認bat詩篇chit本詩歌經冊

如果講聖經是一本文學作品，我想其中佔真重要ê份量，就是因為詩篇ê緣故。

詩篇總共有一五○篇，會精選chiah-ni̍h chē詩歌Tī聖經中，就thang看出以色列人m̄-nā是一個宗教性真強ê民族，koh-khah是一陣真會唱詩ê民族；in m̄-nā tī平日生活中唱詩，koh khah tī宗教祭典中吟唱詩歌，而特別ê是真chē先知lóng是詩人，親像先知以賽亞、耶利米、以西結、約珥、阿摩司、俄巴底亞、那鴻、哈巴谷等。咱thang用chit句話來形容以色列人民：in是一個真會唱詩ê民族。

其實，「詩篇」chit-ê字眼，本來就是teh指「歌曲」ê意思，就kah-ná有真chē研究台語ê學者講，台語就是一種真高尚之詩歌ê語言，共計有八個無仝ê音階（目前chhun落來七個），講出來ná親像teh唱歌仝款。如果由語言學家來看每一個民族ê語言，咱就會發現每一個民族ê語言其實lóng是一種詩歌，有其特殊ê語音、旋律kah音調。

對以色列人民來講，性命是上帝ê賞賜，因為án-ne，唱詩歌並無只是屬tī個人ê喜好問題而已，卻是kui個民族對上帝ê大愛ê一種回應，in認為每一個人ê性命lóng是kah上帝有密切關係，而kui個民族之所以ē-tàng生存落來，就是因為上帝伸出大能ê手拯救in。因為án-ne，tī詩篇中，有bē少詩歌被稱做「史詩」，意思是用歷史寫詩歌，親像：詩篇第七十八篇、第一○五篇，就是典型ê「史詩」。

Koh講，tùi詩篇裡mā thang看tio̍h詩人siōng歡喜陳述上帝ê公義kah審判。Mā因為án-ne，tī詩篇裡，讀起來會感覺是詩人kah-ná teh描述家己所遭遇tio̍h慘痛ê境遇，m̄-koh tī chiah-ê陳述中，thang真清楚看tio̍h詩人所陳述ê對象，就是上帝。詩人teh向上帝表白，祈求上帝顯現公義ê審判。Chit種表白其實就是詩人家己ê信仰告白。

詩篇ê內容
收錄tī聖經內面ê詩篇總共有一五○篇，咱thang kā它分做五大詩集：
第一集：第一到四十一篇。
第二集：第四十二到七十二篇。
第三集：第七十三到八十九篇。
第四集：第九十到一○六篇。
第五集：第一○七到一五○篇。

Tī chit五集ê每一部分結尾，作者lóng是用：「願上主—以色列ê上帝得tio̍h稱頌！阿們！阿們！」chit種句話，á是類似ê句型作結束。Ná親像第一五○篇，mā就是第五段結束ê時，雖然並無chit種句型出現，m̄-koh卻是寫：「一切有性命ê被造物lóng tio̍h頌讚上主。Tio̍h o-ló上主！」這是歌頌ê句話，而且該篇全部lóng是teh o-ló歌頌上帝ê大愛。

Tī chit一五○篇ê詩歌裡，siōng主要ê內容是o-ló ê詩歌，chiah-ê通常是teh歌頌上帝ê拯救、創造。Chit類ê詩用tī祭典、禮拜，會伴tio̍h樂器。親像第八篇、第十九篇，是o-ló上帝創造ê詩歌。第三十三篇則teh歌頌上帝ê偉大。第三十四篇是teh頌讚上帝拯救ê大愛。

除了o-ló詩歌，mā有懇求上帝幫助ê內容；chiah-ê詩ê內容包含了個人ê，mā包括國家、民族tú-tio̍h災難ê時，對上帝發出求助ê詩歌。屬tī個人方面ê，有破病ê時唱ê，有面臨對敵者侵犯ê時祈求上帝ê援助，á是感覺性命ê危機、無力，心靈上有苦楚ê時所唱ê等等。Á chit方面尤其是以國家á是一個民族做一個個體ê時，siōng常被用到。親像第三十八篇、第四十一篇、第六十篇、第八十六篇、第八十九篇等。Chit種詩歌mā包含了人犯罪了後，祈求上帝ê憐憫、赦免，親像第五十一篇。

