認bat 羅馬書chit本書信
福音書中ê福音書
如果tio̍h用siōng簡單ê一句話來形容羅馬書chit本經冊，án-ne講它是一本「福音書中ê福音書」是無為過ê。因為chit-ê本書信就是teh詮釋福音書中ê精義，hō͘咱讀了了後，對福音書ê內涵ē-tàng koh khah清楚，對耶穌救恩ê認bat koh khah深入。

羅馬書是使徒保羅所寫書信中siōng特別ê一本；chit本書信有mài-koh tī使徒保羅所寫ê其它書信。原因是：其它書信lóng是teh處理教會所發生ê tāi-chì，m̄-koh羅馬書卻m̄是án-ne。

咱知影使徒保羅四界去傳福音、開拓教會，然後，伊將所開拓建立ê教會交hō͘別人牧養了後，就kah幾位同工繼續到新ê據點去傳揚福音。M̄-koh tī伊離開了後，lóng是會有一陣保守派ê猶太人歡喜趁此機會滲透進入教會內面，去傳講另外一套無仝ê信息，致使教會內部ê時常為tio̍h chit種無仝ê認知á起爭執。這thang tùi伊寫hō͘加拉太教會ê書信看會出來。伊án-ne講：
「Hiah-ê 有名望ê 人，無論in 有甚麼地位，對我lóng 無khah-choa̍h，因為上帝無用外貌來判斷人；hiah-ê 有名望ê人，對我並無加添甚麼。In 顛倒了解主有交託我去傳福音hō͘ 無受割禮ê人；tú 親像祂交託彼得，去傳福音 hō͘ 有受割禮ê人。 因為上帝有授權hō͘ 彼得成做受割禮 ê 人 ê 使徒，mā 有授權 hō͘ 我成做外邦人ê 使徒。雅各、彼得kah約翰 chiah-ê hō͘ 人看做教會柱石 ê 人，in 知影上帝有特別ê 使命交帶我，chiah hâm 我kah 巴拿巴握手，表示大家lóng是同工。In koh 同意 hō͘ 阮去外邦人中間工作，in 留tī 猶太人中間工作。(全民版)」（加拉太書一：6—9）看，這是jōa-ni̍h-á受氣ê一段話ah！

久長以來，教會一再出現chit種問題，就是有人拼命ê teh見證福音，卻lóng是有人歡喜tī背後破壞傳福音ê成果。使徒保羅就是一再tú-tio̍h chit種情形，m̄-nā tī加拉太教會án-ne，tī哥林多教會mā是仝款。

Tī使徒保羅ê看法裡，一個人會án-ne得救，是因為信耶穌為救主ê緣故。M̄-koh卻有一陣人非常堅持beh kā「割禮」看kah比信耶穌為救主iáu重要，甚至連使徒彼得、巴拿巴mā驚chit群堅決主張外邦人非接受割禮不可ê人，連彼得看見chiah-ê人來到，就趕緊離開原本kah外邦人同齊食飯ê場合，使徒保羅知影chit件事了後，非常失望，teh寫hō͘加拉太教會ê書信中，伊就用真嚴厲ê詞句，公開譴責彼得等人（參考加拉太書二：11—14）。

本冊ê中心思想
Tùi羅馬書thang清楚了解tio̍h使徒保羅ê中心思想：人是因為信耶穌，chiah kah上帝有合宜ê關係。Mā就是講：一個人得救，不是beh先看chit-ê人是m̄是有受過割禮。卻是chit-ê人tùi心底相信，而且勇敢ê表白（參考羅馬書十：10）。因此，一個人是m̄是有受過割禮已經不重要，重要ê是tī耶穌內面成做一個新造ê人（參考加拉太書六：15；哥林多後書五：17）。Ài beh特別注意ê一點，就是使徒保羅強調：人是「因信á會得thang kah上帝有合宜關係」，是teh指chit種人一定tio̍h tùi心裡確實深信，這信ē-sái人ê性命徹底改變，絕對m̄是口頭講講而已。

