認bat 西番雅書chit本經冊
Tī所有小先知ê文獻作品中，西番雅書ē-sái講是紹介先知之身世背景siōng-kài清楚ê一本經冊。Mā因為有紹介伊ê背景，就thang koh khah清楚知影伊ê信息內容，kah傳講信息ê用意。

先知西番雅ê身世背景
Tùi第一章1節開始，就詳細地紹介先知西番雅ê身世背景，而且siōng特別ê所在，就是用族譜ê方式紹介出來。所以tùi chit份族譜thang看tio̍h先知西番雅ê家世真可能有王族kiáⁿ孫ê關係，因為tī第一章1節提起伊是「希西家王ê玄孫」。伊是所有先知中間唯一具有王族背景ê先知。

Mā因為有chit種王族背景，所以伊mā可能大多數ê時間lóng是khiā起tī首都耶路撒冷，並且對hit-ê城ê地理環境非常熟悉。親像伊bat提起耶路撒冷ê「魚門」（參考一：10），tī第一章11節原本有「瑪革提施」chit-ê地ê名（這是中文《和合本》ê譯文，tī《現代中文譯本》是用「下城」），這是teh指設tī耶路撒冷城內ê一個「外商地區」，專門提供給外來貿易商人khiā起ê特區。因為伊具有王室族裔ê身分，可能因為án-ne hō͘伊比其他先知有koh khah chē ê「特權」，thang隨意進入王室內部去傳達上帝ê信息，chit點thang tùi伊傳講ê信息中看會出看出（參考三：1—5）。

Mā是tùi第一章1節ê資料，thang看tio̍h先知西番雅是tī約西亞做猶大王ê時代出來傳達上帝ê信息。約西亞是tī主前641年到609年做猶大王。Án-ne，thang清楚知影先知西番雅kah耶利米、那鴻、哈巴谷等先知lóng是同時代teh傳講上帝ê信息。只是hō͘咱感覺gông-gia̍h ê是：當猶大國仝一個ê時期中有chiah-ni̍h chē先知出現傳揚上帝ê信息，卻無法度挽tńg來滅亡ê運命，這到底是怎樣一回事？kám講真正是人心已經墮落到無thang挽tńg來ê地步了？mā可能pah，因為人心墮落ê非常厲害，chiah會致使先知ê話一再被疏忽。這問題ná親像先知耶利米問上帝講：「啥人是智慧ê 人thang 明白chit-ê奧秘？上主 ê 嘴對啥人講 thang hō͘ 伊傳報？ Chit-ê 地ná 會毀滅，燒毀kah ná 親像曠野，甚至無人tùi hia 經過？(全民版)」（耶利米書九：12）上帝ê回答是án-ne子ê：「因為in 棄sak 我tī inê 面前所設ê 律法，無聽我ê 話，mā 無照án-ne 行；獨獨照in ê 硬心來行，koh 遵thàn chiah-ê 巴力， 就是in ê 祖先所教示ê(全民版)」（耶利米書九：13—14）

照列王記下第廿三章26節、第廿四章3節等等ê記載，當約西亞王極力推動改革人民ê信仰態度，hō͘伊tńg來歸上帝，m̄-koh伊ê後代並無繼續kā約西亞王所推動ê改正信仰態度持守落去，卻是去學習祖先瑪拿西王邪惡ê行為，結果上帝因為瑪拿西王所犯ê罪，特別是伊tī耶路撒冷流了真chē無辜ê ê血，所帶來ê罪惡，hō͘上帝ê忿怒一直無法度消除，m̄肯赦免猶大人民。
Tī先知耶利米ê信息中就真清楚指出，當時以色列人民koh khah害ê是只歡喜聽「假先知」ê話語（參考耶利米書十四：14），對上帝差派ê奴僕傳出ê信息根本就免chhap（參考耶利米書七：25、廿五：4、廿六：4、廿九：19、三十五：15）。不聽從上帝ê話，kan-taⁿ想beh聽從假先知虛偽、好聽ê諂媚之言，chit種國家、社kám bē滅亡、瓦解，he chiah是奇怪。猶大國會hō͘巴比倫帝國滅亡，其實就是因為in拒絕聽從上帝ê話語，雖然tī同一時代出現chit幾位先知，結果á是仝款無法度挽tńg來繼續頹廢ê猶大國勢，終其尾致使滅亡ê運命。

Chit本經冊ê信息
先知西番雅siōng主要ê信息之一，就是提起「上帝ê日子」。Chit種以「上帝ê日子」做主題ê信息，在先知運動中ē-sái講是非常重要ê信息。親像先知以賽亞、耶利米、以西結、阿摩司、約珥等，mā lóng是用chit-ê主題傳達上帝ê信息。Á先知阿摩司ē-sái講是tāi先提出「上帝ê日子」chit種信息ê先知，m̄-koh伊特別提醒以色列人民注意，當「上帝ê日子」來臨時，mā是用色列人民siōng悲慘ê日子來到，因為這日子是審判，無人ē-tàng隱藏所犯ê罪惡，而且就算想beh bih起來mā chhōe bē-tio̍h thang隱藏ê所在（參考阿摩司書五：18—20）。

