讀 雅歌chit本經冊

一講tio̍h「雅歌」，真chē人就會想tio̍h這是一本情歌詩集，並奇怪為甚麼chit種詩歌集會編入Tī聖經正典中。它是舊約聖經中siōng受爭議，同時mā是siōng難詮釋ê一本經冊，真oh理解其中信息ê奧秘。因為án-ne，teh詮釋「雅歌」ê時，會發現比較khah無像其它經冊仝款，有明顯ê風格á是脈絡thang循，即使是翻譯，mā出現仝款ê問題。

被編入聖經正典ê原因
Chit本經冊ê冊名就ná同第一章1節所講ê：「所羅門之歌，是詩歌中siōng美ê詩歌。」mā kā它稱做「歌中之歌」，中文kā它稱做「雅歌」。它kah路得記、以斯帖記、傳道書、耶利米哀歌等共五本經冊，lóng同時被列tī舊約聖經三大類別中ê「聖卷」裡。Á chit五本「聖卷」lóng是kah以色列人民ê節期有密切關係。這「雅歌」經冊特別是用tī以色列人民看做siōng重要、為tio̍h beh記念Pôaⁿ過節ê時吟唱ê詩歌，因為án-ne，「雅歌」koh被khǹg tī chit五本「聖卷」中ê第一卷。路得記是teh記念五旬節，歡慶大麥收成ê時開始吟唱；耶利米哀歌則teh記念耶路撒冷城tī主前586年被巴比倫摧毀而吟唱，表示哀悼、痛心、艱苦心；傳道書則tī Tòa棚節，是收割後準備收藏起來過冬而唱ê詩歌；以斯帖記是teh記念以色列人民逃過哈曼計謀大屠殺，得tio̍h拯救了後，發展出來ê普珥節（參考以斯帖記九：19—22）。
大概是主後一百年ê時chūn，有一陣編輯聖經ê猶太giú比們聚集tī亞美尼亞（Jaminia）舉行會議，討論到有關「雅歌」chit本詩集ê時chūn，真chē人lóng主張kā它tùi聖經正典刪除。M̄-koh，有一位真出名ê giú比名叫「阿基巴」（Rabbi Akiba），強調：「『雅歌』詩集是一本teh譬喻tio̍h上帝kah以色列人民之間『愛』ê詩歌。Kā它刪除，無異是m̄是定了上帝對以色列人民永bē改變ê疼，以及以色列人民teh回應上帝對in揀選ê疼。」伊ê講法得tio̍h大多數giú比ê支持，因為án-ne，chit本詩歌被有編入正典中。因為仝款用「夫妻」關係teh描述上帝kah以色列人民之間ê關係，在先知文獻中mā thang chhōe得tio̍h，親像：

以賽亞書第五十章1節：
「上主án-ne講：
Lín認為我趕走lín ê老母，án-ne，我hō͘伊ê休書tī tó位？
Lín認為我kā lín賣hō͘債主mah？Án-ne，究竟是賣hō͘ toh一個？
Lín被賣是因為lín ê罪；lín ê老母被hiat-ka̍k是因為lín ê惡行。」
耶利米書第二章2到3節：

「向耶路撒冷ê居民án-ne講：我會記得，你少年ê時對我jōa-ni̍h-á情深！
蜜月期間，你jōa-ni̍h-á愛我！
你kah我行過荒野，經過無耕作ê所在。
以色列ah，你是我神聖ê子民，是專屬tī我，是初熟ê果子。
甚麼人傷害你，我就降災禍hō͘甚麼人。
我—上主án-ne宣佈了。」

以西結書第十六章7到8節：

「我栽培你，kah-ná teh照顧田裡ê花草。你漸漸長大，發育成做少女，雙乳堅實，頭毛秀長，ē-sái講是猶原赤身露體。我koh經過hia，發現你已成熟，會談情講愛。我用外套遮蓋你ê裸體，kah你山盟海誓。我—至高ê上主kah你結盟，就án-ne你就成做我ê bó͘。」

何西阿書第二章二到五節：

「我ê kiáⁿ兒ah！雖然lín ê老母無koh是我ê bó͘，我無koh是伊ê丈夫，ē-sái講是lín beh向伊哀求，勸伊除掉面上hit副淫相，無koh暴露誘人ê胸脯。若是伊m̄聽，我beh剝光伊ê衫褲，hō͘伊裸露，像tú出母胎ê嬰á。我beh hō͘伊像曠野，像沙漠，hō͘伊嘴乾來死。我不疼伊ê kiáⁿ兒，因為in是淫婦生ê。In ê老母犯姦淫，是無恥ê娼妓。伊喃喃自語：『我beh去投靠我姘夫情郎；因為我ê食物、飲料、羊毛、衣料、橄欖油，和美酒lóng是in hō͘ ê。』」