1.M̄是因為割禮
猶太人有一個嚴重ê問題，就是kā割禮看做是性命中siōng重要ê記號，因為亞伯拉罕是以割禮作做記號號，kah上帝建立了「永遠ê約」（參考創世記十七：7—14）。因此，tī猶太人ê觀點中，in lóng是認為家己之所以kah其他民族無仝，就是因為割禮。In mā認為無受割禮ê人，就bē得tio̍h上帝憐憫。Ē-sái講是tùi舊約聖經中會發現，早tī雅各ê kiáⁿ兒中，就有人kā割禮當做是欺騙、屠殺別人ê一種「工具」（參考創世記第三十四章）。Chit種行為顯示：割禮已經無koh是kah上帝有性命契約關係ê記號了，若無，in bē有chit種欺騙態度。

約書亞帶領以色列人民過約旦河了後，bat tī吉甲替所有以色列人民行割禮，作為除掉in「tī埃及做奴隸ê恥辱」（參考約書亞記五：2—9）。M̄-koh chiah-ê lóng是表面上ê記號，並無一定thang證明一個人心內有真實ê信仰。先知耶利米就bat指責hiah-ê受過割禮，卻違背上帝話語ê人民講：「上主講：「你看，日子teh beh 到，我beh 刑罰所有受割禮ê kah 無受割禮ê (全民版)」（耶利米書九：25）tùi先知耶利米傳達上帝信息中，thang了解割禮所代表ê是「約」，是kah上帝之間ê性命之約。因此，重要ê m̄是tī chiah-ê表面ê記號，卻是ài如何chiah ē-tàng kā這「約」ê記號實踐tī生活中，並且kā它表明了出來，chit點chiah是siōng重要ê事。

新約時代，行洗禮約翰teh譴責當時ê猶太人就是án-ne講ê：「Tio̍h 用日常生活來證明lín ê 悔改。M̄ -thang 家己想講：『有亞伯拉罕做阮e̍ 祖先』，因為我kā lín 講， 上帝ē-tàng tùi chiah-ê 石頭出 kiáⁿ孫 hō͘ 亞伯拉罕。(全民版)」（路加福音三：8）無錯，割禮thang來證明in是亞伯拉罕ê後代kiáⁿ孫，m̄-koh並無表示in真正有悔改ê心。Kui本聖經所傳達hō͘咱ê信息是：人tio̍h悔改tńg來到上帝面前。Chit點就是耶穌kā xx講hiah-ê法利賽人kah屬tī in一派ê經學教師講ê：「勇壯ê 人無需要醫生，m̄ -koh，破病ê 人就需要。我來m̄是beh 招義人，是beh 招罪人來悔改。(全民版)」（路加福音五：31—32）chia所講ê「悔改」，kah使徒保羅所講ê「成做新造ê人」是仝款ê。Tī伊ê書信中，thang看tio̍h伊一再重複chit種理念（參考哥林多後書四：16、五：17；加拉太書六：15；以弗所書二：15、四：20—24；歌羅西書三：10）。

2.拯救乃是上帝絕對ê恩典
這是羅馬書非常重要ê信息。
久長以來，猶太人犯了一個非常嚴重ê毛病，認為只要ē-tàng完全遵守摩西ê法律規定，就ē-tàng享受上帝拯救ê恩典。M̄-koh使徒保羅卻對chit種信仰觀念提出指正；伊認為如果kā上帝ê救贖恩典看做是thang用人ê行為來換取得tio̍h，ná上帝救贖ê恩典就是廉價ê。Án-ne，耶穌ê死對有罪ê人來講，就無甚麼特別意義thang講。使徒保羅真清楚強調：耶穌救贖ê恩典，是teh表明上帝有「無比ê疼」（參考羅馬書五：8）。既然是「無比ê疼」，就無法度用任何代價換取得tio̍h。這mā thang看出聖經所講ê恩典，就是teh指上帝白白賞賜hō͘人ê（參考羅馬書三：23—24），m̄是用人ê任何方式、兌價ē-tàng換取得tio̍h。

