認bat 撒迦利亞書chit本經冊

「撒迦利亞」chit-ê名tī猶太人社會中是真普遍ê，chit-ê名字ê意思是：「耶和華會記得。」單tī舊約聖經中就有廿九個人kah此同名。伊kah先知哈該是仝一個時chūn hō͘上帝呼召出來傳達信息。Tī尼希米書第十二章12到21節中，提供一個重要資料，就是先知撒迦利亞可能來自祭司ê家族，而且伊具有「祭司宗族ê族長」身分，所以伊既是先知mā是祭司。伊雖然kah先知哈該tī仝一個時期受呼召傳達上帝ê信息，m̄-koh照哈該書ê記載，先知哈該工作ê時間kan-taⁿ有四個月而已（參考哈該書一：1、二：20），thang講非常短促。Á先知撒迦利亞傳講信息ê時間則長真chē，照撒迦利亞書第一章1節ê記載，伊是tī「大流士做波斯皇帝ê第二年八月」開始出來傳上帝ê信息，這是主前520年。然後tùi第七章1節記載「大流士做皇帝ê第四年九月」ê chit句話來看，這是主前518年，án-ne就已經有兩年時間。M̄-koh若是koh加上第九到十四章預言ê經文背景來看，真可能是tī主前480年以後ê作品，án-ne，tùi開始工作到講預言結束，時間必定koh khah長，這mā是為甚麼有bē少學者質疑地第九到十四章mā是伊ê作品ê原因。M̄-koh有一種講法是：chit本經冊既然是用伊ê名，真可能就是伊家己所寫ê。

Chit本經冊ê主要信息
Ná親像先知哈該對重建聖殿ê貢獻仝款，先知撒迦利亞tī chit方面ê貢獻mā是有目共睹。M̄-koh有一點非常重要ê，就是伊提醒以色列人民m̄-thang koh再犯祖先過去所做ê錯事：拒絕聽從上帝ê話（參考撒迦利亞書一：2—6）。伊警告回鄉重建家園ê以色列人民，一定tio̍h聽從上帝ê話，而且tio̍h對上帝有絕對ê信心。

Koh講，tī伊ê信息中一再強調悔改、認罪比甚麼lóng重要，因為只有án-ne，chiah ē-tàng hō͘ in teh過敬虔、誠實ê信仰生活。Tī伊所傳出ê信息中，伊認為這是遠比任何形式ê宗教禮儀koh khah重要（參考七：5—6、9—10）。所以伊hō͘以色列人民知影一項重要ê使命：重建後ê耶路撒冷城kah聖殿，m̄-nā會是世界各地人民學習信仰生活典範ê中心，koh khah是敬拜上帝ê所在（參考八：20—23、十四：16—19）。伊用chit種高超ê理想來鼓勵以色列人民一定會完成建造聖殿ê工作。

Chit本經冊ê特色
讀撒迦利亞書，真容易看tio̍h冊內有真chiok厚ê「彌賽亞」to̍h是將來臨之感覺；親像：

1.第九章9節：「錫安ê居民，tio̍h歡喜緊樂！耶路撒冷ê人民，tio̍h歡呼！看，lín ê君王來à！伊得勝，凱旋而來，卻謙虛地騎tio̍h一匹驢á—騎tio̍h一匹驢á-kiáⁿ。」chit種信息被新約福音書ê作者所引用，當耶穌基督kah門徒進入耶路撒冷城ê時，就是騎tio̍h驢á進入城ê，hit時全城ê人lóng ná親像teh迎接凱旋歸來ê君王仝款（參考馬可福音十一：6—10）。

2.第十一章12節：「我對in講：『如果lín願意，請kā工資hō͘我，無願意，就留tio̍h。』就án-ne in付hō͘我三十塊銀á做工資。」對讀過福音書ê人來講，chit段經文是一點mā不生份，「三十塊銀á」kah猶大出出賣耶穌基督ê價碼完全仝款。先知撒迦利亞傳出ê信息已經teh說明，真tú好ê顧羊人一再被拒絕，伊看顧羊群無幾工就被用三十塊銀á hō͘解雇了，先知撒迦利亞用「廢除」了約（參考十一：11），來形容以色列人民拒絕上帝ê救恩，這ná親像好牧者耶穌基督被棄絕仝款。

