認bat 啟示錄chit本書信

關於啟示錄chit本經冊
聖經中有兩本經卷是非常特別ê，其一是舊約ê「雅歌」，另外一就是新約ê「啟示錄」。會講chit兩本經卷非常特別ê原因，是chit兩本經卷無一定ê詮釋準則thang循，chit點kah其它經冊大無相仝，尤其是「雅歌」，連翻譯lóng會各有所本。Á對講解「啟示錄」，差不多是百言堂一般，每人講ê lóng無仝款，m̄-nā hō͘讀者感覺百味雜陳，mā會有百家齊鳴ê感覺。會有chit種現象ê主要原因，是kah chit本書信中chiap-chiap出現ê「異象」有關。Ti7chit本書信中ê「異象」ē-sái講是聖經中siōng特別ê，每一個解釋者lóng各有家己ê主張，聽起來、讀起來lóng hō͘人感覺「kah-ná」真有道理，m̄-koh整理起來卻是百家各異。

一講tio̍h啟示錄，大家siōng先想tio̍h ê就是hiah-ê超過想像ê異象，到底beh說明ê是甚麼？有ê人真歡喜讀啟示錄，因為thang tùi hiah-ê奇異ê異象看出真chē未來ê「景象」。M̄-koh mā有真chē人無論án怎讀，lóng無法度認清到底hiah-ê異象beh說明甚麼。啟示錄裡mā有真chē數字，chiah-ê數字teh解釋上koh有真chē無仝ê計算方式，到底是確切ê數字neh，á是象徵？有ê人甚至認為chiah-ê數字mā kah上帝ê拯救有密切關係。

真chē人對啟示錄有一個共同ê感受：深奧、難bat。Ē-sái講是，非常有趣味ê是有bē少基督徒卻非常歡喜讀chit本經冊，而且講解起來「kah-ná」頭頭是道。原因可能kah啟示錄裡ê真chē「異象」，thang hō͘人對性命充滿真chē新ê意境。M̄-koh如果小khóa注意一下，就會知影chit本書信tī宗教改革時代，差一點á就被列入「刪除」ê經冊之冊單中，原因是馬丁路德對chit本經冊ê評語是：「只有異象，並無提起耶穌基督ê教示，mā無帶領人認bat耶穌基督。」而chit兩點tú好是宗教改革時代，teh決定聖經正典範圍ê時siōng基本ê要求。M̄-koh長老教會創會者約翰‧加爾文（John Calvin）則認為基督徒應該好好á讀chit本啟示錄。

關於chit本書信ê名稱
用siōng簡單ê一句話來解釋「啟示錄」ê意思，就是「phah開面紗，看kah koh khah清楚」ê意思。換句話講，過去是一個隱藏狀況，現在已經無需要koh再繼續隱藏，卻是ē-tàng phah開hō͘大家看kah koh khah清楚。

M̄-koh問題是「面紗」內面是甚麼？chit點chiah是真正問題所在。大家對phah開面紗了後，所看tio̍h ê、聽tio̍h ê，lóng會有無仝ê解釋，因為tī面紗ê內面，所呈現出來ê是上帝teh beh ài beh進行祂奇妙ê作為。Mā可能正因為án-ne，真chē人歡喜試tio̍h去瞭解、明白它。M̄-koh並無容易，因為類似chit種所謂「來自天頂ê啟示」作品，通常bē出現在太平盛世，而會出現在動亂不安，甚至是迫害連連ê時代。

