認bat民數記chit本經冊
用siōng簡單ê瞭解，民數記chit-ê名稱，就是根據第一章kah第廿六章ê戶口普查而來ê。原本它ê希伯來名稱是第一章1節「tī曠野」，因為chit本經冊大部分是記載以色列人民tī摩西kah亞倫ê帶領下，「tī曠野」漂流ê時，期間所發生ê事（參考民數記第一章1節，申命記第一章3節）。後來因為希臘文翻譯本kā它號名為「數目」，表示清點上帝子「民」ê「數」目，tùi án-ne後來ê聖經譯本就採用「民數記」chit-ê名稱到taⁿ。

其實，kui本民數記是以記載以色列人民tī曠野漂流ê時，所tú-tio̍h ê時遇佔ê篇幅khah-chē，包括有以色列人民tī曠野tú-tio̍h ê各種困難；in án怎調適kah改變；以及in kah摩押人、以東人之間bē爽快ê經歷等。

Tī戶口普查方面，第一pái是tī行到西奈曠野ê時chūn（第一到四章），第二pái是tī teh beh進入迦南地chìn前，koh一pái清點人口數（第廿六章）。不過雖然只有這兩pái，m̄-koh這兩pái清點人數所代表ê意義卻非常無仝款，原因是tī第一pái清查人數ê時，lóng是當時跟tòe摩西出埃及ê人，á tī第二pái清查人口ê時，hiah-ê tī第一pái被登記入冊ê男人lóng已經phah m̄見去，這是kah上帝對in ê懲罰有關（參考十四：29），因in bat表示寧可beh tńg去埃及，甚至想beh罷免摩西kah亞倫，另外推舉新ê領導者帶領in，引起上帝極大ê忿怒。這mā說明了一項重要ê事件：準備ài進入迦南應允之地ê男人lóng是第二代出世ê新生代。而且戶口登記是只有年滿「二十歲以上ē-tàng作戰ê男人」，chiah會列入名單中（參考一：3、18、20），chit件事對以色列人來講是相當具有特殊意義ê。

戶口普查ê意義
一，會án-ne進行戶口普查ê原因，是因為以色列人民一再地tī曠野之地埋怨上帝，包括tú-tio̍h追兵、iau餓、口渴、無肉食等等，尤其是當hiah-ê去窺探迦南地tńg來報告狀況ê人，tī民眾中四界散佈講：「阮所經過探看ê 地，是吞食hiah-ê tòa tī hia ê 人民ê 地，阮tī hia 所看tio̍h ê 人民lóng 真大漢。阮tī hia 看tio̍h 亞納族人，就是大漢人，in 是大漢人ê kiáⁿ孫。照阮看家己ná 親像草蜢，照in 看阮mā 是án-ne。(全民版)」（十三：32—33）因為chiah-ê tńg來ê探子講chit種話á引起民心大亂，chit種謠言等於是對上帝帶領in出埃及ê恩典hō͘ in否定了。In m̄-nā埋怨，甚至iáu威脅摩西kah亞倫講：「咱tio̍h 設立一個首領，tńg 去埃及！」(全民版)」（十四：4）。為tio̍h chit-ê tāi-chì，上帝大大受氣，決定禁止年滿二十歲以上ê人進入迦南應允之地（參考十四：29）。Tī十二個探á中，只有兩位參加窺探tńg來ê人thang進入，就是迦勒kah約書亞，因為in兩人lóng主張tio̍h進入迦南地（參考十四：30）。因此，thang án-ne講，進行戶口普查就是為tio̍h beh進入迦南地作準備，知影thang作戰ê人力。

二，這mā teh表示一個非常重要ê信息：tio̍h進入上帝所應允之地，一定tio̍h是有新性命ê人。如果iáu帶tio̍h過去敗壞之心思意念ê人，是無法度tī新ê土地上kah上帝建立和好ê關係。這mā就ná同使徒保羅一再強調ê，人tī信耶穌了後，一定tio̍h活出新性命ê樣式，像新造ê人仝款，ài kā「舊我」除掉，換上「新我」（參考以弗所冊四：17—24）。只有chit種人，chiah ē-tàng teh進入迦南地了後，堅守kah上帝之間ê關係。

因為迦南地ê民間宗教猖獗，因此，如果無真堅定ê信仰，真容易tī he物產豐富ê土地上，跟tòe當地人民ê宗教信仰拜偶像，背離了上帝。因此，以新ê性命進入新ê應允之地，過新ê生活，這就是第二pái戶口普查所beh表明ê信仰意義。

