認bat 提多書chit本書信

通常咱teh做聖經分類ê時chūn，mā會kā使徒保羅ê書信作一個分類。分類ê方式真chē種，會用年代來分，mā會用性質內容來區分，á是用收phoe ê對象區分。親像寫hō͘教會ê書信，就是：羅馬書、哥林多前書‧後書、加拉太書、以弗所書、腓立比書、歌羅西書、帖撒羅尼迦前書kah後書等，另外寫hō͘個人ê冊，就是：提摩太前書kah後書、提多書、腓利門書等。真有意思ê是án-ne ê分類mā tú好是新約聖經ê目錄順序。

另外有一種分類ê方式，就是kā使徒保羅ê書信用「監獄書信」、「牧會書信」分類。所謂「監獄書信」指ê就是以弗所書、腓立比書、歌羅西書、腓利門書。提摩太後書mā應該是屬tī「監獄書信」之範圍，m̄-koh一般來講，提摩太前書kah提摩太後書chit兩本書信lóng被歸類tī寫hō͘個人ê書信中，mā kah提多書同齊被歸類tī「牧會書信」中。

無論án怎分類法，用使徒保羅ê名字寫hō͘個人ê書信，共計有：提摩太前書、提摩太後書、提多書、腓利門書等這四本。Á這四本書信lóng是針對個人ê需要來寫ê。Ná親像頭前已經敘述過ê，提多書mā是屬tī「牧會書信」一類，án-ne就了解tio̍h chit本書信必定kah牧養教會ê工作有密切關係，mā tùi chia thang想像會到，提多是一位被使徒保羅委託去牧養、關懷教會ê傳道者，mā是使徒保羅真重要ê同工之一，ná親像提摩太仝款，in兩人lóng是使徒保羅tī傳福音ê過程中，非常倚重ê福音伙伴，mā因為án-ne，使徒保羅chiah會寫書信勸勉in、鼓勵in。

關於提多chit-ê人
提多，是使徒保羅teh傳道工作上，有兩位hō͘伊當做「信仰上ê真kiáⁿ兒」（參考提多書一：4）中ê一位，另外一位是提摩太。

非常特別ê是，提多雖然被使徒保羅看做是「信仰上ê真kiáⁿ兒」，ē-sái講是tī使徒行傳ê作者路加筆下卻從來m̄-bat提起伊，反卻是tī哥林多後書中有九pái提起伊（參考哥林多後書二：13、七：6、13、14、15、八：6、16、23、十二：18），另外四pái分別tī加拉太書第二章1 kah 3節、提摩太後書第四章10節，以及提多書第一章4節。

雖然án-ne，tī chit有限ê資料中，mā thang chhōe-tio̍h一kóa有關伊ê背景；伊是希臘人，因為án-ne，無受過割禮（參考加拉太書二：3）。主後49年tī耶路撒冷召開第一pái「使徒會議」ê時，使徒保羅除了帶巴拿巴前往外，mā同時帶提多同齊去參加（參考加拉太書二：1），可見使徒保羅對伊tī信仰底子ê認知上非常肯定，thang成做使徒保羅tī使徒會議中siōng好ê見證者。當使徒保羅第三pái旅行傳道ê時，bat有兩pái特別差派提多到哥林多去處理該教會ê問題，第一pái是為tio̍h beh平息該教會ê紛爭，果然不負使徒保羅ê寄望，伊順利完成受託ê任務，hō͘使徒保羅非常安慰（參考哥林多後書七：6）。另一pái是為tio̍h募款捐助耶路撒冷教會貧困ê兄姊，使徒保羅mā是派提多去哥林多教會協助完成chit項事工（參考哥林多後書八：6、16）。

後來，使徒保羅koh派提多去克里特島處理「設立長老」ê事務（參考提多書一：5），後來koh ài伊趕往尼哥坡里去kah使徒保羅會面（參考提多書三：12）。Tùi提摩太後書第四章10節ē-tàng看出，使徒保羅第二pái tī羅馬監獄服刑ê時，提多並無tī使徒保羅ê身邊，卻是到撻馬太（今á日ê南斯拉夫）。不過並無詳細資料顯示hit-pái行程是m̄是mā是受使徒保羅差派前往ê。

為甚麼寫chit封書信
根據提多書第三章13節ê記載，使徒保羅寫chit封書信是beh提多協助律師西納kah亞波羅順利進行前往克里特島教會ê事工。該島是地中海ê第四大島，島民ê道德生活水準低，詐欺、貪婪，而且pîn-tōaⁿ（參考提多書一：12—13），thang想像會到當年使徒保羅kā福音傳到該島ê時chūn，必定造成信徒tī信仰生活上有真大ê掙扎，á是心內ê鬥爭。後來使徒保羅派提多Tī該教會牧會，主要就是teh堅固信徒ê信仰生活，而且希望透過信徒建立良好ê生活模樣，影響該島居民ê生活品德。

M̄-koh ná親像tī哥林多教會仝款，環境對信徒ê影響lóng是真大，除非有非常堅定ê信心，若無，m̄-nā無好見證，koh khah pháiⁿ ê是會影響tio̍h教會chit-ê信仰團契應該有ê「聖潔生活」（參考提多書一：10—11）。使徒保羅寫chit封書信ê主要目的，mā是為tio̍h beh鼓勵「tī信仰上ê真kiáⁿ兒」提多，伊知影提多tī hia ê牧會工作必定無容易，m̄-koh卻無希望提多會因牧養工作ê艱困而kiu-kiu á是怠惰起來。Ná親像伊勉勵提摩太仝款ê，使徒保羅mā是期待提多「不beh hō͘人看輕」伊（參考提多書二：15，對照提摩太前書四：12）。

雖然是寫hō͘提多ê書信，而且時代kah背景mā kah今á日ê世代相差非常大，m̄-koh有一點是仝款ê，就是當時ê人性墮落並對福音反應冷漠。這兩千年來，福音無論傳到甚麼所在，所tú-tio̍h ê情況kah-ná都無甚麼非常大ê差別。Mā因為án-ne，包括提摩太前後書、提多書，lóng是hō͘傳道者真好ê教材。

Thang分做下列幾個段落
第一章1到4節：請安ê話。
第一章5到16節：設立克里特教會長老，以及對付假教師。
第二章1到15節：真實ê信仰內涵。
第三章1到11節：信仰kah生活ê關係。
第三章12到15節：結語。