另外一方面，使徒保羅mā強調人性ê軟弱面。伊認為人心裡所想ê，kah實際表現出來ê行為，往往相違背。伊家己就án-ne描述自我心內ê交戰，伊講：
「我無去做我所意愛ê好，顛倒tńg 去做我無意愛ê pháiⁿ。 我若做我無意愛ê pháiⁿ，m̄是我本身teh 做，是tiàm- tī 我內面ê 罪teh 做。Án-ne，我有發現一個法則，就是當我ài 做好ê 時，pháiⁿ 就kā 我纏teh。我內心ê 自我意愛上帝ê 律法， m̄ -koh，我看tio̍h tī我ê 身軀內面有另外一個法則，teh kah 我內心ê 法則交戰，害我屈服tī我身軀內面ê 罪ê 法則。 我做人ná 會hiah 悽慘！啥人ē-tàng 救我脫離hit-ê 註定會死ê 身軀？ 感謝上帝，通過主耶穌基督來救我！Án-ne，我ê 內心是順服上帝ê 律法，m̄ -koh，我ê 肉體是順服罪ê 法則。(全民版)」」（羅馬書七：19—26）

Tùi chit段話thang清楚知影使徒保羅心內ê掙扎、痛苦。Mā顯明一個人性命中siōng大ê苦悶，就是無法度靠tio̍h家己脫離罪ê糾纏。這mā是為甚麼福音書記載hit位教法律ê人，伊會來問耶穌有關得tio̍h永恆性命ê途徑ê原因（參考路加福音十：25—37）。雖然伊是teh教導民眾怎樣成全摩西法律ê要求、規定，以達到「得救」ê目的，m̄-koh實際上，伊mā發現並經驗到，人靠家己ê能力確實無法度得tio̍h永生。Ná親像使徒保羅所講ê：「我 bē 了解我家己ê 所做，因為我ài 做ê，無去做，顛倒tńg 去做我所討厭ê。(全民版)」（羅馬書七：15b）

3.只有tī耶穌內面chiah ē-tàng看tio̍h上帝ê救恩
使徒保羅發現上帝拯救ê恩典就是tī耶穌ê身上，除了耶穌，chhōe bē-tio̍h thang hō͘人得救ê途徑。伊甚至進一步強調，拯救是出自上帝特有ê恩典，這恩典就是tī耶穌內面。只要上帝決定了祂拯救ê計畫，任什麼人lóng無法改變chit種恩典。因此，伊講：
「為tio̍h 祢ê 緣故，阮kui 日面對死亡ê 威脅。阮hō͘ 人看做teh beh hō͘ 人刣 ê羊。Lóng m̄ 是；tī chiah-ê 所有ê tāi chì，咱óa 靠疼咱ê 上帝，已經得tio̍h 完全ê 勝利。因為我確信，無論是死，á 是活；是天使，á 是天頂掌權ê；是現今ê，á 是將來ê，á 是有權能ê；是天頂，á 是地上，á 是任何受造物，lóng bē-tàng。(全民版)」（羅馬書八：36—39）

這mā是使徒保羅hō͘所有信耶穌ê人siōng大ê信仰鼓勵。因為上帝決定hō͘所有相信耶穌ê人lóng成做祂拯救ê對象。Chit種恩典是遠遠超出種族ê、文化ê、地理ê、歷史等等ê藩籬á是界限。換句話講，無任何人為ê因素ē-tàng阻擋上帝拯救ê計畫。Á這拯救ê中心焦點就是tī耶穌ê身上。因此，使徒保羅寫hō͘哥林多教會ê書信中，就bat án-ne描述伊ê宣教使命：
「因為我決定，tī lín 中間除了耶穌基督kah 祂hông 釘十字架ê 信息以外，無beh 提起其他ê tāi-chì。(全民版)」（哥林多前書二：2）