所講「上帝ê日子」，這是teh指審判ê時刻。Tio̍h注意ê是：這審判m̄-nā是對外國人，mā是對以色列人民。先知西番雅用「tī hit一工」、「上主ê大日子」、「時chūn快到」等類似ê句話（參考西番雅書一：9、10、14、18、二：3、三：16、19、20）。伊講這「日子」ê來臨，mā ē-sái講是上帝「忿怒」ê時刻（參考一：15、18、二：3），m̄-koh mā可能是上帝憐憫ê日子，thang hō͘以色列人民得tio̍h「逃脫懲罰」ê機會（參考二：3）。所以伊呼籲以色列人民tio̍h趕緊把握機會，tī上主ê大日子來臨chìn前，趕緊悔改歸向上帝（參考二：1—2）。

Koh講，先知西番雅chit本經冊ê另外一個主題，thang清楚看tio̍h上帝siōng無法度容忍ê事，是人ê驕傲。對chit種人，上帝是絕對bē闊待ê（參考一：12、二：8—10、15、三：2、11）。Á chia所指驕傲ê人，當然mā包括以色列人民在內。驕傲表現出來意念，就是心中根本m̄相信有上帝（參考詩篇十四：1），而行為上表現出來ê態度就是真會欺負貧困，欺壓卑微ê人民，chit種行為模式在先知阿摩司ê信息中，俯拾to̍h是（參考阿摩司書二：6—8、三：10—11、四：1、五：10—13、六：4—3、八：4—6）。Á tī西番雅書中mā描述得非常清楚。換句話講，就是因為人ê心中根本無上帝之信念，chiah敢án-ne囂張地犯罪，kā公義ê上帝要求祂ê子民應該維持社會秩序ê準則踐踏殆盡。

Kah先知耶利米等先知ê觀點仝款ê，是先知西番雅嚴厲譴責當時ê以色列人民，竟然棄sak上帝ê教示，去拜偶像神明，kā in kah上帝之間所立ê約hō͘ bē記得，chit點chiah是上帝所無法度忍受ê事（參考一：4—6、8）。

除了譴責當時以色列人民棄sak上帝去拜偶像之外，先知西番雅mā像其他先知仝款，會講tio̍h將來ê ǹg望—上帝ê拯救（參考三：14—20）。

受tio̍h爭議ê一首詩歌
西番雅書siōng受爭議ê一段經文，thang講第三章14到20節。Chit首詩歌一直hō͘人認為是後來編輯者附加上去ê，並m̄是本來舊ê作品。理由有兩點：

一是該首詩歌第19到20節，應該是tī猶大滅亡了後ê事。因為tī第19節提起「hō͘流亡ê人tńg去家園」，第20節soah講「ài kā lín分散ê人民帶tńg來」，chit種詩句lóng說明了是亡國了後，傳hō͘ hiah-ê tī奴隸生活中受苦ê人民ê鼓勵kah安慰之信息。若是án-ne，就kah約西亞王ê時代不相符。因為約西亞是tī主前641年到609年做猶大王，而猶大是tī主前586年被巴比倫帝國滅亡，猶大ê以色列人民被掠到巴比倫去做奴隸，有ê逃離家園四散到各地去，而過去被亞述俘虜ê以色列人民，就án-ne被巴比倫統治管轄。換句話講，chit首詩歌ê背景應該是tī以色列人民被掠到巴比倫了後寫出來ê，kah西番雅出來傳講信息ê時代至少相隔長到四十年ê時間。

二是chit首ǹg望、快樂ê詩歌，差不多kah頭前先知ê信息完全顛倒，內容不搭調。因為先知西番雅tī前面所傳出ê上帝信息，lóng是kah以色列人民犯罪引起上帝ê忿怒有關。伊呼籲以色列人民一定會悔改、歸向上帝，án-nechiah ē-tàng逃脫上帝ê懲罰。Chit種信息kah歡樂ê詩歌實在是配bē起來。

雖然有頂面所講chit種問題，m̄-koh mā有聖經學者認為kā chit首詩歌編輯tī尾溜，tú好補足了本來所欠缺ê先知文獻之特色，就是帶hō͘上帝選民ǹg望、拯救，以及上帝慈愛ê赦免，以及憐憫ê信息，而chit種信息在先知運動中是非常重要ê。

Thang分做下列幾個段落
1.第一章1節，紹介先知西番雅ê背景。
2.第一章2到18節，上帝審判ê日子。
3.第二章1到3節，呼籲以色列人民tio̍h悔改、認罪。
4.第二章4到15節、第三章6到8節，上帝beh審判列國。
5.第三章1到5節，上帝審判耶路撒冷。
6.第三章9到20節，上帝救贖ê恩典。