冊所談ê內容lóng是有關亞述帝國毀滅ê事。
為甚麼亞述帝國滅亡是好消息？

為甚麼beh對亞述帝國ê滅亡發出歡呼ê聲音？這可能kah主前第八世紀末業，mā就是用色列王何細亞時代（主前732到724年），因為被亞述王撒縵以色降服而一定tio̍h年年進貢。加上亞述皇帝索求無度，hō͘何細亞忍到無法度承受chit-ê重大ê壓力，就án-ne走chhōe埃及王梭ê支援。何細亞kah埃及聯盟後無koh向亞述皇帝進貢，採取堅定態度對抗亞述。

其實，何細亞王ê判斷kah決定並無正確，因為當時ê埃及並無強大，無法度抵擋亞述mā無能力來支援北國以色列。因為án-ne，當何細亞王作chit種決定了後，亞述皇帝撒縵以色就tī主前724年派兵攻打北國以色列，俘虜了何細亞王，kā伊監禁起來，只chhun首都撒馬利亞iáu未攻下。經過兩年gōa ê圍城攻打，tī圍城ê時期，亞述皇帝撒縵以色往生，繼任者掖珥根二世繼位，伊繼續帶領亞述大軍圍攻撒馬利亞城，終其尾tī主前721年攻佔了hit-ê城，並且kā以色列人民掠到亞述去做奴隸（參考列王記下十七：5—6）。北國以色列就án-ne滅亡。

掖珥根二世統治北國以色列到主前705年，繼任ê是西拿基立皇帝。伊koh khah有企圖心，一直想順勢南下併吞南國猶大。

Tī主前702年左右，mā就是猶大王希西家在位ê第十四年，亞述帝國皇帝西拿基立揮兵南侵猶大，攻下猶大ê真chē邊防衛星城鎮，並且佔領了將近四十座城市，猶大希西家王iáu為tio̍h beh平息亞述帝國ê受氣，用一萬公斤ê銀á kah一千公斤ê金子當做戰爭賠償ê費用，甚至是tùi「聖殿kah王宮寶庫裡ê銀á lóng送過去，koh kā聖殿門上ê金子kah包tī殿門柱上ê金子lóng刮落來」ê（參考列王記下十八：15—16）。M̄-koh亞述西拿基立皇帝並無因為án-ne而滿足撤軍，iáu繼續圍攻耶路撒冷城，並且當眾侮辱希西家差派去求kah ê大臣，同時侮辱上帝ê神聖。這hō͘南國猶大ê以色列人民感受tio̍h極大ê侮辱（參考列王記下十八：13—十九：19，以賽亞書三十六：1—三十七：20），這說明了tī南國ê猶大以色列人民ê心中，亞述帝國確實是in ê夢魘，如果ē-tàng早日垮台、除滅，he是in夢寐以求ê國家、民族大事。

因為án-ne，當亞述帝國tī主前612年被巴比倫帝國摧毀ê時，thang想像會tio̍h猶大ê以色列人民心中是jōa-ni̍h-á ê歡喜phut-phut-tiô。因為尼尼微城是亞述帝國ê首都，因為án-ne，全冊就是用尼尼微城代表亞述帝國。

本書寫成ê日期
先知那鴻是tī主前664年到主前612年之間擔任先知ê工作。因為tī第三章8到10節提起有關古埃及首都ê底比斯城傾覆ê事件，chit-ê城是tī主前663年左右被亞述摧毀ê。因為án-ne，當作者提起chit-ê城ê毀滅ê時，就ē-tàng想像會tio̍h chit本經冊必定寫tī-chia年了後。

M̄-koh因為tī本經冊中一再提起有關亞述帝國首都尼尼微受毀滅ê事，而hit-ê城是tī主前612年亡tī巴比倫帝國。因為án-ne，mā有人講chit本書寫成ê日期應該比chit-ê時間khah慢一kóa年代。不過chit種看法mā有人抱tio̍h無仝ê觀點，認為先知通常lóng有預言性ê特質，而認為chit本冊應該是tī尼尼微城受毀滅前幾年寫做ê。

Chit本經冊ê主題、特色
全冊只有三章，主題lóng是se̍h tī有關尼尼微城受毀滅ê tāi-chì，可見先知那鴻對亞述帝國興衰ê重視。伊講上帝必定會懲罰亞述，因為它是一個「詭計chē端」，「圖謀攻擊上主」ê國家（參考一：9、11），mā是一個「充滿tio̍h欺詐kah強暴；搶劫掠奪，無休無止」（參考三：1）ê城市，chit種國家、民族，上帝當然bē袖手不管。

Chit本經冊kah其它先知文獻siōng大ê無仝，就是無呼籲以色列人民悔改、歸向上帝等之類ê苦勸內容。Koh講，chit本經冊ē-sái講是一部詩歌，全部三章lóng是用詩歌文體寫做。Kah約拿書ê作者描述尼尼微城ê犯罪，上帝hō͘ in赦免ê主題，差別koh khah大。

Thang分做下列幾個段落
一、用一首紹介ê詩歌做開始，chit首詩歌包括o-ló上帝（一：2—10），以及預言尼尼微會hō͘懲罰（一：11—14），kah上帝對以色列人民ê應允（一：15）。先知那鴻ài所有以色列人民因為得tio̍h這美好ê信息而出來歡唱、快樂，因為這是上帝顯示了祂ê慈悲chiah有ê結果。

二、尼尼微城teh beh受tio̍h上帝嚴厲ê審判。上帝ê審判就是透過巴比倫ê軍隊進攻尼尼微城，同時mā描述尼尼微城內ê亞述人民是án怎地驚惶失措，窘態畢露（二：1—10）。Taⁿ hit-ê城已經成做廢墟了，ná像野獸寄居ê洞穴一般，kah以往hit-ê城繁榮景象互相比較已經是完全無仝ê景象（二：11—13）。

三、 尼尼微城被入侵ê敵人踐踏ê慘狀（三：1—8），以及被徹底毀滅ê理由，就是因為它bat以殘酷ê手路蹂躪其它弱小ê族群（三：9—11）。Taⁿ teh beh受毀滅，而且是徹底ê毀滅，以後永bē koh再記念chit-ê城市（三：12—19）。