Án-ne thang看tio̍h被釘十字架ê耶穌，是使徒保羅tī宣教工作ê中心。這mā是羅馬書ê中心主題：只有tī耶穌內面，chiah ē-tàng體會出上帝拯救ê恩典。

寫此書信ê目的
使徒保羅認為去羅馬傳福音，是koh活ê主hō͘伊ê使命。使徒行傳ê作者路加bat記載主耶穌hō͘使徒保羅chit種命令：「Tio̍h 勇敢！你bat tī 耶路撒冷為我做見證，mā 一定tio̍h tī 羅馬為我做見證。(全民版)」（使徒行傳廿三：11）Ē-sái講是當時ê羅馬城已經有教會建立了，教會內部mā發生一kóa問題。親像：到底是守「安息日」，á是守「主日」ê問題（參考羅馬書十四：5—6a）；mā tī lim食ê問題引起爭執（參考羅馬書十四：19—23）。因此，有人認為使徒保羅去羅馬ê目的，並m̄是beh tī羅馬建立新ê教會，卻是為tio̍h beh以羅馬做一個轉介khiā（á是支撐點），án-ne伊到西班牙去傳福音ê時，羅馬教會ē-tàng成做伊到西班牙去宣教ê中繼站，成做支持伊開拓西班牙宣教事工ê伙伴。因為使徒保羅以往ê宣教策略是：以一個地區為基點，然後以該基點支持另外一個新ê宣教地區。Án-ne，伊beh到羅馬去，應該m̄是為tio̍h開拓新ê教會á去，卻是為tio̍h beh去西班牙，順續去訪問羅馬教會ê。

伊án-ne講：
「所以，chit 遍我beh 去西班牙ê 時，ǹg 望會順路tùi lín hia 去，先kah lín 有幾日áê交陪了後，chiah hō͘ lín歡送去西班牙。 M̄ -koh，我chit-má tio̍h 去耶路撒冷，供給hia ê 信徒ê 需要。 因為馬其頓kah 亞該亞 ê 教會，歡喜獻一筆錢來幫助耶路撒冷一kóa sàn-chhiah ê信徒。 這是in 歡喜做ê tāi-chì，其實mā 是in所欠ê債。因為既然猶太信徒有kah 外邦人做伙分享in 屬靈ê 福氣，外邦ê信徒mā tio̍h 應該tī 物質上kā in 幫助。等我chit 項tāi-chì 辦好勢，kā chit 筆募款交 hō͘ in 了後，我 chiah 經過 lín hia 去西班牙。我知我去lín hia ê 時，會kā基督豐盛 ê 祝福帶去 hō͘ lín。(全民版)」（羅馬書十五：24—29）。

Chit段話thang清楚知影使徒保羅之所以beh去羅馬，並m̄是beh tī羅馬開拓教會，乃是beh訪問in，伊真正目的地應該是西班牙。Mā為tio̍h beh排除有人對伊去羅馬開拓新教會ê giâu疑，伊bat公開宣稱：「我立志beh 去iáu m̄ -bat 聽tio̍h 基督ê名ê 所在傳福音，chiah bē kah 別人ê 工作重複。(全民版)」（羅馬書十五：20）Án-ne，mā thang看出伊寫chit封hō͘羅馬教會ê書信，應該講除了想beh分享伊ê信仰經驗kah認知外，koh khah重要ê，是beh透過chit封書信，kā家己紹介hō͘羅馬教會ê兄弟眾姊妹，希望in會koh khah認bat伊，並且支持伊去西班牙開拓福音事工。

