認bat 以斯拉記kah尼希米記chit兩本經冊

通常談起以斯拉記chit本經冊ê時，真少單獨討論，lóng會kah尼希米記同齊論述，原因是chit兩本經冊原本是一本，tī《希伯來文版本》聖經，以及siōng有權威ê希臘文《七十士譯本》聖經mā是一本，冊名就是「以斯拉記」。Tī koh-khah早ê時chūn，chit本「以斯拉記」是kah歷代志同屬tī一卷經冊。因為tī歷代志下第三十六章22到23節記載ê經文，就kah以斯拉記第一章1到4節記載ê內容仝款。因為teh決定聖經正典ê時chūn，歷代志先被列入，以斯拉記khah晚，所以編輯ê順序就放tī歷代志下了後。

然後tī教父奧利根（Origen,185～254 A.D）ê時chūn，kā以斯拉記kah尼希米記分做兩卷，並取冊名為「以斯拉一書、二冊」。後來ê《希伯來文版本》聖經mā tī 1448年跟tòe改成兩卷。因為這兩卷經冊差不多lóng談仝款ê事，teh用字遣詞上mā差不多仝款，而且談及ê故事內容有延續性，因為án-ne，真chē聖經學者認為作者應該是仝一個人。

作者ê用心明顯thang知
無論是以斯拉記á是尼希米記，chit兩本經冊lóng有一個共同ê目的，就是重新整合分裂ê以色列十二支派。整合ê方法就是透過耶路撒冷聖殿ê重建，來呼籲北方支族ê以色列同胞tńg來歸，並且同心仰望上帝應允ê彌賽亞早日來臨。作者ê用心thang tùi以斯拉記第一章4節看出來：「如果tī流亡ê子民中，有需要幫助chiah ē-tàng tńg去ê，厝邊會幫助in，hō͘ in金銀、物品、cheng-seⁿ，mā tio̍h為耶路撒冷ê上帝聖殿獻上自願祭。」這真緊會想起早年摩西帶領以色列人民出埃及ê時ê景象：以色列人民向埃及人索取金銀首飾kah衫褲，in ài甚麼，埃及人就hō͘甚麼（參考出埃及記十二：35—36），有異曲同工之妙。

作者顯然有意kā chit pái tùi受掠之地回鄉ê行動，看做是另一pái「新出埃及記」。雖然回鄉ê厝園是早年已經進入ê應允之地，m̄-koh重建聖殿ê工作卻是teh象徵上帝就是in ê主，in是上帝ê選民。這真清楚是teh代表以色列人民kah上帝之間beh重新立約。特別tī以斯拉記第七章描述以斯拉宣讀律法之冊，ná親像當年摩西宣讀上帝ê誡命仝款。作者用chit種方式teh鼓舞tńg去家園ê以色列人民，hō͘ in知影新ê國度to̍h是將來臨，過去ê罪過bē koh再被上帝重新計算，因為上帝已經完全赦免了in ê罪過。這就ná同先知以賽亞所傳出ê信息：「Lín tio̍h安慰，安慰我ê人民。Tio̍h 對耶路撒冷講好話，koh 報她知：她ê 交戰已經盡，她ê 罪過已經赦；她為tio̍h 她一切ê 罪，tùi 上主ê 手加倍受刑罰。(全民版)」（以賽亞書四十：1—2）

現代人Siōng-kài爭議ê問題
Chit兩本經冊現代人siōng-kài爭議ê，乃是主張「排他」主義，就是反對kah外族人通婚ê事，尤其是以斯拉採取ê態度koh-khah嚴厲，對hiah-ê已經結婚生kiáⁿ ê人，除非in ē-tàng歸向上帝，若無，，便要求離婚，甚至連kiáⁿ兒lóng tio̍h放棄，這實在是真殘忍ê決定。雖然看起來尼希米ê態度比以斯拉溫和了些，m̄-koh今á日ê人來看chit兩本經冊，iáu是無法度理解kah外族人通婚ê「罪」是甚麼。這當然kah in亡國chìn前，因為真chē人kah外族人通婚致使被誘惑而棄sak上帝ê事件有密切關係，而chit款tāi-chì tùi所羅門晚年被外族妻細姨誘惑棄sak上帝有非常程度ê關係（參考列王記上十一：2、十六：31）。在列王紀裡，真chē kah外族人通婚ê國王，就kah跟tòe王后去拜巴力神明，siōng出名ê例就是以色列王亞哈，伊ê bó͘耶洗碧。

Tī先知ê觀點裡，因為婚姻ê問題，致使對耶和華上帝ê藐視，soah致使kui個民族bē記得上帝ê救恩，甚至棄sak上帝ê律法誡命，koh khah嚴重ê是去拜偶像神明。因為án-ne，chiah有亡國滅族ê危險。為tio̍h無koh重蹈覆轍，以斯拉kah尼希米tùi巴比倫回鄉了後，馬上做ê tāi-chì，就是koh一pái頒佈摩西法令，同時重建耶路撒冷聖殿，這二者同時進行有真深ê意義：beh表明重新tńg去家園ê以色列人民，會遵照摩西律法ê規定，bē koh再犯惹起上帝憤怒ê事。另外，in kā維護聖殿ê神聖，hō͘伊無koh被污穢。M̄-koh tio̍h注意ê是，這全部lóng是tùi耶和華宗教信仰ê觀點，m̄是tùi整體社會問題討論。

以斯拉kah尼希米ê貢獻
以斯拉其實是tùi巴比倫奴隸之地tńg來國內後，對以色列民族貢獻非常大ê一位經學教師；伊m̄-nā親自整理、抄寫聖經，甚至教導人民認bat聖經──上帝ê話。Chit對已經遺失ê經典重新抄寫編撰，有bē-tàng磨滅ê貢獻。Á抄寫經冊、教導人民認bat經冊，乃是以斯拉tī重建工作上siōng大ê職責。Á尼希米siōng偉大ê貢獻，乃是全力推動聖殿ê重建。如果無伊努力排除一切ê困難，重建聖殿ê工作是m̄是ē-tàng成功，lóng iáu是一個問題。Á聖殿重建完成，對tī重新整合分裂已經快四百年ê以色列十二支派來講，實在是功bē-tàng無。雖然北方以色列人民iáu是一再beh恢復撒馬利亞ê敬拜中心，m̄-koh畢竟耶路撒冷聖殿具有非常ê權威kah號召力。

Chit兩本經冊ê主要大綱：
一、以斯拉記
1.第一到第六章：所羅巴伯和回鄉ê以色列人民重建聖殿。
2.第七到第八章：以斯拉ê工作。
3.第九到第十章：以斯拉譴責kah異族通婚，kah頒佈禁止雜婚命令。

二、尼希米記
1.第一到第七章3節：尼希米ê工作：
2.尼希米記第七章4到73節：回鄉者名單。
3.尼希米記第八到第十章：以斯拉ê工作。
7.尼希米記第十一到第十三章：尼希米ê事蹟。