一般來講，類似啟示錄chit種作品lóng會被看做是「惡劣時代ê論著」。因為án-ne，所謂啟示錄，就是beh phah開天頂ê「奧秘」，hō͘ hiah-ê受tio̍h迫害ê人知影，忍耐到底ê人thang享受天頂之福。相對ê，hiah-ê加害別人ê人，最後必定會死得真慘。Án-ne講起來，啟示文學作品對tī受苦時代ê人民必定會有真大鼓舞作用，同時mā會對有權勢者發出警誡ê聲音。真可惜ê是，teh過去受tio̍h逼ê社會時代，透過啟示文學表現出來ê，原本會hō͘當代ê人一讀就明白作者tī字縫內所隱含ê內容kah意義，taⁿ卻因為ê時空ê轉變，成做一種隱藏ê信息，m̄-nā無phah開奧秘，卻是成做另外一種奧秘，除非是生活tī作者時代ê人，而且對社會景況非常有靈敏度ê人才看會出來，後代ê人往往需要花koh-khah chē時間研究、考證，若無，實在是真oh了解作品ê真正意境。

Chit本書信ê作者
Tī第一章1節、4節、9節，以及第廿二章8節等，共有四pái lóng提起chit本經冊ê作者是約翰。Tī主後第二世紀時代ê教父，包括賈斯丁（Justin Martyr主後165年）、愛任紐（Irenaeus主後180年）、特土良（Tertullian主後200年）等人，lóng認為chit位約翰就是耶穌基督ê門徒西庇太ê kiáⁿ兒約翰。持chit種論點，主要在tī kā啟示錄ê作者看做kah約翰福音ê作者仝一個人，lóng是使徒約翰。M̄-koh作者是m̄是真正就是伊？因為約翰福音ê作者mā無一定就是耶穌基督ê門徒約翰。因為án-ne，有人是持無仝ê觀點，認為是另外一位名叫約翰ê長老所寫。持chit種觀點ê是tī第三世紀亞歷山大ê主教丟尼修（Dionysius 主後190~264年）；伊認為啟示錄書寫ê方式，kah約翰福音寫法差異真大，其中有一點是：約翰福音ê作者lóng閉口不談家己ê身分，m̄-koh啟示錄卻一再提起家己就是約翰。Koh-khah hō͘人感覺奇怪ê是，如果是耶穌基督ê門徒約翰所寫，為甚麼啟示錄都無提起任何有關耶穌基督ê生平記事，án-ne是講無通ê。

Ná親像聖經其它經冊、書信仝款，真正作者是甚麼人？除了幾卷大家公認ê作者之外，大多數聖經內面ê經冊、書信ê作者是甚麼人，一直是聖經學界努力beh知影ê課題。

寫作ê年代
Ná親像我tī前面已經講過ê，chit本書信寫作ê背景必定kah當時教會受tio̍h嚴厲ê逼害有密切關係。Án-ne，若tùi chit-ê背景來看，chit本經書寫成ê年代真可能就是tī主後81年到96年ê時代，mā就是羅馬皇帝多米田（Domitian）ê時代，作者被放逐到拔摩島，tī hia寫chit本經冊（參考啟示錄一：9）。

多米田是一個喜怒無常而且猜忌心甚重ê人，tī伊統治之下殖民地ê人民用「暴君」來形容in對chit位皇帝ê感受。Siōng hō͘基督徒kah猶太教徒oh得忍受ê是伊kā家己「神化」，要求人民kā伊當做神明敬拜。這mā是當時ê基督徒tú-tio̍h嚴厲迫害ê原因，一則除了來自羅馬帝國皇帝ê壓迫外，iáu有猶太教徒一再製造謠言陷害in（參考二：9、三：9）。

M̄-koh認為是tī多米田時代寫做ê chit種看法，mā有一kóa聖經學者提出無仝ê觀點，認為應該是比chit-ê時間koh khah早，he就是tī羅馬皇帝尼祿ê時代，因為尼祿皇帝對基督徒ê態度比多米田koh khah惡劣，伊做一件siōng惡劣ê事，就是伊火燒羅馬城卻嫁禍hō͘基督徒。如果啟示錄是tī尼祿ê時代寫做，則尼祿統治羅馬帝國ê時代是tī主後54到68年。不過，一般來講支持tī多米田時代ê人比較多，因為án-ne，真可能寫作ê時間是tī主後90年代。