另外一方面，使徒保羅mā真用心，伊希望基督徒ē-tàng tī信仰上建立一個重要ê觀念：信仰一定tio̍h kah社會生活相配合。羅馬書tī最後一個段落，第十二章到十五章13節，thang看tio̍h使徒保羅真用心地teh勸勉羅馬教會ê眾信徒，tio̍h保持純潔ê生活態度，免得被chit-ê時代所誘惑。伊強調基督徒m̄-nā對家己、厝邊有責任，對社會、政府mā有責任。伊siōng hō͘人歡喜ài講ê，是當伊到各地去傳福音、建立教會後，就呼籲大家同齊關心tī耶路撒冷教會hiah-ê生活tī貧困中ê信徒。伊tī chit-ê本hō͘羅馬教會ê書信中，勸勉基督徒beh建立起hō͘助ê生活態度，因為hō͘助就是見證耶穌基督拯救ê疼。為tio̍h án-ne，伊希望信心堅定ê人，會去體貼hiah-ê軟弱ê人。Tī伊ê看法裡：tī信仰團契裡，大家siōng需要學習ê，就是會時刻考慮tio̍h軟弱ê人ê需要。伊講：「Tio̍h kah歡喜ê 人做伙歡喜，kah 悲傷ê 人做伙悲傷。Tio̍h 同心合意，m̄ -thang 驕傲。Tio̍h kah 卑微ê 人交陪做朋友，m̄ -thang掠家己比別人khah 聰明。(全民版)」（羅馬書十二：15—16）如果基督徒團契ē-tàng建立chit種互動關係，án-ne，kui個社會就會加添和諧ê力量。

寫本冊ê日期kah地點
大部分上講起來，一般聖經學家lóng同意羅馬書是寫tī主後57年到60年之間。如果是án-ne，則羅馬教會應該成立得koh-khah早。

使徒行傳第十五章記載ê「耶路撒冷會議」是tī主後49年召開ê，hit-pái會議討論到有關使徒保羅kah巴拿巴，in tī外邦人地區宣揚福音所引發ê割禮問題。Á tùi羅馬書第九到十一章看起來，是teh討論有關猶太人拒絕接納耶穌為in所期待已久ê基督。Án-ne看起來，耶路撒冷會議是teh探討割禮ê問題，á使徒保羅寫羅馬書ê時chūn，割禮已經m̄是伊寫此書信siōng主要ê問題，若無，使徒保羅應該會提起chiah-tio̍h。

Koh講，使徒保羅tī結束第三pái旅行傳道、beh tńg去耶路撒冷ê時，mā準備ài kā伊tùi馬其頓kah亞該亞ê教會募捐得tio̍h ê救濟款項帶tńg來hō͘「耶路撒冷信徒中窮苦ê人」（參考羅馬書十五：26）。因為伊第三pái旅行傳道中寫成哥林多書信ê時，人iáu未達到哥林多（參考哥林多前書十六：1—4），而且teh寫hō͘哥林多教會ê書信中，iáu討論著有關該項募款救濟ê事宜（參考哥林多後書第八到九章）。因此，tùi chiah-ê資料thang推論使徒保羅寫此本羅馬書，應該是teh寫完哥林多前後書了後，chiah寫ê。Á哥林多前後書是寫tī主後55年，因此，羅馬書應該是tī chit-ê年代了後chiah完成。寫完chit封信ê時，伊託堅革哩教會ê菲比執事帶去hō͘羅馬教會（參考羅馬書十六：1）。

分做下列幾個段落
一、第一章1節到17節：序言—福音就是上帝tī耶穌基督內面拯救ê大能。
二、第一章18節到三章20節：人類ê罪過kah上帝ê拯救。
三、第三章21節到四章25節：上帝奇妙ê救恩。
四、第五章1節到八章39節：人ê軟弱因耶穌基督á得tio̍h上帝恩寵。
五、第九章1節到十一章36節：以色列民族kah上帝ê救恩關係。
六、第十二章1節到十五章13節：耶穌基督ê信徒應有ê生活態度。
七、第十五章14節到33節：結語。
八、第十六章1節到27節：請安請安。

（本冊經文採用opensource/copyleft ê《全民台語聖經》，tī chia特別致謝。）