3.第十一章先知撒迦利亞用兩個顧羊人來形容上帝忠實ê奴僕，kah惡質ê奴僕之間ê差別；chit種譬喻真像先知以西結tī伊ê作品第三十四章中所傳出ê信息，mā ná親像約翰福音第十章，耶穌基督用「我是好ê牧者」chit種詞句來譬喻伊家己仝款。仝款ê，耶穌基督mā提起了pháiⁿ牧者ê樣式（參考約翰福音十：12—13）。

另外一方面，撒迦利亞chit本經冊mā有真chiok厚ê末日來臨、上帝審判ê日子信息，ná親像其他ê先知文獻仝款。先知撒迦利亞一再用「時chūn緊到」、「tī hit工」、「日子緊到à」等chit種詞句（參考撒迦利亞書八：20、23、九：16、十二：3、4、6、8、9、11十三：1、2、4十四：1、4、6、8、13、20、21），說明上帝ê審判to̍h是將來到，而且是一定會來到。Á chit種日子來到ê時，m̄-nā是teh說明上帝ê審判會出現，祂ê審判m̄-nā是對背叛祂旨意ê人，同時mā會對堅守上帝旨意ê子民進行拯救ê工作。

Ná親像先知以西結、但以理仝款，先知撒迦利亞mā不時看tio̍h「異象」，tùi第一章7節起，一直到第六章8節止，總共出現八個「異象」，比較khah特別ê所在是：tī chiah-ê「異象」了後，lóng有天使解說chiah-ê異象hō͘先知撒迦利亞明白。Á值得注意ê是：chiah-ê異象lóng有一個特色，就是上帝beh親自帶領以色列人民重建耶路撒冷城kah聖殿，並且祂behkhia7起tī耶路撒冷城，表示祂behkah以色列人民同在（參考二：10、11）。Mā因為有上帝khiā起tī chia，所以耶路撒冷城kā成做繁榮、穩定（參考一：17、八：3—5）、thang安居樂業ê城市（參考十四：11）。

引起議論ê經文部分
Chit本經冊一再引起爭議ê所在，ná親像頭前提起過ê，有kóa聖經學者認為第一到八章是出自先知撒迦利亞ê作品，m̄-koh第九到十四章則另外一個作者所寫ê。而且這部分被編輯編列tī chia，hō͘人讀起來感覺並m̄是真順。原因是第一部分lóng是談及耶路撒冷城kah聖殿重建ê事，後頭則只有tī第十四章20節談起耶路撒冷聖殿，其餘lóng是談及有關密帝ê審判，以及祂忠心奴僕ê問題。

第一到八章真清楚講出一個明確ê歷史年代，就是tī省長所羅巴伯治理之下，聖殿重建ê時期。所以thang真清楚知影先知撒迦利亞ê時代kah先知哈該、以斯拉、尼希米等chiah-ê帶領以色列人民回鄉重建hit-ê城kah聖殿，以及回鄉後重建信仰根基，以及社會生活之秩序有密切關係。
Koh講，第一到八章大部分lóng以散文體寫做，這kah第九到十四章是用詩歌ê文體真無仝款。而且第九章到十四章並無像前段經文所呈現出來ê歷史背景之資料，真oh確定作品出現ê年代。不過mā有少數ê聖經學者不án-ne認為，in iáu-koh主張kui本撒迦利亞書lóng是仝一個作者所寫ê作品。

Thang分做下列幾個段落
1.第一章1節，紹介先知撒迦利亞。
2.第一章2到6節，勸勉以色列人民tio̍h悔改。
3.第一章7節到第六章15節，有關八個異象ê內容。
4.第七章到第八章，有關禁食問題以及未來ê應允。
5.第九章1節到第十一章3節，論到以色列人民kah外邦人之間ê關係。
6.第十一章4到17節、第十三章7到9節，有關以色列人民內部紛爭ê問題。
7.第十二章1節到第十三6節、第十四章，論到耶路撒冷kā成做世界ê中心。