作者寫此書信ê主要目的
無論是tī多米田皇帝時代，á是tī尼祿皇帝時代，作者lóng有一個共同ê目的，就是希望喚醒tú-tio̍h嚴厲迫害ê信徒，特別對hiah-ê面臨tio̍h苦難kah死亡威脅ê眾信徒，一定會tī信仰上khiā立得穩，tio̍h用堅定ê信心抵擋羅馬皇帝神明崇拜ê要求，因為未來並無屬tī chiah-ê有權勢ê人，mā m̄是屬tī某一個個人á是某一個群人，卻是屬tī死tī十字架上ê耶穌基督；伊chiah是性命ê主。耶穌基督雖然已經升天，m̄-koh伊會koh再臨，而且真緊to̍h會koh再臨。當伊koh再臨時就是beh來審判世界上所有ê君王，毀滅世上所有ê王國，建立一個屬tī上帝ê國度。作者一再kā信徒講，終末ê審判就teh要來臨（參考廿二：6—7、12、20），為tio̍h án-ne迫害者會加快腳步，m̄-koh上帝絕對bē許可chiah-ê迫害者逍遙過久（參考第十七到十八章），上帝替祂子民伸冤ê時刻馬上就會來到，凡是堅持到最後ê信徒，必定會得tio̍h上帝豐富ê恩典kah siōng koân ê榮耀（參考十四：1—5、二十：4—6）。

Chit本書信ê特色
Chit本書信一再出現ê數字「七」Tī聖經中teh代表「神聖、祝福、圓滿」ê意思。Tī chit本書信中，作者提起「七個教會」（參考一：4、11）、「七個靈」（參考一：4、五：6）、「七個金燈臺」（參考一：12）、「七顆星」（參考一：16）、「七個印」（參考五：1）、「七個角」kah「七個目睭」（參考五：6）、「七個天使」（參考八：2）、「七支號筒」（參考八：2）、「七個雷」（參考十：4）、「七個頭」（參考十二：3）、「七種災難」（參考十五：6、8）、「七個王」（參考十七：9）、「七座山」（參考十七：9）、「七頭十角ê獸」（參考十七：7）。總講一句，tùi以上經文Tī聖經中，「七」chit-ê數字，通常lóng是採用其象徵性ê意義。

另外一個數目就是「十二」，親像第十二章1節提起「十二顆星ê冠冕」；第廿一章12節講「城牆有十二個門，由十二個天使kā守tio̍h，門上寫tio̍h以色列十二支族ê名字」；第廿一章14節soah講「城牆建立tī十二塊基石上，基石上寫tio̍h羔羊ê十二個使徒ê名字」；tī第廿一章20到21節lóng提起「十二」，而且tī第廿二章2節講性命樹「每年結果子十二次」等。依照前述chiah-ê經文看起來，真容易明白聖經中ê「十二」必定kah以色列民族ê十二支派有密切關係。

比較特別ê所在是tī第八章7到12節chit段經文中，一再引用ê數目是「三分之一」。有ê「教會」則根據第十四章1節、3節等經文所提起ê「十四萬四千人」看做是上帝beh拯救ê人數，而認定tio̍h其教會人數就是上帝所拯救ê唯一對象。親像以前面所講，chit本經冊siōng受議論ê原因之一，就是無一個絕對ê詮釋準則，各憑所好去解釋數字ê含意。

Koh講，啟示文學作者siōng kah意ê筆法，就是採用「二元論調」ê寫作方式。認為宇宙間存在tio̍h兩股對敵ê勢力存在，就是「善」kah「惡」，mā就是上帝kah邪惡ê對立，耶穌基督kah魔鬼之間對立ê關係。M̄-koh無論án怎，到最後必定是上帝（á是耶穌基督）掌權ê時代來臨。

第三，作者對現世ê時代並無存tio̍h甚麼期待，伊總認為期待一個新ê時代來臨，有一個全新ê創造開始，chiah有性命ê ǹg望。因為án-ne，新天新地就成做啟示錄最後ê指標（參考廿一：1）。