另外一類ê詩篇是屬tī歌頌、讚揚上帝、感謝上帝ê詩篇。這是因為個人á是團體，特別是國家、民族得tio̍h上帝ê恩典，有力量贏過災難後，表達出來ê歡喜、感恩ê詩歌。作者相信上帝是公義ê，mā是伸冤ê上帝，是會垂聽苦難者祈求ê上帝。親像第三十二篇、第四十六篇、第六十五篇、第六十七篇等等。

詩篇iáu有一個特色，就是tī仝一個首詩篇中，卻有兩種無仝ê主題，mā就是kā兩種完全無相仝ê內容併做伙，親像第四十篇，前段是歌頌o-ló上帝ê恩典，後段卻是teh向上帝祈求救助。

當然頂面所講只是簡單ê分類而已，若beh分得詳細，iáu thang分做屬tī個人ê，á是國家ê，á是屬tī聖殿裡用ê，mā有屬tī一般生活用ê，當然mā thang分做祭典用ê，á是一般禮儀ê時所唱ê。

詩篇ê作者kah寫作ê日期
Toh一首詩歌是什麼人ê作品？有bē少詩篇ê作品lóng被註明講是大衛寫ê。其實，chit種觀點並m̄是完全錯，只是若詳細分析，真chē篇詩歌雖然有加註講是「大衛ê詩」，卻無一定是大衛所寫，thang來確定是大衛所寫ê詩篇，只是其中ê一部分而已，親像第廿三篇、第五十一篇。Chit兩篇非常清楚是大衛所寫ê作品。會án-ne認為詩篇大部分ê作品是大衛王寫ê，其原因可能是大衛本身就是一個詩人，伊真愛吟唱、彈奏詩歌，mā會寫詩，是一個正港ê音樂家（參考撒母耳記上十六：17—23、撒母耳記下一：17—27、廿二：1—51、廿三：1—7）。根據歷代志上第十五章15到24節ê記載，teh o-ló禮拜ê時用大型ê詩班、樂器，就是tùi大衛創始ê（參考以斯拉記三：10）。

因為tī希伯來文聖經中，有註明「大衛」寫ê詩篇共計出現七十二篇，mā因為án-ne有人認為tī chit一五○篇ê詩中，有七十二篇是大衛ê作品。比較khah妥當ê看法是：有kóa詩歌其實是仿照大衛ê詩歌型態來寫做，hō͘人讀起來kah-ná就是大衛寫ê詩歌，其實並m̄是，親像第五篇、第廿七篇、第廿八篇、第一三八篇等，chiah-ê詩歌lóng提到à kah聖殿ê關係，m̄-koh事實上它們並m̄是大衛所寫ê，因為大衛ê時代並無建造聖殿，聖殿是tī所羅門ê時chūn chiah建造完成ê（參考列王記上第六章）。

講到詩篇寫作ê日期，因為作者ê bē-tàng考，所以日期mā就真oh確定。Thang瞭解：自大衛時代起（主前第十世紀），到以色列人民被掠到巴比倫做奴隸（主前586年），koh再tùi被俘擄之地ê巴比倫tńg去故鄉為止（主前第六、五世紀）等，chit段長到五百年ê時間，lóng是詩篇作品ê年代範圍。

怎樣讀詩篇
有人會認為詩篇ê內容距離咱台灣社會ê風情、民俗真遠，唸起來kah-ná感受bē-tio̍h hit種敬虔，á是thang接觸tio̍h宗教心靈。這mā莫怪，因為詩篇thang講是真典型ê猶太教kah猶太人生活文化ê作品。它ê內容所呈現出來ê，就是一部以色列民族kah上帝之間ê互動史。Ná親像頭前已經敘述過ê，以色列人民歡喜用in ê歷史來寫詩（史詩），所以讀起來mā會感覺kah-ná teh讀以色列歷史仝款。Á in ê歷史距離咱ê生活經驗，確實有真大ê一段cheng差，這是因為咱kah以色列民族之間ê文化差異所產生ê一種結果。雖然是án-ne，我想應該thang tùi下列幾個觀點來看詩篇，á是許可以幫助咱tùi詩篇中學習tio̍h寶貴ê信息：