Tùi以上經文ē-tàng看出，先知文獻中真歡喜用「夫妻」ê關係，來描述上帝kah以色列人民之間「疼」ê關係。Á chiah-ê情節lóng thang tùi「雅歌」ê詩中看會tio̍h。這ná親像使徒保羅teh描述耶穌基督kah教會ê關係ê時，mā是以「夫妻」ê關係來形容仝款（參考以弗所書五：23—32）。以chit種瞭解來讀「雅歌」，我個人感覺就比較khah容易chhōe-tio̍h切入點，明白chiah-ê詩歌所beh詮釋ê意義了。

本書寫作上ê特色
Chit本經冊siōng大ê特色，就是tùi頭到尾都無提起「上帝」chit-ê名字，ná親像以斯帖記仝款。M̄-koh，咱卻thang tùi詩歌中所表達ê內涵，看tio̍h作者用男女彼此互相盡量講出愛情ê內容，感受tio̍h上帝kah祂ê子民之間ná深厚ê感情，明明是到à無法度分離ê狀態。
Tī全部共八章中，收集有六首詩。除了第五首是由男子（俊男[新郎]）開始吟唱，以及第三首ê結尾是由俊男[新郎]所唱之外，其餘五首詩ê開始kah結尾lóng是由cha-bó͘-gín-á（少女[新娘]）所唱。這thang看出cha-bó͘-gín-á是非常主動teh盡量講出tio̍h伊心中ê疼意。甚至有幾pái，伊是行遍大街小巷teh chhōe認為已經失落ê男子（參考雅歌三：1—3、五：6—8）。

Koh講，chiah-ê詩歌m̄-nā描述男女愛情而已，甚至是以描述對方肉體作為詩歌ê主軸，主要是teh表達一個基本ê含意：彼此認bat得非常清楚，而且是tùi頭到尾lóng看kah真清楚。特別是男方對cha-bó͘-gín-á ê描述koh khah是巨細靡遺，包括頭毛、嘴唇、嘴齒、雙乳、小腹、肚臍、目睭、頷頸等等。以chit種觀點來看上帝kah以色列人民之間ê關係，並kā它延伸到上帝kah祂ê子民之間ê關係，就koh khah能幫助咱明白「雅歌」chit本詩歌會án-ne被編入聖經正典ê原因了。

作者kah寫作ê時間
一般來講，確實有bē少人認為「雅歌」是所羅門王寫ê詩歌。在列王紀上第四章32到33節記載講：「伊（指所羅門王）做三千句箴言kah一千零五首詩歌。伊講論樹木花草，tùi黎巴嫩ê香柏樹到牆上長tio̍h ê牛膝草，koh談論各種飛禽、行獸、爬蟲，kah魚類。」而且tī「雅歌」總共六首詩歌中，就有七pái提起「所羅門」（參考雅歌一：1、5、三：7、9、11、八：11—12），即使是án-ne，iáu是有bē少聖經學者持反對意見，時到目前，聖經學界對tī chit本經冊ê作者iáu是無定論。

雖然有人根據第一章1節講「雅歌」是「所羅門之歌」，而認為這是所羅門王寫ê詩歌。如果是伊寫ê，án-ne，「雅歌」是一本非常早期ê詩歌集，至少he是主前第十世紀ê作品。M̄-koh，因為「雅歌」bat提起「耶路撒冷」kah「得撒」chit兩個地名（參考六：4），表示chit本經冊應該是tī「得撒」建城了後，án-ne就無jōa可能是所羅門王ê時代，因為「得撒」城被用來形容kah耶路撒冷城相對照，必定是tī耶羅波安一世了後，mā就是tī所羅門王往生了後，以色列帝國分裂成做北國以色列kah南國猶大。北國以色列tī耶羅波安一世（主前930到909）帶領之下，tī「得撒」建lóng（參考列王記上十四：17、十五：33），直到暗利王朝時代（主前885到874年）。伊登基六年後，列王記上第十六章24節án-ne記載講：「後來，伊用六千塊銀á tùi一個名叫撒馬ê人hia買來撒馬利亞山。暗利tī chit山頂建造一座城，按照這山原主撒馬ê名字hō͘它起名叫撒馬利亞。」

不過，如果認為「雅歌」乃是譬喻上帝kah以色列人民之間ê關係ê時，則chit本經冊應該是khah晚期ê作品，尤其是kā它列tī被掠到巴比倫做奴隸了後（主前586年）ê作品會koh khah適當。

有bē少聖經學者認為，「雅歌」chit本經冊m̄是一個人所寫ê，它可能是一陣作者，á是民間流傳ê部分情歌被收集kā它編入ê。若是以chit種觀點來看，則「雅歌」chit本經冊被編輯成詩集，恐驚tio̍h koh khah晚期，甚至可能晚到大約是tī主前第三世紀ê時chūn了。

本冊ê大綱
一、冊名，一：1。
二、第一首詩，一：2—二：7。
三、第二首詩，二：8—三：5。
四、第三首詩，三：6—五：1。
五、第四首詩，五：2—六：3。
六、第五首詩，六：4—八：4。
七、第六首詩，八：5—14。