第四，啟示文學真歡喜引用「天使」作為寫作ê素材。「天使」m̄-nā帶hō͘人「夢」、「異象」（參考七：1—2），mā同時是「夢」á是「異象」ê解釋者（參考但以理書八：15—17）。透過「天使」，人kah上帝之間有koh khah接近ê關係，因為thang幫助人koh khah明白上帝ê旨意，mā thang看tio̍h耶穌基督ê救恩。

第五，啟示文學ê作者有一個概念，就是萬事lóng有一個循環。如四季ê替換、希望kah失望、生kah死之間等等。上帝是beh透過chit種循環ê定律，hō͘人知影kui個宇宙萬物循環ê中心lóng是tī上帝手中，是上帝teh主導chiah-ê循環，會失去上帝，人會變成無「秩序」ê人，同時mā會失去一切所有。

第六，啟示文學ê作者mā歡喜用動物來象徵時代背景ê人kah事。不直接提起人ê名字。親像第四章7節、第五章5節等。

第七，顏色tī啟示錄中mā佔有真重要ê位置，像白色、紫色、紅色、烏色、綠色等等。每種顏色lóng有它特殊ê意義。

第八，啟示錄mā採用自然界現象ê變化作題材，說明審判來臨時，chiah-ê自然界會發生極大ê變化，親像星辰會tùi天頂墜落落來，日頭kah天空lóng會變色，昆蟲會有特殊能力等等（參考九：1—4）。

以上chiah-ê lóng有作者特殊ê用意在內面，主要目的就是beh hō͘迫害者看m̄-bat，m̄-koh卻hō͘受tio̍h迫害ê信徒一看就明白he是teh講甚麼。

應該tio̍h注意ê事
讀啟示文學ê作品應該tio̍h注意siōng基本ê兩件事，其一是m̄-thang按照字面來解釋。因為按照字面解釋真容易會疏忽了文字背後所beh表明ê含意。親像數字ê問題，這tī希伯來文化中，通常lóng是象徵性ê意義遠大過實質ê數字。其二，m̄-thang kā符號看做是「真實」ê形像，因為án-ne會容易誤解了真實ê內容。親像tī希伯來文化中，蛇，乃是siōng令in感覺頭殼痛ê動物，防不勝防，tī放牧生活中，in不時受tio̍h毒蛇ê攻擊而致命。因為án-ne，in認為蛇乃是所有受造動物中siōng奸巧ê（參考創世記三：1），因為án-ne常用牠來象徵tio̍h會引誘人墮入陷阱ê撒旦、魔鬼，並且kā蛇kah戾龍相提並論，m̄-koh到taⁿ iáu-koh真oh用筆畫出啟示錄中「戾龍」ê長相（參考十二：3、7—9、十三：11），牠kah台灣人不時看tio̍h ê「龍」之圖案並m̄是仝款。Á聖經作者利用chit種希伯來文化思想，主要是用牠表明he是siōng thang惡ê誘惑力量，卻m̄是kā牠來當做真實存在ê生物。

Thang分做下列段落
1. 第一章1到8節：序言。
2. 第一章9到20節：看tio̍h第一個異象。
3. 第二到三章：hō͘七間教會ê書信。
4. 第四章：天頂ê寶座。
5. 第五章：七個封印ê冊卷。
6. 第六章1節到第八章1節：七個印。
7. 第八章2節到第十一章19節：七支號筒。
8. 第十二章：cha-bó͘人kah戾龍。
9. 第十三章：兩隻獸。
10. 第十四章：得救ê人kah天使。
11. 第十五到十六章：七個天使kah七種災難。
12. 第十七章到十九章4節：大淫婦（巴比倫）。
13. 第十九章5到第二十章15節：羔羊ê婚宴、勝利ê歡呼。
14. 第廿一章到第廿二章5節：新天新地。
15. 第廿二章6到17節：耶穌基督快koh再臨。
16. 第廿二章18到21節：結語。