三，戶口普查特別強調：登記ê對象hit年滿「二十歲以上ē-tàng作戰ê男人，依照宗族、家族ê秩序，一一被登記落來」（參考民數記一：20），這真清楚teh說明，以色列人民tùi出埃及入曠野後，無久就開始組織化，而且相當有秩序地ná親像軍旅一般teh行動。這mā說明in後來進入迦南地，並m̄是一盤散沙、烏合之眾ê lán-si散百萬人民，卻是一支有組織、有紀律ê大軍。因此，曠野漂流期間，其實mā是hō͘ in有夠額時間作chit方面ê準備，chit對in以後建立大國、大族，lóng是一個相當重要ê開始。

主要內容kah結構
因為原來ê冊名叫「tī曠野」，mā就是講chit本經冊原本是teh記述以色列人tī曠野中ê經歷。因此，咱thang tùi in「tī曠野」中分做三個段落來看：

一、 第一章1節到第十章10節。
Chit段經文是記載以色列人民tī西奈曠野，準備啟程向迦南地ê經過。除了有第一pái ê戶口普查（包含利未人在內），iáu有說明各支族分配ê位置、利未人ê職責、訂定離俗人ê條例，以及各種獻祭禮儀。

二、 第十章11節到廿一章29節。
Chit段經文記載以色列人民啟程向迦南地邁進ê經過，其間發生過以色列人民對摩西提出ê嚴重抗議kah抱怨，以及差派探子去窺探迦南地tńg來後，報告足以撼動以色列人民信心ê消息，引起大家驚惶，á想tńg來埃及去做奴隸，認為tī埃及比in進入迦南地了後，死tī hit所在koh-khah好，tùi án-ne企圖推選新ê領導人chhōa in tńg去埃及。上帝因此大為受氣，決定嚴厲懲罰，hō͘ hiah-ê年滿二十歲以上ê人，lóng無法度進入迦南地。Koh講，chit段經文mā記載發生部分利未人準備叛亂ê事，並且mā訂定祭司kah利未人ê職責，以及摩西kah亞倫被上帝kā伊譴責們失寫phoe去心ê事件。

三、 第廿二章1節到卅六章13節。
Chit段經文記載以色列人前入來到約旦河東岸，靠近迦南應允ê土地。Chit期間發生了幾pái戰爭，包括kah以東人、亞摩利人、巴珊人、米甸人等相刣。Mā發生先知巴蘭被摩押王聘請去詛咒以色列人民無成功ê事件。Tī chit段經文中mā進行了第二pái人口普查，並且確定約書亞將繼承摩西帶領以色列人民進入迦南地，koh一pái提醒以色列人民一定tio̍h遵守ê重要節期，同時記落來了呂便kah迦得這兩支族想停留tī約旦河東岸，無想beh進入迦南ê事件，同時記落來了有關女子繼承產業ê問題，以及設立庇護城ê規律。

雖然整體來看，民數記tī編輯結構上顯得有點á亂，ē-sái講是主題卻真明顯，主要原因就是結構tī兩pái戶口普查ê事頂面；tùi第一pái普查人口，說明以色列人民teh beh開始組織化，到第二pái戶口普查，說明頂下二代ê傳承已經順利完成，包括領導者tùi摩西到約書亞之間ê交接，hō͘ kui個原本是烏合之眾ê以色列人民，知影生活ê紀律，kah嚴格ê信仰規律。

怎樣ê角度看chit本經冊
Kah利未記仝款，民數記mā是一本真重要ê經冊，它kā咱講上帝如何在曠野中訓練以色列人民成做一支堅強ê「耶和華信仰」大軍，mā hō͘咱看tio̍h上帝豐富ê慈愛，kah要求嚴格ê信仰紀律。Chit對tī今á日ê基督教會應該是一個真好ê信仰教材。特別是當做上帝ê僕人（親像摩西kah約書亞），應該用怎樣ê態度來帶領上帝ê子民，民數記提供了非常好ê借鏡。

身為基督徒應該有chit種信仰觀念：beh承受上帝ê應允，就一定tio̍h對上帝有絕對ê信心，若無，抱怨jú chē，kan-taⁿ會hō͘家己離開上帝jú遠，最後致使家己背離上帝ê旨意，hō͘家己墮落了。

Koh講，隨便、馬虎ê信仰心態無法度承受上帝ê國，chit種人永遠無法度明白上帝ê國ê意義。曠野，是一個生活相當艱困ê所在，mā是tī chit種所在，上帝訓練以色列人民，hō͘ in成做一支堅強ê軍伍chiah ē-tàng進入迦南應允之地。仝款ê，基督徒應該有chit種認bat，如果上帝國度是咱beh承受ê應允之地，則信仰mā需要接受艱困ê訓練。

（本冊經文採用opensource/copyleft ê《全民台語聖經》，tī chia特別致謝。）