認bat 俄巴底亞書chit本小先知書

作者俄巴底亞
作者俄巴底亞，chit-ê名ê意思是「耶和華ê奴僕」，á是「服事耶和華ê人」。Chit-ê名tī舊約聖經中時常出現，親像：列王記上第十八章3到16節；歷代志上第三章21節、第七章3節、第八章38節、第九章16節、第十二章9節；歷代志下第十七章7節、第三十四章12節；以斯giú記第八章10節；尼希米記第十章5節、第十二章25節等等。雖然lóng是同名（中文有時譯成「俄巴底」、「俄巴底雅」á是「俄巴底亞」，其實lóng是仝一個字），m̄-koh卻kah chit位名叫俄巴底亞ê先知無關係，ē-sái講是mā無法度tùi聖經其他地方chhōe-tio̍h有關於chit位先知ê生平事蹟，連伊ê老父是甚麼人mā無資料。

寫作ê年代看法無仝
Chit本經冊是舊約聖經中篇幅siōng短ê一本，只有短短ê 21節而已。Koh khah特別ê，它是用詩歌ê形式寫做。如果tùi第11到14節內容來看，它是tī主前586年南國猶大首都耶路撒冷被毀滅ê時chūn寫做ê。若是án-ne ê看法成立，án-ne，先知俄巴底亞可能kah耶利米是仝一個時代ê先知，特別是tùi耶利米書第四十九章7到22節論到有關以東ê罪行ê時，kah先知俄巴底亞ê論調非常接近。因為án-ne，mā有人認為in兩人之間有某種程度ê關連，若無就是in同時引用了當時普遍流傳ê口述資料。

M̄-koh mā有聖經學者持無仝ê看法，認為先知俄巴底亞所處ê年代應該koh khah早，mā就是主前第九世紀時代ê先知。持chit種觀點ê講法，是用列王記下第八章ê 20到22節ê資料為底討論，當時猶大王約蘭ê時代，mā就是主前853到841年，非利士人kah阿giú伯人聯合侵犯耶路撒冷，hit時以東「背叛了猶大，成做獨立ê國家」。如果是tī chiah-ê時代，則先知俄巴底亞就kah先知以利沙屬仝一個ê時期。

另有第三種看法，就是tùi俄巴底亞書第19到21節經文內容來看，he是回鄉了後，表明以色列人民對以東人ê仇恨並無消除。若án-ne，則chit本冊ê完成應該是晚tī主前第六世紀。

Tùi以上不同時期ê觀點論調，thang看出chit本經冊跨越ê時代非常長，tùi主前第八世紀到主前第五世紀，而這mā就是本冊ê三個段落時代：

一是第1到9節，chit段經文是預言以東會受tio̍h上帝ê懲罰。

二是第10到14節，詳述以東人所犯ê罪行。

三是第15到21節，是上帝應允ê拯救必定會來臨，並且祂behkoh一pái成做以 色列民族ê「王」。

本冊ê中心信息
Kui本經冊ê中心題旨就是tī論到以東ê罪行。表面上看起來，chit本經冊kah-ná有真狹ê民族情節，m̄-koh實際上m̄是án-ne，卻是kui本聖經有ê一個共同主題：兄弟之間一定tio̍h互相幫助、相疼，絕對m̄-thang有幸災樂禍ê心態，kah趁火搶劫ê行為出現。詩篇ê詩人bat án-ne歌頌兄弟之間bē-tàng分ê疼，講：

「你看，兄弟和好做伙tòa，是何等ê 好，何等ê 安樂！這thang 比並hit-ê 貴氣ê 油倒tī 頭殼頂，流到嘴鬚，就是亞倫ê 嘴鬚，koh 流到伊ê 衫á 裾。這mā thang 比並黑門ê 露水落tī 錫安山；因為tī hia 上主有定tio̍h 賜福，就是永遠ê 活命。(全民版)」（詩篇第一三三篇）

以東人kah以色列人民ê祖先就是用掃kah雅各chit對雙生á兄弟，卻因為後來各自有無仝ê發展，致使兄弟之間ê kiáⁿ孫形同仇敵仝款，這是非常hō͘人遺憾ê事。特別是當兄弟有難ê時，m̄-nā無伸手幫助，iáu趁火搶劫，這是上帝無法度忍受ê惡行。Chit種信息tī tùi巴比倫回鄉了後，對tī會安定tī殘破不堪ê家園重建倫理道德生活ê以色列殘存人民來講，是非常重要ê功課。因為án-ne，mā成做先知kah經學教師教導人民頂真遵守ê法則。