一、學習án怎o-ló上帝
以色列人民tī信仰上siōng可愛ê所在，就是in o-ló上帝ê偉大，是tùi上帝所創造ê世界來開始ê。詩篇中有chē首詩歌就是teh歌頌上帝創造ê奇妙。親像詩篇第十九篇1到6節、第六十五篇6到13節等，詩人不時會kā天頂所看見ê星辰、空中ê飛鳥、地上ê花草、昆蟲、野獸，以及海洋等上帝創造ê萬物當做詩歌ê材料。Ná親像有人常去高山、自然公園旅遊，就常會因為自然景觀ê美而發出感嘆ê詞句仝款。因為án-ne，tùi chia thang án-ne了解：會o-ló上帝創造宇宙之美ê人，chiah會知影人類ê渺小kah有限，以及認bat家己ê卑微。只有驕傲ê人才會想beh用人工ê造景，來代替上帝創造ê自然景觀。因為án-ne，讀熟了詩篇，就知影o-ló上帝創造ê美，kah會曉謙卑落來。

二、學習án怎祈禱
詩篇中siōng chē ê題材，恐驚就是懺悔祈禱ê詩歌，親像第五十一篇是大衛王ê懺悔詩，thang講是一篇認罪文，是一首真好ê詩。Chit種懺悔詩，m̄-nā是含有chiok厚ê以色列文化內涵，koh-khah是一篇非常上乘ê信仰告白之祈禱文。是人對上帝完全ê表白，是kā家己心內ê心境，完全赤裸裸地呈現在上帝面前，以祈求上帝ê赦免。

除了個人ê祈禱詩歌外，詩人mā為國家、社會所tú-tio̍h ê困境祈禱，親像第八十五篇，就是一首為國家社會祈求康寧ê祈禱文。

三、學習án怎向上帝盡量講出咱心中ê意念
詩篇裡有真chē首詩lóng是teh表明作者心中ê憤怒，á是憂鬱、苦悶，而chiah-ê苦悶、憂鬱是外人所無法度理解、mā無法度幫忙解惑ê。Tī咱ê生活中，常常會tú-tio̍h真chē挫折，mā會經驗到真chē無法度說明清楚ê遭遇，心中因為án-ne感覺真窩囊，á是真鬱卒。詩篇卻hō͘咱真好ê材料，hō͘咱知影án怎用詩ê方式，來對上帝表明心思意念。親像第三十九篇就是真好ê一篇；當人對性命感覺無力感ê時chūn，只有tńg來chhōe上帝，chiah會看見性命ê正確途徑。因為上帝chiah是咱性命中siōng好ê幫助者。Hō͘上帝做咱ê「法官」，無為家己做不必要ê衝動反應，chiah bē因為一時失控，造成oh得彌補ê損失á是傷害。

有一點是讀詩篇tio̍h注意ê，就是tī詩篇中不時會出現詩人用「仇敵」chit-ê詞。這「仇敵」並m̄是全然指hiah-ê手上握有武力、兵器，beh欺負、威脅咱性命ê對象，而koh-khah是指一工到晚想beh誘惑咱棄sak上帝旨意ê人、事、物等。Án-ne，chiah bē陷入一種錯誤ê認知：認為詩人lóng teh詛咒kah伊為敵ê一方。真正敵人，lóng是tī咱心中發出聲音，ài咱m̄-thang相信上帝、棄sak上帝，甚至ài咱扮演上帝角色。這就是耶穌所講ê：：「事實上，人ê 對敵就是家己厝內ê人。(全民版)」（馬太福音十：36）這仇敵就隱藏tī咱ê心內世界中。這mā是使徒保羅所感觸到ê，家己應該做ê事，m̄-nā無去做，卻常常去做無應該做ê事（參考羅馬書七：21—24）。因為án-ne，koh khah具體講，chit種誘惑人棄sak上帝法則ê力量，就是罪。

詩篇，是信仰性命siōng好ê教材，好好á ê讀它，而且是讀熟了它，然後想看看，如果是咱tú-tio̍h ê處境，ài怎樣講、唱，án-ne就會有bat幫助。