認bat 腓利門書chit本書信

腓利門書chit本經冊ē-sái講是新約聖經中siōng短ê一封書信，m̄-koh卻是siōng值得咱一讀koh再讀ê書信。

Tī使徒保羅ê書信中，有四本是屬tī「監獄書信」，就是以弗所書、腓立比書、歌羅西書，kah腓利門書。Á腓利門書是使徒保羅書信中寫hō͘個人ê一本，其它三本書信有兩本是hō͘提摩太ê，另外一本是hō͘提多ê。比較特別ê所在是：提摩太、提多lóng是使徒保羅siōng器重ê同工，而腓利門雖mā是使徒保羅看做重要ê同工，m̄-koh寫phoe hō͘伊，並m̄是勸勉伊關於教會ê事務，á是信仰要義，卻是為tio̍h in-tau裡脫逃ê奴隸阿尼西謀講情，因為逃離主別人ê阿尼西謀聽了使徒保羅所傳ê福音了後成做信徒（參考10節），而且tī福音ê事工上mā成做使徒保羅ê好伙伴（參考11、13節）。因為án-ne，使徒保羅為tio̍h án-ne特別向腓利門求情，希望伊ē-tàng看tī耶穌基督ê恩典上，特別赦免阿尼西謀，不beh懲罰伊，並且接納阿尼西謀成做福音ê同工。因為若是按照當時羅馬ê律法，逃脫ê奴隸被掠tio̍h ê時是ē-tàng判處死刑ê。

關於腓利門chit-ê人
伊ê厝裡有畜養奴隸，家境應該是bē-bái ê。這看tio̍h一件事實：羅馬帝國ê時代，畜養奴隸tī當時ê人看起來，包括基督徒在內，是認為正當而且普遍ê現象。奴隸ê主要來源有兩種：一是戰爭失敗受掠，二是厝裡sàn-chhiah被賣到奴隸市場。因為án-ne，奴隸是屬tī主人ê財產。因為án-ne，當時若有奴隸逃走ê時，主人是ē-tàng發出通緝，而掠tio̍h ê時iáu會聖當嚴重ê懲罰，á是被轉賣為koh khah低賤ê奴工，嚴重ê甚至ē-tàng判處死刑。

腓利門，伊是歌羅西教會ê信徒，因為án-ne，chit封書信真可能是Tī使徒保羅tī監獄中寫歌羅西書ê時（參考第9節、第10節、第13節），同時為阿尼西謀寫ê一封書信。腓利門雖然被使徒保羅kā它稱做「親愛ê同工」，並無表示伊像提摩太、提多、西拉、馬可、巴拿巴等人án-ne有密切合作四界傳福音ê同工，m̄-koh，表示腓利門tī福音ê事工上熱心參與（參考第5節）。

寫chit封書信ê主要目的
依照第18節ê記載，腓利門厝內ê chit位逃走奴隸阿尼西謀，可能是因為做無應該做ê事而逃走，這tī當時是真嚴重ê。Ē-sái講是，就tī伊逃亡期間tú-tio̍h了使徒保羅，而且tùi使徒保羅hia得tio̍h福音改變了伊ê性命態度，並且成做對福音事工有熱心kah使命感ê基督徒。為tio̍h chit件事，使徒保羅寫chit張phoe，是希望腓利門接納阿尼西謀，原諒伊逃走kah所犯ê過錯，並且tī阿尼西謀tńg去ê時，m̄-thang kā伊處罰。伊希望腓利門看tī同享耶穌基督福音恩典ê關係上，赦免阿尼西謀ê罪刑。

類似chit種改變主人kah僕人之間ê關係之情況tī當時並m̄是特例，必定iáu有真chē類似ê情況發生，因為當時蓄奴真普遍，當主人kah僕人同時lóng信耶穌基督了後，彼此ê關係真容易因為信仰改變；因為大家tī上帝面前lóng是平等，性命lóng仝款貴重，lóng是上帝所喜愛ê kiáⁿ兒。若是án-ne，如果有奴隸像阿尼西謀án-ne逃走了，而主人mā仝款是信耶穌基督ê，若beh告進官府，án-ne是m̄是信仰上所許可？使徒保羅就bat告誡過哥林多教會ê信徒，bē-tàng kā人kah人之間ê問題告進官府ê行為，伊強調這是非常見笑ê事，mā是一件侮辱基督ê名ê舉止（參考哥林多前書六：1—8）。Án-ne看起來，若是腓利門beh kā逃脫ê奴隸阿尼西謀帶去官府判刑，便是真值得基督徒主人深思ê問題。

Mā因為án-ne，chit封書信ê珍貴就是引發了基督徒探討信仰kah實際社會生活經驗ê問題。尤其是tī今á日美國社會繼續發生烏白種族衝突，在世界各地mā繼續發生種族之間ê衝突，甚至仝款lóng是基督耶穌ê信徒，ài怎樣tùi信仰看chit種事？過去有一段真長ê時間，tī南非發生嚴重ê烏白種族對立、衝突，世界各地ê教會lóng真認真地tùi chit封書信來反省、探討，mā因為án-ne，chit本書信雖短，m̄-koh卻是一封真值得基督徒koh再三研讀ê信仰教材。

Thang分做下列幾個段落
一、第1到3節：前言。
二、第4到7節：o-ló腓利門。
三、第8到21節：替阿尼西謀懇求腓利門赦免。
四、第22到23節：最後請安。